JOHAN 3
3
Nikodem in Jesu A Ve’na
1Pharisaite lak ah mi pakhat, a min Nikodem kiti, Judate hotu a um a.
2Ama chu jan ah Jesu kiang in a hung ah, “Rabbi, nang hi Pathian ah kipat zilsakpa ding ah hung la hi ti ka hiau a; kuale ama ah Pathian umnate longal chun, zia la thilmak bawlte gual hi bawl thei pua’n au,” a hung tia.
3Jesu’n a dawnhu a, “Titakzet in ka hil la hi, mi chunglam ah kipat a pianthak lo chun, Pathian gam muthei pua’n a,” a tia.
4Nikodem in a kiang in, “Mi a têk nung in bang ti’n piang kit thei ding a hem, a nu sung ah lut kit in hung piang kit thei ding a hem?” a tia.
5Jesu’n a dawnhu a, “Titakzet in ka hil la hi, mi kuale, tui leh Thagau ah a pianlo chun, Pathian gam lutthei pua’n a,
6taksa ah piang chu taksa ahi’n, Thagau ah piang chu thagau ahi.
7‘La pianthak ding ahi,’ ka ti hi maksa kin.
8Huizang a nopna lam lam in a hâng sek in, a git la hiau in; himaleh, khoi ah kipat hung a hem, khoilam ah chia ding a hem ti la he puai; kuale Thagau ah piang chu zia gual chu a hisek hi,” a tia.
9Nikodem chun a kiang in, “Bang ti’n zia thilte chu a hithei diam?” a tia.
10Jesu’n a dawnhu a, Israelte hotu pakhat la hingal ah, bangatia ziate hi hethei lo la hem?
11Titakzet in ka hil la hi, kei un ka het uh chu ka gen sek un, ka muu chu ka hiatsak sek ui; himaleh, la taksang ngai puau hi.
12Lei lam thilte ka hun hil ah bawn la het theilo ua leh, van lam thilte hun hil leng bang ti’n hethei ding la hiu em?
13Kuama van ah kal to kha a um puau, van ah kipat hung sukpa, Mihing Chapa van ah umpa tilo ngal hi.
14 #
Kis 21.9
Mosi’n gamthip ah sumgul a khaikâng gual khan, Mihing Chapa hile khaikâng ah um intin.
15Kuale ama ging taphot chun mangthailo ah, kumtuang hinna a nei zawkna ding un.
16Pathian in khawvel a hepi ma ma ziakin, a Chapa changkhat neisun chu a hun pia tai; kuale ama ging taphot chu mangthailo ah, kumtuang hinna a nei ngeina ding un.
17Pathian in khawvel thiamlo chansakna dingin, a Chapa khawvel ah a hun sawl puai, ama ziak ah khawvel hukdam ah a umna dingin a hun sawl zaw ahi.
18Ama ging taphot chu thiamlo chang pua’n tin; himaleh, ama ginglo taphot chu thiamlo changsa ahi tai, Pathian Chapa changkhat neisun min a ginlo ziakin.
19Zia hi thiamlo channa chu ahi, vâk chu khawvel in a hung a; himaleh, mite’n vâk sâng in thim a dawi zawu hi, a thil hi’teu a phatlo ziakin.
20Thil phalo bawl tapo in vâk a dawi puau in, vâk inle a hung nuam puau hi.
21Himaleh, thutak ah thilbawl sekte chu, Pathian ah kipat a bawl uh ahi ti kilatna dingin vâk in a hung sek ui, a tia.
Jesu leh Baptispa Johan
22Zia nung ah chun, Jesu leh a nungzuite chu Judea gam in a hung ua; zia tak ah chun chomkhat a châm un, mi a baptis sek ui.
23Johan inle Salim khua kiang ah Ainon ah chun tui a tam ziakin mi baptisma a chansak sek ah, zia mun chun mipi a hung khawm ua, baptisma a hung chang sek un;
24 #
Mat 14.3; Mar 6.17; Luk 3.19,20 Johan chu suangkul ah khum a hinai tâkdilo ziak ahi.
25Zia hun ah chun Johan nungzuite khenkhat tawh, Judate mi khat hi kisukthianna thu in a kinial ua.
26Tichun, Johan kiang in a hung ua, “Rabbi, Jordan lui gâl lam ah la kiang ah hungpa, a chanchin la la hiatsak sekpa khan mi a baptis hen, ngaitia, mi zosia a kiang in a chia ziang ui,” a vatiu a.
27Johan chun a la dawnhu a, van ah kipat piak a hilo ngal ua leh, kuama’n bangma a nei thei puau hi.
28 #
Joh 1.20
Keima chu, Messiah ka hipua’n, a ma-âng ah sawl masak ka hizawi, ka ti kha, nangmau hi a hiatpite la hiu.
29Mo neipa chu mo-pa chu a hisek hi; himaleh, mo-pa dinpi a gualpa chun, a thu a la hetpi in, zia mo-pa thugen ziak ah chun nasa tak in a la kipak sek hi; zia gual ma chun, zia hi ka kipakna bukimna chu a hi.
30Ama chu hung pung deu deu intin, kei chu hung kiam deu deu ding ka hi.
Van ah Kipat Hung Mi Pakhat Chu
31Chunglam ah kipat hungpa chu mi zosia chung in a um a; lei ah kipan chu lei ah mi ahi’n, lei lam thu a gen sek in; van ah kipat hungpa chu mi zosia chung ah mi ahi.
32A mu leh a het taphot a hiatsak ah, a thu hiatsak chu kuama’n a pom puau hi.
33Kuale a thu hiatsak a la pomte chun, Pathian chu dik tak ahi, ti a sudet tau hi.
34Pathian sawl ahi ziakin Pathian thute chu a gen hi; Pathian in te’ chît chiat in Thagau chu a pia puai.
35 #
Mat 11.27; Luk 10.22 Pa chun Chapa chu a hepi hen, a khut in bangkim a pia tai.
36Kuale Chapa ging chun kumtuang hinna a nei tai; chuleh, kuale Chapa ging lo chun hinna mu pua’n tin, Pathian lungnatna chu um zaw’n a, a tia.
S'ha seleccionat:
JOHAN 3: VAIPBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.