Lukɨ 10

Jizaazai a'mwe kwala naangeraavɨ (72) gamɨre wawɨnya'na wɨdaasake'nesɨ.

1Sa yaka dɨvidaa'nyɨ Naangei a'mwe sevedituya (72) pwaraavɨjɨ dahɨlakɨna yaka pwaraarɨna pwaraarɨna maryaasɨna. Gamɨnyɨne'na sahwaraavɨ sɨnnawɨ wɨdaasɨna. Anga naanga yuyabanyaavɨnajɨ anga maalɨka yuyabanyaavɨnajɨ dɨvidaa'nyɨ yune gamɨ saina wɨya'nebanyana sahwaraavɨ maryaasɨna. 2Sarevɨ sai sahwaraavɨ wɨdɨna “Pɨrɨ' daresɨ. Tɨka munne kwalaalya wawɨnyavɨ mena yovɨgaipwakɨnɨkengɨra. Pɨrɨ' daresɨ. Tɨka munne maarya'ne a'mwera kwalaalyara mɨka. Sarevɨdaa'nyɨ sarɨmɨ wawɨnyavɨ Naangerɨ kidaanganapɨjɨ gamɨre tɨka wapaaya mari'bwarakya'nera gamɨre wawɨnya wɨdaayadɨvɨsaraavɨ yarai wɨdaasaderera. 3Nabaai sarɨmɨ kaanya dɨwila! Yɨthaanyi! Nɨmɨ yɨhɨmaryaasɨweihi kavɨjɨlɨkeraavɨ tɨnnyabanna sipɨzipɨya maalɨkebɨsaihi dɨwideihɨlyɨra. 4Sarɨmɨ nɨgwɨpaawɨzɨyasɨ gɨlyasɨ kwaari'masɨvɨla pɨrɨwaalyɨ namaapɨdɨka! Tutaanyavɨ a'mwera badaapiyaraavɨ aangaa'na dɨvainadaasa'na ‘Nya'mwei! Nya'mwei!’ mudɨpɨna! 5Nabaai sarɨmɨ anga pɨrɨvɨ wɨlapɨjɨ yɨ sɨnnawɨ aayagaa' dara duzideihɨlyɨ ‘Anga davɨ wɨlamwaaidɨvɨsangihɨrɨ kave kwaamu' tewaanya yɨhwarana!’ 6Nabaai a'mwe pwai kave kwaamu' maa'dei anga dazavɨyai mwaalajai yɨ sarɨmɨ kwaamu' wɨjaavɨpɨja sa' dazarɨ wɨlawɨwaradesɨ. Kɨrɨ' nabaai a'mwe pwai sasara mi yaja' yɨ sabwi sarɨmɨnyawɨnna ayɨna bozɨ kwɨyakwaihɨrɨ bihwaradesɨ. 7Kɨrɨmɨnyɨ maarɨna yɨpɨjara sahwaraavɨre yune anga gave pɨrɨvɨna dɨmwaalyideihɨlyɨ. Sara yapi tɨka wapaajɨna aalyajɨna yɨhɨzaavɨpɨja dɨnyideihɨlyɨ. Sare' dare'nanyɨ. Wawɨnya wɨdaayadei gannya wawɨnya'na gannya nɨgwia yɨnɨga wi'na maarannelyɨ. Sarebaaibɨ'na yɨhɨzaavɨpɨja dɨnyideihɨlyɨ. Anga pɨrɨvɨdaa'nyɨ anga pɨrɨvɨna tɨka wapaaya maarya'neihi yaasɨwa'na nyamaripɨka! 8Nabaai sarɨmɨ anga naanga pɨba kulaawopɨjɨ sahɨbanyara yɨhɨmaarapɨjɨ kunnya angengɨna kihɨmakwopɨjɨ yɨ wapaaya yanga yɨhɨzaavɨpɨja dɨthaapyideihɨlyɨ. 9Nabaai anga dazabanya a'mwe nalaavɨnakeraavɨ ayɨna tewaanya yavada'gaina jideihɨlyɨ. Sara yapɨjɨ duzideihɨlyɨ ‘Gotɨyai a'mweraavɨ maremwaaide' yɨma'naabathehaa' sarɨmɨnyɨna mena aya kɨgaa' yɨma'naabɨwaka.’ Sara duzideihɨlyɨ. 10Kɨrɨ' sarɨmɨ anga naanga pɨbanna kulaawapɨjɨ sahɨbanyara kunnya angengɨna mihɨmakwɨyɨ kihyapɨri yɨ anga dazabadaa'nya tu'maangeba davaawapɨjɨ dara dɨzideihɨlyɨ 11‘Sarɨmɨre anga dazabadaa'nyɨ kwaatɨryamɨlɨka naarɨmɨre sɨvɨlyangɨ nehɨmɨwɨ'nɨwake sarɨmɨnyawɨnna ayɨna yɨhɨpurakɨrasɨ'naabakadengɨ. Sare' kɨrɨ' sɨmunya nayaa dara jawɨrila! “Gotɨyai a'mweraavɨ maremwaaide' yɨma'naabathehaa' mena aya kɨgaa' yɨma'naabɨwaka!” 12Nɨmɨ yɨhɨthɨvanɨge. Yɨrɨka aaya sarɨkɨ anga naanga dazahɨbanyaraavɨ taanginya naanga wɨjaavadere. Taanginya daza' kayaa'nanyara Sothomɨ mwaalyaraavɨ taanginya naange' wɨjaavade' wavɨlavadesɨ.

(Matɨyui 11:20-24)

13We'! Korazinɨ mwaalyaihɨle! We'! Betɨzaaitha mwaalyaihɨle! We'! Nɨmɨ anga Taayaajɨ anga Saaithonɨjɨ sabanyaai nɨmɨre dɨragɨnya' yɨwɨjɨ kwajɨ sarɨmɨre angeba nɨmɨ yebaaibɨ' yɨ sarevɨ sɨnnawɨ yɨme'nya'bɨ' sabanyaalyara kale'na baazɨ'ma'nya mumunyɨ'nɨka baazɨ'ma'nadɨvɨ' kwaagɨsavɨ mwaalapɨjɨ sɨmunya mudɨke' kyawɨpɨdɨka! 14Sare kɨrɨ' Gotɨyai a'mweraavɨ maryawɨbwata yadehaa' taanginya naange' Taayaajɨ Saaithonɨjɨ sabanyaalyaraavɨ wɨjaavadere. Taanginya naanga sarɨmɨnyɨ yɨhɨzaavade' yɨ sahwaraavɨrevɨ wavɨlavadesɨ. 15Nabaai Kaapanɨyamɨ mwaalyaihi ‘Nemɨ Sɨgunyavɨnna nennya yaya makɨlaana!’ dadɨvɨ' kɨrɨ' yune Dɨkevɨna dalaawideihɨlyɨ.

16A'mwei sarɨmɨre yagaalya kadɨka nayaa yɨhu'najai yɨ sai nɨmɨre yagaalya kadɨka nyu'nadelyɨ. Nabaai a'mwei sarɨmɨnyɨ bule'na yɨhɨzaavajai yɨ sai nɨmɨnyɨ bule'na nyɨjaavadelyɨ. Kɨrɨ' nɨmɨnyɨ bule'na nyɨjaavajai yɨ sai nɨmɨnyɨ nyɨmaryasaabaka sai kwarɨjɨ bule'na wɨjaawakelyɨra.” Jizaazai sara wɨda'.

17Dɨvi a'mwe sevedituyara ayɨna beva sahwara yɨlaaya naanga yɨna yadɨvɨ' wɨdɨna “Naangeigɨ, nemɨ gɨmɨnne yaya' kumɨnyɨ wɨdaasa'neina wɨdadaawori yɨmaka kwarajɨ nemɨre yagaalyangɨ mɨdɨdɨvɨ' a'mweraavɨ yagalya'makuna yesarera.” 18Sara wɨdɨna kye' sai wɨdɨna “Yɨmakeraavɨ wɨdaasɨwa'daasagaa' nayaa dara wangamwa'de ‘Yɨraayavɨ yɨ'munya pidevaaibɨ' Saataanɨmɨre dɨragɨnya' yarai bwalarakelyɨ.’ 19Yɨthaanyi, sarɨmɨnyɨ dɨragɨnya' mena yɨhɨzaawa. Yɨ sarevɨdaa'nyɨ naawɨnaanyaraavɨjɨ marayɨnɨgaawalyaraavɨjɨ sɨvɨlya' yɨnɨga bɨza'jɨvaibɨneihɨlyɨ. Nabaai Yɨkamaangerɨne dɨragɨnya yuya sangɨ yɨnɨga wi'na davɨlayideihɨlyɨ. Sarevɨ sarɨmɨnyɨ kayaaka yɨgalakya'ne yuya pɨnɨ sa kayaaka yɨnɨga wi'na yɨhigalakade mɨ'. 20Sare kɨrɨ' sarɨmɨ yɨlaaya myadɨvɨ' dara yɨvanɨgasaihɨlyɨ ‘Yɨmakera nemɨre yagaala dɨvanɨgo dangɨ mɨdɨnna kyɨwaa' wɨdaasɨvanɨgorera.’ Aawa. Sabwi maalɨkebulyɨ. Sarɨmɨnyɨne yaya Sɨgunyavɨ mena yavɨkaryakɨwakebwi naangebulyɨ. Sare'na Gotɨyarɨna yɨlaaya nayaa jɨla!”

(Matɨyui 11:25-27; 13:16,17)

21Dazagaasagaa' Kurya Tewaanyai Jizaazare sɨmunyavɨ yɨlaaya yɨwagɨmwaaihɨna yɨna kya' sahwai wɨdɨna “Nɨmwai, gɨmɨ saigɨ Sɨgunyavɨnajɨ Kwaakevakɨnajɨ yuna Naangeigɨnyɨ. Gɨmɨre yaya' munyaba makimanɨge. ‘Su! Su!’ Gɨmɨ a'mwe daraavɨ sɨkulɨya myaraavɨna yuya da wibwarɨdakuwaanyaigɨnyɨ. Yɨ a'mwe sɨmunnakeraavɨnajɨ sɨkulɨya yaraavɨnajɨ yuya da lɨka yulyakɨwaanyaigɨnyɨ. Yɨ sare'na gɨmɨre yaya' munyaba makimanɨge. Yo, Nɨmwai gɨmɨre sɨmunya sabwi yune sasarebulyɨ. Sare'na sara yadɨnyaigɨnyɨ.” 22Sara wɨdɨna yaka a'mweraavɨ wɨdɨna “Nɨmaamaangei sɨmunya yuya nyɨmarɨmwangakeinyɨ. Sarevɨdaa'nyɨ Gawaalɨvɨ aaya kaavɨlya' yawɨrangadei a'mwe aane pwai kwai mɨ'. Aawa. Sahwarɨ Nɨmwai yune gave sahwaina yawɨrangadelyɨ. Sarevɨ nabaai Nɨmwarɨ yawɨrangadei a'mwe aane pwai kwai mɨ'. Aawa. Sahwarɨ yune Gawaalɨ'na yawɨrangadelyɨ. Nabaai a'mweraavɨ Gawaalɨ' Nɨmwarɨ wibwarɨdaakwajara, sara Nɨmwarɨ yawɨrangabɨ'dere.”

23Yune gamɨre mɨdɨdɨvɨsarana Jizaazalyɨ ye'mwannamwaaleva yɨ sahwai kumɨnyɨmagɨnna gɨnyɨma'nyɨna yaka wɨdɨna “Sarɨmɨ wangamanɨgasangɨ pwara wangadɨvɨ' sahwara yɨlaaya naanga yadɨvɨ' tewaanaanga winadere. 24Sare' dare'nesɨ. Nɨmɨ yɨhɨthɨvanɨge. Ne pɨropetɨya kwalaalyarajɨ ne kingɨya kwalaalyarajɨ yuyangɨ sarɨmɨ tɨnna wangamanɨgata sangɨ ‘Wanganaana!’ deva yeta kɨrɨ' sahwara tɨnna mwanganyɨna. Nabaai yagaala sarɨmɨ kadɨka wɨ'nɨvanɨgata dazangɨ ‘Kadɨka wɨ'naana!’ deva yeta kɨrɨ' sahwara kadɨka mu'nyɨna. Sare'na yɨlaaya jɨla!”

Samerɨyadaa'nya tewaanyai yɨkamaangerɨna kale wiakerɨnesɨ.

25Sagaa', yɨthaa, kɨwɨnyangɨ wɨjɨwaakade pwai Jizaazarɨ yaamɨjɨ walapapalakya'nei daavɨna yaka wɨdɨna “Wɨjɨwaakadɨnyaigɨ, gara ya'mujɨ yuyagaa' yuyagaa'ne gaala mwaalyabwi maa'muneinyaka?” 26Sara wɨdɨna kya' sai wɨdɨna “Kɨwɨnyavɨ be yagaalya' dɨnɨkevaka? Gɨmɨ gatha'dara dangamanɨgɨ?” 27Wɨdɨna kya' sahwai ja'nawɨdɨna “Naangei gɨmɨre Gotɨyai sahwarɨna gɨmɨre sɨmunya yunevɨ yuna tewaanya gɨvu'nadeigɨnyɨra. Nabaai gɨmɨre kurya yuyarɨ yuna tewaanyarɨnajɨ gɨmɨre dɨragɨnya yuyavɨ yuna tewaanyarɨnajɨ gɨmɨre sɨduta yuyavɨ yuna tewaanyarɨnajɨ gɨvu'nadeigɨnyɨ. Nabaai yune gɨmɨ saigɨnyɨna tewaanya gɨvu'nadevaaibɨ' a'mwe pwarɨna avaaimwaalya kwarɨna tewaanya nayaa gɨvu'nada duhaimwadeigɨnyɨ.” 28Wɨdɨna kya' sai wɨdɨna “Gɨmɨ yagaala nebulya' ja'nanyɨdɨwaanya'. Yɨ sasara ya'gɨzɨ yuyagaa' gaala dɨmwaaideigɨnyɨ.”

29Sare' kɨrɨ' sɨdu'nakei yawɨ'na “Pwara nɨmɨnyɨna yawɨpɨka! ‘Sahwai sasarebwine yɨda'maraangei mwaaidelyɨ.’ ” Sara yawɨ'na yaka Jizaazarɨ wɨdɨna “Nɨmɨnyɨ avaaimwaalyai bewalaka?” 30Sara wɨdɨna kya' Jizaazai sahwarɨ dara ja'nawɨdɨna “Juya pwai Jeruzaalemɨ yagalya'mavaka Jerikonei kaanya waidawadaa'nyɨ tutaanyavɨ a'mwe yɨpalamaa'dɨvɨsara sahwarɨ bɨramaareva sahware gɨlyɨvɨta yuya yɨpalamaa'na yɨna yeva yɨraipɨvalakɨna yɨna yeva mala naanga mi'na tameva balya'neba yagalya'ma'na yɨna yeva kaanna wɨna. Sarei sai tutaanyavɨ warɨna yadɨ'nyɨ sai mena balya ya'neba. 31Dazagaa' tutaanya dazavɨ Gotɨyarɨna mubɨthɨka yɨra'dei pɨrizɨya pwai kaanna wɨna. Kaanya sara wodehaa' a'mwe sarɨ tɨnna wanganalɨkɨmawakaabɨna yaka sarɨ wangamabɨna yɨna yaka tutaamaangebaarɨ yaaikaanna wɨna yaka wavɨlakuna. 32Sasare sahɨbaaibɨ' nabaai Gotɨyare Angevɨ wɨdaayadei Livaaya pwai sahimagɨ bi'ma'na yɨna yaka a'mwe sarɨ kave wanganyɨkɨmawakaabɨna yaka sarɨ wangamabɨna yakegaa' tutaamaangebaarɨ yaaikaanna wɨna yaka wavɨlakuna. 33Nabaai a'mwe Samerɨya mwaalya pwai Juyara jɨkurɨtɨnna yadɨvɨsaraavɨdaa'nyai tutaanyavɨ kaanya badehaa' a'mwe sai wa'dɨsɨyaba bi'ma'na. Mi'na bi'ma'na yaka sahwarɨ tɨnna wanganna yaka kale naanga yenyɨ'nanganna. 34Sara yakei sahwaryabanna wɨlaawɨna yaka gamɨre kɨlaakejɨkɨ mala tamagɨthaaihɨresangɨ welivananyasɨ waainɨyasɨ dɨngavu'na yaka wa'waaya sangɨ wɨla pwɨyɨna. Sara mena yaka a'mwe sarɨ dɨhaa'bwa'na yaka gamɨre dogiyarɨ munyaba yɨlamaramwaaihɨna yaka kaanna makwalaawɨna, angavaavɨhaanya wodɨvɨsara waraawia'ne angevɨna marakaawɨna yaka nayaa maremwaaina. 35Sarevɨ yɨrɨka dɨvidaa'nyarɨkɨ gamɨre gɨlyavɨ nɨgwia pukaai daapɨna yaka a'mwe anga angavaayara warya'ne savɨ gyakwarɨ wɨjaavɨna yaka wɨdɨna ‘A'mwe datharɨ nayaa dɨmaremwaaidelyɨra. Nabaai gɨmɨre nɨgwia pɨnɨjɨ a'mwe darɨna yɨgainamayɨ'dɨza' yɨ ayɨna ba'mujɨyagaa' nɨmɨre nɨgwia bahɨzaavɨdeinyɨ.’ ” 36Jizaazai sara wɨdɨna yaka wɨdɨna “Dahaa' gɨmɨ gara dahayawɨ'mwaana? Daraai dala saraavɨdaa'nyɨ pwai a'mwe yɨpalamaa'dɨvɨsara sara kye' kayaaka yɨnaka dazarɨna avaaimwaalyai yɨma'nakei bewai dɨngaka?” 37Sara wɨdɨna kya' sahwai wɨdɨna “A'mwe kale kwia' gaimwanga yaka dazalyɨ.” Wɨdɨna kya' Jizaazai wɨdɨna “Gɨmɨ wawo'gɨzɨ avaaina sasara jɨtheigɨnyɨ.”

Maathasɨ Maarɨyaasɨ kɨnadaare angevɨnesɨ.

38Kaanya wodɨvɨsagaa' Jizaazai anga pɨbanna kaanya wɨlaawɨna. Kaanya wɨlaawɨna kya' a'mwe pɨrɨ' gamɨnne yaya' Maatha' sahɨrɨ' gamɨre angevɨna “Dɨneyɨrɨ'marɨmwaaihya!” wɨdɨna. 39A'mwe sare' gamɨnyɨ ganyaabulaange' sahɨrɨvɨne yaya' Maarɨyaa' kɨnɨnnakesɨ. Maarɨyaa sa' Naangere sɨvigɨ'nyɨryawɨ bulamwaaina yaka sahware yagaala dadaa'nyɨyangɨ kadɨka bulawɨ'bale'na. 40Kadɨka bulawɨ'bale'na yadɨ'nyɨ Maatha' tɨka wapaaya yovɨrawakya' wawɨnya kwalaalya biwɨna. Sara biwoda gamɨre sɨmunyai kewi kewi sɨmunya yawɨ'daa'nyɨna. Sara yawɨ'daa'nyɨna yake' gamɨnyawɨnna wɨlaabɨna yaka wɨdɨna “Naangeigɨ, nɨmɨnyɨ nyɨnyaabulaange' nɨmɨnyɨ gave'nyɨ nyagalya'makuwake'nyɨra. Sare'nyɨ tɨka wapaaya yovɨrawakɨvanɨgena. Ai, gɨmɨ dazavɨne'na sɨmunya myawɨrijɨvanɨgɨna? Nɨmɨnyɨna ‘Wɨgaimwagana!’ da'gɨzɨ sara duthana!” 41Kɨrɨ' Naangei sahɨrɨvɨ ja'nawɨdɨna “Maatha', Maatha', gɨmɨ sɨmugwalaalya yawɨ'dɨ gɨmɨre sɨmunya' yawɨta kwalaalyangɨna yɨwa'nadɨkaata yɨvanɨkesɨ. 42Kɨrɨ' gave pɨrɨ'nanya' wɨmudaasɨvanɨ'. Sare'na dare'nanyɨ. Maarɨyaa' tewaanya daza' maa'manɨke'nanyɨra. Sahɨrɨvɨ sa' tewaanya daza' mamarasɨ'nɨwɨna!”

Currently Selected:

Lukɨ 10: byr

Highlight

Copy