Maakɨ 3
3
Kwazaakegaa' Jizaazai pware ata kayaa'nanya' nayaa yavada'gala'.
(Matɨyui 12:9-14; Lukɨ 6:6-11)
1Lotuangevɨ ata pimagɨnyi yaalɨka mena yɨnɨkei mwaaidɨ'nyɨ Jizaazai ayɨna wɨlamwaaina. 2Wɨlamwaaina kya' “Jizaazai Kwazaakegaa' a'mwere asa' tewaanya yavada'gaina yajɨwaka?” deva A'mwe Perɨzɨyara bangana'na ye'. “Asa' tewaanya yavada'gaina yaja' nemɨ kotɨya wɨmwaaihɨna yaadeinaava,” deva bangana'na ye'. 3Nayaa bangana'na yadapi Jizaazai ata kayaa'nanyarɨ wɨdɨna “Tɨnnyabanna dɨthaaka!” 4A'mweraavɨ wɨdɨna “Kwazaakegaa'na kɨwɨnya gara dɨvanɨka? Kwazaakegaa'na tewaanya yɨja'nebwi sara dathɨvanɨka? Kwazaakegaa'na kayaa'nanya yɨja'nebwi sara dathɨvanɨka? Nabaai ‘A'mweraavɨ tewaanya mwaaibɨ'de'na dɨhaimwana!’ dathɨvanɨka? ‘A'mweraavɨ dɨramakya!’ kɨwɨnya sara dathɨvanɨka?” wɨdɨna. Sara wɨdɨna kya' kumɨ sara yagaala mujɨ, maadɨnna mwaalɨna ye'. 5Maadɨnna mwaalɨna kye' kumɨre sɨmunyangɨ ata yaalɨka yɨnɨkerɨna kumɨnyɨ kale mwiadaa'nyɨ Jizaazai wangamabɨna. Wangamabɨna kya' saraavɨne'na kale wiadaasɨ avaalyagaa' maadɨnna mwaaidapiyaraavɨna gamɨre sɨnna tɨka wɨda'daasɨ a'mwerɨ wɨdɨna “Gɨnnya asa' jɨwɨbwaka!” Sara wɨdɨna kya' ata yɨna kya' ata kayaa'nanya' maamɨdarya' yɨma'nyɨna. 6Maamɨdarya' yɨma'nyɨna kya' yɨme'nya'bɨ' Lotuangevɨ Perɨzɨyara bwalyuna yeva Erotɨyarerajɨ yɨ'bwa'nyɨna kye' jamungaje' “Jizaazai balade'na nemɨ gara yaadelaka?”
Kwala bwa'naanya aalɨbumaangebaarɨ mwaale'.
7Jizaazalyɨ gamɨrerajɨ saba yagalya'ma'na yeva Aalɨbunya Galɨlina wɨna. Nabaai kwala naanga kaanna wɨna. Kwaaka Galɨli mwaalyarajɨ Kwaaka Juthɨya mwaalyarajɨ 8Anga Jeruzaalemɨ mwaalyarajɨ Kwaaka Yɨthumɨya mwaalyarajɨ Aalya Jothanɨ pimagɨ mwaalyarajɨ Anga Taayaa Anga Saaithonɨ sabanyaai mwaalyarajɨ yuya sara “Jizaazai sana sana yɨvanɨkelyɨra,” deva gamɨnyawɨnna kaanna bɨna. 9Kaanna bɨna kye' kwala bwa'naanya naange'na gamɨreraavɨ wɨdɨna “Kwala bwa'naanya da' bule nanyɨnadɨka! Botɨya' nɨmɨnyɨne' jovɨrawakyɨla! Aalyavɨ wa'dɨ'nyɨ botɨyavɨdaa'nyɨ wɨjɨwaakɨdeinyɨ.” 10Sare' dare'nesɨ. Sara wɨdɨna yake'ne' Jizaazai a'mweraavɨ tewaanya yavada'gaina kya' nalaavɨnakera “Jizaazarɨ yɨmetavɨma!” dɨneva yɨmeta'na yesa'na wɨdɨna ya'. 11A'mwe pwara yɨmaka widɨvɨsara Jizaazarɨ tɨnna wanganeva gamɨnyawɨ wala'na yeva “Aakayɨ,” jaka dɨna “Gotɨyare Gawaalɨvaangeigɨnyɨra,” wɨdɨna. 12Sara wɨdɨna kye' Jizaazai yɨmakeraavɨ yagaala dɨragɨnɨnaanga wɨdɨna “Nɨmɨnyɨna ‘Gotɨyare Gawaalɨvaangelyɨ,’ madɨpɨnera!”
Jizaazai a'mwe atɨraai sɨvɨlyɨrɨdaa'nyɨ pwaraalyaraavɨ dahɨlaka'.
(Matɨyui 10:1-4; Lukɨ 6:12-16)
13Jizaazai mugunyangɨ wɨlaawɨna yaka “A'mwera nɨmɨrera yɨma'nɨpɨ'dera,” dakeraavɨ jaka wɨdɨna kya' kumɨ wɨlaabɨna ye'. 14Wɨlaabɨna kye' a'mwe atɨraai sɨvɨlyɨrɨdaa'nyɨ pwaraalyaraavɨ dahɨlakɨna yaka “Nɨmɨnyaba dɨmwaalyɨla! Nabaai yagaala wɨjɨwakamarya'na yɨhɨthaasɨdera! 15Yɨmakeraavɨ wɨdaasa'ne dɨragɨnya' yɨhɨzaavɨdeinyɨ,” wɨdɨna ya'. 16A'mwe atɨraai sɨvɨlyɨrɨdaa'nyɨ pwaraala sareraavɨne yaya darengɨra. Yɨ pwai Saaimonɨ yaya pɨrɨ' Jizaazai wɨdake' Pitai, 17yɨ pwaraai Jemɨzai Sevathiyare gawaalɨvaangelyɨ Jonɨ Jemɨzare gahwaalaangelyɨ sadaraai yaya pɨrɨ' wɨdake Bawanezɨzɨ (aangyagaalya'na Yɨ'muyagaainakeraai), 18yɨ pwai Edɨruyai, pwai Pilipɨ, pwai Baatolomyui, pwai Matɨyui, pwai Tomaazai, pwai Jemɨzai Alɨpɨyaazarei, pwai Tathɨyaazai, pwai Saaimonɨ “Kumɨreba Romɨyara wɨpɨka!” dadei, 19pwai Juthaazai Yɨzɨkerɨyotɨyai dɨvidaasɨ Jizaazarɨ yɨkamaangeraavɨna wibwarɨdaakwia'nei.
“Jizaazalyɨ Biyelɨzɨvulɨjɨ saraai yɨvanɨgi,” wɨde' Perɨzɨyara.
(Matɨyui 12:24-32; Lukɨ 11:14-23; 12:10)
20Jizaazai gannya angevɨ wɨlaabɨna. Mi'na wɨlaabɨna kya' kwala bwa'naanya yɨ'bwa'namwaaina kye' Jizaazalyɨ gamɨrerajɨ sara yɨna yɨna yeva “Wapaaya warana! Gotɨyare wawɨnya yaana!” deva wapaaya manyɨ ye'. 21Wapaaya manyɨ kye' Jizaazai yake'na gamɨre jɨlɨkaimɨraaya sara wɨ'neva “Nemɨ gamɨnyɨ marawaana!” deva kaanna bɨna ye'. Sare' dare'nesɨ. “Sɨmunya maayai mwaalɨka,” desa'nanyɨ.
22Kɨwɨjara Anga Jeruzaalemɨdaasara dɨna “Jizaazarɨ munyɨkɨ yɨmaka Biyelɨzɨvulɨ kɨnɨnnakelyɨra.” Nabaai dɨna “Yɨmakeraavɨ maremwaala naangei gannya dɨragɨnya' kujaava' Jizaazai yɨmakeraavɨ wɨdaasɨna yadelyɨ.” 23Sara dɨna kye' Jizaazai a'mweraavɨ “Kaajɨla!” wɨdaka ke'ba'na yagaala wɨdɨna “Saataanɨ Saataanɨmɨ gara yojɨ wɨdaasɨnannelaka? 24Kingɨyare a'mwera anga kɨba mwaalyara jaapaina yɨpɨja' mala bwa'nyɨna yɨpɨja' sahwara dɨragɨnya daapɨne' mɨka! 25A'mwe pɨnɨdaka kajapalemwalamaryapɨjɨ sanɨdaka dɨragɨnya daapɨne' mɨka! 26Savɨne'na Saataanɨjɨ gamɨrerajɨ jaapaina yɨpɨja' mala bwa'nyɨna kyapɨjɨ Saataanɨ maremwaaideva dɨragɨnya madaayɨ yannesɨ. Aawa. Savɨne'na Saataanɨ mi'nanyɨ. 27A'mwe aane pwai kwai a'mwe dɨragɨnyare gɨlyɨvɨsa kuka yɨpalamaasa'na gamɨre angevɨ mulaawi yannelyɨ. Arɨkewɨnyɨra. Sɨnnawɨ sai a'mwe dɨragɨnyarɨ wɨla pwɨyaja' dɨvi kuka yɨpalamaaradelyɨra. 28Yagaala da' jawɨka! Nebwina gɨthɨma! A'mwera kayaa'nanyabwi yɨvanɨgasabwi sabulyɨ Gotɨyarɨna yagaaibɨraizɨka ge ge dɨza yɨvanɨgasajɨ yɨvanɨgasara Gotɨyarɨ kudapɨjɨ Gotɨyai kayaa'nanya sa wɨmarasɨ'nadelyɨra. 29Sare kɨrɨ' Kuryai Tewaanyarɨna yagaaibɨraizɨka wɨdɨvanɨgasa yuyagaa' Gotɨyai mumarasɨ'nyɨ yadelyɨra. Aawa. Kurya Tewaanyarɨna bɨrala sabwina yɨwetawakya sabwi yuyagaa' yuyagaa' waragothevulyɨra. Sabwi Gotɨyai mamarasɨ'nyɨ yadelyɨra!” wɨdɨna ya'. 30Jizaazarɨna “Yɨmakei kɨnɨnnakelyɨ. Gotɨyare Kuryai kɨnɨnnakei mɨka,” dɨnesa'na Jizaazai sara wɨda'.
Jizaazarɨ ganaangesɨ gahwaalaangerajɨ wɨlaabe'.
(Matɨyui 12:46-50; Lukɨ 8:19-21)
31Sagaa' Jizaazarɨ ganaangesɨ gahwaalaangerajɨ bi'ma'na. Mi'na bi'ma'na yeva angevɨ mwasawɨ daaveva gamɨnyɨna pwaraavɨ wɨdɨna “ ‘Gɨmɨjɨyarajɨ gwaangesɨ mwaaihava,’ duthaawila!” 32Sara wɨdɨna kye' kwala bwa'naanya' gamɨnyaba wɨlamwaaleva wɨdɨna “Yɨthaa! Gwaangesɨ ja'mwerajɨ ja'mwejɨ sa mwasaba bamwaaleva gɨmɨnyɨna jaka dɨvanɨga'.” 33Jizaazai wɨ'naka ma'maa'na “Nɨnnya nɨwaa' berɨvaka? Nyɨgwaalaangera bewaraavaka?” 34Wɨdaka gamɨnyaba bamwaihwodapiyangɨ tɨnna wanganaka wɨdɨna “Yɨthaanyi! Dathara nɨwaasɨ nyɨgwaalaangerajɨ mwaaiha'. 35A'mwe pwara kwara Gotɨyai wɨdɨnɨke' sara yɨvanɨgasara sahwara nɨwaasɨ nyɨgwaalaangerajɨ nyɨnyaabulaangejɨ mwaaihava.”
Currently Selected:
Maakɨ 3: byr
Highlight
Copy
Compare
Share
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
