Yeremi-aq 23
23
Htângnùng Lhê É Myìt Myòqbyù Hkyô
1“Ngá é mhan nú yô mâ é sau pé lé lhoqhten lhoqpyo pyâm é sau zúng bang gi, dingnyé wó ri.” ga haû Yhûmsîng Garai taî pyo ri. 2Haû mù, Isira-elaq é Garai Gasang, haû Yhûmsîng Garai gi, Ngá é byu pé lé wú zúng é sau zúng bang lé shî su ga taî ri; “Núngmòq gi, Ngá é sau pé lé a wú gon kô é za, lhoqpyo kat mù, hkat htoq pyám bekô nghut é yánmai, Ngò gi, núngmòq kut é agè ashop hkyô hau é matú, núngmòq lé mara dam byi râ nghut lhê.” gâ ri; haû gi, Yhûmsîng Garai taî pyo ri. 3“Ngò gi, yhángmòq lé hkat pyo hâng kat é mîngdán bànshoq má nyi myìt gyó tô é Ngá é sau pé lé shuî tsîng yù mù, yhángmòq é mhan nú yô má shuî taû lò râ nghut lhê; haú má, yhángmòq myoluq jebe lò mù, byù du myô jàt lò kôrâ nghut lhê. 4Ngò gi, yhángmòq chyáng, yhángmòq lé wú zúng râ sau zúng bang nyhi to byi râ nghut mù, yhángmòq gi, gyùq dàn gyùq chiq kôrâ le a nghut lô é htoq agó, rayùq le a byùq lo kôrâ nghut lhê.” ga haû Yhûmsîng Garai taî ri.
5Haû Yhûmsîng Garai shî su ga taî pyo ri;
“Wú keq; Dawiq é matú,
Ngò, díngmán é hkûngxoq akoq rakoq yùq htoq nhang é buìnyì jé râ nghut lhê;
yhang gi, hkóhkâm dông hpàqchyî bo é èq ùp luî,
mîngdán má târâ ràp-rá hkyô eq díngmán hkyô kut râ nghut lhê.
6Yhâng é i-pyàt má, Yudaq gi, hkyi xe yu é hui luî,
Isira-elaq gi, ngón za myang nyì râ nghut lhê;
yhâng é myìng lé gi, ‘Ngá-mòq é Díngmán é Hkyi yù Sû Yhûmsîng Garai,’
ga wùt kôrâ nghut lhê.” gâ ri.
7-8Hau htoq agó, haû Yhûmsîng Garai taî pyo é gi, “Haû mù, ‘Isira-elaq byu pé lé Egutuq ming mai shuî htoq lo é Sû, haû Yhûmsîng Garai rû dui nyì nyì.’ ga byu pé a taí lo kô é za, ‘Isira-elaq é awùt ashîn pé lé, mautsûng mau mai le, Yhang hkat htoq pyâm é byu pê é mîngdán bànshoq mai le, shuî htoq lo é Sû, haû Yhûmsîng Garai rû dui nyì nyì.’ gâ é buìnyì jé râ nghut lhê. Haú hkûn, yhángmòq gi, yhûmsing é mau má myàng nyì kôrâ nghut lhê.” gâ ri.
Myìqhtoi Mhaû Pê É Hkyô
9Myìqhtoî pé eq sêng é hkyô lé shî su ga taî ri;
ngá é i-myìt nhiklhum gi, ngá é ahkaû má gyòp byùq mù,
ngá é showui showang bànshoq gi, gyùq nán byùq bê nghut ri.
Haû Yhûmsîng Garaî é yánmai le,
Yhâng é chyoiyúng dang pê é yánmai le,
ngò gi, î shuq wùt sû eq
tsibyiq wîng é yánmai gùng a ûng lô é wàqngân hpó eq du ri.
10Ra-mau gón gi, su-myi sulàng lú é bang chyat byíng zan tô ri;
nhing myíng nhing hte é yánmai, maumyî gi, yón ngau nyì mù,
yòso mâ é mhan nú yô pé gi, nyhuî kyuq byùq bê nghut ri.
Myìqhtoî pé gi, agè ashop hkyô châng nyì kô é nghut mù,
yhángmòq é wum-o a-tsam lé a târa é dông chung jai akô nghut ri.
11“Myìqhtoi le, hkyangjong le, agòt a-û dùt bê nghut ri;
Ngá é noqkuq yhûm má lháng, yhángmòq é agè ashop hkyô lé myang ri.” ga,
haû Yhûmsîng Garai taî pyo ri.
12“Haû mù, yhángmòq é hkyô gi, hkyô chyut byùq râ nghut mù,
yhángmòq gi, mauchut hkaû má chyûn hâng kat é hui kôrâ nghut luî,
haú má yhángmòq lèqbàt kôrâ nghut lhê.
Ngò gi, yhángmòq lé mara dam byi râ nghut é zànwut má,
yhángmòq chyáng byò dàn byò sho hkyô jé nhâng râ nghut lhê.” ga,
haû Yhûmsîng Garai taî pyo ri.
13“Samariq mau mâ é myìqhtoî pê chyáng,
a htuk é hkyô lé Ngò myang ri;
yhángmòq gi, Balaq hpara é myìng lang luî myìqhtoi htoi kômù,
Ngá é Isira-elaq byu pé lé hkyô-nghoq shuî nghoq bum akô nghut ri.
14Yerusalem wà mó mâ é myìqhtoî pê chyáng le,
gyùq chiq nhô zâ é hkyô lé Ngò myang ri;
yhángmòq gi, su-myi sulàng lú é mara kut shut kômù,
mhaû é dông chyungxe dui akô nghut ri.
Yhángmòq gi, yhángmòq é agè ashop hkyô mai,
ó yùq le a lhing taû ló byùq sháng gàq ga,
agè ashop hkyô kut bâng é lòq lé wum-o lhoqkíng byî akô nghut ri.
Yhángmòq bànshoq bang gi, Ngá é matú Sodom wà eq du akô;
Yerusalem wà mó mâ é byu pé gi, Gomora wà eq du akô nghut ri.” ga le taî pyo ri.
15Haû mù, myìqhtoî pé eq séng luî, haû Wum-o a-tsam dìk shoq bò Sû Yhûmsîng Garai shî su ga taî ri;
“Ngò gi, yhángmòq lé hkô é zoshuq zo nhâng mù,
dùq bo é ûchyam shuq nhâng râ nghut lhê;
haî mù gâ le, târâ a hkúngga é hkyô gi,
Yerusalem wà mó mâ é myìqhtoî pê chyáng mai,
ra-mau gón jam to bê nghut ri.” gâ ri.
16Haû Wum-o a-tsam dìk shoq bò Sû Yhûmsîng Garai shî su ga taî ri;
“Myìqhtoî pé mai núngmòq lé myìqhtoi htoi byî é dang lé hkâgyo kó;
yhángmòq gi, núngmòq lé dangsôm shèq htoi byî akô nghut ri.
Yhángmòq gi, haû Yhûmsîng Garaî é nhut mai htoq é dang a nghut é za,
yhángmòq é u-nuq mai htoq lo é shing-rán pé lé taî akô nghut ri.
17Yhángmòq gi, Ngo lé wú tiq é bang lé,
‘Haû Yhûmsîng Garai taî le, “Núngmòq nguì ngón râ nghut lhê.” ga taî ri.’ ga taî kyô nyì mù,
yhûmsing é i-myìt htan é hkyô má châng nyi é bang bànshoq lé,
‘Núngmòq haî le a hpuzo kôrâ nghut lhê.’ ga taî akô nghut ri.
18Nghut kôlhang, haû Yhûmsîng Garaî é dang lé wó myâng wó gyo râ matú,
yhángmòq mâ é ó yùq wá Yhang eq hpyê lhûm wú é nghut lhê lhú?
Yhâng é dang lé ó yùq wá wó gyo mù, gyô hâng yù bê nghut lhê lhú?
19Wú keq; haû Yhûmsîng Garaî é nhikmó-yô é mai,
laìdun mó htoq lô râ nghut mù,
laìlhíng mó gi, agè ashop bâng é ulhum htoq má lò râ nghut lhê.
20Haû Yhûmsîng Garaî é nhikjum yo hkyô gi,
Yhâng é i-myìt má htung tô é hkyô a ban kut kut,
zîm byùq râ a nghut.
Haú hkyô lé núngmòq san za sê gyo râ buìnyì,
jé lô râ nghut lhê.
21Myìqhtoi shí bang lé Ngò a nhâng kôlhang,
yhángmòq gi, din wún bekô nghut ri;
yhángmòq lé Ngò dang a nyò kôlhang,
yhángmòq gi, myìqhtoi htoi bekô nghut ri.
22Nghut kôlhang, yhángmòq, Ngò eq hpyê yù kô é ru nghut le gi,
Ngá é byu pé lé Ngá dang taî pyô bekó râ nghut luî,
yhángmòq gi, yhángmòq é agè ashop hkyô mai le,
yhángmòq kut é agè ashop é hkyîzó lòqzó mai le, lhing tau bekô râ nghut lhê.” gâ ri.
23Haû Yhûmsîng Garai shî su ga taî pyo ri;
“Ngò gi, chyâng é má za Garai Gasang nghut mù,
wê é má Garai Gasang a nghut dùt ri lhú?
24Ngò a wó myâng loshoq,
wó haq tô é byù nyi ri lhú?” gâ ri;
haû gi, Yhûmsîng Garai taî pyo ri.
“Ngò gi, Ngá gûng lé mauhkûng eq myigùng má wó lhoqpyîng lhê, a nghut lhú?” ga,
haû Yhûmsîng Garai taî pyo ri.
25“Ngò gi, ‘Ngò yhupmòq myang ri! Ngò yhupmòq myang ri!’ ga Ngá é myìng lang luî, mhaû é myìqhtoi htoî é myìqhtoi dang lé wó gyo bê nghut lhê. 26Haú hkyô gi, mhaû é myìqhtoi htoi bâng é i-myìt má hkâ-myháng jé shoq bo nyì râ lhú? Yhángmòq gi, yhángmòq é i-myìt má cháng luî, myìqhtoi mhaû htoî é bang nghut akô. 27Yhángmòq é îchyí îwâ pé gi, Balaq hparà lé noqkuq kô é yánmai, Ngá é myìng lé tô-myhî pyám kô é su, yhángmòq gi, yhupmòq haú pé lé rayùq eq rayùq taî kyô lhum kôjáng, Ngá é byu pé lé Ngá é myìng wó tô-myhî pyám nhâng kôrâ su ngam akô nghut ri. 28Yhupmòq myang é myìqhtoi gi, yhupmòq hkai sháng gàq; nghut kôlhang, Ngá é dang lé hkam yu to bê sû gi, jujúm myìt mai haú lé taî nyì sháng gàq. Hkâsu mù gâ le, hkówá eq gùq gi, hkâsu wó nyó râ lhú?” ga haû Yhûmsîng Garai taî pyo ri. 29“Ngá é dang gi, myi eq le, lùqgòk lé wó bàt hpyi é bàtdù eq le du lhê, a nghut lhí?” ga haû Yhûmsîng Garai taî pyo ri.
30“Haû mù, rayùq eq rayùq é dang lé hkaû yù mù, Ngá é dang dông taî pyo é myìqhtoî pé lé, Ngò htuqhtíng râ nghut lhê.” ga haû Yhûmsîng Garai taî pyo ri. 31“Haû yhûmsing é shô lé lhû mù, ‘Haû Yhûmsîng Garai taî pyo ri.’ ga taî pyo é myìqhtoî pé lé, Ngò htuqhtíng râ nghut lhê. 32Gè gè yhang, Ngò gi, mhaû é yhupmòq lé myìqhtoi htoî é bang lé, htuqhtíng râ nghut lhê.” ga haû Yhûmsîng Garai taî pyo ri. “Yhángmòq gi, a-kyû a bo é mhaû é dang mai Ngá é byu pé lé haú pé taî kyo mù, yhángmòq lé hkyô shuî nghoq akô nghut ri; nghut kôlhang, Ngò gi, yhángmòq lé a nhang é htoq agó, wò le a hun é nghut lhê. Yhángmòq gi, byù shí bang lé a-kyû ra-tsuí lháng wó byi kôrâ a nghut.” ga haû Yhûmsîng Garai taî pyo ri.
Mhaû É Myìqhtoi Dang
33“Byù shí bang nghut nghut, myìqhtoi nghut nghut, hkyangjong nghut nghut, ‘Haû Yhûmsîng Garaî chyáng mâ é danglù gi, haî nghut ri lhú?’ ga nang lé myi kôjáng, ‘Haí jung danglù? Ngò, núngmòq lé tô pyâm to râ nghut lhê ga haû Yhûmsîng Garai taî pyo ri.’ nghû yhángmòq lé taî kyo aq. 34Myìqhtoi nghut nghut, hkyangjong nghut nghut, rayùq yùq nghut nghut, ‘Shî gi, haû Yhûmsîng Garaî chyáng mâ é danglù nghut lhê.’ ga taí kô é nghut jáng, Ngò gi, yhángmòq lé le, yhángmòq é yhûmbyù wuì lé le, mara dam byi râ nghut lhê. 35Núngmòq yùq hkangmó gi, ‘Haû Yhûmsîng Garai hkâsu ga taî ri lhú?’ nghû le, ‘Haû Yhûmsîng Garai haî taî ri lhú?’ nghû le, núngmòq é buìnùm luzúm wuî eq gu-mang wuì lé xoq taî nyì keq. 36Nghut kôlhang, núngmòq gi, ‘Haû Yhûmsîng Garaî chyáng mâ é danglù nghut lhê.’ nghû ge taí râ a nghut lo. Hkâsu mù gâ le, yùq hkangmó é dang gi, yhûmsing é danglù dùt byùq bekô nghut ri; haû mù, yhángmòq gi, ngá-nhûng é Garai Gasang nghut é, Wum-o a-tsam dìk shoq bò Sû Yhûmsîng Garai, haû rû dui nyi é Garai Gasâng é dang pé lé lhik pyám bekô nghut ri. 37‘Haû Yhûmsîng Garai mai nang lé haî taî ri lhú?’ nghû le, ‘Haû Yhûmsîng Garai haî tû taí bê lhú?’ nghû le, myìqhtoi hpó lé núngmòq wó myi râ nghut lhê. 38Núngmòq gi, ‘Haû Yhûmsîng Garaî chyáng mâ é danglù shî nghut lhê.’ ga taî pyô kôle, haû Yhûmsîng Garai shî su ga taî ri; ‘Haû Yhûmsîng Garaî chyáng mâ é danglù shî nghut lhê.’ nghû, núngmòq ge taí râ a nghut nghû Ngò núngmòq lé taí bê nghut kôlhang, ‘Haû Yhûmsîng Garaî chyáng mâ é danglù shî nghut lhê.’ gâ é dang núngmòq taí bekô nghut ri. 39Haû mù, Ngò gi, núngmòq lé hkyak tô-myhî pyám râ nghut é htoq agó, núngmòq lé le, núngmòq eq núngmòq é îchyí îwâ pé lé Ngò byî é wà shî lé le, Ngá é myòq hí mai dú pyám râ nghut lhê. 40Ngò gi, núngmòq é ahtoq má, ahtum abyùq a ge tô-myhî pyâm é lùmù gànsâng hkyô eq hoq hpu hkyô jé nhâng râ nghut lhê.” ga le taî pyo ri.
Currently Selected:
Yeremi-aq 23: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.