KECHENG 34
34
Dinah Aphan Kelangrem
1Arnisi Dinah, Jakob lapen Leah asopi, ajehak Kanaan a-arloso along kevurdamjisi damlo. 2Hivi aso Hamor asopo Shekem, halaso alongri apinpolo, bangpi aphan thek-lok-lo, la bangpi aphan endet si langremlo, 3Bonta osopi laphan palangmepik-lo#bangpi aphan aning pangsamlo, bangpi aphan la aninghang-o-lo, lapen ke bangpi aphan kelongji si bor-i-lo. 4La apo aphan pulo, “Laso a-osopi nepiso keplangjile piso nehangpi non.”
5Asopi aphan langremdet-lo pu Jakob chechinilo, bonta asomar atum pi ahur pen hidi dam-et apotsi, latum vangvetik la thangnat ta klemkledet-lo. 6Shekem apo Hamor ke Jakob pen kechingkijisi barlo, 7Jakob asomar atum ke hidipen nanglechit anchot-lang. Latum laso alam arjulongsi, latum thirikjok-lo, lapen Shekem lason akam keklem apot aningthihak-lo, lapen Jakob asopi aphan kelangrem pen ajok Israel aso aphan patherk-lo pu aningthilo. 8Alangliphan Hamor pulo, “Nelisopo Shekem ke nanglisopi pen si aningchedok-lo, kanghonpen bangpi aphan la pa-enlongnang. 9Nanglitum arat pen nelitum arat angbong pache-en-pachedo lonang pu chepathikdet lo nang. 10Anke nangli nelitum adet along doverlongpo; nanglining kehang adim dolongpo, beha klemlongpo, lapen mar chepahemphu long po.”
11Anke Dinah apo lapen a-ik atum aphan Shekem pulo, “Neliphan la nangkroidunnon lapen nanglitum nanglining kehang aling neli nanglitum aphan nangpipo. 12Kopi adan ma kenangji neliphan nethan non, lapen arloso anam ko-an ma ador kepasoji pathiknon; nanglitum kehang aling neli nangpidetpo, jongsi bangpi aphan nanglitum neliphan pangrilong lote.”
13Halatum angjir Dinah aphan Shekem langremdet apot Jakob asomar atum Shekem lapen apo Hamor aphan thak parlinlo. 14Alangli phan latum pulo, “Nelitum angjir areng kecherot-re abangphan penan chopi thekthe; lake nelitum aphan isi ahirjuno plangpo. 15Nangli pinso atum an nelitum ason areng cherot lote nelitum nangchedon dunthekpo. 16Anke nelitum ta pupu pangri-pangdon seroi alam aputhak nangchedondun thekpo. 17Bonta nanglitum jongsi nelitum kepu alam nangchedon-dun thekthe lapen rengcherot-re pulote bangpi aphan nelitum chepondet po lapen damjuipo.”
18Laso akephar Hamor lapen asopo aphan mesen thek-long-lo, 19lapen riso abang la keklemji apor padam ingtungte det-lo, pima la Jakob asopi pen aningchedok-lo. La ke ahemtun angbong akenangsot nei abangphulo.
20Rongsopi anghap along Hamor lapen asopo Shekem mei along dunlo, lapen halatum adon arap atum aphan pulo: 21“Laso amonit atum jirpo mesen, latum etum adet along nangpadodun lonang, lapen aning kehang aling padam longnang. Longle latum aphan dorphlupji. Latum asopi eli vanlonang lapen esopi ta latum aphan chopi lonang. 22Bonta alanglitum etum angbong nangdodun nangpo, lapen etum arat pen isinat plang nangpo, ansi eli pinso atum an, latum areng-kecherot asonsi elita cherotdunpo. 23Latum api ahur kedo-an lapen latum kechepahemphu amar an elitum amar kalidetpoma? La apotsi alanglitum etum angbong nangpadodun-jile eli chekroi dunsarlonang.” 24Hamor lapen Shekem kepinkhat alam rongsopi abang phutin ta chedondunsarlo, lapen pinso atum an amar areng cherot-lo.
25Nithom aphi latum areng amek anta cheparem-relang, Jakob asomar banghini, Simeon lapen Levi, Dinah a-ik atum, anok cheponsi, bang pachininepin pen rongsopi lutdamsi, pinso kedo-an aphan pathi-et-lo. 26Hamor lapen asopo Shekem aphan ta lo. Anke latum Shekem ahem pen Dinah aphan pondetsi damjuilo. 27Kethu-kethat-det aphi Jakob akaprek asomar atum rong lutdamsi angjirpi aphan kelangrem apot alar huilo. 28Pi ahur latum pon-et-lo, chainong ahur, gadha ahur, rongsopi lapen hidi ajo kedo amar an latum pon-et-lo. 29Ador kedo amar asontin, arlosopimar atum lapen osomar atum aphan lapen hem kedo amar anta pon-et-lo.
30Simeon lapen Levi aphan Jakob pulo, “Nangtum nephan nepa sungtang-lo; non Kanaan aso atum, Perizi atum, det abangphutin ta nephan nehijimripo, ne monit ong-e, latum jongsi chingrumpet-ra nephan tengkheng lote, etum ahemtun kangthim virklungpo.”
31Bonta latum thak-lo, “Netum angjir aphan bang kedamhur abeisapi aphuthak keklem ason paklem longle.”
Currently Selected:
KECHENG 34: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
