KECHENG 40
40
Hemkangsam Kedo Atum Amang Joseph Athe Kethan
1Penang an arni aphi, Ijip arecho ahor lapen ahim ahemari kethe atum recho aphan aning pakang-lo. 2La banghini aban atum aphan alangli aningthilo, 3lapen keton ahemphu ahem along latum aphan bengchok-lo, ha Joseph aphan kebeng adim along. 4Latum hemkangsam arlo penang an arni donang-lo, lapen kebeng ahemphu abang Joseph aphuthak halatum aban paplangtoilo.
5Ningve isi hemkangsam arlo, hor ahemaripo lapen him ahemaripo latum abangphutinta amang hemanlo, lapen amang athe ta prekjamlo. 6Latum along Joseph adapprang kevang ahut, latum aning kebi la thek-long-lo. 7Latum aphan la arjulo, “Kopi apotsi nanglitum pini lapu-an kematha kesung asonlo?”
8Latum thak-lo, “Netum abang-phutin ta mang hemanlo, lapen mang athe kopima, ladak baduta nekethan abang ave.”
Arnam si mang athe kethan ajakong pi-unchot, Joseph pulo. Nanglitum amang neliphan nethannon.
9Lasi hor ahemaripo abang pulo, “Ne mang ke ne ingno erong drakha arikang thek-long-lo, 10la along rothom dolo. Arvo kechingjok pen amat, angphar pangpharlo, lapen athe men-ang-lo. 11Neli recho aharlung otdong-lo, lasi neli drakha athe enlo, lapen lahei harlung arlo sorlo, lapen alangliphan la pilo.”
12Joseph pulo, “La-so amang athe ke lahelo: Aro kethom la ke nithom aphanlo. 13Nithom aphi recho nangliphan lo-po, nangli diyapo, aphrang akamthot nangpithupo. Nangli alangli hor ahemari aphrang kedo asonthotsi nangli alangliphan harlungpipo. 14Bonta kadokave nangli phan mesenlo pulote neliphan kanghonpen chematha ik-tha, lapen neli lam kanghonpen recho aphan pinpur iktha lapen laso ahemkangsam pen kebar thekjile nerap iktha. 15Jonghe seta neliphan Ibri atum adet pensi ne nep-ponchek-lo, lapen ladak Ijip along seta nephan nekebengchok nangji adai akam neli klemklelang.”
16Hor ahemaripo aphan kethan athe akemesen pu him ahemaripo abang Joseph aphan pulo, “Nelita mang hemanlo; neli tonthom ahim parpu ponlo. 17Athaksi aton along ke recho kecho amar an ajat ajat dolo, lapen vo atum lahei cholo.”
18Joseph thak-lo, “Laso amang athe ke lahelo: tonthom ke nithom aphanlo. 19Nithom aphi nangliphan ta recho nang-lophlotpo, lapen nangliphu nang ingthanpetpo! Anke alangli nanglibang arpum nujok ehong along vek-lokpo, lapen vo atum nangli-ok chopo.”
20Amahang kethek arni nithom aphi kadokave aban atum aphan kecho-i amei recho pathik-lo; alangli hor ahemaripo lapen him ahemari kethe aphan lophlot-lo lapen alangli ban atum angno vandet-lo. 21Hor ahemaripo aphan alangli aphrang akamthot pacheklemtoilo, 22bonta him ahemarikethe aphan alangli pathilot-lo. Joseph kepu atengsi la kadokave ta plang-et-lo. 23Bonta Hor ahemaripo abang Joseph aphan mathathepin-alangli alam laphan la tengnebub-lo.
Currently Selected:
KECHENG 40: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
