Gyung So 10
10
Ngùn Lé Saî É Tut Pé
1Haû Yhûmsîng Garai gi, Mosheq lé, 2“Shiwa hpúng lé wùt tsîng yù râ matú eq xuq tô é wàp mai htoq ló râ matú, ngùn lé tut í lhum bàt saî htoq yû àq. 3Tut í lhûm é mùt kat jáng, shiwa hpúng gón gi, zùphpong zúm hkum náng é hí má lé zing ra râ nghut lhê. 4Tut ralhum za mùt é nghut jáng, Isira-elaq é a-myû koq pê é ushuq pé, náng hí má lé zing ra râ nghut lhê. 5Tut htê mó mùt kat jáng, buìhtoq hkyam shut xuq tô é wàp mâ é bang htoq ló ra râ nghut lhê. 6Í dá nghû râ dá tut htê mó mùt kat jáng, maupyî hkyam shut xuq tô é wàp mâ é bang htoq ló ra râ nghut lhê. Haû su kut tut htê mó mùt é gi, rawàp htâng rawàp htoq ló râ matú nghut lhê. 7Nghut kôlhang, shiwa hpúng lé wùt tsîng é hkûn gi, tut htê mó mùt é dông a nghut é za mùt râ dùt lhê.
8Arun é yhang zo yùqzo hkyangjông pé gi, tut haú pé lé mùt ra râ nghut lhê. Haû gi, núngmòq é matú le, jé lô râ pyàt bán bànshoq é matú le, ahtum abyùq hkyô tô é hkunmó nghut ri. 9Núngmòq é mau má, núngmòq lé zìk zô é gye pé lé majan toq é hkûn, tut htê mó mùt râ dùt lhê. Haú hkûn, núngmòq é Garai Gasang nghut é, haû Yhûmsîng Garai gi, núngmòq lé myìtbun luî, núngmòq é gye pê chyáng mai hkyi xe yù râ nghut lhê. 10Núngmòq gabú byam chyû é ahkyíng nghut é, masàt tô é poî pé má le, Lhôxan Lhôsik poî pé má le, núngmòq é Garai Gasang mai núngmòq lé bûn nyì râ matú, myi nyhé hkungga pé eq zùmhkaû hkungga pé má le tut mùt ra râ nghut lhê. Ngò gi, núngmòq é Garai Gasang nghut é, haû Yhûmsîng Garai nghut lhê.” ga taî ri.
Sinaq Yòso Mai Isira-elaq Byu Pé Htòt Htoq E Ló É Hkyô
11Í zan zàn, í hkyap hkyap, í xê nyí nyí má, haû mhut gi, dangshikaq târâ kat tô é sàksé zúm htoq mai wùp toq ló bê nghut ri. 12Haû mù, Isira-elaq byu pé gi, Sinaq Yòso mai htòt htoq mù, Paran Yòso má mhut ló nô é jé shoq, rawò mai rawò châng sô e ló akô nghut ri. 13Yhángmòq gi, Yhûmsîng Garai mai Mosheq dông hkunmó hkyô tô é eq rajung za, sânghî dá htòt htoq ló é nghut ri.
14Yudaq wàp mâ é hpúng pé hí, yhángmòq é donghkón ô má htoq e ló akô. Shuî-û é sû gi, Aminadap é yhang zo Nashon nghut ri. 15Yisahka up mâ é hpúng bang lé shuî-û é sû gi, Zu-a é yhang zo Nehtanela nghut ri. 16Zebulun up mâ é hpúng bang lé shuî-û é sû gi, Helon é yhang zo Eli-ap nghut ri. 17Hau htâng, sàksé zúm lé hpyoq yû mù, Gerishon byu pé eq Merari byu pé châng wàq htoq e ló akô nghut ri.
18Hau htâng, Rubin wàp mâ é hpúng pé, yhángmòq é donghkón ô má châng htoq e ló akô. Shuî-û é sû gi, Shedura é yhang zo Elizura nghut ri. 19Sime-on up mâ é hpúng bang lé shuî-û é sû gi, Zurishadai é yhang zo Shelumila nghut ri. 20Gat up mâ é hpúng bang lé shuî-û é sû gi, Du-ela é yhang zo Eli-asap nghut ri. 21Hau htâng, Kohat byu pé, chyoiyúng zè lé wàq mù châng htoq e ló akô. Yhángmòq a jé shi má, sàksé zúm wàq bang gi, haú lé saî shap to ra râ nghut lhê.
22Hau htâng, Ehprim koq mâ é hpúng pé, yhángmòq é donghkón ô má châng htoq é ló akô. Shuî-û é sû gi, Amihut é yhang zo Elishama nghut ri. 23Manase koq mâ é hpúng bang lé shuî-û é sû gi, Pedazura é yhang zo Gamalela nghut ri. 24Ben-yamin up mâ é hpúng bang lé shuî-û é sû gi, Gidoni é yhang zo Abidan nghut ri.
25Ló htáng má, wàp bànshoq mâ é ló htâng é wàp nghut é, Dan wàp mâ é hpúng pé, yhángmòq é donghkón ô má châng htoq e ló akô. Shuî-û é sû gi, Amishadai é yhang zo Ahiza nghut ri. 26Asheri up mâ é hpúng bang lé shuî-û é sû gi, Ohkran é yhang zo Pagila nghut ri. 27Naphtali up mâ é hpúng bang lé shuî-û é sû gi, Enan é yhang zo Ahira nghut ri. 28Shî gi, Isira-elaq byu pé rahpúng htâng rahpúng htoq e ló é hkyô nghut ri.
29Mosheq gi, Midi-an byù Re-u-ela é yhang zo, yhâng tsa Hobap lé, “Ngá-mòq gi, haû Yhûmsîng Garai mai ngá-mòq lé, ‘Ngò, núngmòq lé maumyî haû byi râ nghut lhê.’ ga taî é mau shut htoq e ló é nghut lhê; haû mù, Yhûmsîng Garai gi, Isira-elaq lé jeju byi râ ga danghtum htûm to bê nghut é yánmai, ngá-mòq eq rahá e ló sháng, ngá-mòq gi, nang lé rago kut râ nghut lhê.” ga taî ri.
30Haú hkûn, yhang gi, “Ngò a cháng râ nghut lhê; Ngò gi, ngá é mau eq ngá é byu pê chyáng taû ló râ nghut lhê.” ga tû taî ri.
31Nghut kôlhang, Mosheq gi, “Jeju mai ngá-mòq lé hkâ-nyhi pyâm to. Nàng shèq yòso má ngá-mòq hká má wàp xuq râ ru sê lhê; haû mù, nàng gi, ngá-mòq é myòqjí wó dùt râ nghut lhê. 32Nàng, ngá-mòq eq rahá châng e ló é nghut jáng, ngá-mòq gi, haû Yhûmsîng Garai ngá-mòq lé jeju byî é eq rajung za, nang lé jeju byi râ nghut lhê.” ga taî ri.
33Isira-elaq byu pé gi, haû Yhûmsîng Garaî é bùm mai sum nyí yhang sô e ló bekô nghut ri. Haû sum nyí gyoro má, Yhûmsîng Garaî é dangshikaq sàksé dò gi, yhángmòq é matú wàp xuq jowò hô mù, yhángmòq é hí má e ló byî ri. 34Yhángmòq wàp wùp chûng mù htoq e ló kô é hkûn, haû Yhûmsîng Garaî é mhut gi, nyí lé, yhángmòq é ahtoq má htup to byî ri.
35Haû sàksé dò htoq e ló hkangmó, Mosheq gi,
“Yhûmsîng Garai ê, toq àq!
Náng é gye pé gi, lhoqpyo pyâm é hui kó sháng gàq;
Nang lé a naù a wôm é bang gi, Náng é hí mai hpang byùq kó sháng gàq.” ga taí taí kut ri.
36Sàksé dò nô nyì hkangmó, yhang gi,
“Yhûmsîng Garai ê,
Isira-elaq byù hkyîng mun nyi é jang má taû lò àq.” ga taí taí kut ri.
Currently Selected:
Gyung So 10: znot
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc.