Luuka 20
20
ɄYɨɨsʉ ivʉʉtsiwa ʉkwʉ wihʉma ʉvʉtavʉlɨlwa wa mwene
(Mataayo 21:23-27; Maliko 11:27-33)
1Ɨkɨgono kɨpamato, ʉYɨɨsʉ wʉ imanyiisa avaanu mu lʉvɨgo lwa tembile, nʉ kʉvavʉʉla ɨLivangɨli, avavaha va vateeketsi, avamanyisi va ndagɨlo, na vanzagɨla va Vayahudi vakamʼbɨhɨla. 2Vakambʉʉtsa vakata, “Tʉvʉʉle, vuvomba aga kʉ vʉtavʉlɨlwa waani?#20:2 Vuvomba aga kʉ vʉtavʉlɨlwa waani Vaambʉʉtsiitse ɨlɨ ʉkʉkongana ni mbombo itsʉ ʉYɨɨsʉ aavombaga ndi tsa kwingila mu Yelusalemu nɨ kɨluulu, ʉkʉswɨma avaanu mu tembile avaagʉtsaaga isiinu, ʉkʉmanyiisa avaanu na gange mongosu. Veeni ʉvɨ akʉpye ʉvʉtavʉlɨlwa ʉvʉ?”
3Akavaanda akata, “Najyʉne ndikʉvavʉʉtsa ɨkɨɨnu kɨpamato. Munnyande, 4ʉvʉtavʉlɨlwa wa Yohana wa kwotsa avaanu, waahʉmile ndaku? Waahʉmile kʉkyanya evo kʉ vaanu?” 5Apo, vakatengʉla ʉkwɨtsosanza vaveene vakata, “Tʉngate, ‘Waahʉmile kʉkyanya,’ jiikʉtʉvʉʉtsa iita, ‘Pwʉ kɨki namwamwɨdɨke?’ 6Tʉngate waahʉmile kʉ vaanu, avaanu vooni ava, jʉvikʉtʉtika na maganga, ʉlwakʉva vikwɨdɨka ʉkʉta ʉYohana ʉMwotsi aale nyamalago.” 7Pwʉ vakamwanda vakata, “Natʉlʉmanyili ʉvʉtavʉlɨlwa ʉwa ʉkwʉ waahʉmile.” 8ɄYɨɨsʉ akavavʉʉla akata, “Najyʉne, nandikʉvavʉʉli ʉvɨ amye ʉvʉtavʉlɨlwa wa kʉvomba aga.”
Ɨkɨhwananitso kya vʉjagi wa Vaisilahɨli pamiiho ga Ngʉlʉve
(Mataayo 21:33-46; Maliko 12:1-12)
9Pwʉ ʉYɨɨsʉ akatengʉla ʉkʉvavʉʉla avaanu ɨkɨhwananitso ɨkɨ, akata, “Aalepwo ʉmuunu mpamato ʉvɨ aalɨmile ɨkɨlɨmɨla kya mwene, nʉ kʉvyala ɨmizabibu. Kʉ vʉmalɨlo, akagongoletsa ɨkɨlɨmɨla ɨkyo kʉ valɨmi, akaheganitsa akalʉta kʉ kɨlʉnga kya kʉvʉtale. Ʉkʉ akatsitaama isigono syongosu.
10“Ʉnsɨkɨ gwa kʉtʉngʉla izabibu wʉ gʉsiike, akansuungʼa ʉmbombi va mwene kʉ vaanu valya, pakʉta vampe izabibu tsa kɨtʉmba kya mwene. Ʉmbombi ʉlya wʉ asiike, avalɨmi valya vakantova nʉ kʉnswɨma, akakilivuka isivoko syene.
11“Ʉmwenekɨlɨmɨla, akansuungʼa ʉmbombi ʉjyʉnge. Namwene vakantova nʉ kʉmbombela itsa soni, kʉmbele vakanswɨma kɨtsila kʉmpa kɨɨnu. 12Akansuungʼa ʉva daatu. Ʉjwa namwene vakantova, vakandematsa, vakantaaga kʉnzi kʉ kɨlɨmɨla.#20:12 Kʉnzi kʉ kɨlɨmɨla Ʉlole ɨpitsa jya kɨlɨmɨla kya mizabibu mu kɨtabu kya Maliko 12:1.
13“Kʉmbele, ʉmwenekɨlɨmɨla akata, ‘Lɨno ndɨgahe ndeeti? Ʉnsɨkɨ ʉgʉ, ndikʉnsuungʼa ʉnswambango ʉnʼgane! Ndisaaga, vikamwɨmɨke ʉnswambango.’ 14Ʉmwana va mwene ʉnʼdɨɨmi akahega ʉkʉlʉta kʉ valɨmi valya. Wʉ avalɨmi valya vikʉmbona, vakava vivʉʉlana viita, ‘Ʉjʉ vɨ mwenevʉhaale va kɨlɨmɨla ɨkɨ. Lɨno tʉbude, pakʉta ʉvʉhaale wa mwene vʉve wiitu.’ 15Vakankwegela kʉnzi kʉ kɨlɨmɨla, vakabuda.”
Pwʉ ʉYɨɨsʉ akavavʉʉtsa, “Lɨno ʉmwenekɨlɨmɨla ʉlya jiikʉvagaha ndeeti avalɨmi valya? 16Jiikwitsa nʉ kʉbuda avalɨmi valya, nɨ kɨlɨmɨla ɨkyo jiikʉvapa avalɨmi avange!” Avaanu wʉ vapʉliike amamenyu ago, vakata, “Ago galeke ʉkʉhʉmɨla lʉsiku!” 17ɄYɨɨsʉ akavalola, akavavʉʉtsa akata, “Lɨno ʉvʉvɨge ʉvʉ, kwʉ kʉta kɨki?
‘Ɨliganga ɨlyʉ avatsenganyumba vaalɨbeelile,#20:17 Ɨliganga ɨlyʉ avatsenganyumba vaalɨbeelile ɄYɨɨsʉ apa aatoolile amamenyu aga ʉkʉhʉma mu Lwɨdɨngʼano ʉLʉlaala pa kwɨtsova jyʉmwene.
ɨlyo lyʉ lɨvye liganga ɨlivaha lya kwibata ɨnyumba
pa nguto jya waalo wa jyene.’#Zabuli 118:22
18“Ʉmuunu ʉvaveetsaga angagwe pa liganga ɨlyo, ideenyengʼana, ikange ʉmuunu ʉvaveetsaga ʉvɨ likʉnʼgwɨla, likʉntikinyulania.”
19Avamanyisi va ndagɨlo na vavaha va vateeketsi wʉ vapʉliike amamenyu ago, vakalʉmanya ʉkʉta ɨkɨhwananitso kɨlya kyavatsovaga aveene. Pwʉ vakanogwa ʉkʉmwibata, napeene vakadwada ɨlipʉga lya vaanu avaale palya.
Ʉwɨɨdɨhɨtsi kwa Ngʉlʉve evo kwa Kaisali
(Mataayo 22:15-22; Maliko 12:13-17)
20Pwʉ avavaha va Vayahudi, vakava vikʉnʼgokela ʉYɨɨsʉ. Vakavasuungʼa avatandɨɨli, ʉwʉ vɨɨvɨɨkile ʉta vaanu vanonu, vatandɨɨle ʉgwʉ itsova ʉYɨɨsʉ. Vaavombile ɨlyo pakʉta vavʉvone ʉwɨɨmɨlo ʉwihʉma mu mamenyu ʉgwʉ atsovile ʉYɨɨsʉ, pwʉ vamwibate nʉ kʉmmɨlɨka kʉ nkʉlʉdeeva akahɨgwe.
21Pwʉ avatandɨɨli valya vakambʉʉtsa ʉYɨɨsʉ vakata, “Mmanyisi, tʉlʉmanyile ʉkʉta witsova nʉ kʉmanyiisa itsa lweli. Ikange navudwada ʉwɨɨmɨkiwa wa muunu, apeene vumanyiisa ʉwajɨlweli kʉ vaanu ʉkʉkonga ndʉwʉ inogwa ʉNgʉlʉve. 22Ndeeti, indagɨlo tsiitu tsikʉtʉtavʉla ʉkʉsonga ɨsongo kwa Kaisali?”
23ɄYɨɨsʉ akavʉmanya ʉvʉgelʉngʼania wa veene, akavavʉʉla akata, 24“Mumbonie ɨhela jya dinali.” Wʉ ajɨweene, akavavʉʉtsa akata, “Ɨkɨhwani ɨkɨ nɨ litaawa ɨlɨ, syani?” Vakaanda vakata, “Sya Kaisali.” 25Pwʉ ʉYɨɨsʉ akavavʉʉla akata, “Lɨno, isya Kaisali, mumpeetsage ʉKaisali, ni sya Ngʉlʉve, mumpeetsage ʉNgʉlʉve.”
26Avaanu valya vakadega siitso ɨnyamulile jya Yɨɨsʉ. Vakatsiga mye. Vakalemwa ʉwɨɨmɨlo wa kʉmwibatɨla, ʉwihʉma mu mamenyu agatsovilwe nʉ Yɨɨsʉ pavʉlongolo pa vaanu.
Ʉkʉtsʉʉka avaswe
(Mataayo 22:23-33; Maliko 12:18-27)
27Kʉmbele, aVasadukayo vaninie vakalʉta kwa Yɨɨsʉ. AVasadukayo vaanu ʉwʉ vaamanyiisaaga ʉkʉta ʉNgʉlʉve nalatsʉʉse avaanu ʉkʉhʉma kʉ vʉswe. Avo vakambʉʉtsa ʉYɨɨsʉ vakata, 28“Gwe Mmanyisi, ʉMoose aatʉvɨgye ʉlʉlagɨlo ʉkʉta, angave ʉmuunu iiswa, nʉ kʉndeka ʉnʼdala va mwene kɨtsila mwana, pannogye ʉlʉkololwe ahaale ʉnswɨle ʉlya, pakʉta oolose ʉlʉjungu lwa lʉkololwe ʉvaasue.#20:28 Oolose ʉlʉjungu kwʉ kʉta ammolele avaana ʉvajagile pakʉta nalyene ɨlitaawa lyʉla ʉvajagile lɨleke ʉkʉjaga. AVayahudi vaateetsaga ʉmuunu angaswe, nakaave ajagile lwoni, ɨngave pwʉvale avaana va mwene ʉwavalekile. #Simiilitso tsa Ndagɨlo 25:5-6 29Lɨno, vaalepwo avanamuunu lekelakʉpamato (7). Ʉntatsi akategʉla ʉnʼdala, akaswa kɨtsila kʉhola ʉmwana. 30Ʉva vɨɨlɨ, akahaala ʉnswɨle ʉlya, namwene akaswa kɨtsila kʉhola ʉmwana. #20:30 Akahaala ʉnswɨle ʉlya, namwene akaswa kɨtsila kʉhola ʉmwana Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga. 31Kʉmbele, ʉva daatu, namwene akahaala, akaswa. Tsikahʉmɨla ewo kʉ vooni lekelakʉpamato. Avaana va muunu mpamato vooni ava vaategwe ʉnʼdala ʉlya, vooni vaasue kɨtsila kʉhola ʉmwana. 32Kʉmbele, namwene ʉnʼdala ʉlya akaswa. 33Pwʉ ʉtʉvʉʉle, pa kɨgono kɨlya ɨkyʉ avaswe vooni valatsʉʉka, ʉnʼdala ʉnswɨle ʉjwa alaava nʼdala vaani? Tuvʉʉtsa ewo ʉlwakʉva aatoolilwe na vagoosi vooni lekelakʉpamato!”
34ɄYɨɨsʉ akavavʉʉla akata, “Avaanu va lɨno, vitegʉla nʉ kʉtegʉlwa. 35Avaanu ʉwʉ ʉNgʉlʉve ikʉvavona ʉkʉta vanogye ʉkʉtsʉʉswa ʉkʉhʉma kʉ vaswe nʉ kʉtaama mu kɨlʉnga ɨkɨpya, ʉkwa avo navalategʉlage pange kʉtegʉlwa. 36Paninie naago navalaaswe ikange, manya valaava nda vasuungʼwa. Valaava vaana va Ngʉlʉve, ʉlwakʉva valatsʉʉsiwa ʉkʉhʉma kʉ vaswe.
37“Najyʉ Moose aatsovile ʉkʉta avaswe valatsʉʉka.#20:37 Avaswe valatsʉʉka AVasadukayo vɨɨdɨkaga ʉkʉta ʉMoose aale nʉ vʉtavʉlɨlwa ʉkʉhʉma kwa Ngʉlʉve wa kʉvalongotsa aVaisilahɨli vooni. Ɨlɨ lyʉ lɨpelile ʉYɨɨsʉ avakʉmbʉhɨtse aVasadukayo ʉmwʉ ʉMoose aatsovile ikulongwi tsa kʉtsʉʉka avaswe. Ikulongwi tsa Vasadukayo nʉ lwɨdɨko lwa veene, ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. Aatsovile ɨlyo mu Vʉvɨge ʉVʉvalatse palya ʉpwʉ kyaviikaga ɨkɨtsaga. Aatsovile akata, ʉNtwa ʉNgʉlʉve, ‘vɨ Ngʉlʉve va Abulahamu, va Isaka nʉ Yakobo.’#Kʉhʉma 3:6 38ɄNgʉlʉve nikwɨlanga avaswe pakʉta vɨsajage kʉ mwene nʉ kʉmbombela, apeene avaanu avatsiige vʉʉmi.#20:38 Avaanu avatsiige vʉʉmi Mu mamenyu aga ʉYɨɨsʉ aavavʉʉlaga avaanu ʉkʉta, kwa Ngʉlʉve, avaswe vapitsiige vʉʉmi. Kwʉ kʉta kʉ mwene avaanu vooni vʉʉmi.”
39Apo, avamanyisi avange va ndagɨlo vakata, “Mmanyisi, ʉtsovile vʉnonu!” 40Ʉkʉhʉma ʉnsɨkɨ ʉgwa naavepwo ʉmuunu ʉvɨ aagetsiitse ʉkʉmbʉʉtsa ʉYɨɨsʉ ɨlimenyu ɨlɨveetsaga.
ɄKɨlɨsiti vɨ Mwana va Davʉdi ikange vɨ Ntwa va vooni
(Mataayo 22:41-46; Maliko 12:35-37)
41ɄYɨɨsʉ akavavʉʉtsa akata, “Oogo, jɨvye ndeeti avaanu viita, ʉKɨlɨsiti Mwana va nkʉlʉdeeva ʉDavʉdi? 42Lola, ʉDavʉdi jyʉmwene, aavɨgile mu kɨtabu kya Zabuli akata,
‘ɄNtwa ʉNgʉlʉve aambʉʉlile ʉNtwa vango akata,
“Ʉtaame kʉ kɨvoko kyango ɨkya kʉndyo,#20:42 Ʉtaame kʉ kɨvoko kyango ɨkya kʉndyo Ɨkɨtsovo ɨkɨ kwʉ kʉta ʉlongotsaage paninie nʉʉne.
43ʉkʉsikila ʉnsɨkɨ ʉpwʉ ndikʉvalesa avalʉgʉ vaako,#20:43 Ʉkʉsikila ʉnsɨkɨ ʉpwʉ ndikʉvalesa avalʉgʉ vaako Kʉ Kɨyunaani viita Ʉkʉsikila ndikʉvavɨɨka avalʉgʉ vaako paasi pa silʉnde syako.
nʉ kʉvalongotsa lwoni.” ’#Zabuli 110:1 ”
44ɄYɨɨsʉ akoongeletsa ʉkʉtsova akata, “Ɨngave ʉDavʉdi jyʉmwene ikʉmwɨlanga ʉKɨlɨsiti ʉkʉta Ntwa, jiiva ndeeti akilivuke ikange ave mwana va Davʉdi?”#20:44 Mu mamenyu aga, ʉYɨɨsʉ nibeela ʉkʉta ʉmwene ihʉma mu lʉjungu lwa Davʉdi. Apeene ʉmwene ivonia ʉkʉta paninie nʉ kʉva va lʉjungu lwa Davʉdi, ʉmwene vɨ Ntwa va vaanu vooni ʉkʉhanza najyʉ Davʉdi.
ɄYɨɨsʉ ibeetsa ʉkwɨga ʉlwiho lwa vamanyisi va ndagɨlo
(Mataayo 23:1-36; Maliko 12:38-40; Luuka 11:37-54)
45Avaanu vooni wʉ vikʉmpʉlɨhɨtsa ʉYɨɨsʉ, ʉmwene akavavʉʉla avakongi va mwene akata, 46“Muveetsage miiho na vamanyisi va ndagɨlo, avinogwa ʉkʉgenda mu vʉtsenge vaswalile ikanzo, pakʉta avaanu vavasaamusaage kʉ wɨɨmɨkiwa. Ikange wʉ valɨ mu lisinagogi, vinogwa ʉkʉtaama pa sitaamilo sya kʉvʉlongolo. Ikange wʉ avaanu valʉndamiine pa lʉhekelo, vinogwa ʉkʉtaama mu sitaamilo sya vɨɨmɨkiwa. 47Avaanu ava vipoka isiinu sya vadala avaswɨle! Na pa kwɨvɨɨka vɨɨdɨki va Ngʉlʉve, vikɨsaja inyɨsajo inale, pakʉta avaanu vateetsage vagolosu. Avaanu ava pa kɨgono kya vʉhɨgi valavʉngwa siitso!”
S'ha seleccionat:
Luuka 20: zga
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2019, Wycliffe Bible Translators, Inc. All rights reserved.