Yeremi-aq 30
30
Isira-elaq Hkyi Xe Taû Yu É Hui Râ Hkyô
1Yeremi-aq chyáng haû Yhûmsîng Garaî é mungdang jé é gi, 2“Isira-elaq é Garai Gasang, haû Yhûmsîng Garai shî su ga taî ri; ‘Ngò, nang lé taí bê dang bànshoq lé laiká bùk má kâ to aq. 3Wú keq, Ngá é Isira-elaq byu pé eq Yudaq byu pé lé, shúm zung é mai Ngò shuî taû lo é buìnyì jé râ nghut lhê.’ gâ ri; haû gi, Yhûmsîng Garai taî pyo ri; ‘Haú hkûn, yhángmòq é îchyí îwâ pé lé Ngò byî tô é mau lé sing yù nhâng râ nghut lhê.’ ga le, haû Yhûmsîng Garai taî ri.” gâ ri.
4Haû Yhûmsîng Garai mai Isira-elaq eq Yudaq eq séng luî taî é dang pé gi, 5“Haû Yhûmsîng Garai shî su ga taî ri;
‘Ngá-mòq gi, gyùq ngaù htê lé wó gyô ri;
gyùq chiq ri; nguì ngón hkyô a jòq nghut ri.
6Yùqgè gi, zo ge hku lhê laq myî jep wú keq;
haû sû é wá, wúm bo é yùqgè hkangmó gi,
zo hkû nò no é myiwe myhí su,
lòq èq yhûmsing é wamdau má dûn zìk luî,
abósôm mâ é dùt byùq bum é lé, haî mù ngò myang lhê làq?
7Goì ê, haû gi, gyùq chiq hpo mó buìnyì yhang nghut râ nghut lhê!
Haû eq pung é jòq râ a nghut.
Haû gi, Yakup a-myû wuîhke jamjau mó huî é ahkyíng nghut râ nghut lhê;
nghut kôlhang, yhángmòq gi, haú mai hkyi xe htoq yu é hui râ nghut lhê.’ gâ ri.
8Haû Wum-o a-tsam dìk shoq bò Sû Yhûmsîng Garai taî é gi,
‘Haú buìnyì má, Ngò gi, yhángmòq é lìngzing mâ é kyaú lé lhoqhkyuî pyám byi luî,
yhángmòq é tui lé lhoqhpyit pyám byi râ nghut lhê;
yhángmòq lé gó-mîng byu pê èq jùn kut yû kôrâ a nghut lo.
9Nghut kôlhang, Yhángmòq gi, yhángmòq é Garai Gasang nghut é, haû Yhûmsîng Garai lé le,
yhángmòq é matú Ngò nyi htoq lô nhang é,
yhángmòq é hkóhkâm Dawiq lé le, dójaú kôrâ nghut lhê.
10Haû mù, Ngá é duìnhâng zoshâng Yakup ê, hkâgyùq;
Isira-elaq a-myû ê, hkâgyùq dan nghâ.’ gâ ri;
haû gi, Yhûmsîng Garai taî pyo ri.
Hau htoq agó, ‘Hkâsu mù gâ le, Ngò gi, nang lé, mau we mai,
náng é awùt ashîn pé lé, yhángmòq shúm zung é mau mai, hkyi htoq yû râ nghut lhê.
Yakup a-myû gi, taû lò mù, nguì ngón hkyô eq nyì ngón yùqyò hkyô dum wó luî,
yhángmòq lé ó yùq èq le gyùq nhâng râ a nghut lo.
11Ngò gi, núngmòq eq rahá nghut mù, núngmòq lé hkyi yù râ nghut lhê.’ ga,
haû Yhûmsîng Garai taî pyo ri.
Hau htoq agó, ‘Núngmòq lé Ngò hkat hâng kat é a-myû wuì bànshoq lé,
Ngò lhoqhtûm pyám kôlhang,
Ngò gi, núngmòq lé bànshoq a lhoqhtûm pyám râ nghut lhê.
Ngò gi, núngmòq lé tú luî mhoq shit râ nghut mù,
núngmòq lé mara dam a byî é tô to râ a nghut.’ ga le taî ri.
12Haû Yhûmsîng Garai shî su ga taî ri;
‘Nàng hui zô é dàm dap zu záng hkyô gi, a ung yâ gè nghut ri;
nàng gi, dàm mó yhang dàp bê nghut ri.
13Nàng hpuzô é hkyô lé bo taî hung é byù a nyì;
náng é dàm yâ gè râ chi a jòq;
náng é matú gi, wó yâ gè hkyô a jòq nghut ri.
14Nàng chyit é buìnùm wuì gi, nang lé tô-myhî pyám bekô;
yhángmòq gi, nang lé a myìt tê byi kó nghut ri.
Náng é yubàk mara gi, gyai kô é nghut mù,
nàng kut shut é mara gi, gyai myo bê nghut é yánmai,
Ngò gi, nang lé, gyè hpó su bàt nhuq luî,
byù jum hpó su mara dam byi bê nghut lhê.
15Nàng gi, dàm dap zu záng luî, haî mù ngau lhê lhú?
Nàng no é hkyô gi, wó yâ gè râ a nghut.
Náng é yubàk mara mó eq nàng kut shut é mara myo myô é yánmai,
Ngò gi, nang lé, shí pé kut é ru nghut lhê.
16Nghut kôlhang, nang lé myui é bang gi, myui pyâm é hui zo;
náng é gye pé bànshoq gi, shúm zung é hui zo;
nang lé lú zo lú shuq é bang gi, lú zo lú shuq é hui zo;
nang lé zìk zo zìk shuq é bànshoq gi,
zìk zo zìk shuq é hui zo kôrâ nghut lhê.
17Nghut kôlhang, Ngò gi, nang lé wángzán nhâng râ nghut mù,
nang lé yâ gè byi râ nghut lhê;
hkâsu mù gâ le, nang lé, byu pê èq tô pyâm tô é hui sû ga le,
ó le a lé kûm é Zi-un ga le, taî akô nghut ri.’ gâ ri;
haû gi, Yhûmsîng Garai taî pyo ri.
18Haû Yhûmsîng Garai shî su ga taî ri;
‘Ngò gi, shúm zung byùq é, Yakup é byu pê é zúm pé lé dum yu taû lò mù,
yhángmòq é nyì jowò pé lé shogyo nhikmyin râ nghut lhê;
htên byòq byùq é wà htoq má wà dum xuq râ nghut mù,
hkóhkâm wâng gi, yhâng é jowò má hkyak wó jòq to râ nghut lhê.
19Yhángmòq chyáng mai jeju bûn é mahkôn htê eq
gabú byam chyu htê htoq râ nghut lhê.
Ngò gi, yhángmòq lé byù du jàt nhâng râ nghut mù,
yhángmòq yom byùq râ a nghut;
Ngò gi, yhángmòq lé xânghpoq nge wó nhâng râ nghut mù,
yhángmòq gi, tiq chûn ló byùq râ a nghut.
20Yhángmòq é zodù wuì gi, hí lhê é pyàt bang su dùt bùm kôrâ nghut mù,
yhángmòq é shiwa hpúng gi, Ngá é hí má gingtîng nyì kôrâ nghut lhê;
Ngò gi, yhángmòq lé zìk zo bang lé mara dam byi râ nghut lhê.
21Yhángmòq é ushuq gi, yhángmòq é a-myû mâ é dùt râ nghut mù,
yhángmòq lé ùp râ sû gi, yhángmòq chyáng mai htoq lô râ nghut lhê.
Ngò gi, yhang lé shuî chyâng htèp yù râ nghut mù,
yhang gi, Ngá shut chyâng lé lô râ nghut lhê;
hkâsu mù gâ lé, Ngá shut chyâng lé lô râ ga,
yhûmsing gùng lé ó yùq wám àp nhong lhê lhú?’ gâ ri;
haû gi, Yhûmsîng Garai taî pyo ri.
22Hau htoq agó, ‘Haû mù, núngmòq gi, Ngá é byu pé dùt râ nghut mù,
Ngò gi, núngmòq é Garai Gasang dùt râ nghut lhê.’ le gâ ri.” gâ ri.
23Wú keq; haû Yhûmsîng Garaî é nhikmó-yo hkyô nghu é laìdun mó gi,
bùq htoq lô râ nghut mù,
htan dik é laìdun mó nghut luî,
agè ashop bâng é ulhum má mùt râ nghut lhê.
24Haû Yhûmsîng Garai nhikjum mó yô é hkyô gi,
Yhang myìt htung tô é hkyô a ban lhoqdìk dik zîm ló byùq râ a nghut.
Núngmòq gi, jé lô râ buìnyì pé má haú hkyô lé sê gyo kôrâ nghut lhê.
Currently Selected:
Yeremi-aq 30: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.