Gen 25
25
Yisukulu ya Abulahamu
(1 Mbi 1:32-33)
1Abulahamu* ŵalombele ŵakongwe ŵane lina lyawo Ketula. 2Ŵamŵelecele Abulahamu ŵanace ŵacalume aŵa Simulani, Yokishani, Medani, Midiyani, Ishibaki, ni Shuwa. 3Yokishani ŵaliji babagwe Sheba ni Dedani. Ŵanace ŵacalume ŵa Dedani ŵaliji Ashulimu, Letushimu ni Lewumimu. 4Ŵanace ŵa ŵacalume ŵa Midiyani ŵaliji, Efa, Efele, Hanoki, Abida ni Elida. Ŵeleŵa ni yisukulu ya Ketula.
5Abulahamu ŵapelece yipanje yakwe yosope yiŵakwete kwa Isaki. 6Nambo mkinawe Abulahamu, ŵagambile kupeleka yindu yakulekanganalekangana kwa ŵanace ŵa aciŵamkwawo ŵane. Nipo Abulahamu ali ciŵela cijumi ŵatumisye ŵanace ŵakwe ŵanewo, ku cilambo ca kungopoko lyuŵa kuti atalikangane ni Isaki mwanace jwakwe.
Ciwa ca Abulahamu
7Abulahamu ŵaliji cijumi kwa yaka 175, 8nipo ŵawile ali acekulwipe mnope. 9Isaki ni Ishimaeli ŵanace ŵawo ŵasicile baba ŵawowo mu mbanga ja ku Makipela, mu mgunda wuwaliji wa Efuloni mwanace jwamlume jwa Sohali jwa mtundu wa Cihiti, wawuli kungopoko lyuŵa kwa cilambo ca Mamule. 10Awu waliji mgunda wuŵasumile Abulahamu kutyocela kwa ŵandu ŵa mtundu wa Cihiti. Mwelemo ni muŵasicile Abulahamu pamo ni Sala ŵamkwawo.#Gen 23:3-16 11Abulahamu ali awile, Mlungu ŵampele upile Isaki mwanace jwakwe. Nipo Isaki ŵaliji mkutama pa kuŵandikana, “Ni Cisima ca Jwa umi Jwakumbona Une cila.”
Yisukulu ya Ishimaeli
(1 Mbi 1:28-31)
12Ayi ni yisukulu ya Ishimaeli, mwanace jwa Abulahamu juŵamŵelecele Hagala, kapolo jwamkongwe jwa ku Iguputo. 13Mena ga ŵanace ŵa Ishimaeli ni aga: jwandanda ŵaliji Nebayoti, panyuma pakwe ŵaŵelece Kedala, Adibele, Mibisamu, 14Mishima, Duma, Masa, 15Hadadi, Tema, Yetulu, Nafishi, ni Kedema. 16Aga ni mena ga ŵanace 12 ŵa Ishimaeli. Ŵane ŵakwete misi, ŵane yigono yiyaŵilanjikwaga ni mena gawo. 17Ishimaeli ŵawile ali ni yaka 137, nipo ŵamsicile m'malembe. 18Yisukulu ya Ishimaeliyo yatamaga mcilambo ca pasikati pa Hafila ni Shuli, kungopoko lyuŵa kwa Iguputo, litala lyakwinjilila ku Asiliya. Jemanjaji ŵaliji mkutama mwakulekangana ni yisukulu ya Abulahamu.
Kupagwa kwa Esawu ni Yakobo
19Aji ni ngani ja Isaki mwanace jwamlume jwa Abulahamu. Abulahamu ŵaŵelece Isaki, 20nipo Isaki piŵamlombaga Labeka mwanace jwamkongwe jwa Betuwelo, jwa ku upande wa Siliya ku Mesopotamiya, ŵaliji ni yaka 40. Mlumbugwawo Labeka ŵaliji Labani. 21Ligongo lyakuti Labeka ŵaliji ŵangaŵeleka, Isaki ŵapopelele ŵamkwakwewo kwa AMBUJE.* Myoyo AMBUJE ŵalipikene lipopelo lyakwe, nipo Labeka ŵakwete citumbo. 22Labeka ŵaliji mkwembeceya kuŵeleka maŵila, nambo ŵanace ŵala mkinapagwe ŵaliji mkulimbana mcitumbomo. Myoyo Labeka ŵatite, “Naga mwelemu ni mutiyiŵele yele yinduyi, ngutamila cici ni umi?” Myoyo Labeka ŵajile kuwusya kwa AMBUJE kuti amjanje.
23Myoyo AMBUJE ŵamjanjile kuti,#Alo 9:12
“Mcitumbo mwenu mwana mitundu jiŵili ja ŵandu.
Timciŵeleka mitundu ja ŵandu ŵatacilimbanaga.
Mwanace jumo taciŵa jwamacili kumpunda jwine,
jwamkulungwa tacimtumicila jwamnondi.”
24Masiku gakuti apagwe ŵanace pagakwanile, Labeka ŵaŵelece maŵila. 25Mwanace jwandanda kupagwa ŵaliji jwamcejewu mnope, nipo cilu cakwe caliji mpela nguwo ja manyunya, myoyo ŵampele lina lyakwe Esawu.#25:25 Esawu: Linali ligopolela kuti, “Manyunya.” 26Mwanace jwaŵili kupagwa ŵapali ali acikamwile cindende ca Esawu. Myoyo ŵampele lina lyakwe Yakobo.#25:26 Yakobo: Lina lya Mcihebeli ligopolela “Cindende.” Pandaŵi jiŵapagwaga ŵanacewo ni kuti Isaki ali akwete yaka 60.
Esawu akusumisya ukulungwa wakwe
27Ŵanace ŵala piŵakusile, Esawu ŵaliji jwakupakombola kusakula yinyama ya mwitinji, mundu jwakunonyelwa kwendajenda mwitinji, nambo Yakobo ŵaliji mundu jwakufasa, jwakunonyelwa kutama pa mlango. 28Isaki ŵamnonyele Esawu kwejinji ligongo ŵaliji mkulya nawo nyama siŵawulagaga jwalakwe mwitinji, nambo Labeka ŵamnonyelaga Yakobo.*
29Lisiku line Yakobo alimkuteleka ngunde, Esawu ŵawusile kutyocela kwitinji jili jikwete sala 30Esawu ŵamsalile Yakobo kuti, “Une sala jingwete. Conde mungaŵile ngunde simtelecesi.” (Ali ni ligongo lyakwe ŵaŵilanjidwaga Edomu).#25:30 Edomu: Liloŵeli ligopolela kuti, “Ucejewu,” mu Cihebeli.
31Yakobo ŵajanjile kuti, “Mlongole kaje kumba une ukulungwa wenu wakutanda kupagwa, nipo tinampe ngundesi.”
32Esawu ni ŵatite, “Une sigele panandi kuwa, ana ukulungwa wanguwo tiwungamucisye cici?”
33Yakobo ni ŵatite, “Mlumbile kaje kuti mumbele une ukulungwa wenu.”#Aheb 12:16
Myoyo Esawu ŵalumbile ni kuwusumisya ukulungwa wakwe wakutanda kupagwa kwa Yakobo. 34Nipo Yakobo ŵampele Esawu mkate ni ngunde sila. Ŵalile ni kumwela mesi ni ŵatyosile. Myoyo ŵanyosisye ukulungwa wakwe wandanda kupagwa.
S'ha seleccionat:
Gen 25: YAWO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chiyawo Bible: Buku Jeswela © Bible Society of Malawi, 2014