John 16
16
1“kikī-wīhtamātināwāw ōma, ēkosi ēkāya kita-pakitinamēk kitāpwēhtamowiniwāw. 2kika-wayawī-wēpinikawināwāw kita-mawimoscikēyēk ayamihēwikamikohk, ēkwa kita-ispayiw awiyak nipahikoyēko kita-itēyihtam ē‑atoskawāt kisē-manitowa. 3ayisiyiniwak ēkosi kita-tōtamwak ayisk namōya kiskēyimēwak ohtāwīmāwa mīna namōya nīsta nikiskēyimikwak. 4māka kikī-wīhtamātināwāw ōma, ēkwa otihcipayiki ēkosi kita-tōtahkik, kika-kiskisināwāw ē‑kī-wīhtamātakok.
kā‑kanātisit ahcāhk otatoskēwin
“namwāc kitohci-wīhtamātināwāw ēwako ōma nistam ē‑māci-kiskinohamātakok ayisk ē‑kī-wīcētakok. 5ēkwa ōma ē‑wī-nātak ana kā‑kī-pē-isitisahot, āhci piko namwāc kikakwēcimināwāw tānitē ē‑wī-itohtēyān. 6ēkwa mistahi kimihtātēnāwāw ōma ē‑wīhtamātakok. 7ē‑tāpwēyān ōma kā‑itwēyān, nawac kika-miywāyānāwāw sipwēhtēyāni, ayisk kīspin ēkāya sipwēhtēyāni, namōya owīcihtāsow kika-pē-nātikowāw. māka sipwēhtēyāni nika-pē-isitisahwāw. 8ēkwa takohtēci kita-kēhcināmēw ayisiyiniwa ōta askīhk ēkāya kwayask ē‑isi-nisitohtahkik maci-tōtamowin, ahpō kīkway anima kwayask itātisiwin, ēkwa tānisi kisē-manitow ē‑isi-wiyasiwātahk māyi-tōtamowin. 9namōya kiskēyihtamwak kīkway anima maci-tōtamowin, ayisk namōya nitāpowakēyimikwak. 10namōya kiskēyihtamwak kīkway anima miyo-tōtamowin, ayisk ē‑wī-itohtēyān nohtāwiy ēkwa namōya wīhkāc kihtwām kika-wāpamināwāw. 11namōya kwayask isi-nisitohtamwak wiyasiwātikowin, ayisk āsay kisē-manitow kī‑maci-akimēw ana kā‑pimipayihtāt ōma askīhk.
12“ayiwāk ihtakwan kita-kī-wīhtamātakok, māka ēkwa osām mistahi kiyawāw ohci kita-pēhtamēk. 13ispīhk kā‑kanātisit-ahcāhk takohtēci kita-wāpahtihiwēw tāpwēwinihk manitowa ē‑itātisiyit. kika-tōtamākowāw kita-kiskēyihtamēk iyawisk tāpwēwin. namōya kika-pīkiskwātam wiya ohci, kita-pīkiskwātam anima kā‑kī-isi-pēhtahk ēkwa kika-wīhtamākowāw tānisi ē‑wī-ihkihk. 14nika-kistēyihtākohik ayisk kita-otinam anima kā‑itwēwak ēkwa kika-wīhtamākowāw. 15kahkiyaw anima nohtāwiy kā‑tipēyihtahk, ēwako nīsta nitipēyihtēn, ēwako ohci kā‑ohci-itwēyān, ahcāhk nika-natohtāk anima kā‑wīhtamawak ēkwa kika-wīhtamākowāw.
pīkiskātēyihtamowin mīna miyawātamowin
16“wīpac namōya kika-wāpamināwāw, ēkwa mwēscasēs kika-wāpamināwāw.”
17ātiht okiskinohamawākana kā‑kakwēcihtoyiwa ē‑itwēyit, “tānisi ana ē‑wī-kakwē-itwēt, ‘wīpac namōya kika-wāpamināwāw, ēkwa mwēscasēs kika-wāpamināwāw;’ ēkwa ati-itwēw, ‘ayisk ē‑wī-nātak ohtāwīmāw?’ 18tānisi ōma kā‑wī-kakwē-itwēt, ‘wīpac’? namōya kinisitohtawānaw!”
19Jesus ēsa kiskēyihtam ē‑nōhtē-kakwēcimikot, ēkosi ōmisi itēw ēsa, “nikī-itwān, ‘wīpac namōya kika-wāpamināwāw, ēkwa mwēscasēs aciyaw kika-wāpamināwāw.’ ēwako cī ōma kā‑ohci-kakwēcimitoyēk? 20ē‑tāpwēyān ōma kā‑itwēyān, kika-mātonāwāw mīna kika-moskomonāwāw, māka ayisiyiniwak kita-miywēyihtamwak; ēkwa kiyawāw kika-pīkiskātēyimonāwāw, māka piyisk kika-miywēyihtēnāwāw. 21ispīhk iskwēw ē‑wī-wāpamāwasot, kakwātakēyimow ayisk ē‑otihcipayiyik kita-wīsakēyihtahk; māka ispīhk ē‑nōkosiyit ocawāsimisa, wanikiskisiw ē‑kī-wīsakēyihtahk, ayisk ē‑miywēyihtahk oskawāsisa ē‑nōkosiyit ōta askīhk. 22ēkosi tāpiskōc kīstawāw kita-ispayihikoyēk: mēkwāc kikitimākēyimonāwāw, māka kīhtwām kika-wāpamitināwāw, ēkwa kika-miywēyihtēnāwāw, ēkāya kita-kī-maskamikawiyēk.
23“ēwako kīsikāw otihcipayiki namōya ayiwāk kika-natotamawināwāw kīkway ohci. ē‑tāpwēyān ōma kā‑wī-itwēyān, ohtāwīmāw kika-pakitinamākowāw natotamēko kīkway niwīhowinihk ohci. 24isko anohc namōya kīkway kinatotamānāwāw niwīhowinihk. natotamok, ēkosi kika-miyikawināwāw, ēkosi kika-miywēyihtēnāwāw tāpwē piko.
Jesus kī‑sākōcihtāw askiy
25“ē‑aspahākēmoyān ōma ōhi kā‑pē-wīhtamātakok kīkwaya. māka kita-ispayiw ēkāya kita-aspahākēmoyān. nika-ācimāw ohtāwīmāw ēkota ohci kwayask kita-nisitohtamēk. 26ispīhk otihcipayiki kika-natotamawāwāw niwīhowinihk; namōya kā‑katāc kita-natotēstamātakok, 27ayisk ohtāwīmāw kisākihikowāw. kisākihikowāw wiya ē‑sākihiyēk ohci ēkwa ē‑tāpowakēyihtamēk kisē‑manitow ē‑isitisahot. 28nikī-pē-itohtān ohtāwīmāw ohci, ēkwa ōta askīhk kā‑kī-takohtēyān; ēkwa ani niwī-nakatēn ōma askiy mīna ē‑wī-nātak ohtāwīmāw.”
29ēkwa okiskinohamawākana ōmisi itik ēsa, “hāw, ēkwa kwayask kiwīhtamawinān, ēkāya ē‑aspahākēmoyan! 30nikēhcināhonān ēkwa kahkiyaw kīkway ē‑kiskēyihtaman; namōya kā‑katāc awiyak kita-kā-kakwēcimisk. ēkota ohci nitāpwēhtēnān kisē-manitow ē-ohciyan.”
31Jesus itēw ēsa, “kitāpowakēyimināwāw cī ēkwa? 32kita-otihcipayiw, āsay ispayin, ispīhk ka‑ayāyēk nanānis itē kā‑wā-wīkiyēk ēkwa nika-nisikatisin. māka namwāc ninisikatisin ayisk ohtāwīmāw niwīcēwik. 33kiwīhtamātināwāw ōma ēkosi pēyāhtakēyimowin kika-ayānāwāw ē‑wīcēwiyēk ohci. ōta askīhk kika-kakwātakihtānāwāw. māka nāpēhkāsok! nikī-sākōcihtān ōma askiy.”
S'ha seleccionat:
John 16: PCSBR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society