Lukɨ 8

Wawɨnyavɨ witɨzɨla pɨraihɨrakya'na dɨnɨkebwinesɨ.

(Matɨyui 13:1-9; Maakɨ 4:1-9)

1Dɨvi maalɨkegaa' anga naangebanyajɨ anga maalɨkebanyajɨ Jizaazai kaanya yamarina yada Gotɨyai maremwaaidevɨne yagaala tewaanya' wɨjɨwaakɨna. Sagaa' sɨvɨlɨrɨdaa'nyɨ pwaraalyara gamɨjɨ ye'mwannayamarina. 2Nabaai a'mwe pɨnɨ, sɨnnawɨ kɨgaa' Jizaazai kumɨjɨya pɨnɨngɨ yɨmakera marasɨ'naka pɨnɨngɨre nalaaya marasɨ'nake, sa kɨnɨjɨ sahwalyɨ ye'mwannayamarina. A'mwe pɨrɨ' Maarɨyaasɨ. Sahɨrɨvɨna Maahɨthaala mwaalyava wɨdadɨvɨsasɨ. Sɨnnawɨ Jizaazai sahɨrɨvɨ yɨmaka ata purɨdaa'nyɨ pwaraainanyara marasɨ'nakesɨ. 3Nabaai pɨrɨ' Jowaana', Erotɨyare angevɨ maremwaaide Suzaamɨre a'mwesɨ. Pɨrɨ' Suzanasɨ. Nabaai a'mwe yuya kwalaalya pɨnɨjɨ sahɨnɨjɨ sahwalyɨ ye'mwannɨguna. A'mwe daza Jizaazarɨjɨ gamɨreraavɨjɨ kumɨre gɨlyɨvɨsangɨ wɨgaimwagesangɨ.

4Sarevɨ a'mwe kwala bwa'naanya naangera bi'bwa'nemwaaina yadɨvɨ' anga pɨnɨngɨdaa'nyara gamɨnyawɨnna yɨkabɨna yɨkabɨna. Yɨkabɨna yɨkabɨna yɨna kye' yagaala ke'ba'nanya' wɨdɨna 5“Pɨraihɨrakade pwai witɨzɨla pɨraihɨrakya'nei wɨna. Wɨna yaka wawɨnyavɨ witɨzɨla pɨraihɨrakamarivanɨkelyɨ. Sai pɨraihɨrakɨwodaasɨ nabaai witɨzɨla pɨnɨ tusavɨ bwalaraawɨna. Sare sangɨ nabaai a'mwera sɨvɨlyajɨ paihɨramarina yadaapi yusara sɨgunyavɨyara tɨka maranyɨna. 6Nabaai witɨzɨla pɨnɨ sɨlaangevɨ kwaaka maalɨkevɨ bwalaraawɨna. Sa yɨrɨ'na yaka kɨrɨ' kwaakeva' aalya tɨ'gɨrya maayavakɨ sarevɨdaa'nyɨ sɨla sasare daza yɨnahu yawaka baidaa'na yaka balɨna. 7Nabaai witɨzɨla pɨnɨ wɨla lannakebaraayaba bwalaraawɨna. Sare sa wɨla lannakebarajɨ ye'mwannayɨrɨ'na yɨna yaka a'nɨngɨ dathɨwaaina. 8Nabaai witɨzɨla pɨnɨ kwaaka nawɨ'nya mɨnarɨnakevakɨ bwalaraawɨna yɨnɨke sa yɨrɨ'na yaka tɨka munne kwalaalya yɨ'nyɨna. Darebɨsa yɨ'nyɨna, gavemɨlɨkɨdaa'nyɨ waanɨ aadɨretɨya yɨ'nyɨna.” Sara wɨdɨna yaka jaka dɨragɨnna wɨdɨna “A'mwe kadɨ'nakei yagaala dathavɨ kadɨka nayaa wɨ'nana!”

(Matɨyui 13:10-17; Maakɨ 4:10-12)

9Gamɨre mɨdɨdɨvɨsara gamɨnyɨ ke'ba'nanya dazavɨne'na yagaala kaavɨlya'na yɨdaanganna. 10Yɨdaanganna kye' sai wɨdɨna “Sarɨmɨnyɨ Gotɨyai gannya maremwaaidevwina yulyakɨyagaala dɨnɨka aaya kaavɨlyavɨ yawɨranganya'neihɨrɨ mena yɨhibwarɨdaakuwakelyɨ. Sarevɨ kɨrɨ' a'mwe pwara yune ke'ba'nanya yagaalyavɨ kadɨka wɨ'nɨvanɨga'. Sarevɨdaa'nyɨ

‘Tɨnna wangadɨvɨ' kɨrɨ' yawɨrangadɨvɨ' mɨ'.

Kadɨka wɨ'nadɨvɨ' kɨrɨ' wɨ'namaa'dɨvɨ' mɨ'.’

(Matɨyui 13:18-23; Maakɨ 4:13-20)

11Ke'ba'na yagaala dazavɨne aaya kaavɨlya' yɨ daresɨ. Witɨzɨla daza yɨ sa Gotɨyare yagaalyasɨ. 12Nabaai witɨzɨla pɨnɨ tusavɨ bwala'daawade, yɨ sa a'mwera yagaalya kadɨka wɨ'nadɨvɨsa'nesɨ. Kɨrɨ' dɨvidaa'nyɨ Kotɨya Maryadei badehaa' kumɨre sɨmunyavɨ yagaala daza' marasɨ'delyɨ. Sai ‘Gotɨyarɨ nalɨmwabɨka! Sara kyapɨjɨ Gotɨyai nuvadaihasamaaradɨka!’ daka marasɨ'nadelyɨ. 13Nabaai witɨzɨla pɨnɨ sɨlaangevɨ kwaakejɨkɨ bwalaraawɨna, yɨ sa a'mwera yagaalyavɨ kadɨka wɨ'nadɨvɨ' wɨ'namaa'na yadɨvɨ' savɨne'na yɨlaaya naanga yɨna. Sahwara pwipula maayara maalɨkegaa'na lɨmwadɨvɨ' kɨrɨ' yɨjɨwaala pɨgasa lɨka sangina yɨgɨ'daa'dɨvɨsare. 14Nabaai witɨzɨla pɨnɨ wɨla lannakebaraavɨ bwala'daawade yɨ sa a'mwera yagaalya kadɨka wɨ'nadɨvɨ' kaanya yamaryadaapɨjɨ taanginya dala nabinya pɨburajɨ nɨgwia gɨlyɨvɨta sajɨ Kwaaka davakɨya yɨlaaya dala nabinya saburajɨ wɨdathɨvaidere. Yuya sa Gotɨyarɨ mwagi'nadengɨ. Sarevɨdaa'nyɨ kumɨre tɨka wapaaya sa yɨ'nabaladengɨra. Bwɨyangɨra. 15Kɨrɨ' witɨzɨla kwaaka nawɨ'nya mɨnarɨnakevakɨ bwala'daawade daza, yɨ sa a'mwera kumɨre sɨmunya nawɨ'nyaangevɨ Gotɨyare yagaalya' kadɨka wɨ'nadɨvɨ' yuna dɨragɨnna lɨmwaga'na. Sara yadɨvɨ' taanginya wiadaa'nyɨ dɨragɨnna kuna yadɨvɨ' tɨka munne naanga yɨma'nadaa'nyɨ mwaalɨna.

Dɨ'baake' yɨ'bɨnyavɨ yɨlɨmwaaihya'nesɨ.

(Maakɨ 4:21-25)

16A'mwe aane pwai kwai laamɨvananya' yewɨta'da maa'gulyavɨ amwidaa'nyɨ yulyakadei mɨ'. Nabaai se warya'ne yɨ'bɨnyavɨ dalaangevɨ marulyakadei mɨ'. Aawa. Laamɨvananyavɨne yɨ'bɨnyavɨ a'ba munyaba yɨlɨmwaaihadesɨ. ‘A'mwera angevɨ bulapɨriyara dɨ'baaka dazavɨ tɨnna wangabɨka!’ dada munyaba yɨlɨmwaaihadesɨ. 17Sare' dare'nesɨ. Yuya lɨka yulyakɨnɨke dɨvi nabaai sa ku'maayaba yuna yalɨku'naraabathengɨ. Yuya bwakakɨnɨke dɨvi nabaai sa ku'maayaba jalɨku'naraabathengɨ. Sare sangɨ nabaai a'mwera yuna yawɨrangabɨ'dengɨ. 18Sarevɨdaa'nyɨ sarɨmɨ mala nayaa jɨwannyɨla! Sara yapi nɨmɨre yagaalyavɨ kadɨka nayaa dɨnyu'nyideihɨlyɨ. Sare' dare'nesɨ. A'mwe pwai nɨmɨre yagaalya' lɨmwagarojɨyarɨ sare sarɨ nabaai Gotɨyai lɨmwanga pɨbulyɨ yanga kuna wɨjaavadelyɨ. Kɨrɨ' pwai nɨmɨre yagaalya' malɨmwagaryajai nebulya'na kwaasɨ yawɨ'manɨke ‘Mena lɨmwamanɨgena,’ yawɨ'manɨke'na, yɨ sa Gotɨyai marasɨ'nadengɨ.” Jizaazai sara wɨdakesɨ.

Jizaazarɨ ganaangesɨ Jizaazarɨ gahwaalaanga kwaraavɨjɨnesɨ.

(Matɨyui 12:46-50; Maakɨ 3:31-35)

19Sagaa' gamɨnyawɨnna ganaangesɨ gahwaalaangerajɨ yɨkabɨna. Kɨrɨ' a'mwe kwala bwa'naanya naangera kwala yɨ'bwa'nyɨna yadaapɨjɨyavɨna gamɨnyaba aya kɨbanna gidɨku' mulaabi. 20Mulaabi kye' sahwarɨ a'mwe pwara wɨdɨna “Gɨmɨnyɨ gwaangesɨ gɨmɨre jɨhwaalaangerajɨ tɨnna gwanganya'nera mwasawɨ bathaakava.” 21Wɨdɨna kye' kɨrɨ' sahwai sahwaraavɨ ma'maa'na “A'mwera Gotɨyare yagaalya' kadɨka wɨ'nadɨvɨ' mɨdɨbɨzara, yɨ dazara nɨmɨnyɨ nɨwaavajɨ nɨmɨnyɨ nyɨgwaalaangerera.”

Jizaazai yɨhu'maanarya' maanga kuda' mudarake'nesɨ.

(Matɨyui 8:23-27; Maakɨ 4:35-41)

22Yɨrɨka pɨrɨkɨ sɨpɨya pɨrɨvɨ gamɨre mɨdɨdɨvɨsarajɨ yɨladɨkwosɨ'namwaaina yaka kumɨnyɨ wɨdɨna “Nemɨ aalɨbunyavɨ pimagɨ, kengimagɨnna bwalyawaadeinera.” Sara wɨdɨna yaka kaanna wɨna. 23Sɨpɨya' kaanya wodaa'nyɨyagaa' sai se warɨna. Se warɨna yadɨ'nyɨ aalɨbunyavɨ yɨhu'maanarya' yɨma'nyɨna kya' sɨpɨyavɨ bwaladɨ'naawɨna yadɨ'nyɨ kewɨnɨ walamaradathata'neba aya kɨba mena yɨma'nyɨna kya' 24bulaawɨna yeva gamɨnyɨna bulyɨdɨkavaawɨna yevegaa' wɨdɨna “A'mwe naangeigɨ! A'mwe naangeigɨ! Yuna dahaasagaa' nemɨ yaraina yɨwawaade'na yɨwoneva.” Wɨdɨna kye' daavɨna yaka yɨhuta sasɨ aalɨmavajɨnaaka naanga sasɨ maanga wɨdɨna. Sara wɨdɨna kya' yɨhuta yɨnahu muda'na kya' aalya' ayɨna aalɨmavajɨnaaka mima'nyɨna. 25Sara kya' sagaa' sai wɨdɨna “Sarɨmɨre dɨragɨnna lɨmwangebwi gawɨ warɨka!” Sagaa' sahwara lɨka yɨna yadɨvɨ' atɨka maru'na'na yadɨvɨ' dɨnyɨna “Sarevɨdaa'nyɨ be a'mwelaka! Sai yɨhusasɨ aalyasɨ maanga kudɨwa' kadɨka wɨ'nyɨna yɨwaai!”

Jizaazai a'mwerɨ yɨmakeraavɨ marasɨ'nake'nesɨ.

(Matɨyui 8:28-34; Maakɨ 5:1-20)

26Dɨvi sɨpɨyɨhuselɨya' makuna yaka Geraaza sɨmagɨnna yɨ'mavaawɨna. Anga dazaba aalɨbunya Galɨli pimagɨ warɨkeba. 27Yɨ'mavaawɨna kya' Jizaazai sɨpɨyavɨ yagalya'mavaka tɨyawɨnna wɨlaawɨna kya' a'mwe anga naanga dazabnne mwaalyai sahwarɨ wɨrata'nyɨna. A'mwe dazarɨ yɨmaka pwara wɨmwaaidapiyai. Saamɨnyagaa' sahwai kwaabɨhannya kuna mira'nyadei. Sahwai anga aane pɨrɨ' kɨrɨvɨ mwaaidei mɨ'. Aawa. Sai gɨlekavi'nɨnnyabanya mwalamaryadelyɨ. 28A'mwe dazai Jizaazarɨ tɨnna wanganaka jaka danganna yɨna yaka gamɨre sɨvigɨ'nyɨryaba aya kɨba wɨlaabɨna yaka kwaakevakɨ bula'na yaka jaka naangave'na danganna “Jizaazai, Gotɨya yuna munya ke'bevanyareigɨ! Nɨmɨnyɨ gara dɨnyɨde'na bahɨneigɨnaka? Akai, dɨragɨnna yɨdaanganna gima! Nɨmɨnyɨ daanga manyɨjaavɨnnera!” 29Sara wɨdake' dare'nesɨ. Jizaazai yɨmaka dazarɨna mena wɨdɨna “A'mwe dazarɨ yagalya'makuna yɨna ja!” Nabaai sare' dare'nanyɨ. Saamɨnya kwalaalyagaa' yɨmaka dazai a'mwe dazarɨ galalɨmwaga'delyɨ. Sarevɨdaa'nyɨ a'mwera yuyagaa' sahwarɨ asawaalyɨ wɨla senɨyabaalyɨ yapwekɨna yadɨvɨ' sɨvɨlyaraalyɨ wɨla yapwekɨna yadɨvɨta sahwarɨ maredaa'dɨvɨsalyɨ. Kɨrɨ' sahwai yuya kwaari'mawɨla kɨbara yesɨvalakɨwɨna yada sarevɨ yɨmaka dazai a'mwera mamwaalyɨgata pimagɨnna yɨdangɨramakwodelyɨ. 30“Daanga manyɨjaavɨnnera!” jaka kuda' Jizaazai sahwarɨ yɨdaanganna “Gɨmɨnne yaya' aaihwaigɨnaka?” Yɨdaanganna kya' sai wɨdɨna “Kwalaalyainyɨ.” Yɨmaka kwalaalyara gamɨnyɨ wɨlamwaainɨkerɨna “Kwalaalyainyɨ,” wɨdɨna. 31Wɨdɨna yaka yɨmaka dazara jaka dɨragɨnna danganna “Gɨmɨ nemɨnyɨ dɨka kewewɨnneinaavɨna mamaraneyaasɨnnera!” 32Sara dɨragɨnna danganna yevegaa' yaawarɨkwala naange' mugunyavɨ aya kɨba kurɨvaarɨya nɨdaa'nyɨna yadaapi yɨmaka dazara yawɨ'dɨvɨ' “Daanga naangeba nalarawaadɨka!” jaka dɨragɨnna danganna “Yaawarɨkwala naanga dazaraayawɨnna kanedaasa'gɨzɨ yuimɨlaana!” Dɨragɨnna sara danganna kye' wɨdanganaasɨna yɨna. 33Wɨdanganaasɨna yɨna kya' yɨmaka dazara a'mwe dazarɨ yagalya'ma'na yɨna yeva yaawaryaraavɨre munyɨkaavɨ wiminna. Sara kye' yaawarɨkwala daza' davaanyavɨ kaanyave'na dɨragɨnna walaawɨna. Sare sara aalɨbunyavɨ walakuna yɨna yeva aalya mihuna yɨna yeva yuya kwalya' baihɨrirɨ'na ye'.

34Yaawaryaraavɨ yɨ'dɨvaidɨvɨsara sasara yɨma'naka dazangɨ tɨnna wanganna yeva lɨkaanya wɨna. Lɨkaanya wɨna yeva anga naangebanyavɨjɨ wawɨnangengɨjɨ mwaaidɨvɨsaraavɨna yagaala daza' wɨjɨwakamaryaawɨna. 35Sara yɨna kye' a'mwera dazangɨ tɨnna wanganaawia'nera Jizaazaryawɨnna bi'ma'na yɨna yeva a'mwerɨ yɨmakera mena yagalya'makwawesarɨ tɨnna wanganna. Sai kwaabɨhannya' yɨra'nɨkei gamɨre sɨmunyai nawɨ'nya yawɨ'da Jizaazare sɨvɨlyɨryaba gidɨku' aya kɨba mwaaidɨ'nyɨ. A'mwera dazavɨ tɨnna wanganeva lɨka naanga yɨna. 36Nabaai a'mwera sasare dazangɨ tɨnna wanganesara sɨnnawɨ a'mwe dazarɨ yɨmakera wɨlamwaaidapiyarɨ ayɨna tewaanya yavada'galakerɨna sara wɨjɨwaakɨna. 37Wɨjɨwaakɨna yɨna kye' a'mwe yuya anga Geraaza sɨmagɨdaa'nyara gamɨnyɨ wɨdɨna “Nemɨnyɨ neyagalya'mava'gɨzɨ kaanya dɨwona!” Kumɨ lɨka naanga yadɨvɨsa'na sara wɨdɨna. Sara yadaapi sɨpɨyavɨ dɨkwosɨ'na yaka ayɨna kaanna wɨna. 38Kuna mwaaidɨ'nyɨyagaa' a'mwe yɨmakera mena yagalya'makwaweta dazai dɨragɨnna yɨdaanganna “Nɨmɨ gɨmɨjɨ ye'mwannɨguma!” Sara wɨdɨna kya' kɨrɨ' sahwarɨ wɨdaasa'nerɨ wɨdɨna 39“Gɨnnya angebanna ayɨna kaanna dɨwodeigɨnyɨra. Sara wawo'gɨzɨ Gotɨyai gɨmɨnyɨ giwaka yuya sanna duzɨwaakɨdeigɨnyɨra.” Sara wɨdɨna kya' sarevɨdaa'nyɨ a'mwe dazai kaanna wɨna yaka gamɨre anga naangebanya yuyaraavɨ yagaalya' wɨjɨwaakɨna. Jizaazai gamɨnyɨ wɨvada'galaka yuya sanna wɨjɨwaakɨna.

Taaya' bainɨkesɨ a'mwe nalaavɨnakesɨ sawaarɨnesɨ.

(Matɨyui 9:18-26; Maakɨ 5:21-43)

40Jizaazai ayɨna kaanna bakevɨ a'mwe kwala bwa'naanya' wɨjɨma'naabɨna yeva yɨlaaya yɨna. Sare' dare'nesɨ. Yuyara sahwarɨna yemwaaina yadɨvɨ' yɨlaaya yɨna. 41Yɨlaaya yɨna yadaapi a'mwe pwai sahwarɨne yaya' Jaairazai bi'ma'na. Sai Juyaraavɨre lotuange' maremwaaide pwalyɨ. Sai bi'ma'na yaka Jizaazare sɨvigɨ'nyɨrɨ bula'na yaka dɨragɨnna yɨdaanganna “Nɨmɨre angevɨna dɨvama! 42Nɨnnya taaya' yune gave kɨrɨ'nanyasɨra. Yɨ gamɨre kwarame atɨraai sɨvɨlɨrɨdaa'nyɨ pwaraaibɨsasɨ. Sare'na sa' balade'na nebawa mɨka. Sare'na yarai dɨvama!”

Jizaazai kaanya wodaa'nyɨ a'mwe kwala bwa'naanya naange' gamɨnyɨ yunebanna bathakwamwadakuna. 43Bathakwamwadakuna yadapi a'mwe pɨrɨ' mwaalɨna. Dazahɨrɨ' yuyagaa' baizaaka ma'nada kuna mwaaidɨ'nyɨ kwarame sɨvɨlɨrɨdaa'nyɨ pwaraaina mwaainɨke'. Nabaai gamɨre nalaaya sasare daza' a'mwe tewaanya yavada'gala ya'nei aane pwai kwai mamwaalyɨna. 44A'mwe daza' gamɨnyɨ dusɨ bulyɨmagɨnna wɨlaabɨna yɨna yaka gamɨre baazɨ'ma'nyavɨre maangebaarɨ asa' dathɨwagaavɨna. Asa' sara dathɨwagaavɨna kya' sagaasagaa' gamɨre tawe' yaalɨka yɨlɨna yaka ayɨna mima'nyɨ. 45Ayɨna mima'nyɨ kya' Jizaazai wɨdɨna “Nɨmɨnyɨ asa' aai nyɨdathɨwamwaabɨka!” Wɨdɨna kya' sare'na yuyara mɨjadɨwɨlɨna “Nɨmɨ aawa. Nɨmɨ aawa.” Sara yɨna kye' Pitai wɨdɨna “A'mwe naangeigɨ, a'mwe kwala bwa'naanya naangera gɨmɨnyɨ gyahɨhɨpaledaakava. Yɨ sara yeva yunebanna gɨhɨpaledaakava!” 46Wɨdɨna kya' kɨrɨ' Jizaazai wɨdɨna “Pɨmɨlɨ' ata nyɨdathɨwamwakeinyɨra. Sare' dare'nesɨ. Nɨmɨ yɨbwakɨmanɨge. ‘Nɨmɨre dɨragɨnya pimagɨnya' mena wɨwakeinyɨ daaka!’ yawɨ'manɨge.” 47Wɨdɨna kya' a'mwe daza' yawɨ'na yaka “Gamɨnyɨna lɨka myulyaki yɨde'nyɨ daaka!” yawɨraka. Sarevɨdaa'nyɨ sa' lɨka naanga yɨna yada gamɨnyɨ aya kɨba kwaakevakɨ kwadaai bulagina. Sara yaka a'mwe yuyaraayaba gannya nalaaya'na asa' dathɨwagake' wɨjɨwaakɨna yaka nabaai wɨdɨna “Sara yena sagaa' nɨmɨre nalaaya' yarai yɨwɨwake'nera.” 48Dɨna kya' sahɨrɨvɨ wɨdɨna “Nyɨraavɨ, gɨmɨre dɨragɨnna nyɨlɨmwamwaanyabwi gɨmɨnyɨ ayɨna tewaanya gyavada'gaimwake'gɨnyɨ. Gɨmɨre munyɨ' kave kwaamu' wa'dozɨ kaanya dɨwona!”

49Sai yagaalya' kuna dadaa'nyɨ a'mwe pwai maremwaaidere angevɨdaa'nyai bɨna yɨna yaka maremwaaiderɨ wɨdɨna “Gɨmɨre jɨraavaange' mena kabaimwakɨra. Nejɨwaakaderɨ yaasɨwa'na mamakunnera!” 50Sara wɨdɨna kya' kɨrɨ' Jizaazai daza' kadɨka wɨ'naka ganɨmaangerɨ ja'nawɨdɨna “Gɨmɨ lɨka minnera! Gɨmɨ yune dɨragɨnna dɨnyawɨralɨmwagaka! Sare'na gɨmɨre kaimɨraaya' ayɨna tewaanya yɨma'nadesɨ.” 51Wɨdɨna yaka maremwaaidere angevɨna kaanna wɨna yaka a'mweraavɨ mwanganaki, gamɨjɨ angevɨna ye'mwannɨgulya'na. Aawa. Sahwai yune Pitarɨjɨ Jonɨmɨjɨ Jemɨzarɨjɨ taayavɨ ganɨmaangeyorɨjɨ maarɨna yaka gamɨjɨ ye'mwannɨgwina. 52Nabaai a'mwe yuyara kaimɨraaya dazavɨna kɨnna jakɨnna bazemwaihuna yadaapi kɨrɨ' wɨdɨna “Sarɨmɨ kɨnna madɨpɨnera! Sa' mena baimwaka' mɨka. Aawa. Sa' se warɨka.” 53Wɨdɨna yadaa'nyɨ gamɨnyɨ jɨka maregina. Kumɨ yawɨ'dɨvɨ' “Sa' mena baimwakesɨra,” bɨrala wɨdɨna. 54Bɨrala wɨdɨna kye' sarevɨ kɨrɨ' kaimɨraayavɨre asɨrɨ lɨmwaga'na yɨna yaka jaka wɨdɨna “Kaimɨraaya'gɨ dɨthɨkaaka!” 55Sara wɨdɨna kya' taaya dazavɨre kuryai gamɨnyawɨnna ayɨna bɨna yaka bulamwaaina kya' sagaasagaa' taaya' dɨkavamwaaina. Mi'na dɨkavamwaaina kya' sarevɨna sayorɨ wɨdɨna “Sahɨrɨvɨ wapaaya dumaarila!” 56Taayavɨ ganɨmaangeyoi atɨka maru'na'na yadaakɨlyɨ sahɨyorɨ dɨragɨnna wɨdɨna “Nɨmɨ yɨwe daza'na kɨrɨmɨyoihi a'mwe pwaraavɨ nujɨwaakikadɨka!”

Currently Selected:

Lukɨ 8: byr

Highlight

Copy