Mbombo tsa Vapositili 22
22
1“Ʉnyie valʉkololwango, najyʉnyie vadaada vango, mummʉlɨhɨtse lɨno wʉ ndikɨtetela pavʉlongolo paanyie.” 2Avaanu valya, wʉ vapʉliike ʉkʉta ʉPaulo itsova ɨnzovele jya veene jya Kɨebulaniya, vakakenyemuka, vakoongeletsa ʉkʉnuunala. ɄPaulo akagendelela ʉkʉvavʉʉla akata, 3“Ʉne ndɨlɨ Nʼyahudi, ndyaholilwe mu vʉtsenge wa Taso mu kɨlʉnga kya Kilikiya. Ndɨkʉlye nʉ kʉmanyiisiwa baaha apa pa Yelusalemu. ɄGamalieli vɨ aammanyiise kʉ lwʉtsi indagɨlo tsyoni itsʉ avanyienya viitu vaatʉlekye. Ndyɨhʉmiitse kʉ maka gooni ʉkʉnkonga ʉNgʉlʉve, ndʉwʉ ʉnyie ɨleelo mukɨhʉmya kʉ maka.
4“Ndyavapelelaga ʉvʉkʉvɨlwa nakʉ kʉvabuda avɨɨdɨki va Ntwa ʉYɨɨsʉ, ndɨlɨkʉviibata avagoosi na vadala nʉ kʉvakʉnga mu kɨkʉngwa. 5Ago ʉgwʉ ndikʉvavʉʉla ʉnyie, namwene ʉnteeketsi ʉmbaha paninie na vavaha va kɨvʉmbʉkʉ kyoni kya Vaisilahɨli, viweesa ʉkʉhʉmya ʉwooleletsi ʉkʉta ga jɨlweli. Aveene wʉ vaamye ikalata tsa kʉvahɨlɨkɨla avalʉkololwitu ʉwʉ vaale mu vʉtsenge wa Damesiki, nʉʉne ndyalʉtaga ʉkʉ, pakʉta ndɨkavakʉnge avaanu ava, nʉ kwitsa navo apa pa Yelusalemu, pakʉta vavʉngwe.
6“Ʉngata akavalɨlo ka ntanato (6) pamuunyi, ndɨkava ndɨhegelye ʉkʉsika apo pa Damesiki. Baaho ndɨkakenyemuka ɨlilangamuli ɨlikali ʉkʉhʉma kʉkyanya lɨkammulika ʉne imbasu tsyoni. 7Ndɨkagwa paasi, ndɨkapʉlɨka ɨlimenyu likʉmbʉʉla liita, ‘Gwe Sauli! Gwe Sauli! Kɨki vukʉmmelela ʉvʉkʉvɨlwa?’ 8Apo ndɨkavʉʉtsa ndɨkata, ‘Gwe mbaha, ʉve veeve veeni?’ Akannyanda akata, ‘Ʉne neene Yɨɨsʉ va kʉ Nazaleti, ndɨ vukʉmmelela ʉvʉkʉvɨlwa.’ 9Avajyango ʉwʉ twagendaniaga paninie vaalɨweene ɨlilangamuli, lɨno ɨlimenyu ɨlyo, navaalɨpʉlɨke. 10Pwʉ ndɨkavʉʉtsa ndɨkata, ‘Gwe Ntwa, ndɨvombe kɨki?’ Akannyanda akata, ‘Ɨma! Wiingile mu Damesiki, manya ʉmwa mwʉ jʉvuvʉʉlwa vʉnonu imbombo tsyoni itsʉ ʉNgʉlʉve akʉvɨɨkile ʉtsivombe.’ 11Kʉ nsɨkɨ ʉgwa ndɨkava ndilemwa ʉkʉlola, ʉlwakʉva ɨlilangamuli ɨlyo ɨlikali lyadosolye amiiho. Pwʉ avajyango avo vakannyibatɨlɨla isivoko, vakansikitsa mu Damesiki.
12“Apo aalepwo ʉmuunu mpamato, ɨlitaawa lya mwene aale vɨ Ananiya. ɄAnaniya ʉjwa aamwɨdɨkaga ʉNgʉlʉve ndʉwʉ tsitsova indagɨlo tsiitu, ikange aVayahudi vooni vʉʉkwa vaanʼginiaga. 13Akiitsa, akɨɨma pawiipi nʉʉne, akambʉʉla akata, ‘Lʉkololwango Sauli, tengʉla ʉkʉlola.’ Ʉnsɨkɨ gʉʉgwa amiiho gango gakabunguka, ndɨkambona.
14“Pwʉ akambʉʉla akata, ‘ɄNgʉlʉve va vanyienya viitu akʉhalile, pakʉta ʉvʉmanye ʉvʉnogwe wa mwene, ʉmbone ʉlya ʉNʼgolosu,#22:14 ɄNʼgolosu Ʉmuunu ʉvitsowa apa vɨ Yɨɨsʉ. ɄPaulo naanogwe ʉkʉtambʉla ɨlitaawa pavʉvalasu pakʉta aleke ʉkʉvaviipitsa aVayahudi. nʉ kʉpʉlɨka ɨlimenyu ʉkʉhʉma mu ndomo gwa mwene. 15Itso tsyoni itsʉ ʉtsiweene nʉ kʉpʉlɨka, jʉvukʉtsitsovaga kʉ vaanu vooni, ʉlwakʉva jʉwiiva mwoleletsi va mwene. 16Lɨno, vupʉlɨkɨli? Ɨma! Wootsiwe, ʉvalatsiwe kʉ mbiivi tsyako, ʉdoovage ʉvʉsyɨkɨlo wa mbiivi tsyako nʉ kʉlɨhʉʉvɨla ɨlitaawa lya Ntwa ʉNgʉlʉve.’
17“Pwʉ ndɨkakilivuka kʉ Yelusalemu. Wʉ ndikɨsaja kwa Ngʉlʉve mu tembile, tsikannyitsila imbonekelo. 18Mu mbonekelo itso, ndɨkambona ʉNtwa ʉYɨɨsʉ, akambʉʉla akata, ‘Waangʉpe, ʉhege ngʼaningʼaani mu Yelusalemu, manya ʉwooleletsi waako pa kulongwi jyango, avaanu va vʉtsenge ʉvʉ navakawɨɨdɨke.’ 19Ndɨkamwanda ndɨkata, ‘Gwe Ntwa, naveene valʉmanyile vʉnonu ʉkʉta ndyalʉtaga mu masinagogi, ndɨlɨkʉvakʉnga mu kɨkʉngwa avikʉkwɨdɨka, nʉ kʉvatova! 20Ikange, ʉnsɨkɨ ʉgwʉ avaanu vaagʉduudile ʉnkisa gwa mwoleletsi vaako ʉSitefano, najyʉne ndyɨɨmile baaho pawiipi, ndɨkava ndikwɨdɨka ʉkʉta vamʼbude. Amakoti ga vaanu ʉwʉ vaamʼbudile ʉSitefano, neene ndɨ ndyaloleelaga.’ 21Apo ʉNtwa akannyanda akata, ‘Lʉtaga, manya jʉndikʉkʉsuungʼa ʉbɨhage kʉvʉtale, kʉ vaanu avatava Vayahudi.’ ”
ɄPaulo ikɨtsova ʉkʉta namwene iNdooma
22Avaanu vakampʉlɨhɨtsa ʉPaulo mu mamenyu ago gooni. Lɨno kʉ vʉmalɨlo, wʉ amalile ʉkʉtsova ago, vakooveela siitso vakata, “Ʉmuunu ʉjʉ ajatsiwe mu kɨlʉnga ʉmʉ! Napanogiili atsige mwʉmi!” 23Vakagendelela ʉkwoveela siitso, valɨkʉlyʉtsa amakoti ga veene kʉkyanya nʉ kʉtutuululila ʉlʉsumbe kwa Paulo. 24Pwʉ ʉmbaha va vasikali akavalagɨla avasikali va mwene vamwingitse ʉPaulo mu libooma lya vasikali. Akalagɨla ʉkʉta vantove ni sikoti, kʉnʉ vikʉmbʉʉtsa pakʉta valʉmanye kɨɨnu kɨki kɨvapelye avaanu valya vamwoveelelage ʉmwene ʉPaulo. 25Wʉ avasikali avo vikʉnkʉnga ʉPaulo pakʉta vantove ni sikoti, ʉPaulo akambʉʉtsa ʉmbaha va veene ʉvɨ ɨɨmile apo akata, “Ndeeti, mutavʉlɨlwa ni ndagɨlo ʉkʉntova ni sikoti ʉmuunu ʉNdooma, ʉvɨ nahɨgilwi ʉkʉkongana ni ndagɨlo ʉkʉta atulile ɨnongwa ninie?”
26Ʉmbaha ʉjwa wʉ apʉliike ɨlyo, akalʉta akambʉʉla ʉjoojolo va mwene akata, “Vunogwa ʉkʉvomba kɨki? Ʉmuunu ʉjwa iNdooma!” 27Pwʉ ʉjoojolo ʉjwa akiitsa kwa Paulo, akambʉʉtsa akata, “Imbʉʉle, ndeeti, ʉve lweli ʉlɨ Ndooma?” ɄPaulo akaanda akata, “Eena! Ʉne ndɨlɨ Ndooma.” 28Ʉjoojolo ʉjwa akata, “Ʉne ndyagʉlile ʉwenekɨlʉnga wa kʉva iNdooma kʉ nzɨla jya kʉhomba indalama nyongosu siitso.” ɄPaulo akamwanda akata, “Nawʉ jɨlɨwo kwane, ʉne ndɨlɨ Ndooma va vʉholwa.”
29Ʉnsɨkɨ gʉʉgwa avasikali valya ʉwʉ vaasaagaga ʉkʉmbʉʉtsa ʉPaulo vakɨlekelwa. Ʉjoojolo va veene ʉjwa namwene akadwada wʉ alʉmanyile ʉkʉta ʉPaulo iNdooma, ikange ankʉngile nɨ minyololo.
Avavaha va kɨvʉmbʉkʉ kya Vaisilahɨli vikɨgava pavɨlɨ
30Wʉ kʉkie, ʉmbaha va vasikali ʉjwa akanogwa ʉkʉlʉmanya ɨkɨvapelye aVayahudi avo vammɨgage ʉPaulo. Akambopola, akalagɨla valʉndamane avavaha va vateeketsi paninie nʉ lʉlʉndamano lwoni lwa vavaha va kɨvʉmbʉkʉ kyoni kya Vaisilahɨli. Pwʉ akammegeletsa ʉPaulo, akamwɨmya pavʉlongolo pa veene.
S'ha seleccionat:
Mbombo tsa Vapositili 22: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.