Yohana 20
20
Ɵiyi n'amai na wiini Yesu
Mat. 28.1-8; Mark. 16.1-8; Luk. 24.1-12
1War mefeŋ n'avut, war demas, Mariya Magdelena te halasi mini waŋ gorof na hlai a na gegeŋ hai, te niviti fukuni gaini likiti edi mini waŋ ɗa par likat. 2Te lawa sini Simun Peter gaini ɗif zi hitri ktai na Yesu a daraŋ gara, te miɗini: E tiki Epiɗ-ɗai edi warni waŋ par ɗaw, mi siɗi hlai n'e kiŋ woni kai. 3Nɵa Peter gaini ɗif zi hitri zamai e niyisi anene e hili mini waŋ. 4E liwi piɗi marɗi gaini suliɗi, amma ɗif zi hitri na ktai a lawa kokolai a suwa Peter, a co mini waŋ avut, 5a goɓo azumai, a tala arni warni waŋ, a nava sapa n'e rgiŋ gaini azumai ca, amma ni a niya amlai warni waŋ ɗa kai. 6Simun Peter n'aŋsi pini par ɗa a cosi, won hlai n'a niya amlai warni waŋ ɗa, a nava sapa n'e rgiŋ gaini ɗa azumai ca, 7a tala ɗa, sapa na e biriŋni miɗini ɗa edi warni hlai zamai ta gaini tipi gaini sapa n'e fiɗiŋ gaini kai. 8Nɵa ɗif zi hitri na ktai n'a cosi mini waŋ avut ɗa, a niya amlai lai, a tala, a yima lai. 9Buri e ɵini ezini ɗû na a muɗa ɓa: Aga a ɵiya amai arbaɗi zi mri par ɗa kai hai. 10Nɵa ɗai zi hitri na sulu e wiyisi ahaɗi.
Yesu a siŋka sini arɗi Mariya Magdelena
Mat. 16.9-11
11Amma Mariya te ɗiyasi anene par gobi gaini waŋ, te tuwa, won hlai na te tuwa ɗa, te goɓa azumai aŋ tala arɗi amlai warni waŋ ɗa. 12Nɵa e tali ɗai zi ɵeŋ na war fuŋ-n'Alaw sulu gaini simni azumai war hlai na kopoŋni Yesu a na ka woni ca. Na ktai won hlai na miɗini a na ka woni sek ɗa lai, na zamai won hlai n'ezini a na ka woni sek ɗa lai. 13E miɗiɗi: Muni ku tuwa buri maɗa? Te wiyiɗi seŋ te muɗa: E tiki Epin-geza ɗaw, mu sɗa hlai n'e kiŋ woni kai. 14Asakal na te muɗa hanɗa ya, te bunda arɗi duɓaɗi te tala Yesu gaini ɗiyi zaw, amma te sɗa ɓa A ni nɵa kai. 15Yesu a miɗiɗi: Muni ku tuwa buri maɗa? Ku paya ɗa asiya ɗa? Na te hiina ɓa a epin-gezani vowai ɗa, te miɗini: Ɗif n'abai, na ɓa ku tikaŋ ku tuku ɗa, siŋkaŋa hlai na ku kaŋ woni ta, kapai mu hala mu tikaŋ wiya. 16Yesu a yikiti: Mariya. Te bundasi arɗi, te miɗini war seŋɗi Hebrekai ɓa: Rabbouni, a dara a muɗa: Api zi hitri. 17Yesu a miɗiɗi: Ku tika tuku sa kai, buri mu hala amai sini Apa kai hai, amma hala siɗi tawalakaya, ku miɗiɗi ɓa: Mu na hala amai sini Apa n'Epiki tiki lai, sini Alaw ɗa n'Alaw na wiiki lai. 18Mariya Magdelena te halasi te miɗiɗi seŋ hanɗa wiiɗi ɗai zi hitri ɓa te talasi Epiɗ-ɗai ya, ɓa a miɗiɗisi maini hanɗa ɵa lai.
Yesu a siŋka sini arɗi ɗai zi hitri
Luk. 24.36-49
19Koskoini mefeŋ n'avut ni ɗa, won hlai na mini hlai na ɗai zi hitri e ɗa woni a na fu gaini dûgû amai burini hunai na wuzaɗi Yudiyakai ɗa, Yesu a halasi a ɗiya arbaɗi zaw a miɗiɗi: Ɵeɗ a sumna gaiki. 20Won hlai n'a miɗiɗi hanɗa ya, a siŋkiɗi tini gaini paɵani, ɗai zi hitri e firiyi gara buri e tili Epiɗ-ɗai.
21Yesu a miɗiɗi pra: Ɵeɗ a sumna gaiki, maini n'Api a ɵinaŋasi, Ta mu ɵiniki nɵa lai. 22Asakal n'a muɗa hanɗa ya, a yiba smer midiɗi a miɗiɗi: Seze Sɗik a sumna midiki. 23Ni na ki hinini tuwurni li ɗa, tuwurni aga a pɵa miɗini kai, ni na ki hiniŋni kai ɗa, tuwurni aga a pɵa miɗini lai.
Yesu a siŋka sini arni Tomas
24Tomas, ni n'e yikiŋ teyek, ktai arbaɗi na doogo pi sulu a na fu gaiɗi kai won hlai na Yesu a halasi ɗa; 25Won hlai n'a cosi, ɗai zi hitri na zamai e miɗini: Tiyi mi tili Epiɗ-ɗai. Amma a miɗiɗi: Na ɓa mu tala balamni ɓere na war tini kai, na ɓa mu tikiti ahini ta war balamni ɓere kai, mu tika ta mini paɵani kaalai ɗa, mu yima duk kai zaŋ.
26Mefeŋ mitwis asakal hanɗa, ɗai zi hitri e ɗi fu amlai ca, Tumas a na fu dam lai, mini hlai a na fu gaini dûgû duk duk lai, nɵa Yesu a halasi a ɗiya arbaɗi zaw, a miɗiɗi: Ɵeɗ a sumna midiki. 27Asakal par a miɗini wiini Tumas: Kitisi ahiɗi tuku ɗa, tala wara ɗa, tikitisi tuku ɗa, tikiti mini paɵa ɗa, ku sumna gaini yimi kai kai, yima. 28Tumas a waya seŋ a miɗini: Epiɗ-ɗai ŋa, Alaw ŋa. 29Yesu a miɗini: Tumas, ku yima ɗa, buri ɓa ku talaŋa, ɵeɗ midiɗi nagai n'e tili kai paŋ ktai e yimi.
Wala na Maktuɓ hanɗa a ɗo burini ɗa
30Yesu a za wazagai zi siŋki zamai viya wuzani arɗi ɗaini zi hitri, n'aŋ gaini ɗû warni maktuɓ hanɗa kai. 31Hanɗa a ɗo ɗa, ɓa kapai ki yimi ɓa Yesu a Kristu, a Ahini Alaw, kapai pini yimi hanɗa ki nivi suŋfa war yikini.
S'ha seleccionat:
Yohana 20: MUSGUM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964