Yohana 10
10
ɄYɨɨsʉ vɨ Nʼdɨɨmi ʉNnonu va ngʼolo
1ɄYɨɨsʉ akagendelela ʉkʉtsova akata, “Jɨlweli ndikʉvavʉʉla ndiita, ʉmuunu ʉvaveetsaga ʉvɨ nikwingilila pa ndyango gwa lipaalo lya ngʼolo, apeene ikwingilila apoonu apange, ʉjwa indyasi ikange nyambuda. 2Lɨno ʉmuunu ʉvɨ ikwingilila pa ndyango gwa lipaalo, ʉjwa nʼdɨɨmi va ngʼolo. 3Ʉndoleeli va lipaalo lya ngʼolo ikʉnʼdɨndʉlɨla ʉndyango ʉnʼdɨɨmi va ngʼolo ʉjwa. Ʉnʼdɨɨmi ʉjwa wʉ ikʉtsyɨlanga ingʼolo, itsyene tsipʉlɨka ɨlimenyu lya mwene. Wʉ ikʉtsihʉmya kʉnzi, ʉnʼdɨɨmi ikʉjyɨlanga ɨngʼolo mamato mamato ɨlitaawa lya jyene.#10:3 Ʉnʼdɨɨmi ikʉjyɨlanga ɨngʼolo mamato mamato ɨlitaawa lya jyene Avadɨɨmi va ngʼolo va nsɨkɨ ʉgwa, wʉ gʉsiike ʉnsɨkɨ gwa kʉmihe, vaalʉndamaniaga ingʼolo nʉ kʉdɨndɨla mu lipaalo lipamato nʉ kʉvɨɨka avaloleeli ʉwʉ vaaloleelaga ɨkɨlo jyoni. Wʉ kʉkie, avadɨɨmi valya vaasikaga pa ndyango nʉ kwɨlanga ingʼolo tsa veene manya ɨngʼolo nɨ ngʼolo jyammanyile ʉnʼdɨɨmi va jyene. 4Wʉ amalile ʉkʉtsihʉmya kʉnzi, ilongola kʉvʉlongolo, itsyene tsikʉnkongaga ʉlwakʉva tsilɨmanyile ɨlimenyu lya mwene. 5Ingʼolo natsiweesi ʉkʉnkonga ʉmuunu ʉmmenza, apeene tsikʉnkɨmbɨla ʉlwakʉva natsilɨmanyili ɨlimenyu lya mwene.” 6ɄYɨɨsʉ aavavʉʉlile aVafalisayo ɨkɨhwananitso ɨkɨ, lɨno aveene pange valʉmanye ɨkyʉ aavavʉʉlaga.
7Pwʉ ʉYɨɨsʉ akatsova akata, “Jɨlweli ndikʉvavʉʉla ʉkʉta, ʉne ndɨlɨ ndʉ ndyango ʉgwa ʉgwʉ ingʼolo tsikwingilila mu lipaalo. 8Avaanu vooni ʉwʉ vaalongwe paane ʉkʉva vadɨɨmi va ngʼolo vaale valyasi ikange vanyambuda, napeene ingʼolo natsyavapʉlɨkage.#10:8 ɄYɨɨsʉ apa aavatsovaga avalongotsi vooni, ʉwʉ navaavɨɨkɨle ʉntɨma gwa kʉvapoka avaanu va Ngʉlʉve mu vʉpala. Apeene vaavavombelaga imbiivi, nʉ kwɨlondela isiinu sya vʉkavi kʉ lʉvʉmbʉlɨlo lwa veene. 9Ʉne ndɨlɨ ndʉ ndyango ʉgwa. Ʉmuunu ʉvaveetsaga ʉvɨ ikwingilila mu lipaalo ʉkʉgendela kwane alapokwa, ikange iiva nʉ vʉtavʉlɨlwa wa kwingila nʉ kʉhʉma, ʉkʉbɨha kʉ lʉhamba. 10Ʉndyasi ikwitsa kʉ vʉsumbe wa mwene wa kʉhɨɨtsa, ʉkʉbuda nʉ kʉvejanga. Lɨno ʉne nditsile pakʉta vave nʉ wʉʉmi ʉvʉnavʉkeepa kɨɨnu.
11“Ʉne ndɨlɨ Nʼdɨɨmi Nnonu va ngʼolo. Ʉnʼdɨɨmi ʉnnonu ikɨhʉmya ʉwʉʉmi wa mwene pakʉta ingʼolo tsa mwene tsileke ʉkʉlɨɨwa. 12Ʉnʼdɨɨmi ʉnʼgongolwa ʉvɨ ingʼolo natsa mwene, ɨngave ikʉjɨvona ɨngʼekeeva jikwitsa, ikɨmbɨla nʉ kʉtsileka ingʼolo tsyene. Pwʉ ɨngʼekeeva jikwibata ingʼolo ninie, ni tsinge tsihamba. 13Ʉnʼdɨɨmi ʉnʼgongolwa ikɨmbɨla ʉlwakʉva nivɨɨkɨla ʉntɨma ingʼolo itso. 14Ʉne ndɨlɨ Nʼdɨɨmi Nnonu. Ndɨtsimanyile vʉnonu ingʼolo tsyango, natsyene tsimmanyile ʉne, 15ndʉwʉ ʉDaada ammanyile ʉne, najyʉne ndɨmmanyile ʉmwene. Ʉne ndikɨhʉmya ʉwʉʉmi wango, pakʉta ingʼolo tsyango tsileke ʉkʉlɨɨwa. 16Ʉne ndɨlɨ ni ngʼolo itsinge itsʉ nimuli mu lipaalo ɨlɨ, natsyene ndilondiwa ndɨtsilongotsaage. Ingʼolo itso natsyene tsipipʉlɨkaga ɨlimenyu lyango. Kʉ nzɨla ɨjyo, kuveetsaga ɨkɨpʉga kɨpamato, nʉ nʼdɨɨmi mpamato.
17“ɄDaada anganile ʉne ʉlwakʉva ndikɨhʉmya ʉwʉʉmi wango, pakʉta ndɨvʉkave ikange. 18Nakʉli ʉmuunu ʉvɨ iweesa ʉkʉmbuda ʉne ndɨngave ʉne nandɨntawiili. Ʉne jyʉne neene ndɨlamwe ʉkʉta ndɨbudwe. Ʉne ndɨlɨ nʉ vʉtavʉlɨlwa wa kʉta ndɨbudwe, ikange ndɨlɨ nʉ vʉtavʉlɨlwa wa kʉva mwʉmi ikange. ɄDaada jyʉmwene vɨ aandagye ʉkʉvomba ndavʉle.” 19Wʉ vapʉliike amamenyu ago, aVayahudi vakalekengʼana kɨmasaago. 20Vongosu vakatsova vakata, “Ʉjʉ alɨ nɨ mepo ɨmbiivi ɨjyʉ jɨmbɨɨkile ave nʉ lʉkwale. Kʉlɨ lʉvʉmbʉlɨlo lʉki ʉkʉmpʉlɨhɨtsa ʉmuunu ʉjʉ?” 21Lɨno avange vakakaanika vakata, “Amamenyu ago nagiweesi ʉkʉhʉma mu muunu ʉnya mepo ɨmbiivi. Ndeeti, ɨmepo ɨmbiivi jiweesa ʉkʉmbɨɨka ʉmʼbosu alolage?”
Avaanu vongosu vikʉmʼbeela ʉYɨɨsʉ
22-23Wʉ gʉsiike ʉnsɨkɨ gwa kyaka kya Vayahudi kya kʉkʉmbʉka ʉkwɨmɨka ɨtembile ʉkʉ kʉ Yelusalemu, ʉYɨɨsʉ aale mu tembile, aagendaga mu lyeve ɨlyʉ ɨlitaawa lya lyene vaateetsaga Lyeve lya Solomoni. Ʉnsɨkɨ ʉgwa gwale nsɨkɨ gwa ngʼaala. 24AVayahudi vaninie vakantsʉngʉtɨla ʉYɨɨsʉ, vakambʉʉtsa vakata, “Gwe! Vukʉtʉgatatsaaga mu numbula tsiitu ʉkʉsikila ndali? Ɨngave ʉve veeve Mesiya, tʉvʉʉle pavʉvalasu.” 25Ʉmwene ʉYɨɨsʉ akavaanda akata, “Ʉne ndɨvavʉʉlile ʉkʉta neene veeni, lɨno ʉnyie mubeela ʉkʉnnyɨdɨka. Imbombo itsʉ ndivomba, kʉ maka ga Daada, tsʉ tsyene tsivonia ʉkʉta ʉne neene veeni. 26Lɨno mubeela ʉkʉnnyɨdɨka ʉlwakʉva namulɨ va mu kɨpʉga kya ngʼolo tsyango. 27Lola, ingʼolo tsyango tsipʉlɨka ɨlimenyu lyango nʉʉne ndɨtsimanyile vʉnonu, ni tsyene tsikʉngʼonga. 28Ʉne ndikʉtsipa ʉwʉʉmi wa sikutsooni, natsiliitse tsijage lʉsiku. Ikange nakʉli ʉmuunu ʉnya kʉpoka ʉkʉhʉma mu sivoko syango. 29ɄDaada ʉvɨ amye itso tsyoni vɨ ndʉti kʉ syoni. Pwʉ nakʉli ʉmuunu ʉvɨ iweesa ʉkʉpoka mu sivoko sya mwene. 30Ʉne nʉ Daada tʉlɨ kɨɨnu kɨpamato.”
31Pwʉ aVayahudi avange wʉ vapʉliike ago, vakatengʉla ʉkʉhola amaganga ikange, pakʉta vantike nʉ kʉmʼbuda ʉYɨɨsʉ. 32Ʉmwene ʉYɨɨsʉ akavavʉʉla akata, “Ndɨvavoniitse isimanyilo syongosu isinonu isyʉ ndɨvombile kʉ maka ga Daada. Lɨno kyʉ kɨlɨku ɨkɨmanyilo ɨkyʉ kikʉvapelela ʉnyie ʉkʉnogwa ʉkʉnnika na maganga?” 33AVayahudi vakaanda vakata, “Natunogwa ʉkʉkʉtika na maganga kʉ nongwa jya kʉvomba isidego isinonu, apeene ʉlwakʉva vukʉnʼdʉka ʉNgʉlʉve. Ʉve vukɨtsova ʉkʉta ʉlɨ Ngʉlʉve, wʉ ʉlɨ muunu vʉvʉle nda vaanu avange!”
34ɄYɨɨsʉ akavaanda akata, “Ndeeti, najɨvɨgilwi mu sitabu siinyo sya ndagɨlo ʉkʉta ʉNgʉlʉve aatye, ‘Ʉnyie mulɨ vangʉlʉve?’#Zabuli 82:6 35Tsivɨgilwe mu Vʉvɨge ʉVʉvalatse ʉkʉta avaanu ʉwʉ vʉʉpɨlye ɨlimenyu lya Ngʉlʉve, ʉNgʉlʉve aatye avo vangʉlʉve. Nʉʉwe tʉlʉmanyile ʉkʉta ʉgwʉ gaavɨgilwe mu Vʉvɨge ʉVʉvalatse ga lweli isigono syoni. 36Pwʉ lɨno, kɨki mwita ʉne ndikʉnʼdʉka ʉNgʉlʉve, wʉ ndiita, ‘Ʉne ndɨlɨ Mwana va Ngʉlʉve,’ wʉ ʉne neene ndɨ ʉDaada jyʉmwene annyalile nʉ kʉnsuungʼa mu kɨlʉnga? 37Ɨngave nandivomba imbombo tsa Daada itsʉ ivomba, pwʉ muleke ʉkʉnnyɨdɨka. 38Lɨno ɨngave ndivomba imbombo itsʉ ʉDaada ivomba, nʉpwʉ jɨngave namukʉgɨɨdɨka ʉgwʉ nditsova, pwʉ mwɨdɨkage imbombo itso. Kʉ nzɨla ɨjyo, pwʉ jʉmukʉlʉmanya ʉkʉta ʉDaada alɨ mwane, nʉʉne ndɨlɨ mwa Daada.” 39Pwʉ aVayahudi avo wʉ vapʉliike ago, vakalonda ʉkʉmwibata ikange, ʉmwene ʉYɨɨsʉ akanyemeelʉka, akajaganika.
40Kʉmbele ʉYɨɨsʉ akalʉta ikange ɨmwambo jya lʉgasi lwa Yolodani, akatsisika ʉpwʉ ʉYohana ootsehetsaaga avaanu pa vʉtengʉlɨlo, akataama ʉkʉ kʉ nsɨkɨ. 41ɄYɨɨsʉ wʉ alɨ ʉkʉ, avaanu vongosu vakankonga, kʉnʉ vɨkɨtsosanza viita, “ɄYohana naavombe ɨkɨmanyilo nɨkɨpamato, napeene ikulongwi tsyoni tsa Yɨɨsʉ itsʉ aatsovaga tsyale tsa jɨlweli.” 42Pwʉ avaanu vongosu avaalepwo palya vakamwɨdɨka ʉYɨɨsʉ.
S'ha seleccionat:
Yohana 10: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.