LUK 19
19
Jisu ko Zakeus
1Jisu Jeriko lang züdu khu tsichiyacho. 2Hütsüla alihmüthsü dhrirü aying alirü khüdu anengnü Zakeus licho. 3Abinü Jisu tsü sünangpü dhingnyücho, ta abi akhikyah thsacho ko nyitsarü sühdirachonü abinü müngucho. 4Achotsü abinü sühdi bekhu shang wünü papasi dong khüdu chah abi dhingnung küducho, tunüo abi hütsüba lang tsünü tsinung licho. 5Jisu hütsüba müdüm chii rode, abinü kehchü dhing Zakeus te yocho, “Zah jürung, Zakeus, tunüo chünye Ih nü kuh la müdongnung.”
6Achotsü Zakeus-nü dhsüdhsa jüro abi künyangseh khyüchocho. 7Hütsü ngurü nyitsarü atümungnü nyingkongnü yocho, “Hiba nyitsarü münyirü khüdu shikuh kang müdongnung wüko!”
8Zakeus-nü shemüsu yapü Abüdongba te yocho, “Abüdongba nyieng! I kuthsi achangsho Ihnü ailümrü khyang jünung, ko Ihnü khürü kihyocho likhang, müyüshinü alaa thali jünung.”
9Jisu-nü abi te yocho, “Chünye hiba kuh la akangcheh ro lile, tunüo abi mii Abraham chahnü sihchocho. 10Tunüo Nyitsarü Tsurü achahcho yangchinung ko khümchonung rocho.”#Mat 18.11
Thsinü Yukitacho
(Mat 25.14-30)
11Nyitsarütinü hi nyi yade, Jisu-nü mütozah yukita khüdu yocho. Ade abi Jerusalem amünyethsa rocho, ko arühnü Tsingrangba yanglih tsü ronung thsakopü lümcho. 12Achotsü abinü yocho, “Shikhe khüdu adirü khüdu yanglih khüdu khyüchopü thali ronung limih ashulang wücho. 13Abi mütsiede, abinü akulirü dhüre dsinü arüh müipi khyang thsi khüdu-khüdu jonü yocho, ‘Ih mürode hinü shithsabhüleh yaang.’ 14Ta apu nyitsarütinü abi thrünyicho, hütsünü abi khanglang yusi hirü müthehnü yocho, ‘Ihrünü hiba nyitsarü hi ihrü yangthsarü mükangsohnyüre.’
15“Nyitsarüba tsü yangthsarü kangpü thali rocho. Abinü akulirütinü khüdodo jingchochonang müdhenung abi bete shibülungnung yuzengjücho. 16Akhoba tsünü ro yocho, ‘Adirü, nühnü jüba tsünü Ihnü thsi dhüre jingchoko.’ 17Abinü yocho, Mahso, nüh kulirü atsa. Nüh azikyahla longlangchehchonü, nüh Yangdi dhüre michah tase linung. 18Anyüubanü ro yocho, ‘Adirü, nühnü jüba tsünü Ihnü thsi münga jingchoko.’ 19Hivi te abinü yocho, ‘Nüh yangdi münga michah tase linung.’
20“Aparü kulirü khüdunü ro yocho, ‘Adirü, nü thsi hila lile, Ihnü shü la khapü yohpüchoe. 21Nüh amütsa nyitsarü thsachonü Ihnü nüh drücho. Nühnü bürü yo khyüre ko nühnü müchichola xare.’ 22Abinü abi te yocho, ‘Nüh kulirü amütsa! Ihnü nüpu yunü nüh mülangjünung. Ih zii amütsa nyitsarü, bürü yo khyürü ko Ihnü müchicho lanü xarepü nühnü müdhele. 23Khang, tuepü I thsi thsikuh la müzahkehcho? Arelang, Ih thali rode ajehyoh zeh nguba thsacho.’
24“Hütsüpü abinü hütsüla yarüte yocho, ‘Abi khehlanü thsi tsü khyüng ko thsi dhüre liba kuliba khyang jüng.’ 25Ta arühnü abi te yocho, ‘Adirü, abi thsi dhüre limado!’ 26Abinü lalingcho, ‘Ihnü nührü te yore, sü lango liro abi khyang alaa mii jünung; ta sü müliro, abi azikyah liba tsü mii hitsinung.#Mat 13.12; Mrk 4.25; Luk 8.18 27Ko I rorüti sürünü arüh michah Ih yangthsarü mükangsohnyücho, arüh tsü hila norung ko I betenü arüh kyüsehng!’”
Jerusalem lang Akoh ngu Züducho
(Mat 21.1-11; Mrk 11.1-11; Jhn 12.12-19)
28Jisu-nü hi yopü arüh müngu Jerusalem lang wüchi yacho. 29Khode abi Olive zong la Bethfage ko Bethany amünyethsa rocho, abinü mono anyüh tsehleh yu hiri yopü müthehcho. 30“Nührü bekhu liba yang la tsü züdung; nührü züdude, khodesü müpümdhingcho Gaduza khüdu xohchingpo ngunung. Hütsü lehcheh hila norung. 31Ko khürünü tuepü lehchehropü yokhang, Abüdongba shulüm hi dhsütahlepü young.”
32Achotsü arühnü wücho ko Jisu-nü arüh te yocho roh-i ngucho. 33Arühnü Gaduza tsü lehchehchi yade, abüdongrünü arüh te yocho, “Tuepü hütsü lehchehro?”
34Arühnü lalingcho, “Abüdongba-nü hi dhsütahle” 35ko arühnü gaduza tsü Jisu yang norocho. Hütsüpü gadu michah tsü arühnü shü phakehjücho, ko hütsü chah tsü Jisu pümsocho. 36Ko abi wüde, nyitsarütinü arüh shü langla khyangjücho.
37Abi Jerusalem amünyeh Olive Zong langnü jüroba lang müdüm tsü chii rode, abi mono sühdi tsünü arühnü ngucho anyemüyangnungti nengdang züde Tsingrangba neng senung dikehcho: 38“Abüdongba nengla roba yangthsaba tsü müwajüng! Ninglang atbachi ko Tsingrangba te ahechi thsaang!”#N. Khi 118.26
39Hütsüde amülungla Farisirü khürünü Jisu te yocho, “Athsingyurü, nü monoti tsü mürongrongnung yuzeng jüng!”
40Jisu-nü lalingcho, “Ihnü nührü te yonung, arühnü yah-a du likhang, lungnü züdemüsunung.”
Jisu-nü Jerusalem Nengdang Tracho
41Khode abi yangdi amünyethsa rocho, abinü hütsü ngu tranü yocho, 42“Nührünü chünye dusü yangtsa chürosohnung müdherelang! Ta nührünü hütsü ngunung mükoh! 43Nührü rorünü dhsu-tbünü nührü kyahtinung, ko apüm langnü nührü dhsuti khangtinung bekhyah ronung. 44Arühnü nührü riri changsohnung ko hütsüla lirü atümung müpsehnung; arühnü lung khüdu dusü ajojila müjosohnung, tunüo Tsingrangba-nü nührü khümchonung rocho bekhyah tsü nührünü mümüdhecho!”
Jisu Amübükuhlang Wücho
(Mat 21.12-17; Mrk 11.15-19; Jhn 2.13-22)
45Hütsüpü Jisu-nü amübükuh la züdu shithsabhülehrüti iipehnung dikehnü 46arüh te yocho, “Amüsa yula hi thrah lile, ‘I kuh te dangkhidangnang kuh pü dsinung.’ Ta nührünü aführü ku münyiji kangsohre!”
47Ko Jisu-nü nyümong mükhu amübükuh la docho. Bebü ayingti, yuzeng dorüti ko amülung yola langnürütinü abi müpsehnung yangchicho,#Luk 21.37 48ta arühnü nguchinungthsa tu lang müngucho, tunüo atümungnü abi yu nyinung mücijo licho.
S'ha seleccionat:
LUK 19: SANGBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.