JOHAN 4
4
Jesu leh Samari Numei
1Johan sâng in nungzui tam zaw a nei leh, baptis le a bawl tam zawi ti Pharisaite’n a hiau hi ti, Jesu’n a het phat in,
2Jesu ngei ngei in a baptis pua’n, a nungzuite’n a hi’zaw sek uh ahi,
3Judea gam chu pawtsan ah, Galili gam lam in a chia kit ta’n.
4Ahi’n, Samaria gam a hawthen a ngai hi.
5 #
Thl 33.19; Jos 24.32 Tichun, Samaria gam ah khaw pakhat, Saikhar a tiu chu a hung tung a; zia tak ah chun Jakob in a chapa Joseph kiang ah mun a piakna kiang kha ahi.
6Zia tak ah chun Jakob tuikul kha a um a. Jesu lamzawtna a thachawl ziakin, tuikul gei ah chun a chu ta’n; zia chu sûn an nêk hun ding vêl ahi.
7Samari numei pakhat tuikhai dingin a hung a; Jesu’n a kiang in, “Tui dawn ding ei pia’n,” a la tia.
8(A nungzuite nêk ding chaw khua sung ah a chia kâl uh ahi’n.)
9 #
Ezr 4.1-5; Neh 4.1,2 Samari numei chun a kiang in, “Nang Juda mi la hi’n, kei Samari numei ka hingal a, bangtidan ah ka kiang ah dawn ding la dot ziang a hem?” a tia. (Judate chun Samari mite bangma a mat ngailo uh ahi’n.)
10Jesu’n a dawnhu a, “La kiang ah dawn ding ei pia’n, tipa leh, Pathian thilpiak chu he hilechin vang, ama kiang ah hin don zaw’n la tin, ama chun tuihing hun pia ding hive’n,” a tia.
11Numei chun a kiang in, “He pu, tui khaidawna ding bangma la nei pua’n, zia tuikul hi a thûk ngal a; khoi ah kipat a hem zia tuihing chu la nei?
12Ka puu Jakob sâng ah lopi zaw la hia a hem? Ama chun, zia tuikul hi ei pia’n, ama ngei leh a chate, chuleh, a ganchate’nle a la dawn ui,” a tia.
13Jesu’n a dawnhu a, “Kuale zia tui dawn tapo chu a dangchâk kit in a;
14himaleh, a kiang ah ka piak ding tui dawn tapo chu, kum khua’n a dangchâk ta pua’n a; keima’n a kiang ua ka piak ding tuinâk chu a sung un um intin, kumtuang hinna tiang in pûtdok in a,” a tia.
15Numei chun a kiang in, “Aleh he pu, zia chan chan ah tuikhai ah ka hung lona ding leh, ka dangchâk kit tâk lona dingin zia tui chu ei pia’n,” a tia.
16Jesu’n a kiang in, “Chia inla, la pawsal vako inla, zia tak hin hung kit in,” a tia.
17Numei chun a dawnhu a, “Pawsal ka nei puai,” a tia. Jesu’n, “Pawsal ka nei puai la ti chu la ti dik ten hi,
18pawsal panga la nei ta’n, tu’ la kichenpi hile la pawsal ahi puai; zia la ti chu la tidik ma ma hi,” a tia.
19Numei chun a kiang in, “He pu, jawlnei la hi ti ka hun he tai.
20Ka pu leh pateu in zia tâng ah hin Pathian a ho sek un; himaleh, nang un, ‘Min Pathian a biakna ding uh chu Jerusalem ahi,’ la tiu in,” a tia.
21Jesu’n a kiang in, “Numei, ei taksang mai in, a hun tung ding ahi tai, zia tâng leh Jerusalem khel lo ah le, Pa chu biak thei hung hita ding ahi.
22Nang un la hetlopiu la ho sek un; kei un vang ka biak uh chu ka hiau ahi; Judate lak ah kipat hukdamna chu hung pawt ding ahi ngal a.
23Ahi’n, a hun tung ding ahi tai, tu’hin le a tung ma ahi tai, zia hun tak chuleh Pathian be tak takte chun, Pa chu Thagau leh thutak in ho ding a hiu; Pa’n zia tawhbang mi chu ama ho dingin a hawl hi.
24Pathian chu Thagau ahi’n, ama ho dingte chun, thagau leh thutak in a ho diu ahi,” a tia.
25Numei chun a kiang in, “Messiah chu hung ding ahi ti ka la hia’n; ama chu a hung tak leh bangkim ei hil in a,” a tia.
26Jesu’n a kiang in, “Keima la kiang ah thugen pa hi ama chu ka hi,” a tia.
27Ziazaw chet ah chun, a nungzuite chu a hung tung un, numei tawh a la kiho uh chu mak a sau a. Himaleh, kuama’n, “Bang la dawi em?” Ahiloleh, “Bangatia, zia nu chu tawh kiho la hem?” le a ti diak puau hi.
28Ziaphatchun, numei chun a tuibêl chu a nusia ah, khawpi lam ah chun a tai ah, mite kiang in,
29“Hung unla, hung en tiam un, mi pakhat ka thil hi zosia ei gen piak ziang thei a um hi, Messiah chu a hiziang kha diam?” a vatia.
30Khawpi chu hun nusia in, mite chu a kiang lam in a hung tau a.
31Zia kâl ah chun a nungzuite chun, “Hotupa, an ne’n,” a tiu a.
32Himaleh, ama chun, “La hetlo uh an nêk ding ka nei hi,” a tia.
33A nungzuite chu a kiho ua, “A nêk ding hun choi piak thei kuama um leh lah a kilawm pua maw?” a kitiu a.
34Jesu’n a kiang un, “Ei sawlpa dawi gual bawl leh, a na sep zaw hi ka an ahi.
35Nanghaw’n, ‘Bulâkna ding tha li a um nalai hi,’ la tiu hilo a hem? Ngai un, ka hil la hiu, dâk un la loute hi en vêl ma tiam un, tu’ziang hinle lâk dingin a minkuai zo ahi tai.
36Buâtte chun a sep man a mu zo tau in; zia ban ah chun kumkhawtuang hinna ga chu lakhawm nalai ding a hiu, a tû’te leh a lakhawmte a kipak chiat theina ding un.
37Mi pakhat in a tu in, midang in a ât sek hi, ti hi zia thu hin a dik ahi.
38La tu’lo uh leh la sep gimlonau ah, bu va ât dingin ka hun sawl la hiu; midang in a la sepgimnau ah lût ding la hiu,” a tia.
39Numeinu’n, Ka thil hi tapo ei gen piak ziang, ti ah a hiatsak thu ziak khan, Samari mi tam tak in Jesu a gingcha tau a.
40Tichun, Samari mite chu Jesu kiang in a hung un, a kiang ua um dingin a chial tau a; tichun, zia tak ah chun ni ni’ a châm tai.
41A thugen ah kipat chun midang tam tak in a gingcha tau hi.
42Chuleh, amau chun, numei kiang ah chun, “Tu’hin vang nang thugen ziak ah gingcha ka hita puau in, keimau ngei in a thu ka hiau ah, zia hi Messiah, khawvel hukhingpa chu ahi ngei hi ti ka he tau hi,” a tiu a.
Galili Gam Ah Jesu Kille’kitna
43Ni ni zaw ah chun a kipandok kit ah, Galili lam in a chia kit tai.
44 #
Mat 13.57; Mar 6.4; Luk 4.24 Jesu ngei in, “Jawlnei chu ama umna gam ah chawihoi in a um ngai puai,” a tia.
45 #
Joh 2.23
Galili gam a hung tun phat ua chun, Jerusalem ah Kût bawlna a thil hi a la mu’sau ahi ziakin, Galili mite chun a la lop ma mau hi.
Jesu’n Milian Pakhat Chapa A Sukdamna
46 #
Joh 2.1-11
Galili gam ah Kana khua, tui uain a suaksakna kha a hung tung kit a. Zia tak ah chun milian pakhat, Kapernaum khua um chu, a chapa damlo in a um a.
47Jesu chu Judea gam ah kipat a hung pawt in, Galili gam in a hung hi, ti thu a hun het phat in a hung ah, a chapa chu thi vâng vâng ah damlo ahiziak in a vachia ah, a sukdam dingin a hung ko a.
48Jesu chun a kiang in, “Tepte’na leh thilmakte la mulo ua leh, ei gingcha tak tak lo ding la hiu,” a tia.
49Zia milian chun a kiang in, “He pu, hung suk vak ta’n, ka chapa thiman kha’n a,” a hung tia.
50Jesu’n a kiang in, “Chia ta’n, la chapa a dam tai,” a tia. Zia pa chun, Jesu thugen chu a taksang ngal ah, a chia kit tai.
51A chia suk leh, a suakte’n a la lamtuau ah, “La chapa a dam tai,” a tiu a.
52Ziaphatchun, ama chun a hung damdaw hun lai tak ding vêl chu a dong ah, amau chun, “Za’ni, sûn nung dak khat lai tak khan a khawsik a hung bei tai,” a tiu a.
53Tichun, a pa chun, Jesu’n: La chapa a dam tai, a ti hun lai tak kha ahi ti a he ngal a; tichun, ama leh a Insung mi zosia chun a hun gingcha tau hi.
54Zia hi Judea gam ah kipat a hung pawt ah, Galili gam a hung tun nung ah a thilmak bawl niveina ahi.
S'ha seleccionat:
JOHAN 4: VAIPBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.