Yohana 21
21
Yesu a siŋka sini arɗi ɗai zi hitri muguzak
Luk. 5.1-11
1Asakal hanɗa, Yesu a siŋka sini arɗi ɗai zi hitri pra, agoɗom wulani yem-ra n'abai na Tiberiyade, a siŋka sini arɗi ɗa maini nɵa: 2Simun Peter, Tumas n'e yikiŋ ɓa na Teyek gaini Nataniyel na Kana na war Galeliya par, alini Zebedewus gaiɗi ɗai zi hitri na zamai na sulu lai e ɗi fu ktai. 3Simun Peter a miɗiɗi: Mu hala fu aŋ tum. Nagai e miɗini: Tiyi mi hiliɗi gaiku lai. E niyisi anene, e niyi warni hulum n'abai, duvuk ni ɗa e yimi wala ktai kai. 4Gorof par na hlai a sɗasi li edi ɗa, Yesu a halasi a ɗiya ɵimani a ɗa zaw, amma ɗai zi hiri e siɗi ɓa A ni ɗa nɵa kai. 5Yesu a miɗiɗi: Aliya wala zi simi aŋ tiki ɗi? E wiyini seŋ e miɗi: Aŋ kai. 6A miɗiɗi: Ɵi ava na tiki ɗa miɗini graŋki na wus ɗa, aga ki yimi. Nɵa e ɵiŋki avaɗi miɗini graŋɗi na wus e yimi hilif viya haa avaɗi ɗa a yimasi amai gaiɗi kai. 7Nɵa ɗif zi hitri na Yesu a daraŋ gara ɗa a miɗini wiini Peter: A Epiɗ-ɗai sike. Won hlai na Peter a ɵina ɓa a Epiɗ-ɗai ɗa, a rga sapani pini buri a na fu ganala, a ɵa sini agoɗom aŋ ɵila sini sek, 8ɗai zi hitri na zamai ɗa e vilisi gaini hulum ɗa, e yimisi ava amai gaini vi gaini hilif, e ɗi fu gaigai gaini wulani daŋ ɗa kai, a za li viya ɗa a metir miya ɗaw ɗi.
9Won hlai n'e niyisi li amai ɗa, e nivi morjoni afu gaini hilif miɗini gaini peŋ lai. 10Yesu a miɗiɗi: Ki milisi pini hilif na ki yimiŋsi tiyana ɗa, kiŋsi. 11Simun Peter a niya warni hulum, a yimasi ava amai gdaŋ, a nava hilif n'abakai warni miya gaini doogo doogo ɵim pi hu; gaini viyani paŋ tekeɗeɗi, ava ɗa a ɓasa edi kai.
12Yesu a miɗiɗi: Hilisi simi. Ktai arbaɗi ɗai zi hitri n'a zilbaŋ ɓa tuku ku siya ɗa nɵa aŋ kai, buri e siɗi ya ɓa a Epiɗ-ɗai. 13Nɵa Yesu a halasi a tika peŋ a siŋɗi, a siɗi hilif ɗa nɵa lai. 14Hanɗa azi n'ag'aŋ hu na Yesu a siŋka sini arɗi ɗaini zi hitri asakalni ɵiyini n'amai arbaɗi zi mri par ta ɗa.
Yesu gaini Peter
15Asakal na e simi ya, Yesu a miɗini wiini Simun Peter ɓa: Simun ahini Yohana, ku daraŋa ku sûwiɗi nagai hanɗa ɗi? A waya seŋ a miɗini: Nkam Epiɗ-ɗai, tuku ku sɗa ya ɓa, ta mu marmaiku. Yesu a miɗini: Tika hangalku sini alini adumaiŋa. 16A zilbaŋ azi n'ag'aŋ sulu, Simun ahini Yohana, ku daraŋa ɗi? Peter a waya seŋ a miɗini: Nkam, Epiɗ-ɗai, tuku ku sɗa ɓa ta mu marmaiku. Yesu a miɗini: Ku giɗima adumaiŋa. 17A zilbaŋ azi n'ag'aŋ hu, a muɗa: Simun ahini Yohana, ku marmaya tiɓ? Peter, sini a kwima buri a zilbaŋ azi n'ag'aŋ hu ɓa: Ku marmaya tiɓ ɗi ɗa? A waya seŋ a miɗini: Epiɗ-ɗai, tuku ku sɗa wazagai paŋ, ku sɗa ya ɓa mu marmaiku. Yesu a miɗini: Tikini hangal wiini adumaiŋa. 18Jre jre mu muɗuku, won hlai na ku na agwi hai ɗa, ku naga santir wuzaku kiiku, ku hala warni hlai na ku daraŋ lai, amma won hlai na ku za li wel ɗa, aga ku yima graŋku amai kapai ɗif zamai a rguku, aŋ kuku won hlai zamai na ku daraŋ kai. 19A muɗa seŋ hanɗa buri a siŋkitini wiini Peter miɗini mri n'aga a mra gaini, n'aga a sini kol wiini Alaw gaini. Asakal n'a muɗa hanɗa ya, a miɗini: Tapasi pa.
Yesu gaini ɗif zi hiri na ni a daraŋ gara ɗa
20Won hlai na Peter a bundasi arni ɗa, a tala ɗif zi hitri na Yesu a daraŋ gara ɗa, ni n'a na ka a hiŋla didikni Yesu won hlai n'e ɗa simi simi na koskoi aŋ zilbaŋ ɓa: Epiɗ-ɗai, n'aga a suku edi ɗa asiya ɗi ɗa? Ni lai a na fu piɗi su.
21Won hlai n'a talaŋ, Peter a zilba Yesu a muɗa: Epiɗ-ɗai ni hanɗa koo! 22Yesu a miɗini: Na ɓa mu firiya ɓa a sumna karni haa mu wayasi ɗa, seŋku woni ɗi? Tuku ɗa, halasi pa. 23Asakal hanɗa par, labar a wa edi arbaɗi tawalakai ɓa, ɗif zi hitri hanɗa aga a mra kai. Paŋktai, Yesu a miɗini ɓa aga a mra kai ɗa kai, amma a miɗiŋ ɓa: Na ɓa a sumna karni haa hlai na mu wayasi ɗa, seŋku woni ɗi?
24A za zaida midini wazagai hanɗa, a ɗoŋ lai ɗa a ɗif zi hitri ni ɗa, tiyi mi siɗi ɓa, zaidani ɗa a jre.
25Yesu a za wazagai zamai zamai viya, na ɓa e ɗûŋ fu na ktai ktai paŋ ɗa, yai na gaiɗi abaiɗi maa te kiɗa te mula maktuɓ n'e ɗûŋ ɗa kai.
S'ha seleccionat:
Yohana 21: MUSGUM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964