Yeremi-aq 27
27
Nebuhkatneza Lé Yudaq Byu Pé Dójaú Râ Hkyô
1Yudaq hkóhkâm Yosi-a é yhang zo Zedeki-a ùp hi é zànwut má, haû Yhûmsîng Garaî chyáng mâ é dang Yeremi-aq chyáng shî su ga jé ri; 2haû Yhûmsîng Garai mai ngo lé shî su ga taî é gi, “Sho-kuq tui long pé eq pyîyang pé lé kyaú saî yù mù, náng é lìngzing má tuî wùt to aq. 3Haû mù, Yudaq hkóhkâm Zedeki-a chyáng lé jé râ matú, Yerusalem wà mó má lé jé é lagyô pé dông, Edom, Moba, Ammon, Turuq eq Sidon hkóhkam pê chyáng dang kyô kat àq. 4Lagyo haú bang gi, ó le ô é yhûmsing pé lé shî su ga ló taí kó sháng gàq; ‘Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; “Núngmòq é yhûmsîng wuì lé shí hkyô taî kyo keq; 5Ngò gi, Ngá é hpungwup a-tsam mó eq lhâm tô é lòqbú èq, myìdàm htoq lé le, haú má nyi é waxâng zo wuî eq gaunyhaú bànshoq lé hpan to mù, Ngò byí nau é sû ó yùq lé nghut kôle, haú pé lé byî é nghut lhê. 6Ahkuî, Ngò gi, núngmòq é mîngdán shí pé bànshoq lé, Ngá é duìnhâng zoshâng, Babelon hkóhkâm Nebuhkatneza lé àp byi râ nghut lhê; tân jung yòsô zè pé lé lháng, yhang lé dójaú nhâng râ nghut lhê. 7Yhâng é mîngdán htûm byùq shoq, byù myû bànshoq gi, yhang lé le, yhang zo lé le, yhâng é gashu lé le, dójaú kôrâ nghut lhê; yhâng é mîngdán htum jáng, byù myû myo myo eq hkóhkâm mó pé gi, yhang lé jùn kut yù kôrâ nghut lhê.
8Nghut kôlhang, byù myû ra-myû nghut nghut, mîngdán ra-mîngdán nghut nghut, Babelon hkóhkâm Nebuhkatneza lé a dójaú é eq yhâng é kyaú lé lìngzing má a ngóm wùt yu é nghut jáng, Ngò gi, byù myû haú lé, yhâng é lòq èq lhoqhtên pyâm é hkûn jé shoq, shâm, mùtmó gyó é eq wúm gyó é èq mara dam byi râ nghut lhê ga haû Yhûmsîng Garai taî pyo ri. 9Haû mù, ‘Núngmòq gi, Babelon hkóhkâm lé dójaú râ a nghut.’ ga núngmòq lé taî é, núngmòq é myìqhtoî pé, núngmòq é bùt hpyit bang, núngmòq é yhupmòq hkai bang, núngmòq é nàt dàt jì bang eq núngmòq é myòqheq hpàqchyî kut bâng é dang lé, hkâgyo kó. 10Yhángmòq gi, núngmòq é mîngdán mai, núngmòq lé we we má Ngò hkat hâng pyám mù, núngmòq htûm byùq kôrâ matú, mhaû é dang baú núngmòq lé myìqhtoi htoi byî akô nghut ri. 11Nghut kôlhang, byù myû ra-myû myû gi, Babelon hkóhkam é kyaú lé yhûmsing é lìngzing má ngóm wùt yù mù, yhang lé dójaú é nghut jáng, Ngò gi, byù myû haú lé, yhángmòq é mau má nyi to nhâng râ nghut mù, yhángmòq gi, haú má zui zo zui shuq luî, nyi nyì râ nghut lhê ga haû Yhûmsîng Garai taî pyo ri.” gâ ri.’ ga taî ri.” gâ ri.
12Ngò gi, Yudaq hkóhkâm Zedeki-a lé le dang haû bànshoq taî kyô é nghut lhê; ngò gi, yhang lé, “Babelon hkóhkam é kyaú lé náng é lìngzing ngóm mù wùt yù luî, yhang lé le, yhâng é byu pé lé le dójaú aq; haû jáng, nàng chyungxe duì râ nghut lhê. 13Babelon hkóhkâm lé a dójaú râ nghut lhê gâ é byù myû eq séng luî, haû Yhûmsîng Garai taî kyuq tô é eq rajung za, nàng eq náng é byu pé gi, haî mù shâm, mùtmó gyó é eq wúm gyó é èq shi byùq kôrâ nghut lhê lhú? 14‘Núngmòq gi, Babelon hkóhkâm lé dójaú râ a nghut.’ ga, núngmòq lé taî é myìqhtoi dang pé lé hkâgyo kó; hkâsu mù gâ le, yhángmòq gi, núngmòq lé mhaû é myìqhtoi dang htoi byî akô nghut ri. 15‘Yhángmòq lé Ngò a nhang kat; yhángmòq gi, Ngá é myìng lang luî, mhaû é dông myìqhtoi htoî akô nghut ri. Haû mù, Ngò gi, núngmòq lé hkat htoq pyám luî, núngmòq lé le, núngmòq lé myìqhtoi htoi byî é myìqhtoî pé lé le, lhoqhtûm pyám râ nghut lhê.’ ga haû Yhûmsîng Garai taî pyo ri.” nghû taî é nghut lhê.
16Hau htâng, ngò gi, hkyangjông pé eq shiwa byù bànshoq lé, “Haû Yhûmsîng Garai shî su ga taî ri; ‘Haû Yhûmsîng Garaî é yhûm mâ é zèhkoq pé lé, Babelon mai hân za yu taû lò râ nghut lhê.’ ga taî é myìqhtoî pê é dang lé hkâgyo kó. Yhángmòq gi, núngmòq lé mhaû é dông myìqhtoi htoi byî é ru nghut lhê. 17Yhángmòq é dang lé hkâgyo kó. Babelon hkóhkâm lé dójaú keq; haû jáng, núngmòq chyungxe duì kôrâ nghut lhê. Haî mù wà shî htên byòq pyám râ lhú? 18Yhángmòq, myìqhtoî pé nghut mù, haû Yhûmsîng Garaî é dang lé hkam yù kô é ru nghut le gi, haû Yhûmsîng Garaî é yhûm, Yudaq hkóhkam é yhûm mó eq Yerusalem wà mó má myìt gyó tô é zèhkoq haú pé lé Babelon má a yu ló byùq râ matú, haû Wum-o a-tsam dìk shoq bò Sû Yhûmsîng Garai lé dûng tôngbán kó sháng gàq. 19-20Hkâsu mù gâ le, Babelon hkóhkâm Nebuhkatneza gi, Yudaq hkóhkâm Yehoi-akim é yhang zo Yehoi-ahkin lé le, Yudaq mau eq Yerusalem wà mó mâ é xânghpoq nge wó bang bànshoq lé le, Yerusalem wà mó mai Babelon shut shúm dông chyup shuî ló é hkûn, a yu ló mù wà shí má myìt gyó tô é zìng mó pé, gyi lànghkang, wó huî htòt é tsûngjang pé, gótû zèhkoq pé eq séng luî, haû Wum-o a-tsam dìk shoq bò Sû Yhûmsîng Garai shî su ga taî ri. 21Gè gè yhang, Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai gi, haû Yhûmsîng Garaî é yhûm má le, Yudaq hkóhkam é yhûm mó eq Yerusalem wà mó má le, myìt gyó tô é zè pé eq séng luî shî su ga taî ri; 22‘Zè haú pé gi, Babelon wà mó shut yu ló byùq é hui mù, Ngò, haú pé lé dum ê kûm é hkûn jé shoq wà haú má jòq to râ nghut lhê; hau htâng, Ngò gi, haú pé lé dum yu taû lò mù, shí jowò má lo dum tô to râ nghut lhê.’ ga haû Yhûmsîng Garai taî pyo ri.” nghû taî é nghut lhê.
Currently Selected:
Yeremi-aq 27: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.