Gen 27
27
Isaki akumpa upile Yakobo
1Isaki ali acekulwipe ŵatatele meso gakwe, mwakuti nganapakombola kulola. Lisiku line, ŵamŵilasile Esawu mwanagwawo jwandanda ni ŵamsalile kuti, “Mwanangu!”
Esawu ni ŵajanjile kuti, “Ndili apano baba.”
2Isakiwo ni ŵatite, “Mlole, kucekulupatu une akuno, nipo ngangulimanyilila lisiku lya kuwa kwangu. 3Mjigale yida yenu, ukunje ni mipamba jakwe, mjawule mwitinji mkambulajile nyama. 4Nipo mundelecele une yakulya yakunong'a yingusinayinonyela yila ni myice nayo akuno, patimale kulya, tinampe upile m'mwejo mkanim'we.”
5Labeka ŵaliji mkupikana Isaki piŵaŵecetanaga ni Esawu. Esawu piŵapite kwitinji kukusakula, 6Labeka ŵamsalile Yakobo* kuti, “Napikene baba ŵenu alimkuŵecetana ni Esawu kuti, 7‘Mkambulajile une nyama ni mundelecele cenene kuti ndye ni nampele upile pameso pa AMBUJE* une mkanimbwe.’ 8Sambano m'mweji mwanangu, mumbikanile soni myitende yindu yosope yitinamsalile. 9Mjawule kuyili yilangwa ni mkanjigalile tumbusi tuŵili twakwimbala kuti ndelece nyama jakwe cenene mpela mwakusajinonyelela baba ŵenu. 10Nipo timkayipelece cakulyaco kwa baba ŵenu kuti akalye, ni kuti akampe upile mkinawe.”
11Nambo Yakobo ŵasalile mamagwewo kuti, “Mama akukumbucile kuti Esawu akwete manyunya pa cilu pakwe nambo une jwangali. 12Mwine mwakwe babawo takangwaye, ni takamanyilile kuti une naloŵesye, nipo takambe une malweso, m'malo mwakumba upile.”
13Mama ŵawo ŵala ŵamjanjile kuti, “Naga akamlwese, malwesogo gangwile une, m'mwejo mgambe kupikanila yingumsalila une, jawulani mkajigale tumbusito myice nato akuno.” 14Myoyo Yakobo ŵapite kujigala tumbusito ni ŵapele mamaŵawo, nipo Labeka ŵa telece cakulya cele ciŵacinonyelaga babawo. 15Labeka ŵajigele yakuwala yambone mnope ya Esawu yiŵayisungaga m'nyumba, ni ŵam'wecice Yakobo mpwakwe. 16Ŵam'wecice soni mapende ga tuŵanace twambusi tula m'makono ni pa lukosi pakwe, m'malo mwele mumwaliji mwangali manyunya. 17Ni ŵajigele mkate ni cakulya ciŵacitelece cenene cila, ni ŵampele kuti akapelece kwa baba ŵawo.
18Yakobo ni ŵapite kuŵaliji baba ŵawo ni ŵaŵilasile kuti, “Baba!”
Isaki ni ŵawusisye kuti, “Ana m'mwejo mwanangu jwakwe jwapi?”
19Yakobo ni ŵajanjile kuti, “Une Esawu mwanagwenu jwamkulungwa, nipo yindu yimwandumile yila nayitesile. Conde jimukani kuti mlye nyama jiyice najo, nipo mumbe upile.”
20Nambo Isaki ŵatite, “Mwanangu, yikombolece uli kuti mjipatile nyama mwa citemacitema?” Yakobo ni ŵajanjile kuti, “Ligongo AMBUJE Mlungu jwenu angamucisye, kuti nijipate mwacitemacitema.” 21Nipo Isaki ŵatite kwa Yakobo kuti, “Ŵandicilani mwanangu kuti namkwaye kuti manyilile naga mli mwanangu Esawu kapena iyayi.” 22Myoyo Yakobo ŵapite ciŵandika ni Isaki babagwe, nipo babagwewo ŵamkwayiye ni ŵatite kuti, “Maloŵe genu gakupikanika mpela ga Yakobo, nambo makono gakuŵa mpela ga Esawu.” 23Myoyo nganam'manyilila kuti ŵaliji Yakobo, ligongo makono gakwe galiji gana manyunya mpela ga Esawu, ni ŵatandite kumpa upile. 24Nambo ŵamwusisye soni kuti, “Ana m'mwejo nditu mli mwanangu Esawu?”
Yakobo ni ŵajanjile kuti, “Nditu une Esawu.”
25Isaki ni ŵatite, “Myice najo nyamajo, kuti ndye, nipo tinampe upile.” Ni ŵapelece nyama jila nipo ŵalile, ni ŵapelece soni finyo nipo ŵamwele. 26Isaki ŵala ni ŵatite, “Mwanangu mumbandicile nipo mungomasye pa ngomo.” 27Ni ŵaŵandicile ni ŵakomasisye pa ngomo, nipo Isaki ŵalipikene liwungo lya cakuwala ciŵawete ni ŵampele upile acitiji, “Liwungo lyambone lya mwanace jwangu lili mpela liwungo lya yakugowola ya mu mgunda wele AMBUJE ŵawupele upile!#Aheb 11:20 28Mlungu amgwicisye ula, nipo migunda jenu jiŵe jakusogola cenene, ampe yakulya ni yakumwa yejinji. 29Ŵandu amtumicileje, Nipo mitundu ja ŵandu jimtindiŵalileje. M'mwejo mŵe ŵakwalamulila acalongo acimjenu, nipo yisukulu ya mama ŵenu tiyimtindiŵalileje. Alwesece wosope ŵakumlwesa m'mwejo, nipo akole upile wosope wakusampa m'mwejo upile.”#Gen 12:3
Esawu akumŵenda Isaki kuti ampe upile
30Isaki piŵamasile kwapa upile Yakobo, Yakobowo ŵakopwece. Ndaŵi jijojo Esawu ŵawusile kutyocela kukusakula nyama. 31Esawu nombe nawo ŵatelece yakulya yakunong'a, ni ŵajile kupeleka kwa baba ŵawo. Esawu ŵatite, “Baba, conde jimukani mlye nyama jele jinamjigalile une mwanagwenu, ni soni kuti mumbe upile.” 32Isaki ŵawusisye kuti, “Ana m'mwejo soni ŵani?”
Jwalakwe ŵajanjile kuti, “Une mwanagwenu jwamkulungwa Esawu.”
33Papopo Isaki ŵatandite kutetemela cilu cosope, ni ŵamwusisye kuti, “Ana ŵani ŵayice najo nyama kwa une jindile m'mwejo mkanimyice? Jwelejo nampele upile, nipo upile welewo uli wakwe nditu mpaka kalakala.”
34Esawu piŵapikene yiŵaŵecete baba ŵawo yila, ŵalisile mnope pakupwetesya mtima. Nipo jwalakwe ŵatite kwa babagwe, “Baba, conde none jwakwe ambe upile.”
35Nambo Isaki ŵajanjile kuti, “Apwenu ŵayice, nipo alambwisye. Ŵelewo ni ŵajigele upile wenu.”
36Esawu ŵatite, “Keleka kaŵili kunyenga une jwalakweju. Ngangusimonga kuti lina lyakwe lili Yakobo, pakuŵa anjiŵile kaŵili. Pandanda ŵasumwile ukulungwa wangu ŵakutanda kupagwa, nipo lelo asumwile upile wangu. Ana upilewo nganasunjila amta panandi baba?”#Gen 25:29-34
37Isaki ŵajanjile kuti, “Napele kala upile apwenuwo, nipo naŵisile kuŵa ŵakumlamulila m'mwejo. Acalongo acimjakwe ŵane wosope naŵisile kuŵa ŵakutumicila ŵakwe. Nampele soni upile wakuti agowoleje yakulya yejinji ni yakumwa yakwe. Myoyo pangali cakuti mpaka namtendele m'mwejo mwanangu.”
38Esawu ŵapitilisye kwaŵenda baba ŵawo kuti, “Ana baba, akwete upile umopewu, nganakola upile amta panandi wakuti none ambe? Conde baba ambe upile none jwakwe.” Ali aŵecete gele maloŵega Esawu ŵatandite soni kulila.#Aheb 12:17
39Isaki ni ŵajanjile kuti,#Aheb 11:20
“Timcitama pa malo gangali cajila,
ula ngasijigwa pa migunda jenu.
40Masengo genu tigaciŵa ga kuputa ngondo,#Gen 36:8; 2 Ayi 8:20
nipo timciŵa ŵakutumicila ŵa apwenu.
Nambo naga mli mwajimucile,
timcityoka pasi pa ulamusi wa apwenuwo.”
41Myoyo Esawu ŵaŵengene najo Yakobo ligongo m'malo mwa kumpa upile jwalakwejo, Isaki ŵampele Yakobo upile. Nipo Esawu ŵaganisisye kuti, “Ndaŵi jakuwa baba ŵangu jisigele panandi, nipo timjimwulaga Yakobo.”
42Labeka piŵapikene yosope yiŵaganisyaga Esawu, ŵamŵilasile Yakobo ni ŵamsalile kuti, “Esawu mkulugwenu akuganisya yakuti amwulaje m'mwejo, kuwucisya yele yimwatendele. 43Myoyo mwanangu, mtende yitinamsalile uneji. Mliŵicile cile, mtilile ku Halani kwa mjomba ŵenu Labani. 44Mkatame kweleko kwa kandaŵi panandi mpaka mtima wa akulu ŵenu uli utulele. 45Nikuti soni aliŵalile kaje yimwatendeleyi. Msogolo mwakwe tinjituma mundu kwisa kukumtola. Ngajasa une ŵanace ŵangu ŵaŵilimwe lisiku limpepe.”
Isaki akumjawusya Yakobo kwa Labani
46Kaneko Labeka ŵasalile Isaki kuti, “Acakongwe ŵa mtundu wa Cihiti ŵalombele Esawu une ambesisye. Naga Yakobo akulombela soni jwamkongwe jwa Cihiti, ana une umi wangu tiwuciŵa uli?”
S'ha seleccionat:
Gen 27: YAWO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chiyawo Bible: Buku Jeswela © Bible Society of Malawi, 2014