Pi zi tiki 14
14
Abram a rɗa amai midiɗi paakai na gawni
1War mefeŋ na wiini Amrafel pai na Mezopotamiya, Ariyok pai na Ellasar, Kedorlaomer pai na Elam gaini Tideyal pai na Goyim 2paakai hanɗa e hitimi gaini Bera pai na Sodoma, Birsa pai na Gumura, Siniyab pai na Adma, Semeber pai na Seboyim gaini pai na Bela lai, a dara a muɗa: Pai na Sowar.
3Paakai na ɵim hanɗa e tipi siɗi war huduk na Sidim, n'e yikiŋ girna ɓa yem-ra n'abai zi manta. 4E ɗi fu azumai pini Kedorlaomer haa buza doogo pi sulu, amma war buza n'ag'aŋ doogo pi hu, e fiki amai sini. 5War buza n'ag'aŋ doogo pi puɗu, nagai e ɗa azumai pini Kedorlaomer gaiɗi paakai na gaini, e hilisi e rɗi amai midiɗi ɗai na Refayim war Astarot-karnayim, e rɗi amai midiɗi Zuzitekai war Ham, midiɗi Emitekai war hlai na plas na Kiryatayim, 6E rɗi amai midiɗi Horitekai amai midiɗi huwuŋ na wiiɗi mal war Seyir, e tiki futi piɗi haa a El-paran edi mini basga na kaɗataŋ ta. 7Asakal par e wiyisi, e cûsi war Ein-Mispat na yikiɗi zamai ɗa ɓa: Kades, e fiɗiɗi Amalekekai edi midini aftiɗi par, gaiɗi Amoritekai na war Hasason-Tamar ɗa lai.
8Nɵa pai na Sodoma, na Gumura, na Adma, na Seboyim, gaini na Bela lai, e niyisi anene gaiɗi askaraiɗi, e zizini siɗi aŋ hitimi gaiɗi war huduk na Siddim. 9Nagai e hitimi gaini pai Kedorlaomer na Elam, Tideyal na Goyim, Amrafel na Mezopotamiya, Ariyok na Ellasar lai; paakai ɵim e hitimi gaiɗi paakai puɗu. 10Huduk na Siddim ɗa, kalaŋ a na fu warni viya, war priɗi n'edi ɗa, pai na Sodoma gaini na Gumura e yiki woni, nagai n'e hini ɗa e pri amai sini huwuŋ lai. 11Paakai n'e rɗi amai ɗa, e mili wazagaiɗi ɗai na Sodoma gaiɗi gumura paŋ, e mili wazagaiɗi zi simi paŋ lai, e fiki e hili. 12E yimi Lot n'ahini tawalni Abram, e mili wazagaini paŋ lai e fiki e hili gaini.
Lot a na fu aha war Sodoma. 13Ɗif ktai n'a prasi edi a kinisi labar wiini Abram na hebre n'a sumna gobi ɵimani luwaŋai n'abakai na wiini Mamre na Amorite, na tawalni Eskol gaini Aner, nagai hu paŋ e ɗi ɗai na bonu ɗi gaini Abraham. 14Won hlai n'a ɵina ɓa e yimi ahini tawalni kai ɗa, tizaw tar a tipiɗi ɗaini zi sda n'e wii ahani, ɗai miya hu gaini doogo pi mitwis. A tika futi piɗi gawɗi haa a Dan ta. 15A ɓûrwiɗi askaraini edi ta ta, kapai e cikiɗi gawɗi duvuk. A rɗa amai midiɗi, a tika futi piɗi haa a Hoba na te na war gal n'azumai par na tiɗi Damaskus. 16A wayasi wazagai n'e miliŋ ɗa paŋ, Lot n'ahini tawalni gaini wazagaini n'e miliŋ ɗa paŋ lai, falakai gaiɗi ɗai zamai zamai n'e yimiɗi lai.
17Asakal n'Abram a wayasi edi par war rɗi n'amai na midini Kedorlaomer gaiɗi paakai na pini, pai na Sodoma a halasi mini war huduk na Save, a dara a muɗa huduk na wiini pai.
Abram a nava gaini Melkiseɗek
18Melkiseɗek pai na Salem, a pai zi ɓaka na wiini Alaw n'amai n'amai, a kasi peŋ gaini vin, 19A ɓaka Abram a muɗa: Alaw n'amai n'amai n'a za hlai n'amai gaini afti ɗa, a ɓaka Abram.
20Kol sini Alaw n'amai n'amai, n'a siɗi gawku war tuku. Nɵa Abram a sini doogoni wazagaini paŋ n'a mulaŋsi mini gaw par.
21Pai na Sodoma a miɗini wiini Abram: Siɗiŋa ɗai ɗa ca, mula wazagai ɗa wiiku.
22Abram a wiyini seŋ wiini pai na Sodoma, ta t'aŋ kaai amai pini EPIƊ-ƊAI, Alaw n'amai n'amai, n'a za hlai n'amai gaini afti lai,
23koo aduzi, koo ɓa a sogom na miɗini harabak, jre zaŋ, aga mu tika wala ktai pini wazagaiku par kai, kapai dawai ɓa ku zaŋa aŋ ɗif zi farai ku tuku ɗa, mu ɗiya kai.
24Mu tika wala ktai buriya kai, ku saŋa ɗa a simi na wiiɗi ɗaiŋa gaiɗi nagai n'e zi bonu gaya ɗa, Aner, Eskol gaini Mamre lai, nagai ɗa, wala n'e firiyiŋ aga e miliŋ wiiɗi kiiɗi.
S'ha seleccionat:
Pi zi tiki 14: MUSGUM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964