KECHENG 39
39
Joseph Lapen Potiphar Apiso
1Non Ishmael aso atum Joseph aphan Ijip anat pondet-lo, lapen laphan potiphar, inut recho a-saihemphu, rechohem keton ahemphu, aphan jordet-lo. 2Joseph along Hemphu dolo lapen laphan keklem aling pachunlo. Alangli Ijip-aso ahemphu along si dodunlo,#Akam 7.9 3la Joseph along Hemphu dolo lapen alangli keklem aling pahirme lo pu thek-long-lo. 4Alangliphan Potiphar aningdok khak-lo, lapen laphan alangli methang aban pinchong-lo; lasi laphan alanglihem aputhak pachehemphutoilo, lapen alangli mar an aputhak. 5Halaso arni pen, Joseph ajok Ijip-aso ahem isi lapen alangli hem lapen hidi kechepahemphu amar an aputhak Hemphu pahirjumelo. 6Potiphar asontin alangli kechepahemphu amar anta Joseph arideng si hodai-et-lo, lapen alangli methang kecho a-an apar alangli thangnat ta matha dundedet-lo.
Joseph ke akrom-ajom, lapen kelang athokdo, 7lapen malomso arni aphi ahemphu apiso, Joseph aphan aning kehang cheng-lo, lapen laphan bangpi ahongplang along ke-irap-rapji aphan hang-lo. 8La kroidunde si bangpi aphan pulo, “Langtha, hem akam an nelihemphu thangnat ta matha nangne det-lo, pima neli ladak kedo. Alanglimar kedo-an nelirideng si hodai-et-lo. 9Alangli laso ahem aputhak ko-an ma jakong kedo la-an si nelita dolo, lapen nanglipen apar alangli thangnat ason ta neliphan khang khelo. Neli kopuson si lason mek-langno akam keklempo, lapen Arnam aphan langplot pen keklemhaipo?” 10Arnivangta bangpi Joseph aphan chohangbomlo seta, la bangpi ahongplang along i-dundedet-lo.
11Bonta arnisi Joseph amethang akam kecheklemjisi hem arlo kelutdam ahut, hadak badu aban atum ta ave. 12Bangpi laphan ape ot-hetsi pulo, “Nelong hongplang along nangdunnon.” Bonta la chepajok-phlot-lo lapen bangpi arideng ape chetekangbubsi ingtan katjuilo. 13La ape che-otekangbub-lo, lapen hempen ingtan katjuilo pu bangpi thek-longsi, 14bangpi hem aban atum aphan hang-lo, lapen pulo, “La langtha! La nepenan dak ahem kevan Ibri aso etum aphan elangremlo. La ne ingdeng arlo vang-lo, lapen nephan nekelangremjisi bor-i-lo, bonta ne nesedotik hang-lo. 15La nekehangchir arjulongsi, la ingtan katjuilo, nedung laso ape che-otekangbub-lo.”
16Joseph ahemphu hem vangvetik laso ape bangpi chebijoilo. 17Anke alangli phan laso isinat alam thanlo: “Nang kevan a-Ibri aso ne ingdeng vanghamsi lapen nephan patherak-lo. 18Bonta ne hangchir amat la ingtan katjuilo, lapen nedung laso ape che-otekangbub-lo.”
19Joseph ahemphu ke aningthihak-lo, 20lapen Joseph aphan panepchek-lo, lapen recho amonit atum aphan kebeng ahemkangsam kebeng adim arlo bengchek-lo, lapen hadak si la donang-lo. 21Bonta Hemphu ke Joseph along dodunlo, lapen lapu-an pahirjumelo, laphan kebeng abang aningdok-khak-lo.#Akam 7.9 22Alangli Joseph aphan kedo-an hemkangsam kedo atum aphuthak pachehemphutoilo, lapen hemkangsam along kopi plang loma kelang abang bat-lo. 23Joseph adeng aputhak hemkangsam kehon abang kelang nangji thangnat akam avelo, pima Joseph along Hemphu dolo lapen alangli keklem aling laphan pachundunlo.
Currently Selected:
KECHENG 39: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
