KECHENG 47
47
1Lasi Joseph a-ik atum bangpho aphan pon si recho along damlo. Alangli pulo, “Nelipo lapen neli-ik atum latum api ahur lapen amar atar penpen latum Kanaan adet pen vang-lo. Latum non Goshen alongri si do.” 2Anke alangli a-ik atum aphan recho angno paklang-lo. 3Recho latum aphan arjulo, “Nangtum akam kopi?”
Nelitum ke kevi-atum, akehai, nelitum aphusar atum keklem ason, latum thak-lo. 4“Nelitum laso adet kedoji ninghang-lo, pima Kanaan adet akhim lapu-an kethurlo, hadak pi keviji aphan adim avedet-lo. Kanghonpen Goshen alongri kedolongji aphan hukum nelipi-iktha.” 5Joseph aphan recho pulo, “Non nanglipo lapen nangli-ik atum nangle tang-lo, 6Ijip adet ke latumlo. Latum akemenei alongle Goshen alongrile padonang. Lapen jongsi latum angbong keklemthek abang do pulote nepi ahur kelang abang pachehemphunang.”
7Joseph apo Jakob aphan vansi alangliphan recho angno ponlo. Jakob ahirjume recho aphan pilo, 8lapen alangliphan recho arjulo, “Nangli arta ko-anlo?”
9Jakob thak-lo, “Neli kedamtap akai ningkan 130 an damtang-lo. Lahei aningkan malomsovet lapen sungpik, neliphusar atum kedamtap ajirkeding kai ason kali.” 10Recho aphan Jakob isi kechekak ahirjume pitekangsi damjuilo. 11Anke Joseph apo lapen a-ik atum aphan Ijip along padolo, lapen Remeses arongsopi adung kemenei alongle latum aphan pachepahemphu toilo, la recho hukum kepi ateng-lo. 12Joseph apo aphan, a-ik atum aphan lapen apo ahemtun kedo-an aphan, lapen kebinei aphan sok-sang pilo.
Akhim Kethur
13Akhim lapu-an thurlo, nahokta an avedet-lo, lapen Ijip aso lapen Kanaan aso atum kangchirpen ainihak-huk-lo. 14Latum sok nang nam si, Joseph kedo-an atangka pangrumsi rechohem ponlo. 15Ijip adet lapen Kanaan atangka kedo-an padam-et aphi, Ijip aso atum vangsi Joseph aphan pulo, “Nelitum aphan sok-sang nepinon! Nelitum aphan pathilongri. Pine klem iknon! Nelitum atangka an dam-et-lo.”
16Joseph thak-lo, “Nanglitum atangka jongsi dam-et-lo pulote, nanglitum kepangreng api vannon, sok pen chelar lonang.” 17Lasi Joseph along latum kepangreng api vanlo, lapen latum alosei, abiresak, abi, achainong, lapen agadha alar alangli sok-sang pidunlo. Halaso aningkan latum aphan alangli halatum kepangreng api alar sok-sang pidunlo.
18Aphi aningkan latum vangsi pulo, “Nanglipen nelitum thangnat asonta kepatu ji ason ave, akehai, nelitum atangka an ta dam-et-lo, lapen nelitum kepangreng api anta nanglilongsi do-et-lo. Nangliphan nelitum abang arpum lapen longle pen apar thangnat ta nanglikepiji ason avelo. 19Nelitum aphan pathilongri. Pine klem-iktha! Nelitum ahidi pasamphridang longri. Sok-sang pen nelitum aphan lapen nelitum ahidi nenamdetnon. Nelitum recho aban plangpo, lapen alangli nelitum alongle cherailongpo. Nelitum kerengji aphan sok, lapen kerikji aphan chili nelipinon.”
20Recho aphan Ijip along kedo-an alongle Joseph nampilo. Ijip aso abangphutin ta alongle chejor nangkok-lo, pima akhim kethur sodak; lapen longle kedo-an ta recho amar plang-et-lo. 21Ijip arat kecheng ahin pen ha kejut an aphan Joseph ban pinchong-et-lo. 22Kurusar atum alongle si alangli namnechot. Latum longle jor nangne, pima latum kerengji aphan recho tangka pilo. 23Rat atum aphan Joseph pulo, “Langnon, non nanglitum aphan lapen nanglitum alongle recho aphan ne nangnam det-lo. Ladak kerikji aphan chili dolo, la nanglitum aphanlo. 24Kerot ahut phanpho pen ephan nangtum recho aphan pinangji. Ahin an ke chili lapen nanglimethang lapen nanglitum ahemtun kechoji aphanlo.”
25Latum thak-lo, “Nangli nelitum apran pajok-lo; nangli nelitum aphan me-o, akehai, lapen nelitum recho aban plangpo.” 26Lasi Ijip adet aphan Joseph isi aron pathik-lo, phanpho pen ephan asok ke recho apharman. Non pu anta laso aron dobomlang. Kurusar atum alongsi recho amar kalichotji.
Jakob Kejutsi Kechoningri
27Israel aso atum Goshen alongri Ijip along si dolo, hadak latum plang-olo, lapen osomar ongdung-lo. 28Jakob arta ningkan 147 an leletik alangli Ijip adet ningkan 17 dolo. 29Alangliphan kethiji apor nangle si, alangli sopo Joseph aphan alangli hang-lo, lapen pulo, “Nekengtham athak nangri chebat-ra nephan nang Ijip adet nangpippe lo pura semetangnon.#Kech 49.29-32; 50.6 30Nepo atum aphan kepip adimle nekepip-ji aphan nening hang-lo; nephan Ijip angtan nepon-ra halatum aphan kepip adimle nephanta nepipnon.”
Joseph thak-lo, “Nang kepu asonthot si ne klempo.”
31Jakob pulo, “Nang klempo pura semetangnon.” Joseph seme tang-lo, lapen Jakob hadak ahongplang athak kero pilo.
Currently Selected:
KECHENG 47: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
