KECHENG 29
29
Laban a-Hem Jakob Keledam
1Jakob dambomlo lapen Nihang adet anat ledamrok-lo. 2Menmen alangli hidi angtan isi alangtuk along nanglelo, hadak la adung jonthom anbak abiresak kedomkur dolo. Pi atum aphan langtuk pensi lang kepi, la amangho arlongthepi isi do. 3Hadak pi ahur kevangpet ahut, kevi abang arlong terekpo lapen latum aphan langpajunpo. Anke latum arlong aphrang adim bithupo.
4Kevi atum aphan Jakob arjulo, “Jirpo atum, nanglitum ke konat penlo kevang?”
Haran pen, latum thak-lo.
5Alangli arjulo, “Nahor asopo Laban aphan nanglitum chinima?”
Nelitum chini, latum thak-lo.
6Alangli mesen langma? la arjulo.
Alangli mesenlang, latum thak-lo. “Lang iktha, alangli sopi Rachel ladak abiresak ahur penpen vangbomlo.”
7Jakob pulo, “Non arnisoklang lang, lapen pi ahur kevan apor kalilangle, kopisi nanglitum lang lahei aphan pen latum aphan pachopan ponpedet-lo?”
8Latum thak-lo, “Pi ahur kedo-an ladak vangpetpetik lapen arlong adimthot bithuthetik ke nelitum la klem-un-e; ansi nelitum latum aphan langpajun po.”
9Jakob latum pen chingkibom ahut, pi ahur penpen Rachel nangledunlo. 10A-ong abiresak penpen Rachel aphan Jakob thek-longsi, la langtuk along damlo, arlong terek si biresak aphan lang pilo. 11Anke la bangpi aphan ingjup-lo, lapen aning arongpik si hangchir lo. 12Bangpi aphan la chethanlo, “Ne ke nangpo adonlo, Rebeka asopolo.”
Apo aphan kechethan-damjisi bangpi kat-lo; 13lapen alangli osa Jakob alam arjulongsi, kechetong-dunjisi la kat-lo, lapen bamlo, lapen ingjup-lo, lapen laphan hem vandet-lo. Keplangtang an alam Jakob kethan ahut, 14Laban pulo, “Kalang, chenamsi, nangli ke nemethang a-ok lapen avilo.” Hadak Jakob chiklo ejon kangthim dolo.
Rachel Lapen Leah Aphan Laban Ahem Piso-Kemen
15Jakob aphan Laban pulo, “Nangli nedonlo pura nelilong nangliphan thangnat ale avepinji lason akam klem nangne. Nangli ko-an anam kenangjine?” 16Laban asopimar banghini do; akleng abang amen ke Leah lapen akebi abang amen ke Rachel. 17Leah amek langmepik#mate kemara, bonta Rachel abang ke biher lapen arje mepik.
18Jakob ke Rachel pen si aning kechedok, lasi la pulo, “Rachel aphan neli pangrilong pulote nangliphan neli ningkan throksi kam nangklempiji.”
19Laban thak-lo, “Anut kaprek aphan kepi apar bangpi nangli phansi nangpidetpo; nelilong ladak nangdo dunnon.” 20Rachel aphan ke-enlongjisi Jakob ningkan throksi kam klemdunlo, lapen laphan apor malomsovet ason, pima bangpi aphan la chinghonlo.
21Anke Laban aphan Jakob pulo, “Apor juttang-lo; neliphan nanglisopi pen pachepangri longnon.” 22Lasi Laban isi piso-pangri akecho amei sikpilo lapen abangphutin aphan ta hangpet-lo. 23Bonta halaso aningve, Rachel alar alangli Jakob aphan Leah si ponpirong-lo, lapen bangpi pen Jakob che-endet-lo. 24(Leah aphan Laban, Zilpah pu ban a-osopi pilo.) 25La Leah lo pu puthot adap an si Jakob chinipinlo. La Laban along damsi pulo, “Nangli neliphan la kopisi keklemloma?”
26Laban thak-lo, “Ladak akleng aphan penan chopipe ako akebi abangphan penan kepi aron ave. 27Pangri-pangdon arui parpetik inghongtha, jongsi nangli puthot ningkan throksi neliphan kam nang-klempilote Rachel nangliphan nangpipo.”
28Jakob chedondunlo, lapen pangri-pangdon arui damdet aphi Laban laphan alanglisopi Rachel laphan penan chopidet-lo. 29(Laban asopi Rachel aphan Bilhah pu aban-a-osopi pidet-lo.) 30Jakob ke Rachel penta che-endet-lo, lapen bangpi aphan Leah aphan aparta la inghon muchot-lo. Anke Laban aphan la puthot ningkan throksi kam klempilo.
Jakob Aphan Osomar Mahang-kethekpi
31Rachel apar Leah aphan kanghon ave muchot Hemphu thek-long si, Alangli Leah aphan osomar pilo, bonta Rachel ke osomar avedet-lo. 32Leah oso chopathe si inut pinso a-oso mahang pathek-lo. Bangpi pulo, “Ne kesung Hemphu nethek-long-lo, lapen non nepenan nephan ne inghonpo;” lasi bangpi laphan Reuben#Ibri penke “nangsopo chethek-longpo” lapen “ne kesung chethek-long-lo” pusi amen irlo. 33Bangpi puthot oso chopathelo, lapen inut pinso a-oso amahang pathek-lo. Bangpi pulo, “Hemphu laso a-oso ta nepilo, pima nephan ne inghonhe pu alangli arjulong-lo;” lasi bangpi laphan Simeon#Ibri penke “arjulong-lo” pusi amen irlo. 34Bangpi puthot oso chopathelilo, lapen anut kaprek pinso a-oso mahang pathek-lo. Bangpi pulo, “Non nepenan nedung patebokpikpo, pima laphan ne bangkethom pinso a-oso mahang pathekpilo;” lasi bangpi laphan Levi#Ibri pen “kok-het” pusi amen irlo. 35Anke bangpi puthot oso chopathelilo lapen anut kaprek apinso a-oso amahang-pathek-lo. Bangpi pulo, “Non ke ne Hemphu aphan choropo;” lasi bangpi laphan Judah#Ibri penke “kero” pusi amen irlo. Anke bangpi oso chopathe ingtonkok-lo.
Currently Selected:
KECHENG 29: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
