KECHENG 30
30
1Bonta Rachel ke Jakob aphan inutbakta oso amahang pathek pipedet-lo, lasi bangpi ate aphan lang un-elo, lapen Jakob aphan pulo, “Osomar nepinon, kalite ne thilotpo.”
2Rachel aphan Jakob aningthihak-lo, lapen pulo, “Arnam adim ne en-un-e. Alangli si nangphan oso kelongji pen khang-lo.”
3Bangpi pulo, “Ladak nebanpi Bilhah dolo; bangpi pen irap-rap non, anke bangpi nephan inut a-oso nepi unpo. Lasonsi bangpi pen ajok ne inut apei plangpo.” 4Lasi bangpi apenan aphan Bilhah pidet lo, lapen alangli ta bangpi pen che-endet-lo. 5Bilhah oso chopathe si Jakob aphan inut pinso a-oso mahang pathekpilo. 6Rachel pulo, “Arnam nephan akeme si ingsailo. Alangli nekardom arju si sopo inut nepilo;” lasi bangpi laphan Dan#Ibri penke “kangsai pen kerapdun” pusiamen irlo. 7Bilhah puthot oso chopathe lilo, lapen Jakob aphan pinso a-oso adun mahang pathekpilo. 8Rachel pulo, “Nete pen ne kesungnei akechedan chedanlo, bonta ne haidet-lo;” lasi bangpi laphan Naphtali#Ibri penke “kechedan” pusi amen irlo.
9Leah aso avelo pu chechinisi, apiso kepaplangjisi Jakob aphan abanpi Zilpah pidet-lo. 10Anke Jakob aphan Zilpah inut pinso a-oso mahangpathek-lo. 11Leah pulo, “Ne kopai the-olo;” lasi bangpi laphan Gad#Ibri penke “akopai” pusi amen irlo. 12Jakob aphan Zilpah sopinso inut mahang pathekpilo, 13lapen Leah pulo, “Ne ko-an ning arong! Non arloso atum nephan ning arong pusi nehangpo;” lasi bangpi laphan Asher pusi amen irlo.
14Soktipli kerot apor Reuben hidi damlo, lapen amek-kejang abap#jakongkepi abap mate arjekeme aphan dovai long-lo, la apei Leah along vandet-lo. Leah aphan Rachel pulo, “Kanghon pen asap-o nangsopo abap-dovai nepichomtha.”
15Leah thak-lo, “Nang nepenan pondet ta dordelangma? Ako non, nang nesopo abap dovai ta keponjisi kebor-i.”
Rachel thak-lo, “Nang jongsi nangsopo abap dovai nephan nepilote peningve nang Jakob along i-dun-longpo.”
16Arnikangsam Jakob hidi pen nangchevoisi, laphan Leah keche-tongjisi damlo, lapen pulo, “Peningve nang nelongsi nang-i dun nangji, pima nesopo abap dovai pen ne nangphan anam pi-et-lo.” Lasi halaso aningve bangpi pen la i-rap-rap si che-enlo.
17Leah akardom Arnam thak-lo, lapen bangpi oso chopathelo, lapen Jakob aphan pho adun asopo mahang pathekpilo. 18Leah pulo, “Arnam nephan ne nong-e nepilo, pima nebanpi ne, nepenan aphan pidet-lo;” lasi bangpi laphan Issakar#Ibri “kerong amonit aphan anong-e” pusi amen irlo. 19Leah puthot oso chopathelo, lapen Jakob aphan throk adun sopo inut mahang pathekpilo. 20Bangpi pulo, “Arnam nephan isi kemenei adan nepilo. Non nepenan nephan nedengpo, pima alangliphan ne throk adun sopinso mahang pathekpilo;” lasi bangpi laphan Zebulun#“Kedeng” lapen “Kepi” pu amen irlo. 21Aphi bangpi inut arloso a-oso mahang pathek-lo, laphan bangpi Dinah pusi amen irlo.
22Anke Rachel aphan Arnam chemathalo, bangpi akardom Alangli thak-lo, lapen bangpi aphan osomar palong undet-lo. 23Bangpi oso chopathelo, lapen pinso a-oso inut amahang pathek-lo. Bangpi pulo, “Arnam nephan sopo inut nekepi pen ajok nekepinrem an pondet-lo. 24Arnam puthot nephan anut kaprek sopinso nepapilonang;” lasi bangpi laphan Joseph#alangli “akaprek pitahai” mate “pondet-lo” pusi amen irlo.
Laban Aphan Jakob Kechoningri
25Joseph amahang-thekdet aphi, Laban aphan Jakob pulo, “Neli phan nepadam longnon, anke neli hem chevoilongpo. 26Neli nangphan kam nang keklempi anam kelong nepiso, neso nepinon, lapen neli opo. Neli ko-an nangliphan kam nangklempi pameloma, nangli chinilo.”
27Laphan Laban pulo, “Neliphan la nepapu longtha: Neli sangkelang pen ajok chinilo, nanglipen apot Hemphu neliphan pahirmelo. 28Nangli kechepaduk anam nethannon, lapen neli lahei nangpidetpo.”
29Jakob thak-lo, “Neli kosonsi nangliphan kam nang klempiloma nangli chini lapen kosonsi nangli pi ahur ko-an chanloma nangli chinilo. 30Neli kevang aphrang asap-nat seta nonke dopik-lo, Lapen neli kedam aling Hemphu nangliphan pahirjumelo, Non lasi neli methang aphan neli kechelang nangji aporlo.”
31Nangliphan neli kopi nangpi nangpo? Laban arjulo.
Jakob thak-lo, “Neliphan thangnat anam ta nelipi nangne. Nangli jongsi laso alam nang chedondun pulote neli nangli pi ahur bibomji: 32Pini neliphan nangli pi ahur angbong nepadam longtha lapen biresek ake-ik#akemorok lapen adak kedo, lapen ake-ik ajontin lapen adak kedo mate akemorok abi aso ajontin nepa-en longnon. Lahelo ne kenangji anam. 33Neli athikpetma mo nangli chinijoikeji. Neli kelongji anam nangli nangkelang ahut jongsi adak kave mate akemorok-re abi nelilong nanglong pulote lapen biresak ke-ik kalipin thek-long pulote la chonghutang-lo pu ra nangli chininon.”
34Laban thak-lo, “Chedonlo, nangli kepu atengle eli klemlo nang.” 35Bonta halaso arni bi alo adak kedo mate akemorok an, halahei along akelokchot kedo an thakdak-lo; lapen alangli biresak abi-ik an ta thakdak-lo. Lahei aputhak alanglisomar atumsi palang lo, 36lapen Jakob pen chepahelosi lahei abi ha nithom kedam un atovar ponsi damlo. Laban ahin api ahur an ke Jakob si lang-lo.
37Poplar, almond, lapen plane athengpi aro-heihei kelir enlo lapen ajehak ahu chep-lo, anke lahei along akelok chotchat ta dolo. 38Alangli lahei pi ahur lang kejun adim angno bilo. Hadak alangli lahei bilo, pima pi atum langkejunji kevang ahut chardonlo. 39Lasi bi atum aro-heihei angno chardonlote, latum aso ta adak kedo lapen kemorok saide si philo.
40Bi ahur pen Jakob biresak atum kebi paprek-lo, lapen lahei Laban api ahur kemorok lapen ake-ik atum anat si papangnolo. Lasonsi la amethang api ahur chepa-ong-lo lapen la Laban api ahur pen kebi pahelolo.
41Aprankeme api atum chardonlote, lang kejun adim pi angno Jakob thengpi aro-heihei bilo, anke latum thengpi aro-heihei angbong aso punpo. 42Bonta kechungkrenglai api atum angno alangli thengpi aro-heihei bibedet-lo. Laban ke kechungkreng api an si long-lo, lapen Jakob ke kangtulim api an long-lo. 43Lasonsi Jakob plangvoilo. Alangli ongdung api ahur, ban atum, ka-ut-heihei, lapen gadha-heihei chepahemphu long-lo.
Currently Selected:
KECHENG 30: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
