KECHENG 35
35
Bethel Along Jakob Aphan Arnam Kepahirjume
1Jakob aphan Arnam pulo, “Non amat Bethel along damseraknon, lapen dodamnon. Hadak Nephan isi adovan nebuipinon, nang ik Iso pen nang kekat ahut nang kecheklang a-Arnam aphan.”#Kech 28.11-17
2Lasi hem isi aphan Jakob thanlo, lapen alanglilong kedo atum an aphan thanlo, “Bang adet a-arnam-heihei pen nangtum che-onon; nangtum chepangthirnon lapen pe kangthir chepindengnon. 3Etum ladak onangpo, lapen Bethel damnangpo, nekesung ahut nekerap abang lapen ne kedamtang alongtin nekedo dunkri a-Arnam aphan hadak ne isi adovan buinangji.” 4Lasi latum bidet arnam-heihei kedo-an Jakob aphan pi-et-lo, lapen latum kechingthang anorik-heihei ta pi-et-lo. Alangli lahei Shekem tarabeng athengpi arum si pip-lo.
5Jakob lapen asomar atum ke-oji kecheng ahut, adung arei arong-heihei arat aphuthak jasemet kephere vang-lo, lapen latum alangli tum aphi-phi hungdunde det-lo. 6Kanaan adet Luz pu adim, nonke Bethel pusi chethang-lo, laso adim Jakob lapen alangli rat atum an vangpet-lo. 7Hadak alangli isi adovan builo, lapen adim amen Bethel a-Arnam amen irphit-lo, pima a-ik pen alangli kekat ahut laphan Arnam amethangsi cheklang-lo. 8Rebeka a-obok Deborah thilot-lo, lapen Bethel anitur tarabeng arum si pip-lo. Lasi la amen “Kechiru atarabeng pulo.”
9Mesopotamia pen Jakob nang-chevoidet aphi Arnam alangliphan puthot cheklangthulo, lapen alangphan pahirjumelo. 10Alangliphan Arnam pulo, “Nangmen ke Jakob, bonta pini pen nangmen Israel lo.” Lasi Arnam alangliphan Israel pu amen irlo.#Kech 32.28 11Lapen laphan Arnam pulo, “Ne ke Jakongtheparpik Abang. Osomar chepa-ong-onon. Nangpen khei atum plangpo, lapen nang ke recho atum aphusar manpo.#Kech 17.4-8 12Ne Abraham lapen Isaak aphan kepi alongle la nangphan lapen nangso nangsu atum aphan nangthilot aphi ne nangpidetpo.” 13Anke Arnam laphan obub-lo. 14Hadak, laphan Arnam kepu adim, Jakob isi kechematha-dam a-arlong elo, lapen la drakha ahorlang lapen jit ajangthu kedung pen ajok pangthirlo.#Kech 28.18-19 15Alangli bangso adim amen Bethel irlo.
Rachel Kethi
16Jakob lapen la ahemtun Bethel olo, lapen latum Ephrath pen helovinglang, Rachel oso amahang kepathek ji apor nangletang-lo, lapen bangpi sungnangpik-lo. 17Bangpi sopik khangjangsi, a-obok bangpi aphan pulo, “Rachel phereri, la pinso a-osolo.” 18Bonta bangpi kethipo pulo, lapen achethe kechevung ahut bangpi asopo aphan Benoni#“Nening keduk asopo” pu amen irlo, bonta apo ke laphan Benjamin#Ibri alam penke “Akopai keme asopo” pusi irlo.
19Rachel thilot-lo, bangpi aphan Ephrath atovar akung anatsi pip-lo, Non ke la Bethlehem pusi chethang-lo. 20Hadak Jakob isi kechematha dam a-arlong isi elo, lapen pini anta laso adim Rachel athirilo pu pangthek-lo. 21Jakob dambomsi Eder ahemchardon parai si amukam chekimlo.
Jakob Asopomar
(1 Phur 2.1-2)
22Halaso adet Jakob kedo un ahut, Reuben ke apo ke-enpangtar apiso, Bilhah pen irap-rap-lo, Jakob laso alam arjulongsi aningthihak#Ibri alam penke ave lo.#Kech 49.4
Jakob asomar bang krehini dolo. 23Leah pen aso ke Reuben (aso-akleng), Simeon, Levi, Judah, Issakar, lapen Zebulun. 24Rachel pen aso ke Joseph, lapen Benjamin. 25Rachel abanpi, Bilhah asomar ke Dan lapen Naphtali. 26Leah abanpi, Zilpah asomar ke Gad lapen Asher, Lahei asomar ke Mesopotamia si amahang-kethek.
Isaak Kethi
27Jakob ha apo Isaak kedo adim Mamre damlo, Hebron adung, ladak si Abraham lapen Isaak atum dolo,#Kech 13.18 28Isaak ningkan 180 an reng-lo. 29lapen sarpame si thilong-lo; lapen laphan asopo Iso lapen Jakob si pip-lo.
Currently Selected:
KECHENG 35: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
