LUK 20
20
Jisu Tase Nengdang Tsingdhingcho
(Mat 21.23-27; Mrk 11.27-33)
1Nyümong khüdu amübükuh la Jisu-nü nyitsarüti te donü ko Yuse atsa thsingyu yade, bebü ayingti ko yuzeng dorüti azibarüti te müjang 2abi yanglang ronü yocho, “Hiri nguchinung nüh tu tase liro? Sünü nü khyang hiba tase jücho? Ihrü te young.”
3Jisu-nü arüh te lalingcho, “Ihnü nührü te lang khüdu tsingdhingnung. 4Johan-nü baptijüba tase tsü Tsingrangba chahnü a mahkhang nyitsarü chahnüo, Ite young?”
5Arühnü arühbürü yola rehtamüsucho, “Ihsanü tu yonung? Ihsanü, ‘Tsingrangba chahnüe’ pü yokhang, ‘Khang tuepü nührünü Johan chah müyudsicho pü abinü yonung?’ 6Ta Ihsanü, ‘Nyitsarü chahnüekhang’ sühdi hi atümungnü Ihsa chah lungnü kengnung, tunüo Johan tsü azikehrüepü arühnü müdhele.” 7Achotsü arühnü lalingcho, “Hütsü khüdenünang Ihrünü mümüdhe.”
8Jisu-nü arüh te yocho, “Khang, Ihnüsü tu tasenü hiri nguchiro hütsü nührü te müyonung.”
Shükusih Luthsarünü Yukitacho
(Mat 21.33-46; Mrk 12.1-12)
9Hütsüpü Jisu-nü nyitsarüti te yukitaba hi yocho: “Shikhe khüdu nyüh khüdunü shükusiluh khüdu thsacho, ko hütsü anguchirü khyang pehjüpü anyahli nengdang kuh pehjüpü tsicho.#Isa 5.1 10Khode shükusih laanung akyang chihcho, abinü anguchirü yang abi nohlüm chingnung akulirü khüdu wüsohcho. Ta arühnü kulibong tsü lahcho ko khehshü thali müthehcho. 11Achotsü abinü akulirü aparü nyüh khüdu wüsohcho; ta arühnü abisü lahcho, ko ashah khyo bichipü khehshü thali müthehcho. 12Hütsüpü abinü kulirü asanguba wüsohcho, ta arühnü abisü lerohpehjüpü, tphahchehchüpehcho. 13Hütsünü shükusiluh abüdongba-nü yocho, ‘Ihnü tu nguchinung! Ihnü Ipu amüiba tsurü müthehnung; arühnü abi jengrenglü drünung!’ 14Ta khode shehsherünü abi ngucho, arühbürü chotacho, ‘Hiba hi abüdongba tsurüe. Ihsanü abi müpsehnung, ko kuthsi tsü Ihsa yo kangnung!’ 15Achotsü arühnü abi shükusiluh lanü tphahcheh müpsehcho.
“Jisu-nü tsingdhingcho, Hütsütakhang, shükusiluh abüdongba-nü shehsherü chah tsü tu nguchinung? 16Abinü ro shehsherü tsü müpsehnung ko shükusiluh tsü khyo aparü khyang jünung.”
Arühnü hi yuchinü yocho, “Hiroh-ilü tütikehsoh!”
17Jisu-nü arüh chah dhingnü yocho, Khang amüsa yu hi tu adüzüo?#N. Khi 118.22
“Kuthsarünü müdhsütahba lung tsü
apüm tenü ayingba kangcho.
18“Hütsüba lung chah sü shohjonang abi lahzangzangnung; ko lung tsü khürü chah longkehkhang, abi asongsong kang kengnahnung.”
Alihmüthsü Jünung Nengdang Tsingdhingcho
(Mat 22.15-22; Mrk 12.13-17)
19Yuzeng dorüti ko bebü ayingti tsünü hütsü chahnü Jisu rangnyücho, tunüo yukita abinü yoba hi arüh nyümrepü arühnü nyichehcho; ta arühnü nyitsarüti drücho. 20Arühnü nyitsarü khürü yuje chorü kyo ngusohnung müjühpü apu yula xohsohpü governor kheh la khakhuchüjünung nengdang arüh wüsohcho. 21Füzathsarü hirinü Jisu te tsingdhingcho, “Athsingyurü, nühnü yuje du chore ko dorepü Ihrünü müdhele. Nühnü sü tsah müdhingre, ta Tsingrangba lang yuje dore. 22Kaisar khyang alihmüthsü jünung tsü yuzengnü müla lirü mah-o?”
23Ta Jisu-nü arüh rah richeh ngunü arüh te yocho, 24“Ite thsi khüdu ngusohng. Hi chah sü tsah ko sü neng kehro?”
Arühnü lalingcho, “Kaisar.”
25Jisu-nü yocho, “Khang, tu Kaisar yo liro hütsü Kaisar khyang jüng, ko tu Tsingrangba yo liro hütsü Tsingrangba khyang jüng.”
26Hütsüla nyitsarü bete arühnü tulasü abi rangnung mükohcho ko abinü lalingchola nyemüyang arühnü sahmüthsacho.
Kangliroba Nengdang Tsingdhingcho
(Mat 22.23-33; Mrk 12.18-27)
27Hütsüpü asürü kangliroba mühlepü yorü Sadukirü khürünü Jisu yang ropü yocho,#R. Ngu 23.8 28“Abüdongba! ‘Nyüh khüdu atsurü mülipü anitpü pehjü sopehkhang, anithrenü chomitpü tsü khyübae ko anyüh tsurü tsü amung asuu tsurü roh-i khichibaepü Mosa-nü ihrü khyang thrah yohpüjüle.’#Azk 25.5 29Shikhe khüdu arüh jünirü dhünyeh licho; aziba tsü kukangcho ko tsuzarü mülipü sopehcho. 30Achotsü anyüubanü khingkutpü tsü khyücho, 31hütsüpü asangubanü khyücho. Hütsü roh-i arüh dhünyehding tsuzarü mülipü sücho. 32Achangkathsa, khingkutpü tsüsü sücho. 33Asürüti kangli roba nyümongla abükyü tsü sü nitpü thsanung? Tunüo arüh dhünyehdingnü abükyü tsü khyücho.”
34Jisu-nü arüh te lalingcho, “Hi limih la khingkurü adhrerü xengyangpitare, 35ta sürü kangliro ninglanglih la linung dekhingro, arüh müxengyangpitanung. 36Arüh ninglang riwürüti kyo kangnung ko müsünung. Arüh tsü Tsingrangba tsurüti, tunüo asücho lanü arüh kangliko. 37Ko Mosa-nü asürü kanglinung nengdang yuzi tsidsa lile. Singtrungla michang trude abinü Abüdongba nengdang: ‘Abraham Tsingrang, Isak Tsingrang ko Jakob Tsingrang pü dsicho.’#Nüch 3.6 38Abi asürü Tsingrang mah, ta akang liba Tsingrang, tunüo abi chah atümung akang lire.”
39Yuzeng dorüti khürünü yocho, “Athsingyurü, tsa lalingko!” 40Tunüo arühnü abi te apa tsingdhingnung müci mümülahcho.
Mesia Nengdang Tsingcho
(Mat 22.41-46; Mrk 12.35-37)
41Jisu-nü arüh te tsingdhingcho, “Mesia tsü David tsurüepü arühnü khüta yoro? 42Tunüo Nengsekhi la David apunü yore,#N. Khi 110.1
“Abüdongba-nü I Abüdongba te yocho:
Ihnü nü rorüh nü jing pohki dhrümchi müyohpüde,
43I tsalangthring hila püm.
44David-nü abi te, Abüdongba; pü dsikhang, Mesia tsü khütapü David chahnü trahchocho thsanung?”
Jisu-nü Yuzeng Dorüti Nyüm Müzahsohcho
(Mat 23.1-36; Mrk 12.38-40)
45Nyitsarü atümungnü nyi yade, Jisu-nü amonoti te yocho, 46“Yuzeng dorüti, sürünü shü asheng müpipü tungchinyüro ko yanglongla jengrengjo salüm jüsohnyüro; ko sürünü Sinagog ko thsütila pümji atsauba khyünyüro; 47sürünü chomilarü kuh la kengcho khyünyüro, ko atangnung anyahli dangkhidangnangro, arüh nengdang müzahmükieng! Arüh akhingchi atümung tenü amütsau linung!”
S'ha seleccionat:
LUK 20: SANGBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.