Yeremi-aq 46
46
Egutuq Ming Eq Sêng É Danglù
1Gótû byù myû wuì eq séng luî, myìqhtoi Yeremi-aq chyáng haû Yhûmsîng Garaî chyáng mai shî su ga mungdang jé ri;
2Egutuq ming eq sêng é mungdang gi, shî su gâ ri;
Yosi-a é yhang zo Yudaq hkóhkâm Yehoi-akim hkóhkâm hkô má zung é myí zan zàn má, Babelon hkóhkâm Nebuhkatneza èq Uhprat Wuìlàng yàm mâ é Hkarahkemesha jowò má sat ung pyâm é, Egutuq ming mâ é hkóhkâm Hpara-uq Nehko é gyè hpúng eq séng luî jé é mungdang gi,
3“Tiq é kô é gòlong lé hen yù mù,
majan zan râ matú yán htoq ê keq!
4Myang ji gyèzô pé ê,
myang buí keq!
Jòqtoq mùq tsung mù,
jowò yù râ matú htoq ê keq!
Lhâm pé lé sut yúng mù,
gyèhking wùt to keq!
5Yhángmòq gi, gyùq chiq luî,
zùt taû hpang ló byùq kô é lé,
haî mù Ngò myang lhê lhú?
Yhángmòq é sârhe pé gi, sûm byùq bekô nghut ri.
Yhángmòq gi, a taû lhing wú é za,
hân hân hpang ló byùq bekô nghut ri.
Lhînghkyùq má gyùq chiq hpo baú jòq tô ri.” gâ ri;
haû gi, Yhûmsîng Garai taî pyo ri.
6Hau htoq agó, “Wó din dik sû gi, wó hpâng râ a nghut;
wum bô su le, wó hpang lùt râ a nghut.
Yhángmòq gi, mautsûng hkyam mâ é Uhprat Wuìlàng yàm má,
htûng lèqbàt lêng to bekô nghut ri.
7Nile Wuìlàng su jê toq lô luî,
wuìgyùn toq é wuìlàng pé su dùt é sû gi, ó yùq nghut lhê lhú?
8Egutuq ming gi, Nile Wuìlàng su jê toq lô mù,
wuìgyùn toq é wuìlàng pé su dùt nyi ri;
haû mù, yhang gi, ‘Ngò toq mù, myìdàm htoq lé ûm nghop pyám râ nghut lhê;
ngò gi, wà pé eq haú pé mâ é byu pé lé lhoqhtên pyám râ nghut lhê.’ ga taî ri.
9Myang pé ê, dòq ê keq!
Gyèlhêng pé ê, wum kat yhang kôn dìn keq!
Sârhe pé nghut é, gòlong chung é Hkusha byu pé eq Put byu pé,
lai dàt chung é Ludi-a a-myû wuì ê, yán htoq ê keq.
10Nghut kôlhang, haú nyí gi, haû Yhûmsîng nghut é,
Wum-o a-tsam dìk shoq bò Sû Yhûmsîng Garai eq sêng é nghut mù,
Yhang mai, Yhâng é gye pé lé lató hpuq é buìnyì nghut ri.
Shâm gi, yhángmòq é sui lé shuq wùt shoq,
yhángmòq lé nhik shî tung tsing myui pyám râ nghut lhê.
Haû Yhûmsîng nghut é, Wum-o a-tsam dìk shoq bò Sû Yhûmsîng Garai gi,
Uhprat Wuìlàng yàm mâ é mautsûng mau má,
shigu hkungga nhông byi râ nghut lhê.
11Egutuq zo-myi gyíng ê,
Gile-at mau má dòq ê mù chi gâm agyi ê yû keq.
Nghut kôlhang, nàng gi, akôm má chi myo myo yâ wú bê nghut ri;
nang lé haî le a wó yâ gè byi nghut ri.
12Nàng hoq hpu huî é hkyô lé, byù myû wuì wó gyo râ nghut lhê;
náng é ngaù htê gi, myìdàm htoq má byíng zan to râ nghut lhê.
Sârhe pé gi, rayùq eq rayùq htûng hte lhum mù,
í yùq é rahá lèqbàt kôrâ nghut lhê.” le gâ ri.
13Egutuq ming lé majan lé zan râ matú, Babelon hkóhkâm Nebuhkatneza lé lo nyi é hkyô eq séng luî, myìqhtoi Yeremi-aq lé haû Yhûmsîng Garai taî é mungdang gi,
14“‘Shâm gi, náng é lhînghkyùq mâ é bang lé myui pyâm é yánmai,
jowò yù mù, rì rì hen to aq.’ nghû,
Egutuq ming má shit kyo mù, Migidola wà má taî pyô aq;
Memhpi wà eq Tahpan-hesi wà má le taî pyô àq.
15Sârhe pé gi, haî mù lhoqhtûm pyâm é hui zô akô làq?
Haû Yhûmsîng Garaî èq yhángmòq lé chyûn lhêng pyâm é yánmai,
yhángmòq a wó yàp to kó nghut ri.
16Yhángmòq gi, dum lèqbàt bàt dùt kôrâ nghut mù,
rayùq é ahtoq má rayùq lêng kê to kôrâ nghut lhê.
Yhángmòq gi, ‘Toq keq, zìk zo zìk shuq bâng é shâm mai,
ngá-nhûng é choq hpyit mau eq ngá-nhûng é byu pê chyáng taû ló sháng.’ ga, taí kôrâ nghut lhê.
17Haú má, yhángmòq gi, ‘Egutuq hkóhkâm Hpara-uq gi, laì htuq mó za nghut mù,
ahko ahkáng lé lhoqlhaî pyám bê nghut ri.’ ga taî garu kôrâ nghut lhê.” gâ ri.
18Haû Wum-o a-tsam dìk shoq bò Sû Yhûmsîng Garai gâ é Hkóhkâm hpó shî su ga taî pyo ri;
“Ngò rû dui nyi é eq rajung za,
bùm pé mâ é Tabora Bùm eq
wuìshuq lung-aû yàm mâ é Hkarimela Bùm su myhang é,
Babelon hkóhkâm jé lé râ nghut lhê.
19Egutuq ming má nyi tô é bang ê,
shúm zûng ê râ matú yhûmsing é zè pé món keq hkoi;
hkâsu mù gâ le, Memhpi wà gi, tô sâ tô é hui mù,
byù le a nyì, chamchyuîyuì htên byòq to râ nghut lhê.
20Egutuq ming gi, gyai kô yúng é no-pyá nghut ri;
nghut kôlhang, yhang lé lé htim râ matú,
mautsûng hkyam mai mhoq dâng jé lé lo ri.
21Yhâng é langchyáng nghut é gyèzô pé gi,
tsô myum tô é no zô pé su nghut nyi ri.
Yhángmòq gi, a wó yàp gîng to lo kôrâ nghut mù,
rahá lhing hpang ló byùq kôrâ nghut lhê;
hkâsu mù gâ le, byò dàn byò sho huî é buìnyì gi,
yhángmòq chyáng jé lo nyì bê nghut mù,
yhángmòq mara dam byî é hui zo râ ahkyíng jé lô bê nghut ri.
22Egutuq ming gi, gyè hpúng mó lé lo é hkûn,
lhângmuì mó yê hpang é htê su gâ é htê lhoqhtoq râ nghut lhê;
hkâsu mù gâ le, gyè haú bang gi, sikgâm htuq é byu pé su,
wazung chûng mù lé lô kôrâ nghut lhê.
23Yhángmòq gi, a ung nghap loshoq dinggám jum pê htoq myô é nghut mù,
yhâng é sik mó yô htu dik kôlhang,
wó pui pyám byi kôrâ nghut lhê.” ga,
haû Yhûmsîng Garai taî pyo ri.
24Hau htoq agó, “Egutuq byìzo gi, hoq hpû é hui râ nghut mù,
mautsûng hkyam mâ é byu pê é lòq má àp pyâm é hui râ nghut lhê.” le gâ ri.
25Isira-elaq é Garai Gasang, haû Wum-o a-tsam dìk shoq bò Sû Yhûmsîng Garai shî su ga taî ri; “Ngò gi, Htebe wà mâ é hparà Amon lé le, Hpara-uq lé le, Egutuq ming lé le, haú mâ é hparà pé lé le, haú mâ é hkóhkam pé lé le, Hpara-uq lé lùmhkau é bang lé le, mara dam byi râ za nghut bê. 26Ngò gi, yhángmòq lé sat pyám naû bang nghut é, Babelon hkóhkâm Nebuhkatneza eq yhâng é zaugun wui é lòq má yhángmòq lé àp pyám râ nghut lhê. Nghut kôle, htâng má, Egutuq ming gi, hí lhê su byù dum nyì râ nghut lhê.” gâ ri; haû gi, Yhûmsîng Garai taî pyo ri.
27“Ngá é duìnhâng zoshâng Yakup ê, hkâgyùq;
Isira-elaq ê, hkâgyùq ngha byùq.
Ngò gi, gè gè yhang, nang lé mau we mai,
náng é awùt ashîn pé lé yhángmòq shúm zung é mau mai, hkyi yù râ nghut lhê.
Yakup gi, dum taû lò mù, ô èq kyuq é le a hui lô é za,
nguì ngón yùqyò mù, wó myang bánno râ nghut lhê.
28Ngá é duìnhâng zoshâng Yakup ê,
Ngò gi, nàng eq rahá nghut nyi é yánmai, hkâgyùq;
Ngò gi, nang lé Ngò hkat pyo hâng kat é byù myû lhúnglháng lé chyut lhoqhtûm pyám kôlhang,
nang lé chyut lhoqhtûm pyám râ a nghut.
Ngò gi, nang lé laké kat mù mhoqshit râ nghut luî,
nang lé mara dam a byî é za nyhi to râ a nghut.” ga haû Yhûmsîng Garai taî pyo ri.
Currently Selected:
Yeremi-aq 46: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.