Gen 30
30
1Lakelo piŵayiweni kuti ngakumŵelecela Yakobo* ŵanace, ŵamtendele litima Leya mkulugwawo jula, nipo ŵamsalile Yakobo kuti, “Mumbe ŵanace, naga ngamkumba, kuli cenene kuti une mbwe.”
2Maloŵe gelega gampwetesye mtima Yakobo, ni ŵatite kwa Lakelo, “Mkanjimba une magambo, une ngaŵa Mlungu?”
3Lakelo ni ŵatite kwa Yakobo, “Mumjigale Biliha jwamasengo jwanguju, mtame najo malo gamo kuti ambelecele une mwanace, kuti kupitila mwa jwalakweju none jwakwe ngole ŵanace.”
4Myoyo Lakelo ŵampelece Biliha kwa ŵamkwakwe, nipo Yakobo ŵatemi najo malo gamo Bilihajo. 5Biliha ŵakwete citumbo ni ŵamŵelecele Yakobo mwanace jwamlume. 6Lakelo ŵatite kuti, “Mlungu alamwile mwakusalalila une mtima. Alipikene lipopelo lyangu, nipo ambele une mwanace jwamlume.” Myoyo mwanacejo ŵampele lina lyakwe Dani. 7Biliha jwamasengo jwa Lakelo jula ŵakwete soni citumbo cine, ni ŵamŵelecele Yakobo mwanace jwamlume. 8Lakelo ŵatite, “Limbene nawo kwakukulungwa mnope cemwali, nambo sambano mbundile.” Myoyo mwanace jula ŵampele lina lyakuti Nafutali.
9Leya ali ayiweni kuti alesile kuŵeleka, ŵamjigele Silipa jwamasengo jwakwe ni kumpeleka kwa Yakobo. 10Nipo Silipa ŵamŵelecele Yakobo mwanace jwamlume. 11Leya ni ŵatite, “Ngwete upile!” Ni ŵampele mwanacejo lina lyakwe Gadi. 12Silipa jwamasengo jwa Leya jula ŵamŵelecele Yakobo mwanace jwine jwamlume. 13Leya ŵatite, “Mbundile kondwa. Acakongwe tandende une kuti jwamjaliwe.” Myoyo ŵampele mwanace jula lina lyakwe Asha.
14Lisiku line, ndaŵi jakata tiligu, Lubeni ŵapite ku migunda kuŵawusimene mtela wakusyana mundu kuti aŵelece, ŵayice nawo kwa Leya mama ŵawo. Nipo Lakelo ŵatite kwa Leya, “Conde mungaŵile une panandi mtela wawuŵelesi wamjigalile mwanagwenu.”
15Nambo Leya ŵajanjile kuti, “Ana ŵamkwangu ŵamusumwile ŵala nginakwana? Lelo soni mkusaka musumule mtela wakusyana wanjigalile mwanangu?”
Lakelo ni ŵatite, “Naga mkungaŵila une mtela wakusyanawo, ŵalumeŵa tagone kumangwenu cilo cino.”
16Yakobo piŵawujaga kutyocela ku migunda ligulo, Leya ŵajile kukwacingamila ni ŵasalile kuti, “Lelo agone ku nyumba jangu kuno, pakuŵa nimlipilile kala mtela wa kusyana.” Myoyo Yakobo ŵagonile ni Leya cele ciloco.
17Mlungu ŵalipikene lipopelo lya Leya, nipo Leya ŵakwete citumbo cine, ni ŵamŵelecele Yakobo mwanace jwamsano. 18Leya ni ŵatite, “Mlungu andipile ligongo nampelece jwamasengo jwangu kwa ŵamkwangu.” Myoyo mwanacejo ŵampele lina lyakwe Isakala. 19Leya ŵakwete citumbo cine soni, ni ŵamŵelecele Yakobo mwanace jwamsano ni jumo. 20Leya ŵatite kuti, “Mlungu ambele une mtuka wakusalala. Sambano ŵamkwangu tanjimbicisyeje ligongo naŵelecele ŵanace ŵacalume msano ni jumo.” Myoyo mwanace jula ŵampele lina lyakwe Sebuloni. 21Kaneko ŵaŵelece mwanace jwamkongwe nipo ŵampele lina lyakwe Dina.
22Mlungu ŵamtendele canasa Lakelo, pakulipikana lipopelo lyakwe ni ŵamkundile kuti aŵelece ŵanace. 23Ŵakwete citumbo ni ŵaŵelece mwanace jwamlume. Lakelo ŵatite, “Mlungu andyosisye soni sya ungaŵeleka wangu.” 24Myoyo ŵampele lina lyakwe Yosefe, pakuŵa ŵatite kuti, “AMBUJE* ambe soni une jwine.”
Yakobo ni Labani
25Yosefe ali apagwile, Yakobo ŵatite kwa Labani, “Angunde njawuleje kumangwetu. 26Ambe aciŵamkwangu ŵanapatile pakwakamulila ŵalakwe masengo, pamo ni ŵanace ŵangu njawuleje. Ŵalakwe akumanyilila kuti nakamulile masengo cenene.”
27Nambo Labani ŵatite kwa Yakobo, “Naga m'mweji kweli mli mlongo mjangu, conde mkatyoka, ligongo ngumanyilila kuti AMBUJE ambele upile une ligongo lya m'mwejo. 28Mgambe kusalila malipilo gamkusaka nipo une tinampe.”
29Yakobo ŵajanjile kuti, “M'mwejo mwasyene mkumanyilila mungamulileje masengo, nambo soni muyitupile yilangwa yenu mu ndaŵi jinaliji mkuyilolela. 30Pandanda ŵalakwe ŵakwete yilangwa yamnono, nambo sambano yitupile mnope, nipo AMBUJE ŵapele upile ŵalakwe ligongo lya une. Ndaŵi sambano jikwanile jakuti none jwakwe samalile liŵasa lyangu.”
31Labani ni ŵatite, “Ana nimlipile cici?”
Yakobo ŵajanjile kuti, “Une ngangusaka malipilo galigose. Nambo une timbitilisye kulanga yilangwa yawo, naga ŵalakwe akwiticisya yitisale uneji. 32Lelo angunde kuti njawule pasikati pa yilangwa yawo yosope. Ni tisagule ngondolo syosope syepiliwu, kwisa soni mbusi syosyope sya maŵalamaŵala ni madondomadondo. Malipilo gangusaka une kuti ŵalakwe ambe une ni gelego. 33Msogolo mwakwe tacimanyilila ŵalakwe naga uneji ndili mundu jwakulupicika, pa ndaŵi jitaciyika kukulola malipilo gangu. Naga talole kuti ngwete mbusi jangali madondomadondo kapena maŵala, kapena mwanace jwangondolo jwamkanaŵa jwampiliwu, tamanyilile kuti jele mbusijo kapena ngondolojo jili jakwiŵidwa.”
34Labani ni ŵatite, “Yambone, kwende tutende mumŵecetele pemo.” 35Nambo lyele lyuŵalyo, Labani ŵatyosisye acitonde wosope ŵamaŵalamaŵala ni mandondomandondo. Ŵatyosisye soni mbusi syosope syasikongwe sya madondomadondo ni maŵalamaŵala ni jilijose jijakwete liŵala lyeswela pacilu pakwe, kwisa soni ngondolo jilijose jepiliwu, ni ŵasipelece kwa ŵanace ŵakwe kuti asiloleleje. 36Ali amasile kutenda yindu yeleyi, Labani ŵalekangene najo Yakobo kuti aloleleje yilangwa yineyo, jwalakwe ŵajesile ulendo ŵa masiku gatatu.
37Yakobo ŵajigele nyambi syasiŵisi sya yitela ya mitundu jitatu ja ku cilamboco, ŵatugwagwile makungwa, nipo nyambisyo syawonekaga sya maŵalamaŵala. 38Nyambisyo ŵasiŵisile pasogolo pa yilangwa kumalo kuyamwelaga mesi, kuti yilangwayo yiloleje nyambisyo pakumwa mesi, yinyamayo yaliji mkumemesya piyayikaga kukumwa mesi. 39Ligongo lyakuti yilangwayo yajigalaga maŵele yili yilolite nyambi sila, yilangwayo yaŵelekaga ŵanace ŵamaŵalamaŵala ni ŵa madondomadondo.
40Ngondolo sine sya Labani siŵalanganga Yakobo syaliji sya maŵalamaŵala. Nipo ngondolo sine pisyaliji mkumemesya Yakobo ŵasiŵisile ngondolo sine pa malo pakuti silolegane ni ngondolo sya Labani, yilangwa yine yila ŵayitendesye kuti yiloleje ku yaliji yilangwa ya Labani yiyakwete maŵala ni yayipiliwu. Yilangwa yeleyi nganayiwanganyaga ni ya Labani.
41Pa ndaŵi jiyamemesyaga yilangwa yamacili kumalo kuyamwelaga mesi, Yakobo ŵalolecesyaga kuti aŵisile nyambi sya maŵalamaŵala sila pasogolo pakwe, kuti sijigale maŵele sili silolite nyambisyo. 42Nambo ndaŵi jiyamemesyaga yilangwa yangali macili, Yakobo nganaŵikaga nyambi sila pasogolo pakwe. Myoyo, Yakobo ŵapatile yilangwa yakwimbala ni yamacili, nipo yaganda yosope yaliji ya Labani. 43Pakutenda yindu yeleyi Yakobo ŵasicile mnope. Ŵakwete ngondolo, mbusi, ngamila* ni abulu ŵajinji. Ŵakwete soni acikapolo ŵacalume ni ŵacakongwe ŵajinji.
S'ha seleccionat:
Gen 30: YAWO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chiyawo Bible: Buku Jeswela © Bible Society of Malawi, 2014