KECHENG 37
37
Joseph Lapen La Korte Atum
1Jakob ke Kanaan adet si doverlo, hadaksi apo atum ta dolo, 2lapen Jakob ahemtun atomo la helo.
Joseph, inut ningkan krethroksi ariso, la apo enpangtar apiso, Bilhah lapen Zilpah asomar, la a-ik atum pen pen biresak lapen bi hei hei langbomlo. A-ik atum kehingno keklem alam apo aphan la thanlo.
3Akaprek asomar apar Joseph aphan Jakob chinghon muchot-lo, pima la kesar ahut si laphan la amahang-thek pilo. Laphan alangli epak arikeding achoidingpo#Kepasaine achoi paroipilo. 4Latum aphan apar latum apo abang Joseph aphan inghon muchot thek-longsi, amu aphan latum lapu-an langselet-lo, latum laphan ingki pameme det-lo.
5Ningve isi Joseph mang heman-lo, lapen la a-ik atum aphan laso alam kethan apot a-ik atum laphan langselet muchot-lo. 6La pulo, “Ne keheman nemang alam arjutha. 7Etum kadokaveta soktipli apeng kerak ahut nesok apeng abang thursom si arjap pakengsonlo. Nangtum asok apeng ke nesok apeng aphan komdirlo, lapen la aphan angphun patongkika lo.”
8“Nang inut arecho plangji putong nang kechemathama, lapen netum aphuthak pangrijima?” A-ik atum arjulo. Lasi latum laphan ansose langselet-lo, pima la amang alam lapen halahei la kepu apot.
9Anke Joseph akaprek amang thek-long tang-lo, lapen a-ik atum aphan thanlo, “Ne akaprek amang thek-longlilo, halabangso along ne, arni, chiklopi, lapen chiklolongso kre-isi latum nephan nekardomri thek-long-lo.”
10Laso amang alam la apo aphan chethanlo, lapen apo abang laphan ingchek-lo: La kopi amang-lo? Nangpei, nang-ik atum an, lapen ne ta nangphan nangcho-ardom nangjilangma? 11Joseph a-ik atum laphan langselet-olo, bonta apo ke laso alam aputhak mathabomlo.#Akam 7.9
Joseph Aphan Kejordet Lapen Ijip Adet Kepon
12Arnisi Joseph a-ik atum, apo api ahur kevijisi Shekem anat damlo, 13Joseph aphan Jakob pulo, “Nang ik atum pi ahur kevi adim, Shekem anat nang kedamji aphan ne ninghang-lo.”
Joseph thak-lo, “Ne dampo.”
14La apo pulo, “Damra nang-ik atum mephunlangma lapen pi ahur ta dopet ma langdamtha; anke nangchevoira nephan nethan non.” Lasi Hebron Arlok pen laphan apo toijuilo.
Joseph Shekem along nanglelo 15lapen keriduntap keridunphru ahut inut amonit laphan arjulo, “Nang kopisi kerilo?”
16“Pi ahur kevi ane-ik atum aphansi ne keri, “ la thak-lo. “Nangli latum konat si kedoma nelithan thekjima?”
17Bangpo abang thak-lo, “Latum dak o-et-lo, Latum Dothan anat si kedamji pu ne arjudun long-lo.” Lasi Joseph a-ik atum aphi aphi ridunlo lapen Dothan along latum aphan thek-long-lo.
18Laphan achar pen latum thek-long-lo, lapen halatum along la kele aphrang, laphan kepathijisi halatum mang-lo lapen chesik-lo. 19Latum lahin lahin chethan seroilo, “Mang keheman abang ladak vang-lo. 20Non vangpetnon, eli laphan pathilot-lonang lapen la abang arpum lang kave alangtuk arlo jokchok-lonang. Laphan ingnam api si pathilot-lo pule than-lonang. Anke eli lang-lonang, la amang kopi cheplang thekjima.”
21Reuben halahei arjulong-lo, lapen Joseph aphan keraiji bor-i lo. “Laphan eli pathinangne,” la pulo. 22“Kejejangtang ajo alangtuk arlo le jok-chotnon, bonta laphan phangnori.” Alangli la so alam pulo, lake laphan halatum pen kepajokji si kemang-lo, lapen apo along ketoijuiji si kemang-lo, lapen apo along ketoijuiji aphan lo. 23A-ik atum along Joseph nangkele ahut, latum laphan arikeding achoidingpo#Kepasaine achoi phlokjok-lo. 24Latum laphan ponsi lang kave alangtuk arlo jokdamthot-lo.
25Latum an kechobom ahut, menmen latum Gilead pen Ijip anat Ishmael aso atum esong kevang thek-long-lo. Halatum aka-ut mosola-heihei, lapen jangthu-heihei si arthang-lo. 26Judah abang a-ik aphan pulo, “Etum ebong aphan pathilotpen lapen prankarmut kedip pen kopi ale si kedopo? 27Laphan eli lahei Ishmael aso atum along chojor dundet-lonang. Anke eli laphan phangno jokphlotpo, jat-le pu seta, la ebong-lo, emethang a-ok lapen avi apok abong-lo.” La akorte atum chedondunlo, 28lapen ajehak Midian aso akiripo atum nanglelo, a-ik atum#Latum Joseph aphan langtuk arlo pen rung si, Ishmael aso arideng laphan rup dum ingkoi pen jordet-lo, laphan latum ha Ijip pondet-lo.#Akam 7.9
29Langtuk along Reuben chevangthulo, lapen hadak Joseph aphan thek-longle det-lo, aning ke oi pen ape chingsek lo. 30Akorte atum along la damsi pulo, “Oso hadak avedet-lo! Ne kopisi klempoma?” 31Anke latum ejon abi that-ot-lo, lapen Joseph achoidingpi la avi athak tut-lo. 32Choidingpi latum apo along pondet-lo, lapen pulo, “Netum la si longchot-lo. La nangsopo achoi kalima?”
33Alangli la pangthek-unlo lapen pulo, “Kalang-lo, la ke alang choilo! Ajehak ingnam api si laphan pathilot-lo. Nesopo Joseph aphan ingsek-i-lo!” 34Aningduk si Jakob ape chingsek-lo, lapen pethoila che-umlo. Asopo aphan alangli penang an arni ningduk-lo. 35Asopomar lapen asopimar kedo-an laphan than-pangsamlo, bonta alangli ning chepangsamji molo, lapen pulo, “Nesopo aphan kechiru kechiru pen chepathipin po.” Lasi alangli sopo Joseph aphan aning chepadukbom-lo.
36Halaso ahut, Ijip along, Midian aso atum Joseph aphan Potiphar arideng jordet-lo, alangli recho a-saihemphulo, lapen rechohem keton atum ahemphulo.
Currently Selected:
KECHENG 37: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
