Yeremi-aq 42
42
1Haú hkûn, gyèzaû pé bànshoq, Kare-a é yhang zo Yohanan, Hoshai-a é yhang zo Yezani-a eq mingbyû wuì je tiq é mai je kô é bang bànshoq gi, 2myìqhtoi Yeremi-aq chyáng lé kômù, yhang lé, “Ngá-mòq dûng tôngbán é dang lé gyo byi mù, nyi myìt gyó tô é byù shí bang bànshoq é matú, náng é Garai Gasang nghut é, haû Yhûmsîng Garai lé kyû bo dung byi laq. Hkâsu mù gâ le, ngá-mòq gi, hí lé byù gyai myo kôlhang, ahkuî nàng myang é eq rajung za, ra-tsuí za ru myit gyó tô alô nghut ri. 3Náng é Garai Gasang nghut é, haû Yhûmsîng Garai gi, ngá-mòq lé, ngá-mòq hká shut e ló râ eq ngá-mòq haî kut râ hkyô taî kyo sháng gàq, Yhang lé kyû bo dung byi aq.” ga taî akô nghut ri.
4Haû jáng, myìqhtoi Yeremi-aq gi, “Núngmòq é dang lé ngò wó gyo bê; núngmòq taî é eq rajung za, ngò gi, núngmòq é Garai Gasang nghut é, haû Yhûmsîng Garai lé hkyak kyûdung râ nghut lhê. Ngò gi, núngmòq hí mai haî le a nghop tô é za, haû Yhûmsîng Garai taí mîtaí bànshoq núngmòq lé taî kyo râ nghut lhê.” ga tû taî ri.
5Haû mù, yhángmòq gi, Yeremi-aq lé, “Haû Yhûmsîng Garai mai nang lé ngá-mòq chyáng lé taî kyó nhang é bànshoq lé, ngá-mòq a châng kut é nghut jáng, haû Yhûmsîng Garai gi, ngá-mòq é gyoro má tengmán é eq jujúm é sàksé dùt sháng gàq. 6Ngá-mòq gi, ngá-mòq é Garai Gasang nghut é, haû Yhûmsîng Garaî é jì-no gyo mù, wó nyì ngón yùqyò sháng gàq, ngá-mòq, nang lé nhang kat é, ngá-mòq é Garai Gasang nghut é, haû Yhûmsîng Garaî é dang, ge é nghut kôlhang, a ge é nghut kôlhang, jì-no gyo râ nghut lhê.” ga taî akô nghut ri.
7Hau htâng raxê nyí myáng jáng, Yeremi-aq chyáng haû Yhûmsîng Garaî é mungdang jé ri. 8Haû mù, yhang gi, Kare-a é yhang zo Yohanan eq yhâng htâng châng é gyèzau bànshoq lé le, mingbyû wuì je tiq é mai je kô é bang bànshoq lé le, ji tsîng yù mù, 9yhángmòq lé, “Núngmòq dûng tôngbán é dang lé ê bo dung byi râ matú, núngmòq ngo lé nhang kat é, Isira-elaq é Garai Gasang, haû Yhûmsîng Garai shî su ga taî ri; 10‘Núngmòq shí mau má nyi tô é nghut jáng, Ngò gi, núngmòq lé lhoqkô myhâng râ nghut luî, hpyoq hpyi pyám râ a nghut; Ngò gi, núngmòq lé hô to râ nghut mù, nùt htoq pyám râ a nghut; hkâsu mù gâ le, Ngò gi, núngmòq chyáng jé nhang é byò dàn byò sho hkyô eq séng luî, myìt lhîng bê nghut lhê. 11Ahkuî núngmòq gyùq nyi é Babelon hkóhkâm lé hkâgyùq kó. Yhang lé hkâgyùq kó; hkâsu mù gâ le, Ngò gi, núngmòq eq rahá nghut nyî mù, núngmòq lé hkyi yù râ nghut luî, yhâng é lòq mai núngmòq lé hkyi htoq yû râ nghut lhê; haû gi, Yhûmsîng Garai taî pyo ri. 12Yhâng èq núngmòq lé shogyo nhikmyin hkyô shit luî, núngmòq é mau shut núngmòq lé taû ló nhâng shoq, Ngò, núngmòq lé shogyo nhikmyin hkyô shit râ nghut lhê.’ gâ ri.
13Nghut kôlhang, núngmòq mai, ‘Ngá-mòq gi, shí mau má nyì râ a nghut.’ ga taí mù, núngmòq é Garai Gasang nghut é, haû Yhûmsîng Garaî é jì-no a gyo kô é nghut jáng le, 14hau htoq agó, ‘A nghut ô; ngá-mòq gi, Egutuq ming má ê nyî râ nghut lhê; haú má, ngá-mòq, majan zân é hkyô le myàng râ a nghut; tut htê le wó gyo râ a nghut; zò-mut wuìshit é le hui râ a nghut.’ ga taí kô é nghut jáng le, 15Yudaq mau mâ é nyi myìt gyó tô é bang núngmòq ê, haû Yhûmsîng Garaî é mungdang lé gyo keq. Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; ‘Núngmòq Egutuq ming má gyó ê râ matú myìt hpyit mù, haú má ê nyî kôrâ nghut jáng, 16núngmòq gyùq nyi é shâm gi, núngmòq lé haú má châng hkyit mù, núngmòq gyùq chiq nyi é mùtmó gyó hkyô gi, Egutuq ming má núngmòq htâng châng wang lò luî, núngmòq gi, haú má shi byùq kôrâ nghut lhê. 17Gè gè yhang, Egutuq ming má gyó ê râ matú myìt hpyit mù, haû má ê nyi é bang gi, shâm, mùtmó gyó é eq wúm mó gyó é èq shi byùq kôrâ nghut lhê; rayùq lháng, Ngò, yhángmòq chyáng jé nhâng râ nghut é byò dàn byò sho hkyô mai wó byûn wó hpang lùt kôrâ a nghut.’ gâ ri. 18Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; ‘Yerusalem wà mó má nyì bâng é ahtoq má Ngá é nhikjum yo hkyô eq nhikmó-yo hkyô hut hkyô kat é eq rajung za, núngmòq Egutuq ming má gyó ê kôjáng, núngmòq ahtoq má le Ngá é nhikmó-yo hkyô hut hkyô kat râ nghut lhê. Haû mù, núngmòq gi, nhîng pyám hkyô, gyùq chiq hpo mó, dâkam pyâm é hkyô eq nyhap pyâm é hkyô dùt kôrâ nghut lhê. Núngmòq gi, shí mau lé hkâ-nhám le dum myàng râ a nghut.’ gâ ri.
19Yudaq mau mâ é nyi myìt gyó tô é bang ê, ‘Egutuq ming má hkâgyó ê kó.’ ga haû Yhûmsîng Garai mai núngmòq lé taí bê nghut lhê. Hkû-nyí ngò núngmòq lé sidìq byî é lé hkyak bûn nyì keq. 20Núngmòq gi, yhûmsing gùng yhûmsîng mhaû pyám bekô nghut ri; hkâsu mù gâ le, núngmòq gi, ‘Ngá-nhûng é Garai Gasang nghut é, haû Yhûmsîng Garai lé ngá-mòq é matú kyûdung byi aq. Yhang taí mîtaí bànshoq ngá-mòq lé taî kyo aq; ngá-mòq châng kut râ nghut lhê.’ ga, núngmòq é Garai Gasang nghut é, haû Yhûmsîng Garaî chyáng núngmòq ngo lé nhang kat kô é nghut mù, 21ngò gi, hkû-nyí núngmòq lé Yhâng é dang taî kyo bê nghut lhê. Nghut kôlhang, núngmòq gi, shí hkyô pé bànshoq núngmòq lé taî kyo râ matú ngo lé nhang kat é, núngmòq é Garai Gasang nghut é, haû Yhûmsîng Garaî é jì-no a gyo kó nghut ri. 22Haû mù, núngmòq gi, núngmòq ê nyî nau é jowò má, shâm, mùtmó gyó é eq wúm mó gyó é èq shi byùq kôrâ nghut é lé, hkyak sê to keq.” ga tû taî ri.
Currently Selected:
Yeremi-aq 42: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.