Yohana 19
19
1Nɵa Pilatus a yima Yesu a siŋɗi buri e ɵiɓiŋ. 2Askarai e hiti bogorai zi hedek e pitini miɗini, e wiini sapa zi pai sini lai. 3E givilisi mini e miɗi: Lapiya, paiɗi Yudiyakai, e tiki piɗi e ɵiɓiŋ galaini lai. 4Pilatus a niyasi anene pra a miɗiɗi wiiɗi Yudiyakai: Mu na kiŋkisi anene kapai a yima midiki ɓa mu nava wala ktai na mu kûti sariya miɗini pini aŋ kai. 5Nɵa Yesu a niyasi anene, bogorai zi hedek ɗa miɗini tiɓ, sapa zi pai sini ca lai, Pilatus a miɗiɗi: Ɗif ɗa an na. 6Won hlai na paakai n'abakai zi ɓaka gaiɗi ɗaiɗi e tiliŋ ɗa, e ɗûûli e miɗi: Tûkûŋ amai, tûkûŋ amai. Pilatus a miɗiɗi: Tiki dama yimiŋ tûkûŋ amai buri ta mu nava wala na meefeŋ na mu kûti sariya miɗini pini aŋ kai. 7Yudiyakai e wiyini seŋ e miɗi: Tiyi ɗa, gadai zi ɗû ktai a na, pini gadai ni ɗa, sai a mra edi buri a za sini aŋ Ahini Alaw. 8Won hlai na Pilatus a ɵina seŋ hanɗa, hunai te yimaŋ a suwa pra. 9A waya aha a miɗini wiini Yesu: Tuku ku na wata par ɗa? Amma Yesu a wiyini seŋ kai. 10Nɵa Pilatus a miɗini: Mu muɗuku ku muɗaŋa kai! Ku sɗa ɓa spak aŋ ta buri mu ɵuku, spak aŋ ta buri mu tukuku amai lai kai ɗi? 11Amma Yesu a wiyini seŋ a muɗa: Spakku ktai maa mada kai, a sasifu suku amai par kai ɗa. Buri nɵa, ni n'a saŋa war tuku ɗa, tuwurni ɗa abai a suwa paŋ. 12Woni par Pilatus a paya aŋ ɵaŋ, amma Yudiyakai e ɗûûli e miɗi: Na ɓa ku ɵaŋ li ɗa, ku marmaini Sezar kai. Asiya ɗi paŋ n'a za sini aŋ pai ɗa a faka amai na ɗa sini Sezar. 13Asakal n'a ɵina seŋ hanɗa ya ɗa, Pilatus a kasi Yesu anene, a sumna azumai midiɗi paramai zi sariya, won hlai n'e yikiŋ ɓa: Hlai zi didigi, war seŋɗi Hebrekai e yikiŋ ɓa: Gabbata. 14Hanɗa a mefeŋ na buri zizinini-si na buriɗi fet na wiiɗi Paska, futi girvudi n'arba, Pilatus a miɗiɗi wiiɗi Yudiyakai: Paiki ɗa an na. 15Amma e ɗûûli e miɗi: Fiɗiŋ edi, fiɗiŋ edi, Tûkûŋ amai. Pilatus a miɗiɗi: Mu toko paiki ɗa amai ɗi? Paakai n'abakai zi ɓaka e wiyini seŋ: Paiyi zamai aŋ kai, sai Sezar tar. 16Nɵa a saŋ war tiɗi kapai e tûkûŋ amai.
Tûkû n'amai na wiini Yesu
Mat. 27.32-44; Mark. 15.21-32; Luk. 23.26-43
Nɵa e yimi Yesu 17E tikinisi dagrani wulani aŋ libi, a niyasi anene aŋ hala war hlai n'e yikiŋ ɓa keɵke na humok, na war seŋɗi Hebrekai e yikiŋ ɓa: Golgota ɗa. 18E tûkûŋ amai war hlai ni ɗa, ɗai zamai gaini sulu lai, ktai war gal hanɗa par lai, ktai war gal hanɗa par lai, Yesu arba tok. 19Pilatus a ɗo wala ktai ɗo, a tokoŋ amai sini dagra tok, ɗû na warni maini nɵa: Yesu na Nazaret par, pai na wiiɗi Yudiyakai.
20Yudiyakai viya e ŋi ɗû hanɗa, buri ɓa hlai na e tuku Yesu amai woni ɗa a na fu gobi gaini fuŋ n'abai ɗa. Ɗû hanɗa a ɗo war seŋ na wiiɗi Hebrekai, gaini latin gaini grek lai. 21Paakai n'abakai zi ɓaka na wiiɗi Yudiyakai e miɗini wiini Pilatus: Ku ɗoŋ ɓa, pai na wiiɗi Yudiyakai kai, amma ɗif hanɗa a muɗa mu pai na wiiɗi Yudiyakai. 22Pilatus a waya seŋ: Na mu ɗoŋ ɗa, mu ɗoŋ ɗa a ɗû ɵa.
23Askarai, won hlai n'e tuku Yesu amai li ɗa, e mili sapani, e ɓûrwiŋ arni puɗu, askar paŋ ɗa gal ktai ktai. E militi ropni na ziigi siɗi kai gaini hi ktai amai par haa azumai ta ɗa yaw lai. 24E kitiŋ arbaɗi ɓa: Mu ɓusutumu edi kai, amma mu ɓultumu aŋ tambulo kapai mu suɗumu ɗif n'aga te sa sini ɗa. A za nɵa kapai ɗû na a muɗa ɓa:
E ɓûrwi sapakaini arbaɗi,
E ɓiliti robni aŋ tambulo lai a va amai.
Hanɗa a wala na askarai e ziŋ ɗa.
25Gobi gaini dagrani Yesu ɗa, emini gaiɗi Mariya na tawalɗi emini na munini Klopas gaiɗi mariya Magdelena e ɗi fu ca. 26Yesu, won hlai n'a tiliti emini gaini ɗif zi hitri n'a daraŋ gara ɗa, ɵimaɗi zaw lai ɗa a miɗiɗi wiiɗi emini: Muni ahiku ɗa an na. 27Asakal par a miɗini wiini ɗif zi hitri ɗa ɓa: Amuku t'aŋ na. War hlai ni par ɗif zi hitri ɗa a yimiti aha gaini.
Mri na wiini Yesu
Mat. 27.45-56; Mark. 15.33-41; Luk. 23.44-49
28Asakal hanɗa, kapai ɗû a va amai ɗa, Yesu won hlai n'a sɗa ya paŋ ɓa a vada li ɗa, a muɗa: Sai te na zaŋa. 29Grak ktai a na fu zaw, gaini vi gaini vin, e rgi tipeɵ na gaini diyɓi arni vinegre mini tini luwuŋ Izop ɓak, e kiŋnisi mini. 30Won hlai n'a ca vinegre hanɗa, Yesu a muɗa: Paŋ a va amai li, asakal par a pa miɗini azumai, suŋfani a wa edi.
Wuruk na paɵani Yesu
31Hanɗa a mefeŋ na wiini zizinini-si, kapai kopoŋ ɗa a hina amai sini dagra warni Sabbat kai ɗa, buri ɓa Sabbat ni ɗa a mefeŋ n'abai. Yudiyakai e zilbi Pilatus buri e hiɗi eziɗi ɓaw ɓaw, e miliɗisi azumai. 32Nɵa askarai e hilisi e hiɗi ezini n'avut n'a toko amai sini dagra gaini, 33won hlai n'e cûsi sini Yesu ɗa, e niviŋ gaini mri, e hiɗini ezini kir kai. 34Amma ktai arbaɗi askarai a ɓla paɵani gaiɗi kaway, won hlai ni yem gaini fel a niyasi edi. 35Ni n'a tala hanɗa a za zaida miɗini lai, zaidani a jre, ni a sɗa ɓa a muɗa na ɗa a jre lai kapai tiki ki yimi. 36Hanɗa a za nɵa kapai ɗû n'a muɗa ɓa:
Keɵkeni ktai maa a haɗa kai ɗa a va amai.
37Ɗû zamai a na muɗa pra ɓa: Aga e mili arɗi sini Ni na e ɓiliŋ ɗa.
E tiki Yesu azumai war waŋ
Mat. 27.57-61; Mark. 15.42-47; Luk. 23.50-56
38Asakal hanɗa Yosef na Arimatiya par, a ɗif zi hitri na wiini Yesu amma war kuɗuhai buri hunai na wuzaɗi Yudiyakai, a zilba Pilatus buri a tikasi kopoŋni azumai, Pilatus a sini futi, nɵa Yosef a tika kopoŋ azumai. 39Nikodemus, ni n'a halasi ka sini duvuk ɗa a cosi lai, a kasi mir gaini yitir zamai lai, a za kilo gobi doogo doogo hu. 40E tiki kopoŋni Yesu ɗa, e rgiŋ gaini sapa, gaini wazagai zi ɗûgûdi zi lûgûzi lai maini na Yudiyakai e pi ɗaiɗi nɵa. 41Zardeŋ ktai a na fu won hlai na e tûkûŋ amai warni ɗa, war zardeŋ hanɗa, waŋ na hehe a na fu woni n'e tiki ɗif warni kai hai. 42E tiki Yesu warni waŋ ni ɗa, buri zizinini-si na wiiɗi Yudiyakai buri ɓa waŋ ɗa a na fu gobi.
S'ha seleccionat:
Yohana 19: MUSGUM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964