KECHENG 28
28
1Jakob aphan Isaak hangsi ardom pilo, lapen laphan pulo, Kanaan a-osopi aphan enri. 2La alar ha Mesopotamia, nangphu, Bethuel, along damnon, lapen hadak inutbak aphan piso ennon, nang-ong, Laban asopimar angbong inut bak aphan ennon. 3Jakongthenei Arnam nangtum kechepangri pahirmenang lapen nangtum aphan ongdung a-osomar nang papilonang, anke nang ke ongdung akhei atum apo plangpo! 4La Abraham aphan kepahirme asonthot nangphan lapen nangso-nangsu aphan pahir jume nang, lapen nangkedo laso alongle lapen Abraham aphan Arnam kepi alongle nang pachehemphu longnang!#Kech 17.4-8 5Jakob aphan Isaak ha Mesopotamia, Laban anat, Aram aso Bethuel asopo, lapen Jakob lapen Iso apei Rebeka a-ik along toijuilo.
Iso Akaprek a-Arloso Ke-en
6Jakob aphan Isaak pahirmelo lapen piso kepa-enjisi Mesopotamia toijuilo pu alam Iso chinilo. Lapen ke Isaak laphan hukum kepi ahut Kanaan a-osopi inut penta chepangri-ri puta chinilo. 7La thek-long-lo, Jakob ke apo aphan lapen apei alam kroisi Mesopotamia damtang-lo. 8Iso chechinilo, Kanaan a-osopi ke-en ke la apo Isaak aningdokde. 9Lasi la Abraham asopo Ishmael along damlo, lapen alanglisopi Mahalath pen chepangrilo, bangpi ke Nebaioth angjirlo.
Bethel Along Jakob Amang
10Jakob Beersheba osi Haran anat bar pangcheng-lo. 11Arnikangsam ahut alangli isi kangthir-adim#mate isi adim nanglelo, lapen hadak sakok-lo. Amek-kejangjisi alangli tilailo, isi a-arlong athak aphu chepuhuilo. 12La amang hemanlo, isi pirthe pen sining kechepho adon-don thek-long-lo, la athak pherangke atum kehir lapen karlu helatpit.#Jon 1.51 13Alangli dung#mate la aphuthak Hemphu si arjapding. “Ne helo Hemphu, Abraham lapen Isaak a-Arnam,” pusi alangli pulo. “Nang ketilai alongle Ne nangphan lapen nangso-nangsu aphan nangpipo.#Kech 13.14-15 14Latum pirthe athak alongle-aduk asonsi ongdungji. Latum alongri konaphli anta parji, lapen nang, lapen nangso-nangsu pen ajok khei kedo-an#mate nangphan lapen nangsomar aphan ne ahirjume kepi asonsi khei atum ahirjume aphan nangchohangji aphan Ne pahirjumeji.#Kech 12.3; 22.18 15Chematha-tha, Ne nanglong doji, lapen nang kedam aling nangraiji, lapen laso alongle along Ne nangphan nang-vanthudetji. Nangphan Ne kechak ason an paplengpletik Ne nangphan nang-lole.”
16Jakob amek-prang si pulo, “Hemphu dak si dolo! Alangli laso adim si dolo, lapen ne la chinine det-lo!” 17Alangli pherelo, lapen pulo, “La isi kepherememe adimlo! La ke Arnam ahem plangvekpo; la si sining kedamji kangpu anghap plangpo.”
18Jakob puthot adap thurdap-prang-lo, kechepuhui a-arlong en si, la kechekimoji aphan elo. La Arnam kehodaijisi alangli la athak jit ajangthu dung-lo. 19Laso adim alangli Bethel#Ibri penke “Arnam ahem” pusi amen irlo. (Laso adim arong aphrang ke Luz pusi kechethang.) 20Anke Hemphu aphan Jakob isi chechak-lo! “Ne kedambom ahut jongsi nang nelongdoji lapen neraiji lapen an nepiji lapen pe-ri nepiji, 21lapen nepo ahem mesen pen nepachevoi longji pulote, Nang ne Arnamlo. 22Ne ke-e kechekimo a-arlong ke Nangphan karcho adim plangpo, lapen Nang nekepi amar asontin phankep pen ephan Nangphan ne nangpi po.”
Currently Selected:
KECHENG 28: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
