Gen 29
29
Yakobo akwika kwa Labani
1Nipo Yakobo* ŵapitilisye ulendo wakwe wakwinjilila ku cilambo ca ŵandu ŵa kungopoko lyuŵa. 2Ni ŵaciweni cisima cicaliji mwilambo. Makuga gatatu ga ngondolo gawuteme mungulugulu cisima, pakuŵa ni pisyamwelaga mesi. Pacisimapo ŵawunicilaga ni liganga lyalikulungwa. 3Makuga gosope ga ngondolo gali gasongangene, ŵakucinga ngondolo ŵalityosyaga liganga liŵawunicilaga pa cisima pala, ni ŵatekaga mesi kusimwesya ngondolo sila. Silisimasile kumwa, ŵaliwucisyaga soni liganga lila pa malo pakwe.
4Yakobo ni ŵawusisye ŵakucinga ngondolo ŵala kuti, “Ana acalongo acimjangu kumangwenu kwapi?”
Ŵajanjile kuti, “Kumangwetu uwe ku Halani.”
5Ni ŵawusisye soni kuti, “Ana akum'manyilila Labani mwanace jwa Naholi?” Ŵakucinga ngondolo ŵala ŵajanjile kuti, “Elo, tukwamanyilila kwabasi.”
6Yakobo ŵawusisye soni kuti, “Ali uli womwanjawo?”
Jemanjajo ŵajanjile kuti, “Womwanjawo ali cenene. Alole, Lakelo mwanagwawo jwamkongwe ni ajo jwa kwisa ni ngondolo apopojo.”
7Yakobo ni ŵawusye kuti, “Awuno ngati musi, ndaŵi jakuja kusiwugalila ngondolo nganijikwane, uli ngagamba kusimwesya mesi ni kuja kusilisya soni?”
8Ni ŵajanjile kuti, “Uwe ngaŵa mkutenda myoyo pakuŵa tukulindilila kuti makuga ga ngondolo gane gayice ni kuti soni liganga ali lili pacanya pa cisima tulityosye, ni tusipe mesi ngondolo syetu.”
9Yakobo ali ciŵela mkuŵeceta ni ŵakucinga ngondolo ŵala, Lakelo ŵayice pa cisima pala ni ngondolo siŵacingaga sya babagwe. 10Yakobo piŵam'weni Lakelo ali ni ngondolo sya babagwe Labani, ŵajile kutyosya liganga liŵawunicilaga pacisima lila ni ŵasipele mesi ngondolo sila. 11Kaneko Yakobo ŵamkomasisye Lakelo, nipo Yakobojo ŵatandite kulila. 12Yakobo ŵamsalile Lakelo kuti, “Une ndili mlongo mjawo baba ŵenu. Une ndili mwanace jwa Labeka.” Lakelo ŵawutwice kuja kwasalila baba ŵawo.
13Labani piŵapikene kuti Yakobo jwa alumbugwe ayice, ŵawutwice ni kuja kuwonegana najo. Ŵamkomasisye ni ŵamjigalile ku nyumba jawo. Myoyo Yakobo ŵamsalile Labani Yosope yiyatendece. 14Nipo Labani ŵatite kwa Yakobo, “M'mwejo mli nditu mlongo mjangu msyesyene.” Yakobo ŵatemi nawo kweleko mwesi wa mtundu.
Yakobo akumtumicila Labani kuti alombele Lakelo ni Leya
15Labani ŵamsalile Yakobo kuti, “Ngaŵa cindu cambone kuti mungamulileje masengo ga lulele, ligongo lyakuti mli mlongo mjangu. Musalile malipilo genu pa masengo gamkutendaga tigaŵe cici.” 16Labani ŵakwete ŵanace ŵaŵili ŵacakongwe, jwamkulungwa lina lyakwe ŵaliji Leya, jwamnondi lina lyakwe ŵaliji Lakelo. 17Meso ga Leya galiji gakulembuka ganganonyelesya nambo Lakelo ŵaliji ŵakusalala mnope.
18Yakobo ŵamnonyele Lakelo kwejinji, nipo ŵatite kwa Labani, “Tinamkamulile masengo kwa yaka msano ni yiŵili nipo timumbe mwanagwenu Lakelo kuti lombele.”
19Labani ni ŵatite, “Kuli cenene kuti une nampe m'mwejo mwanangujo kulekangana ni kuti nampelece kwa mundu jwinepe, tamagani ni une.” 20Myoyo Yakobo ŵamkamulile masengo Labani kwa yaka msano ni yiŵili kuti ampe Lakelo. Yakobo ŵayiweni yaka msano ni yiŵili mpela masiku gamnono ligongo ŵamnonyele Lakelo mnope.
21Kaneko Yakobo ŵamsalile Labani kuti, “Ndaŵi jitwalangene kukamula masengo sambano jimasile, ambe mwanagwawo jula kuti lombele.” 22Myoyo Labani ŵalinganyisye cindimba ca ulombela, ni ŵaŵilasile ŵandu wosope ŵakweleko. 23Nambo cilo ca lisiku lyelelyo Labani ŵamjigele Leya mwanagwawo jwamkulungwa m'malo mwa Lakelo ni ŵampele Yakobo, nipo Yakobo ŵatemi najo malo gamo. 24(Ndaŵi jijojo Labani ŵampelece soni Silipa, jwamasengo jwakwe jwamkongwe kwa Leya kuti amtumicileje). 25Kundaŵi pakwacele, Yakobo ŵalolite kuti jwamkongwe jula ŵaliji Leya. Nipo Yakobo ŵamwusisye Labani kuti, “Ligongo cici andesile cipongwe ca mtundu welewu? Ana ngati twalangene kuti une tinakamulile ŵalakwe masengo kuti lombele Lakelo? Nambi ligongo cici alambwisye une?”
26Labani ŵajanjile kuti, “Ngaŵa msyungu wetu akuno kumlombekasya jwamnondi, jwamkulungwa mkanalombedwe.” 27Mjembeceye, umale kaje mlungu awuno wa cindimba ca ulombela wenuwu, kaneko tinjimpa Lakelo, nambo timungamulile soni masengo yaka yine msano ni yiŵili.
28Yakobo jula ŵakundile, nipo piŵamasile mlungu wacindimba ca ulombela ula, Labani ŵampelece Lakelo kwa Yakobo kuti aŵe ŵamkwawo. 29(Ndaŵi jijojo Labani ŵampelece soni Biliha, jwamasengo jwakwe jwamkongwe kwa Lakelo kuti amtumicileje). 30Myoyo Yakobo ŵamlombile Lakelo, nipo ŵamnonyele mnope kumpunda Leya. Myoyo ŵakamwile masengo kwa Labani kwa yaka yine msano ni yiŵili.
Ŵanace ŵa Yakobo
31AMBUJE* piŵayiweni kuti Yakobo ngakumnonyela Leya mnope, ŵampele Leyajo uŵelesi wakola ŵanace, nambo Lakelo ŵaliji jwangaŵeleka. 32Nipo Leya ŵakwete citumbo, ŵaŵelece mwanace jwamlume, ni ŵatite, “AMBUJE ayiweni yipwetesi yangu, nditu ŵamkwangu tanonyele une.” Myoyo ŵampele lina lyakwe Lubeni.#29:32 Lubeni: Linali ligopolela kuti, “Mlole mwanace jwamlume.” Nambo soni ligopolela kuti, “Ayiweni yipwetesi yangu.” 33Ŵakwete soni citumbo cine, ŵaŵelece jwamlume ni ŵatite, “AMBUJE ambele soni une jwamlume aju, ligongo lyakuti ŵapikene kuti ŵamkwangu ngakunonyela.” Myoyo ŵampele lina lyakwe Simiyoni.#29:33 Simiyoni: Linali ligopolela kuti, “Kupikana.” 34Ŵakwete citumbo cine, ŵaŵeŵelece soni mwanace jwamlume, nipo ŵatite, “Sambano ŵamkwangu tanonyele mnope pakuŵa naŵelecele ŵanace ŵacalume ŵatatu.” Myoyo ŵampele lina lyakwe Lefi.#29:34 Lefi: Linali ligopolela kuti, “Kulumbikana.” 35Ŵakwete soni citumbo cine, ŵaŵelece soni mwanace jwamlume, ni ŵatite kuti, “Sambano tinalumbe AMBUJE.” Myoyo mwanace jula ŵampele lina lyakwe Yuda.#29:35 Yuda: Linali ligopolela kuti, “Kutogolela.” Pelepo ni ŵalecesye kaje kuŵeleka.
S'ha seleccionat:
Gen 29: YAWO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chiyawo Bible: Buku Jeswela © Bible Society of Malawi, 2014