Lucas 6
6
Ti sin kꞌuájiko Jesús tsétaón iso noatrigo ti ña̱o to̱kꞌéhe chojni
(Mt. 12:1-8; Mr. 2:23-28)
1 #
Dt. 23:25. *Ijnko ti ña̱o to̱kꞌéhe chojni la chꞌin Jesús kꞌuatsínka iso nonte tsíkꞌínká noatrigo. La ti sin kꞌuájiko chꞌan mé tsétaón sin iso noatrigo la nkaya itja sin kꞌóntajiñá sin, kjónie sin. 2Ndá ti sin fariseo mé kjuanchankí, ndáchro:
―¿Nkekuènté tjejochꞌera ti nkehe kohya kjuachaxin tso̱hen ti ña̱o to̱kꞌéheni? ―ichro sin.
3Ndá kjuáte̱he chꞌin Jesús ndáchro:
―¿Á kjui̱nchekuáxinhñara ti xroon chrónka nkehe kjuíchꞌe David la ko ti sin kꞌuájiko chꞌan nkonaá ti ó ikꞌuén sin kjinta ní? 4#Lv. 24:9.#1Sam. 21:1-6.*Jehe chꞌan mé kꞌuíxehen chꞌan ti nchia kuènté Díos la kjónie chꞌan ti nio̱tja̱ tsíkóñao kuènté Díos, la ko kja̱xin ti sin kꞌuájiko chꞌan kjónie sin kjónté jehó ti sin ncha̱tꞌá chónta kjuachaxin sinie tíha.
5La kja̱xin ndáchro Jesús:
―A̱ndá ti Xje̱en Díos kꞌóna Chojni la chónta kjuachaxin tsꞌe̱to̱an nkehe tso̱hen kjónté ti ña̱o to̱kꞌéhe chojni.
Ti nkexro tsíxámá itja
(Mt. 12:9-14; Mr. 3:1-6)
6Ndá íjnko ña̱o to̱kꞌéhe chojni la kꞌuíxehen chꞌin Jesús ijnko nchia xrakue̱xin ti sin judío la kjuankíxin kjuako chꞌan. Ndá ntiha kjuákꞌe ijnko chojni tsíxámá ti itja chjina. 7La ti sin tjako ley la ko ti sin fariseo tsꞌáyéhe̱ sin chꞌin Jesús la tjinkaon sin chrókꞌuikon sin á sinchekito̱he chꞌan jína ti nkexro a ti ña̱o to̱kꞌéhe chojni ndá jína tsjanchia sin ijie̱. 8Kjánchó chꞌin Jesús ó nohe nkehe tjenka̱yáxin a̱sén sin, la nixje̱he̱ chꞌan ti nkexro tsíxámá itja, ndáchro chꞌan:
―Tꞌínkatjen, tjakꞌe nko̱siñe ntihi.
Ndá kꞌuínkatjen ti nkexro a la kjuákꞌexín to̱té. 9Ndá ndáche chꞌan ti íso sin:
―Tsjánchánkíhara ijnko nkehe. Ti ña̱o to̱kꞌéheni la, ¿á chrókjuíchꞌeni ti nkehe jína ní o̱ ti nkehe jínahña? ¿Á chrókjuinchekaáni chojni ní o̱ chrókꞌóñáni chojni?
10Ndá komá chꞌan kaín ti chojni tjejó ntiha la ndáche chꞌan si̱níhi:
―Tjéntoá itjá.
Ndá ti nkexro a kjuendoá itja la ó kuito̱he jína. 11Ndá ti ó kꞌuíkon ti sin fariseo la kónínkaon sin la ikjo kícho sin nkehe sichꞌehe sin ti chꞌin Jesús.
Chꞌin Jesús kjueyá ti teyó sin
(Mt. 10:1-4; Mr. 3:13-19)
12A̱ndá ijnko ña̱o chꞌin Jesús chrìin ijnko ijna̱ kixin ntiha tsonixje̱xín Díos la ntahó kjuákꞌe chꞌan kuenté tie nixje̱he̱ chꞌan Díos. 13Ndá ti ó kꞌuínkaséña la kꞌuéye̱he̱ chꞌan ti sin chréhe̱ ti jehe chꞌan la kꞌuíchehe chꞌan teyó sin tsꞌajiko chꞌan mé kja̱xin kjuínchekꞌin chꞌan sin apóstol. 14Ti sin a mé itꞌin; Simón, la kja̱xin kjuínchekꞌin sin Pedro; la ko kícho chꞌan Andrés, Jacobo, Juan, Felipe, Bartolomé, 15Mateo, Tomás, Jacobo xje̱en Alfeo; Simón Zelote, 16Judas kícho chꞌin Jacobo; la ko Judas Iscariote, ti nkexro kjuínchekji chꞌin Jesús.
Chꞌin Jesús kjua̱ko̱he̱ nchónhña chojni
(Mt. 4:23-25)
17Ndá chꞌin Jesús kꞌuinkaji̱koxin sin ti ijna̱ la kꞌuejó sin ijnko nonte yóxin la ko ntiha kꞌuejó ti sin chréhe̱ jehe chꞌan. Kja̱xin kꞌuixikóchjina nchónhña chojni kjui̱xi̱n nkuíxín Judea, Jerusalén la ko ti chrínta nda̱ñao kuènté Tiro la ko Sidón. Ikjui sin kixin tsihin sin ti nkehe tsjako chꞌin Jesús la ko tsito̱he sin jína. 18Ndá ti sin kꞌuéchónta ncha̱kuén jínahña kjuaxróxinhña kuekꞌejó sin la kuito̱he sin jína. 19La kaín chojni tjinkaon chrókuákóxi̱n sin chꞌan kixin kjuínchekito̱he chꞌan jína kaín chojni kixin chónta chꞌan kjuachaxin ijié.
Ti kjuachéhe̱ la ko ti kjuaxróxinhña
(Mt. 5:1-12)
20Ndá komá chꞌin Jesús ti sin kꞌuájiko la ndáchro:
―Díos sincheñao ti jahara nóara kixin tsꞌayéhéra ti nonte nkaya nka̱jní.
21’Díos sincheñao ti jahara tꞌenxínra kjinta ijie kixin chrꞌéxi̱n sintera jína.
’Díos sincheñao ti jahara tsja̱nkara ijie kixin chrꞌéxi̱n tsjanora.
22 #
1Pe. 4:14. *’Díos sintañaora ti nínkakohanra chojni, ti tsotjinkakonhña sin ti jahara, la tꞌándaxíhanra sin la ko tsondáchro sin kixin jínahña tsꞌákjexi̱n sin ti ihni̱ára kixin tinkachónkira ti Xje̱en Díos kꞌóna Chojni. 23#2Cr. 36:16; Hch. 7:52.*Chrochontara kjuachéhe̱ la ko chrókócháhara ti ña̱o a kixin tsꞌayéhéra ti nkehe a̱ntsí jína nkaya nka̱jní kixin kja̱xin ti tꞌáchri̱i sin la xi̱kaha kjuate sin ti sin kꞌuéchronka itén Díos.
24’Nóa ti chojni rico kixin kjuaxróxinhña tsꞌejó sin chrꞌéxi̱n kixin ó kjuixin kꞌuáyéhe̱ sin kaín nkehe ntihi.
25’Nóa ti chojni kjónie jína ntihi, kixin kjuaxróxinhña tsꞌejó sin chrꞌéxi̱n kixin tsꞌénxi̱nra kjinta.
’Nóa ti sin tjano ijie, kixin kjuaxróxinhña tsꞌejó sin chrꞌéxi̱n kixin tsꞌává sin la ko tsotsjánka sin.
26’Nóa ti nkexro kaín chojni tsjikosáyehe sin ijie kixin ti sin kꞌuaxrjeníxin sin la xi̱kaha kjuíkosáyehe sin ti chojni nduáhya kꞌuéchronka itén Díos.
Tso̱tjue̱heni ti sin nínkakohen ti jeheni
(Mt. 5:38-48; 7:12)
27’A̱ndá jahara tjejotihínra mé ndáxrja̱n kixin chrótjue̱héra ti sin nínkakohanra la ko jína chrókjuínki̱tsara ti sin tjinkakonhña ti jahara. 28Jína nixjehéra ti sin tꞌándaxíhanra la ko tjanchehéra Díos sincheñao chꞌan ti sin chónkíhara. 29Ti ijnko nkexro tsochjéhe jnko tua̱anra, la chrókjókara ti íjnko kja̱xin. Ti nkojín nkexro tjinkaon tsakítsjahara ti ika tꞌitsa̱tera la tito̱hé sátsjiko sin camisára kja̱xin. 30Ti nkojín nkexro tjanchahára nkehe la chje̱héra sin. A̱ndá ti tsakítsjahara sin jnko nkehe kuèntára, la tjanchehyara sin kixin tsꞌókjan sin. 31#Mt. 7:12.*Méxra̱ tjáko̱xinra sa̱ora, ti nkehe tjinkáonra tsja̱ko̱xi̱n chojni ti jahara.
32’Ti jehó tjue̱héra ti nkexro tjua̱hára la, ¿nkehe chrókjuachara? Kixin kjónté ti sin jínahña la xi̱kaha ichꞌe sin. 33A̱ndá ti jehó tjíkosayehéra ti nkexro tjikosáyehe ti jahara la, ¿nkehe chrókjuachara? Kixin ti sin jínahña la kja̱xin sin xi̱kaha ichꞌe sin. 34A̱ndá ti jehó nchekjenra chichaon ti sin tjénka̱yáxinra kixin tsꞌókjahanra sin, la, ¿nkehe chrókjuachara? Kixin ti sin jínahña chónta ijie̱ la kja̱xin sin nchekjen kícho sin chichaon la chóhen sin kixin tsjacha ti chi̱cha̱ko̱en sin. 35Méxra̱ jahara chrótjue̱héra ti sin nínkakohanra la ko jína chrókjui̱chꞌehéra sin la ko chrókjui̱nchekjenra sin chichaon la chróchoénhñara kixin chrókꞌokjan sin a̱ntsí. Ndá ti xi̱kaha si̱chꞌera la imá tsjachara la ko tsꞌónara xje̱en Díos nkaya nka̱jní kixin Díos la jína, kjónté ti sin chóntehya kjuasàya ti jehe chꞌan la ko ti sin jínahña. 36Chrokui̱konoéhéra kichuara éxi ti Itꞌára itjen nkaya nka̱jní la ti̱konoéhe̱ chꞌan chojni.
Chrokꞌuándaxiénhñani kíchóni
(Mt. 7:1-5)
37’Chrokꞌuekahyara ijie̱ ókjé chojni ndá Díos chrókjuanchahyara chꞌan ijie̱. Chrokuétua̱nhñara kixin chrókjuasóte íjnko chojni ndá Díos chrókjuinchekjasótiahyara. Chrokꞌuitjáñahanra ichrén ijie̱ kjuásihanra íjnko chojni ndá Díos chrókjuinchekꞌitjáñehe chꞌan ti ijie̱ kjuásinra. 38Chje̱héra íso chojni ti nkehe ticháxi̱hin sin ndá Díos tso̱tjáhara ti nkehe jína. Tjetóxin tsotjáhara Díos la ícha tsꞌe̱nka̱ chꞌan íso tsꞌótsjéyehe chꞌan la hasta tsꞌixikꞌitjijin ti nkehe tsjajon chꞌan. Díos tso̱tjáhara chꞌan éxi ti nkehe tsíchje̱héra íso chojni.
39 #
Mt. 15:14. *Ndá kjuíncheyóe̱xin chꞌan, ndáchro chꞌan:
―¿Á jína kixin ijnko chojni tꞌikonhña chrókuinkatséhe íjnko chojni tꞌikonhña ní? Ti xi̱kaha la kjá yóí sin tsꞌánótje̱ñá sin nkojín tòye̱. 40#Mt. 10:24, 25; Jn. 13:16; 15:20.*Ijnko nkexro xráko̱he̱ la kanhñó tjetoan ke ti nkexro tjako. Kjánchó ti ó tsjixin tsoxrako̱he̱ la tso̱yóhe̱ éxi ti nkexro kjuako.
41’¿Nkekuènté tsjehé ti chji̱nínó intsí tjenkánkí ikon ti kichua, ndá tꞌikonhña ti inta ijié tjenkánkí ti ikuan? 42Ti xi̱kaha la, ¿nkexrín chróndáche ti kichua: “Tito̱hé tsakítsjenkía ti chji̱nínó intsí tjenkánkí ikuan”, ti tꞌikonhña ti inta ijié tjenkánkí ti ikuan? Jaha la nduáhya tjénka̱yáxian. Sa̱o takítsjenkia ti inta ijié tjenkánkí ti ikuan ndá jína tsꞌikuan tsakítsjenkía ti chji̱nínó intsí tjenkánkí ikon ti kichua.
Ti ito tꞌóna tjatso̱anxíni ti inta
(Mt. 7:17-20; 12:34-35)
43’Kohya inta jína chrókꞌóna ito jínahña, la ko kja̱xin kohya inta jínahña chrókꞌóna ito jína. 44#Mt. 12:33.*Kixin nkojnko inta mé tjatso̱anxíni ti ito tꞌóna. Ti ntachꞌi̱ la xitjahya tsꞌóna ito higo la ko xitjahya tsꞌóna to uva. 45#Mt. 12:34.*Ijnko chojni jína la jína nixja kixin jína ti a̱sén. A̱ndá ijnko chojni jínahña la nixja ti nkehe jínahña kixin ti jínahña mé tjinká ti a̱sén kixin éxi tjenka̱yáxin a̱sén chojni mé xi̱kaha nixja ti irꞌua sin.
Ti yaá nkexro kjuíchꞌéna nchia
(Mt. 7:24-27)
46’¿Nkekuènté ndáchrora “Ìnchéni, Ìnchéni”, a̱ndá nchexiteyéhyara ti nkehe tétua̱hanra? 47Kaín ti nkexro tóchjina la tihin ti nkehe ndáxrja̱n la ko titekaon 48mé yóhe̱ sin éxi ijnko nkexro kjuíchꞌéna nchia la sa̱o kꞌóxraya ni̱nka ndá kjuíchꞌéna nchia chritaón ti tjo̱ a. Ndá ti ó kui nda̱ninche la ikui ti ìnta̱ kꞌuindate ti nchia, la ní kꞌuinkihya ti nchia kixin jína tsíkꞌóna kixin chritaón ti itjo̱ a tjekjen. 49A̱ndá ti nkexro tihin ti nkehe xrja̱nká ndá titekakonhña mé tóyóhe̱ éxi ijnko nkexro kjuíchꞌéna nchia chritaón inche la kohya itjo̱ chrínkí. A̱ndá ti ó kui ti nda̱ninche la kꞌuindate ti nchia la kꞌuátjoá ti nchia la kuenté ti nchia la kꞌuitjáña.
S'ha seleccionat:
Lucas 6: poeNTplus
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2016, Wycliffe Bible Translators, Inc. All rights reserved.