Yeremi-aq 22
22
Agè Ashop É Hkóhkam Pé Lé Târâ Jéyáng Râ Hkyô
1Haû Yhûmsîng Garai shî su ga taî ri; “Nàng gi, Yudaq hkóhkam é wâng má gyó ê mù, shî su nghû dang ê taí aq; 2‘Hkóhkâm Dawiq é tángmyhâng má zung é, Yudaq hkóhkâm ê, nàng le, náng é zaugun wuì le, hkum shí pé mai laî wang é, náng é shiwa byu pé le, haû Yhûmsîng Garaî é dang lé gyo keq. 3Haû Yhûmsîng Garai taî le, “Târâ ràp-rá hkyô eq díngmán hkyô kut keq. Lú zo lú shuq é hui sû lé, zìk zo zìk shuq su chyáng mai hkyi xe yù keq. Gó-mîng byu pé lé le, chuimó chuízô pé lé le, a ge é hkyô nghut nghut, lú lhum bàt zìk é hkyô nghut nghut hkâkut kó; mara a bo é sui lé shí jowò má hkâ lhoqhtoq kó. 4Hkunmó shí pé lé núngmòq rago châng é nghut jáng, hkóhkâm Dawiq é tángmyhâng má zung é hkóhkam pé gi, hkóhkâm wâng shi é hkum pé mai wó wâng kôrâ nghut lhê; yhángmòq le, yhángmòq é zaugun wuì le, yhángmòq é shiwa byu pé le, gyèlhêng eq myang ji mù wó wâng kôrâ nghut lhê. 5Nghut kôlhang, núngmòq gi, hkunmó shí pé lé a châng é nghut jáng, hkóhkâm wâng shî gi, htên byòq byùq râ nghut lhê nghû, Ngò, Ngá myîng lang luî dâkam lhê ga haû Yhûmsîng Garai taî pyo ri.” gâ ri.’ nghû àq.” gâ ri.
6Hkâsu mù gâ le, Yudaq hkóhkâm wâng eq séng luî, haû Yhûmsîng Garai shî su ga taî ri;
“Nàng gi, Ngá é matú, Gile-at mau su le,
Lebanon bùm nyuq su le nghut nyî kôlhang,
Ngò gi, gè gè yhang, nang lé,
tô sâ tô é maumyî su le,
byù a nyi é wà pé su le kut pyám râ nghut lhê.
7Ngò gi, nang lé lhoqhtûm pyám râ matú,
yhûmsing lòq má shâm lhâm chung é gye pé lé nhang kat râ nghut mù,
yhángmòq gi, náng é je réng é kyám zîng pé lé zân hpyit pyám mù,
myi má dú kat pyám kôrâ nghut lhê.
8Byù myû myo myo mâ é byu pé gi, wà shî mai laî ló kôluî, ‘Haû Yhûmsîng Garai gi, wà mó godeng shî lé haî mù shî su kut pyâm lhê lhâ?’ ga rayùq eq rayùq myî lhûm bùm kôrâ nghut lhê. 9Haú hkûn, ‘Yhángmòq gi, yhángmòq é Garai Gasang nghut é, haû Yhûmsîng Garaî é dangshikaq lé tô pyám kômù, gótû hparà hpôlhô pé lé noqkuq dójaú kô é yánmai nghut ri.’ ga tû taí kôrâ nghut lhê.” gâ ri.
10Shi byùq bê hkóhkâm eq yhang lé sûm pyâm é matú iyon hkâyon kó;
shúm zûng huí su é matú kúm gyai yhang ngaù keq;
haî mù gâ le, yhang gi, hkâ-nhám le dum taû lò râ a nghut mù,
yhâng é choq hpyit mau lé dum myàng râ a nghut lo nghut ri.
11Hkâsu mù gâ le, Yudaq hkóhkâm dông yhâng wa Yosi-a é hkô má zùng luî, shí mau mai shuî htoq ló byùq huî é, hkóhkâm Yosi-a é yhang zo Shalum eq séng luî, haû Yhûmsîng Garai shî su ga taî ri, “Yhang gi, hkâ-nhám le dum taû lò râ a nghut lo. 12Yhang gi, yhang lé shúm dông shuî ló byùq é jowò má shi byùq râ nghut mù, shí mau lé dum myàng râ a nghut lo.” gâ ri.
13“Yhûmsing é yhûm mó lé a díngmán é dông,
yhûmsing é ahtoq pyâm wàp pé lé târâ ràp-rá hkyô a châng é za saí mù,
yhûmsing é byu pé lé akôm má mú zui nhâng luî,
zuihpau a byî é sû gi, dingnyé wó ri.
14Yhang gi, ‘Ngò yhang, ngá é matú, ahtoq pyâm má lam é wàp pé bo é,
yhûm mó saí râ nghut lhê.’ ga taî ri.
Haû mù, yhang gi, hkohot mó pé htong luî,
kyám sik lông èq wàm mù, chi nê bùt tô ri.
15Nàng gi, kyám sik myo myo wó luî,
hkóhkâm dùt é nghut lhê lhú?
Náng wa gi, zoshuq wó lhê a nghut lhí?
Yhang gi, wó nyì ngón yùqyo nyì sháng gàq ga,
jo âng é eq târâ ràp-rá é dông kut bê nghut ri.
16Yhang gi, myùng bang eq asho awui dùt bâng é mú lé bo hûng byî é nghut mù,
nyì ngón yùqyo é nghut ri.
Haû gi, Ngo lé sê é hkyô nghut lhê, a nghut lhú?” ga,
haû Yhûmsîng Garai taî pyo ri.
17Hau htoq agó, “Náng é myòqjí eq náng é i-myìt gi,
myòqnòq é hkyô, mara a bò su é sui lhoqshun é hkyô,
zìk zo zìk shuq é hkyô eq lú lhum bàt zìk é hkyô lé za ho nyi ri.” ga le taî pyo ri.
18Haû mù, Yudaq hkóhkâm Yosi-a é yhang zo Yehoi-akim eq séng luî,
haû Yhûmsîng Garai shî su ga taî ri;
“Yhángmòq gi, ‘Goì yô! Ngá gu-mang ê! Ngá gu-nhá ê!’ ga,
yhâng é matú iyon yon kôrâ a nghut;
yhángmòq gi, ‘Goì yô! Ngá é yhûmsîng ê! Yhâng é hpungwup ê!’ ga,
yhâng é matú iyon yon kôrâ a nghut.
19Yhang gi, Yerusalem wà hkum shinggan shut she hkyut dú pyâm é hui mù,
loze lé myhup pyâm é su, myhup pyâm é hui râ nghut lhê.
20Yerusalem wà byù ê, Lebanon bùm má dòq ê mù, ê wùt ngaù aq;
Bashan mau má wó gyo shoq náng é htê lé lhoqmyhâng aq;
Abarim mau mai wùt ngaù aq;
hkâsu mù gâ le, náng é buìnùm ji-myi wuì bànshoq htûm byùq bê nghut ri.
21Ngò gi, nàng nyì ngón yùqyo é hkûn, nang lé sidìq byî é nghut lhê;
nghut kôlhang, nàng gi, ‘Ngò gyo râ a nghut!’ ga taî ri.
Nàng, Ngá é jì-no a gyo kut é gi,
náng é zorâm hkûn mai yhang nghut bê nghut ri.
22Náng é sau zúng bang bànshoq gi, lai èq mùt tâng ló hpyuq é hui râ nghut lhê;
náng é buìnùm wuì gi, shúm zung é hui kôrâ nghut lhê.
Haú hkûn, náng é agè ashop hkyô bànshoq é yánmai,
nàng gi, hoq hpû é eq gùng-yuì mó hui zo râ nghut lhê.
23Kyám gâm má sut saî é,
Lebanon bùm má nyì sû ê,
nàng gi, zo hkû nò no é myiwe myhí su,
nàng no hpû é hkûn, hkâ-í yhang asho awui dùt râ nghut ri nhung!
24Ngò rû dui nyì nyì, Yudaq hkóhkâm Yehoi-akim é yhang zo Yehoi-ahkin gi, Ngá é lòqyo lòq mâ é lòqtsung dizìk nghut nyî kôlhang, Ngò gi, nang lé lâng hpik htoq pyám râ nghut lhê.” ga le taî ri; haû gi, Yhûmsîng Garai taî pyo ri. 25Hau htoq agó, “Ngò gi, nang lé sat râ ga náng é chyungxe gyám bang nghut é, nàng gyùq nyi é Babelon hkóhkâm Nebuhkatneza eq Babelon byu pê é lòq má nang lé àp byî pyám râ nghut lhê. 26Ngò gi, nàng eq nang lé hku é náng nu lé, núngmê é choq hpyit mau a nghut é, gó-mau má hkat hâng kat râ nghut mù, núngme gi, haú mau má shi byùq kôrâ nghut lhê. 27Núngme gi, núngme taû lò nau nyi é mau má hkâ-nhám le myang taû lò kôrâ a nghut.” ga le taî pyo ri.
28Byù shí yùq gi, wú tiq pyám mù, lhoqhkoq pyám luî,
ó yùq le a ô nau é au su nghut é,
Yehoi-ahkin nghut lhê, a nghut lhú?
Haî mù luî, yhang le, yhâng é zodù wuì le,
yhángmòq a sê é mau má hkat hâng pyâm é hui râ lhú?
29Maumyî ê, maumyî ê, maumyî ê,
haû Yhûmsîng Garaî é dang lé gyo aq!
30Haû Yhûmsîng Garai taî le,
“Byù shí yùq lé, zodù a dàp sû,
yhâng é i-pyàt má a kô myhâng râ sû nghû kâ to keq;
hkâsu mù gâ le, yhâng é a-myû hkûngxoq pé gi, kô myhâng râ a nghut é htoq agó,
Dawiq é hkóhkâm tángmyhâng má zùng mù,
Yudaq byu pé lé ùp râ byù le, nyì râ a nghut lo.” gâ ri.
Currently Selected:
Yeremi-aq 22: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.