KECHENG 38
38
Judah Lapen Tamar
1Halaso ahut malom Judah ke a-ik atum aphan obub-lo lapen Hirah pu amonit along kedodunjisi damlo, Hirah ke Adullam arong pen. 2Hadak inut Kanaan a-osopi, apo amen ke Shua, pu aphan Judah chetong-lo. Bangpi aphan alangli en-det-lo, 3lapen laphan bangpi inut sopo amahang pathekpilo, laphan la amen Er pusi irlo. 4Bangpi puthot oso chopathethulo, lapen sopinso inut amahang-pathek-lo, lapen laphan Onam amen irlo. 5Puthot bangpi inut sopinso dothulo, lapen laphan Shelah pu amen irlo. Oso amahang kethek ahut Judah ke ha Akhzib si do.
6Aso akleng Er aphan, Judah piso inut ripilo, amen ke Tamar. 7Er a-ot hingnodak, lapen la Hemphu aphan aning padokdelo, la apotsi Hemphu laphan pathilot-lo. Anke Er akorte Onam aphan Judah pulo, 8“Damra nang-ik ahemepi along i-dunnon. Bangpi aphan nang keklemnangji apenan akorte nangdeng paplengnon, ansi nang-ik apoton dopo.” 9Bonta Onam chechini lo, osomarke alang pharman kalilo, lasi la a-ik ahemepi pen dim-tar pasi lote, la amar alang longle athak si paklolo, anke a-ik apharman osomar avedetpo. 10Alangli keklem akam ke Hemphu aphan aning padokdelo, lapen Hemphu laphan ta pathilot-lo. 11Anke amunpi Tamar aphan Judah pulo, “Nanglipo ahem chedamthunon lapen nelisopo Shelah the-thetik pahemevernon.” Alangli la kepu lahelo, a-ik atum ason thakthak Shelah aphan ta pathilot na pu pherelo. Lasi Tamar apo ahem chedamjuilo.
12Penang an aphi Judah apiso ta thilot-lo. Alangli aning keduk apor jut si, alangli lapen alangli jirpo Adullam asor, Hirah penpen ha Timnah anat damlo, hadak alangli biresak aphan angmi ingtip-po. 13Alok-hei abiresak angmi kangtipjisi Tamnah anat dambomlo pu mane Tamar aphan thanlo. 14Lasi bangpi kechingthang-bom hemepi ape chelar si, amahang pe chekurkilunlo, lapen Enaim kelut atovar along ingnilunlo, la Timnah anat kedam atovar arongso lo. Judah asopo akebisi Shelah abang thedung-lo pu bangpi chini pamelo, lapen bangpi aphan non an ta pa-en-elang.
15Judah bangpi aphan thek-longsi bangpi inut abeisapi pusi mathalo, pima bangpi amahang chekurkithip-lo. 16Bangpi anat alangli damhamlo, ha tovar akung anat lapen pulo, “Mesenlo, nang ko-ansi anam kehangpo?” (Bangpi ke alangli munpilo pu alangli chechininedet-lo.)
Bangpi pulo, “Nangli neliphan kopilo nekepipo?”
17Alangli thak-lo, “Ne pi ahur pen nangphan ejon abi nangpipo.”
Bangpi thak-lo, “Mesen, nangli bi nangthonthe aphrang kopine asim neliphan pi tekangjima?.”
18Isi asim ne kopisi nangkepi nangpo? alangli arjulo.
Bangpi thak-lo, “Nanglisap ketheng a-arnan lapen nangli ke-ot dong achin.” Lahei alangli bangpi aphan pidet-lo. Anke latum dim-tar pasilo, lapen bangpi oso-chopathelo. 19Tamar ahem chedamjuilo, bangpi kechekurki ape chephlokjok-lo, lapen hemepi ape chepindengthulo.
20Hirah aphan Judah ke bi papontoilo, lapen arloso aphan alangli kepitekang sim-bon ta pavantoilo, bonta bangpi aphan Hirah thek-longle det-lo. 21Enaim along alangli ajehak amonit aphan arjulo, “Tovar akung kedo abeisapi konat-lo?”
Ladak beisapi aphrang penta ave, latum thak-lo.
22Alangli Judah along chevoilo, lapen pulo, “Bangpi aphan neli thek-longle det-lo. Hadak lason abeisapi aphrang penta ave pusi hadak kedo amonit atum pulo.”
23Judah pulo, “Bangpi le mar pakhang-lonang. Etum aphan bang epangnekchoi longle-det nangji. Bangpi aphan ne anam kepiji bor-ilo, bonta nang bangpi aphan longle det-lo.”
24Chiklo jonthom anbak aphi mane Judah aphan pulo, “Nangmunpi Tamar ke beisapi asonsi cheplang-lo, lapen non bangpi oso-chopathelo.”
Judah hukumpilo, “Bangpi aphan pondet-ra me phrindutnon.”
25Bangpi aphan kepon ahut, alok-hei aphan bangpi lam pathan damtoilo: “Lahei amar ahemphu pen ajoksi neli oso chopathelo. Lahei langnon, lapen lahei komat amar ma langnon-laso asap a-arnan lapen laso achin.”
26Lahei Judah pangthek undet-lo, lapen pulo, “Bangpi ahok si kedo. Bangpi aphan keklempi nangji akam ne klempipedet-lo-bangpi aphan nesopo Shelah pa-en nangji apot-lo.” Bangpi pen Judah aphi an dim-tar pasise det-lo.
27Bangpi oso amahang kepathekji apor nangkele ahut, bangpi oso-cherop kelongji chinikoilo. 28Bangpi oso amahang kepathek ahut, inut bang ari nangchejarlo, lapen oso mahangkethek kerapdun a-arloso la otdundong si honjeng ke-er kokdunlok-lo, lapen pulo, “Labangsi mahangkethek paphrang.” 29Bonta la ari chesanthudet-lo, lapen akleng abang si mahangthek paphrangrong-lo. Anke oso amahang-kethek kerapdun abangpi pulo, “O nang lasonsi nangbar paphrang-lo!” Lasi laphan ke Perez#Ibri alam penke “kechebahak” pusi amen irlo. 30Anke la abong honjeng ke-er kekok abang mahang nangthek-lo, lapen la amen Zerah#Ibri penke arni kevang ke-erring ason irlo.
Currently Selected:
KECHENG 38: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
