Gen 28
28
1Isaki ŵamŵilasile Yakobo* ni ŵampele upile, nipo ŵamlamwile kuti, “Mkalombela jwamkongwe jwa ku Kenani kuno. 2Mliŵicile cile, mjawule ku Mesopotamiya kwa Betuwelo, anganga ŵenu ni mkalombele jumo mwa ŵanace ŵacakongwe ŵa Labani, mjomba ŵenu. 3Mlungu Jwamaciligosope awupe upile ulombela wenu, nipo ampe ŵanace ŵajinji, kuti timŵe likuga lyalikulungwa lya mitundu jejinji ja ŵandu. 4Ampe upile m'mwejo pamo ni yisukulu yenu mpela muŵapelele Abulahamu* kuti timpakombole kusumula cilambo citimkatameco, cilambo cele ciŵacipelece Mlungu kwa Abulahamu.”#Gen 17:4-8 5Myoyo Isaki ŵamtumisye Yakobo ku Mesopotamiya, kwa Labani, mwanace jwamlume jwa Betuwelo jwa ku upande wa Siliya. Labani ŵaliji alumbu ŵawo Labeka mama ŵawo Esawu ni Yakobo.
Esawu akulombela jwamkongwe jwine
6Esawu ŵapikene kuti Isaki ampele upile Yakobo, ni kuti amtumisye Yakobojo ku Mesopotamiya kuti akalombele kweleko. Ŵapikenene soni kuti pakumpa upile, ŵamlamwile kuti akasalombela jwamkongwe jwa ku Kenani. 7Ŵapikene soni kuti Yakobojo ŵapikanile ni kuyitenda yiŵasasile baba ŵawo ni mama ŵawoyo, ni kuti apite ku Mesopotamiya. 8Pelepo Esawu ŵamanyilile kuti Isaki babagwe ngakwanonyela acakongwe ŵa ku Kenani. 9Myoyo Esawu ŵajawile kwa Ishimaeli mwanace jwa Abulahamu, ni ŵalombele Mahalati mwanace jwamkongwe jwa Ishimaeli, mlumbugwe jwa Nebayoti.
Sagamisi sya Yakobo ku Beteli
10Yakobo ŵatyosile ku Belesheba kwawula ku Halani. 11Nipo ŵayice pa malo gane gakwe lyuŵa lyaliji lili likapile. Ŵaganisisye yagona papopo. Piŵagonaga ŵajigele liganga ni kutenda msamilo. 12Ŵasagamile ali mkugawona makwelelo gakutyocela pa cilambo capasi mpaka kwinani, malayika ga Mlungu gali mkukwela ni kutuluka pa makwelelopo.#Yoh 1:51 13AMBUJE* ŵajimi pambali pa jwalakwe ni ŵamsalile kuti, “Une ndili AMBUJE, Mlungu jwa acinangolo ŵenu Abulahamu ni Isaki. Cilambo cimgonileci tinjicipeleka kwa m'mwejo pamo ni yisukulu yenu.#Gen 13:14-15 14Yisukulu yenuyo tiyiciŵa yejinji mpela luwundu lwa pa cilambo capasi, ticikusya malile ga yilambo yawo mbali syosope, kutandila kungopoko lyuŵa, kungapilo lyuŵa, kumpoto ni kum'mwela. Nipo tinape upile ŵandu ŵa mitundu josope kupitila mwa m'mwejo ni yisukulu yenu.#Gen 12:3; 22:18 15Une timbe namwe, tinamcinjilicisyeje kulikose kutimjawule, nipo tinjimwucisya soni ku cilambo acino. Ngasinimleka mpaka ndili nayitesile yindu yosope yimbeceteyi.”
16Yakobo piŵajimwice ŵatite, “Nditu AMBUJE ali apano, nambo une nganimanyililaga.” 17Myoyo wakamwile woga, ni ŵasasile kuti, “Malo agano gakutesya woga. Apano nditu ni pa Nyumba ja AMBUJE, nambo soni pa mlango wa kwinani.”
18Myoyo Yakobo ŵajimwice kundaŵindaŵipe, ŵajigele liganga liŵatesile msamilo lila, ni ŵalijimice kuti liŵe liganga lya cikumbukumbu. Nipo ŵalitasile mawuta ligangalyo. 19Nipo Malo gala ŵagapele lina lyakuti Beteli, nambo pandanda lina lya msindawo lyaliji Lusi. 20Kaneko Yakobo ŵalumbile kwa Mlungu kuti, “Naga akutama ni une ni kunjinjilicisya pa ulendo wanguwu ni kuja kusunga kungwawulaku, ni soni kumba yakulya ni yakuwala, 21ni kumbucisya cenene ku nyumba ja baba ŵangu mwamtendele, AMBUJE timciŵa Mlungu jwangu. 22Liganga lya cikumbukumbu linalijimice apanoli, tiliciŵa nyumba jenu, une tinjipeleka kwa ŵalakwe mbuwa ja ca likumi pa yindu yiliyose yitacimba uneji.”
S'ha seleccionat:
Gen 28: YAWO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chiyawo Bible: Buku Jeswela © Bible Society of Malawi, 2014