KECHENG 46
46
Jakob Lapen Alangli Hemtun Ijip Kedam
1Jakob kedo-an amar telup-lo, lapen Beersheba anat damlo, hadak alangli po, Isaak a-Arnam aphan arklilo. 2Ajo alangliphan cheklangsi hang-lo, “Jakob, Jakob!”
Kopilo, neli daksi dolo, alangli thak-lo.
3Ne Arnamlo, Nangpo a-Arnamlo, Alangli pulo. “Ijip adet kedamji aphan phere-nangne; hadak nangso-nangsu aphan Ne isi thedung akhei pinchongji. 4Nanglong Ijip adet Ne dunji, lapen laso alongle along nangso-nangsu aphan vanthudetji. Nang kethi ahut Joseph nanglong si dopo.”
5Beersheba pen Jakob barlo. Asomar atum alangliphan, latum a-osomar atum aphan, apiso atum aphan Ijip arecho nangkelo hem-kong-long-heihei athak arthang-lo. 6Kanaan adet latum kelong api lapen kechepa-hemphu amar an latum ponlo lapen Ijip damlo. Jakob aso-asu kedo-an chepon-et-lo:#Akam 7.15 7la asomar atum, asumar atum lapen asopimar atum.
8Ijip kedam Jakob ahemtun abangphu atum ke alangli aso-akleng Reuben 9lapen Reuben asopomar atum: Hanokh, Pallu, Hezron, lapen Karmi. 10Simeon lapen la asopo: Jemuel, Jamin Ohad, Jachin, Zohar, lapen Shaul, la Kanaan a-arloso asopo. 11Levi lapen la asopo atum: Gershon, Kohath, lapen Merari. 12Judah lapen la asopo atum: Shelah, Perez, lapen Zerah. (Judah akaprek asopo Er lapen Onan, atum Kanaan along si thi-lo.) Perez asopo atum ke Hezron lapen Hamul. 13Issakar lapen la asopo atum: Tola, Puah, Jemhub, lapen Shimron. 14Zebulun lapen la asopo atum: Sered, Elon, lapen Jahleel. 15Lahei asopomar atum ke Mesopotamia along Jakob aphan Leah mahang kepathekpi asomar atumlo, la apar ta angjir Dinah dolang. Leah pen ajok kadokave aso-asu aphai bang thomkep-ra kethom.
16Gad lapen la asopo atum: Jephon, Haggi, Shuni, Ezbon, Eri, Arod, lapen Areli. 17Asher lapen la asopo atum: Imnah, Ishvah, Ishvi, Beriah, lapen latum angjir Serah. Beriah asopo atum ke Heber, lapen Malkhiel. 18Lahei bang krethok ke Zilpah pen ajok Jakob aso-asu atum lo. Zilpah ke Rachel aphan kelodun abanpilo. 19Jakob apiso Rachel laphan sopo banghini mahang pathekpilo: Joseph lapen Benjamin. 20Ijip along Joseph asopo banghini dolo, Manasseh lapen Ephraim, lahei Asenath pen ajok-lo, bangpi inut Heliopolis akurusar, Potiphera asopilo.#Kech 41.50-52 21Benjamin asopo atum ke Bela, Becher, Ashbel, Gera, Naaman, Ehi, Rosh, Muppim, Huppim, lapen Ard helo. 22Lahei bangkrephli atum ke Rachel pen ajok Jakob aso-asu atumlo.
23Dan lapen la asopo Hushim. 24Naphtali lapen la asopo atum: Jahzeel, Guni, Jezer, lapen Shillem. 25La bang throksi ke Bilhah pen ajok Jakob aso-asulo, Bilhah ke Laban, Rachel aphan kepi abanpilo.
26Ijip along kedam Jakob aso-asu apok-et pangrumpet aphai bang throk-kep-ra throk, apiso lapen asomar atum aphan lakha ponpe. 27Ijip along Joseph aphan banghini sopo amahang thekpilo, latum penpen hadak kedo Jakob aso-asu pangrumpet aphai bang throksi kep-lo.#Akam 7.14
Ijip Along Jakob Lapen Alangli Ahemtun
28Goshen along Joseph pen kechetongjisi Judah aphan Jakob toi paphrang-lo. Latum nanglesi, 29Joseph amethang hem-kong-long charlusi apo aphan kechetongjisi Goshen damlo. Latum kechetong ahut, Joseph apo aphan bamhet-lo, lapen penang ajirkeding chirulo. 30Joseph aphan Jakob pulo, “Ne thilot seta chok-lo, non ne nangphan nangthek-long-lo, lapen nang reng-et-lang pu chinilo.”
31Anke A-ik atum aphan lapen apo ahemtun kedo-an atum aphan Joseph pulo, “Ne damsi recho aphan Kanaan along kedo ne-ik atum lapen nepo ahemtun kedo-an atum nelong vangpet-lo pu thandam nangji. 32La aphan ne thanpo, nangtum ke kevi-atum, nangtum kevan api kepangreng atum lapen pi ahur lapen kedo-an amar chevanplang-lo. 33Recho jongsi nangtum akam kopilo pu nang arju lote, 34nangtum nangkai isi pi kepangreng-lok pu alam thanvek nangji, nangphusar atum keklem asonthot. Lason si alangli nangtum aphan Goshen alongri nangpado longpo.” Joseph la kepu athe ke Ijip aso atum ke Kevi-atum pen thangnat akecherap ave.
Currently Selected:
KECHENG 46: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
