KECHENG 27
27
Jakob Aphan Isaak Kepahirme
1Isaak nonke sartang-lo, lapen amek checharchedet-lo. Alangli aso akleng aphan hang si pulo, “Po!”
Kopilo, pu la thak-lo.
2Isaak pulo, “Nang chinilo, ne sartang-lo, lapen thidap-prangpo. 3Nang thai lapen aso-heihei chepon-ra, det arlo damnon, lapen nephan ejonbak api pathinon. 4Ne ningkehang kechomesen ahan ajehak tun pamenon, lapen la nelong van non. La ne chotangdet aphi, ne thithe aphrang ne kepadu ahirjume nangphan nang-pitekangpo.”
5Iso aphan Isaak lam kethanbom ahut, Rebeka ke arjudunding-lo. Lasi Iso sekar kedam bar-et aphi, 6Jakob aphan bangpi pulo, “Iso aphan nonhet nangpo kethan alam ne arjudun long-lo, 7‘Nephan pi nevanpira la netunpinon. La ne chodet aphi, ne thithe aphrang nangphan Hemphu angno hirjume nang-pitekangpo.’ 8Non, lasi, po, ‘Rebeka ningjebomlo, ‘Nelam arjutha, lapen ne kepu aling le klemnon. 9Pi ahur along damra, lapen athu kedo abi jonni ingvainon, anke lahei ne tun longpo lapen lahei pen ajehak nangpo aning kedoknei ahan tun pipo. 10La nang alanglilong ponlongpo kepachoji aphan, alangli thithe ako la ahirjume nangphan nangpi tekangpo.”
11Bonta apei aphan Jakob pulo, “Nang chini Iso ke angmijanghu amonit, bonta ne ke nailep. 12Nepo nephan nepapho lote ne alang phan pachobeidet-lo pu chinipo; lasonsi ahirjume alar nephuthak ahirjuno si chevanrongpo.”
13La apei thak-lo, “Nangphuthak ahirjuno kepho an nephuthak le paklonang, po, ne kepu ateng le klemnon, lapen nephan damra bi nevanpinon.” 14Lasi halahei ke-endamjisi la damlo, lapen bangpi aphan vanpilo, lapen la apo aning kehang ahan bangpi tun pilo. 15Anke Iso akemenei bangpi hem kebi achoi bangpi endamlo, lapen lahei Jakob aphan pangchoilo. 16Bi areng-heihei la ari aphang along bangpi bat-lo lapen la angmikave achethok along an ta bat-lo. 17La aphan bangpi kechomenei ahan bangpi kepangdang ahim pen pen pilo.
18Anke apo along Jakob damlo, lapen pulo, “Po!”
“Kopilo” alangli thak-lo. “Nang komat abang-lo?”
19Jakob thak-lo, “Ne ke nangso akleng Iso lo; nang kepu ateng si ne keklemlo. Kanghon pen ingnira ne nangphan nangkevanpi a-ok chotha, anke nang nephan nepahirme unpo.”
20Isaak pulo, “Nang kopusonsi lapu-an kelongdap-lo, po?”
Jakob thak-lo, “Nang Arnam Hemphu si la kelongji nerap-lo.”
21Jakob aphan Isaak pulo, “Nangbang nang kepapholong jile nedung vangtha, po. Nang chenamsi Iso loma?” 22Apo adung Jakob damsi chepachinilo, lapen alangli pulo, “Nangse ke Jakob ase ason, bonta nangri-nangphang ke Iso ari ason.” 23Alangli Jakob aphan chinine det-lo, pima la ari Iso ari asonsi angmi dolo. Laphan alangli ahirjume kepiji dokdok-lo, 24bonta arjuthulo, “Nang chenamsi Iso loma?”
Kalang-lo, la thak-lo.
25Isaak pulo, “Nephan ok ajehak nevanpitha. Ne la chodet aphi, ne hirjume nangphan nangpipo.” Jakob la aphan vanpilo, lapen alangli phan kepajunjisi la drakha ahorlang ta vanpilo. 26Anke laphan apo pulo, “Nedung vang-ra, ne ingjuptha, po.” 27Alangliphan kangjup jisi la kevang ahut, la achoi angnim Isaak ingnim long-lo, lasi laphan alangli hirjumepilo. alangli pulo, “Kedokjin nesopo angnim ke Hemphu kepahirjumetang ahidi ason.#Ibr 11.20 28Arnam sining angsong pen ar-e nangpapi nang lapen nanghidi-heihei ho-or padonang! Nangphan alangli dorphlup asok-asang lapen drakha ahorlang nangpapi lonang! 29Det atum nangban paplang lonang, lapen rat atum nangphan pardomri nang. Nangdon-nangrap aphuthak nang pangrinang, lapen nangpei asomar atum nangphan pardomrinang. Nangphan ahirjuno kepi abang pahir junonang, lapen nangphan kepahirme abang ahirjume paplangnang.”#Kech 12.3
Isaak Ahirjume Iso Kehang
30Isaak ahirjume kepi patang-lo, lapen Jakob odet aphi, la a-ik Iso sekar pen nangchevoilo. 31La ajehak kechomesen ahan tunlo lapen la apo aphan ponpilo. La pulo, “Kanghon pen, po, ingnipamenon lapen ajehak nangphan nangkevanpi a-ok chotha, anke nephan nang hirjume nepi-unpo.”
32“Nang komat-lo?” Isaak arjulo.
“Nangso-akleng Iso-lo,” la thak-lo.
33Isaak keklemhur pangcheng-lo lapen abangbithe klemhurlo, lapen alangli arjulo, “Tangte hala komat-lo, pi that si la nelong kevan abang komat? Nang kevang aphrangchot-lang ne kecho. Halaphan si nehirjume padu pilo, la apotsi la ke kaike halaphanlo.”
34Iso la arjulongdet aphi, la hangserlo lapen aning hodaksi pulo, “Nephan ta nanghirjume nepinon, po!”
35Isaak thak-lo, “Nangmu vang-lo, lapen nechobeidet-lo. Halasi nangkelongji ahirjume pondet-lo.”
36Iso pulo, “La bataihini aphong-lo nephan la nekechobei. La amen Jakob#Ibri penke “chobei-abang” pu jonghe chepu seta. La sonu-sokleng nejakong pondet-lo, lapen non la ne kelongji ahirjume ta ponthudet-lang. Nang nephan isibak ahirjume nebipipema?”#Kech 25.29-34
37Isaak thak-lo, “Ne laphan nang phuthak chepahemphuji pitang lo, lapen la adon-arap an ne la aban paplangtang-lo. Laphan ne soksang lapen drakha ahorlang pitang-lo. Non ne nangphan nangkeklem piji thangnat ta avelo, po!”
38Apo aphan Iso choningri-bomlang: “Nanglong isinat ahirjume tong kedochotma, po? Nephan ta pahirmetha, po!” La kechiru pangcheng-lo.#Ibr 12.17 39Anke laphan Isaak pulo
“Nangphan sining pen ar-e avelo,
Aho-or kedo ahidi nangphan avelo.#Ibr 11.20
40Nang ke nokjir pensi rengji,
Bonta nangmu aban plangpo.
Seta nang kethurkrap#mate kerek-roktok ahut,
La akekhang pen nang phri-unji.”#Kech 36.8; 2 Rec 8.20
41Jakob aphan Iso langselet-lo, pima Jakob aphan la apo ahirjume pitang-lo. La mathalo, “Nepo kethi ningke-oi apor tebok-het-lo; anke ne Jakob aphan pathilot-po.”
42Bonta Iso akemang alam Rebeka arjulongtang-lo, bangpi Jakob aphan hangsi pulo, “Arjutha, nang ik Iso ke nangphan nangnepsi nang kepathiji aphan mang-lo. 43Non, po, ne kopima nangkethan aling le klem non. Haran ne ik Laban along nang non amat damnon, 44lapen nang-ik aning kethi hamhetik an alanglilong malomso an dodunnon, 45lapen nang laphan kopima keklemtang alam tangnedetdetik an. Anke ne anut keprek nangphan nangpa-enjisi nangtoipo. Kopisi ne arnisivet angbong banghini nesomar kevirnangpo?”
Laban Anat Jakob Aphan Isaak Ketoi
46Isaak aphan Rebeka pulo. “Iso bang adet apiso atum pen apot Ne kesolo lapen lak-huitang-lo. Jakob ta jongsi lahei Hitti asopimar atum angbong inut aphan enlo pulote, ne thilot tahai.”
Currently Selected:
KECHENG 27: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
