लूका 8
8
येशूए सेवा लबै च्हमिरिमैं
1च लिउँइँ येशू सहर-सहर, नाँस-नाँसर स्युरसि परमेश्वरए ग्याल्सर्बै सैं तोंबै ताँ बिप्रइ। खीने बालु च्युसे ङ्हिं चेलामैं या मुँल। 2अरू ल्हें च्हमिरिमैं या खीने बालु मुँल। च च्हमिरिमैं मोंइ स्यासि सब्मैं नेरो अरू नब् छबउँइँले सब्मैं मुँल। चमैं न्होंरि मरियम बिबै मग्दालाथेंस्यो मुँल। चउँइँले येशूजी मों ङिउँलो ल्हाल। 3चमैं न्होंरि योअन्ना बिबै च्हमिरि घ्रि मुँल। च खुजास बिबै म्हिए प्ह्रेंस्यो मुँल। च खुजास हेरोद म्रुँए दरबारर चिबै के लमल। झाइले अर्को सुसन्ना बिबै च्हमिरि मुँल। चमैं नेरो अरू ल्हें च्हमिरिमैंज्यै या ह्रोंसए मुइ खर्ज लसि खीए सेवा लमल।#मत्ती २७:५५-५६; मर्क १५:४०-४१; लूक २३:४९
प्लु प्लुबै म्हिए अहान्
(मत्ती १३:१-९; मर्कूस ४:१-९)
4नाँस-नाँसउँइँले म्हिए हुल खागु तसि खी ङाँर खइ। झाइले खीजी चमैंने चु अहान् घ्रि बिइ। 5“तिगें म्हि घ्रि प्लु प्लुबर ह्याल। प्लु प्लुमा कोइ प्लु घ्याँर तेइ, कोइ प्लु गेगरर तेइ, कोइ प्लु पुजु मुँबै क्ल्ह्योर तेइ, कोइ प्लु छ्याँबै स मुँबै क्ल्ह्योर तेइ। घ्याँर तेयाबै प्लुमैं म्हिमैंइ प्लेवाइ, नमेमैं खसि चवाइ। 6गेगरर तेयाबै प्लुमैं म्लोखलेया युनन् सियाइ तलेबिस्याँ चर्बै स कारयाल। 7छलेन पुजु मुँबै क्ल्ह्योर तेयाबै प्लु म्लोखलेया पुजुए छ्यारइ च प्लु बडिल् आपिं। 8छ्याँबै सर तेबै प्लु बिस्याँ छेनले म्लोखइ। धै च प्लु थेब् तसि ल्हें रो रोइ।”
च्हौ बिल् खाँसि येशूजी थेबै कैले बिइ, “थेबै न्ह मुँब्मैंइ थेरिगे।”
अहान् झोंबै कारण
(मत्ती १३:१०-१७; मर्कूस ४:१०-१२)
9चेलामैंइ खीजी बिबै ताँ छेनाले आक्होसि चु अहानइ बिल् म्हैब तो जा बिसि येशूने ङ्योएइ।
10येशूजी चमैंने बिइ, “परमेश्वरए ग्याल्सर्बै थेब् थेबै ताँमैं क्होबै ज्ञान क्हेमैंलाइ पिंइमुँ। दिलेया अरूमैंने बिस्याँ ङ अहानउँइँले पोंब्मुँ, तलेबिस्याँ परमेश्वरए छ्वेर प्ह्रिब् धोंले:
‘चमैंइ ङ्ह्योलेया आम्रोंरिगे,
थेलेया आक्होरिगे।’”#यशै ६:९-१०
प्लु प्लुबै अहान् क्होमिंबा
(मत्ती १३:१८-२३; मर्कूस ४:१३-२०)
11येशूजी चमैंने बिइ, “अहानए अर्थ चु ग: प्लु बिब परमेश्वरए ताँ ग। 12घ्याँर तेबै प्लु चुन् ग: परमेश्वरए ताँ थेब्मैंइ आक्वेंरिगे धै चमैं जोगेल् आयोंरिगे बिसि दुष्ट बिबै सै खसि#८:१२ दुष्ट बिबै सै खसि ग्रिक क्युइर दियाबलसए अर्थ स्योर्गु ग। चमैंइ थेबै ताँ ताँन् युनन् म्लेल् लवाम् धै क्वेंल् आपिं। 13झाइले गेगरर तेबै प्लु चुन् ग: खाबइ परमेश्वरए ताँ थेसि सैं तों-तोंइ क्वेंम्। दिलेया चमैंए जरा आत। छतसि चमैंइ तिस्याँदे मत्त्रे च ताँ क्वेंम्, तलेबिस्याँ ह्रोंसए फिर दुःखमैं तमा बिब् धों आतमा चमैंइ पिवाम्। 14छलेन पुजु मुँबै क्ल्ह्योर तेबै प्लु चुन् ग: खाबइ परमेश्वरए ताँ थेमुँ। दिलेया लिउँइँ चु छ्ह खैले थोब् ङ्हे बिसि न्हुँ लमुँ धै सम्पति खैले योंब् ङ्हे बिसि ह्युलर्बै सैमैंर सैं ह्यासि चमैंए बिश्वास म्हयाम्। छतमा चमैं भोंसि आत। 15दिलेया छ्याँबै सर तेबै प्लु चुन् ग: खाबइ परमेश्वरए ताँ थेसि छेनाले खोंर थेंमुँ। धै चए फिर तोइ तखलेया सैदिसि ल्हें रोमैं रोम्।”
बत्तिए बारेर्बै ताँ
(मर्कूस ४:२१-२५)
16येशूजी धबै बिइ, “खाबज्यै बत्ति म्रोसि भाँडोइ आउथें, खाट न्होंरै या आथें। बरु धिं न्होंर खब्मैंइ मि म्रोंरिगे बिसि बत्ति नुबै क्ल्ह्योर थेंम्।#८:१६ चु अहानए मतलब: येशूजी बिबै ताँ लोथेंल् आत।#मत्ती ५:१५; लूक ११:३३ 17तो सै या लोइरि थेंल् आँखाँ, लोथेंइरि आम्रोंबै सै तोइ आरे। छलेन लोथेंबै ताँमैं तो मुँलेया लिउँइँ खन्तोंदोंन् थेनेसि ताँनइ सेम्।#मत्ती १०:२६; लूक १२:२
18“छतसि न्ह क्रों मि क्रों तद्, क्हेमैंइ थेबै ताँ छेन्ले सैंर थेंन्। तलेबिस्याँ ङइ लोमिंबै ताँ छेनाले थेब्मैंइ झन् क्होल् योंब्मुँ, दिलेया ङए ताँ आथेब्मैंइ क्होइ बिसि ह्रब् प्हैंलेया चमैं ङाँइँले प्हेंवाब्मुँ।”#8:18 तलेबिस्याँ...प्हेंवाब्मुँ ग्रिक क्युइरि, तलेबिस्याँ खाबने मुँ चलाइ झन् ल्हें पिंब्मुँ। झाइले खाबने आरे, चने तो मुँ बिसि चइ मैंमुँ, चै या च ङाँइँले प्हेंवाब्मुँ#मत्ती २५:२९; लूक १९:२६
येशूए आमा नेरो अलिमैं
(मत्ती १२:४६-५०; मर्कूस ३:३१-३५)
19तिगें येशूए आमा नेरो अलिमैं येशूने त्होबर खइ। दिलेया म्हि हुलइ लमा चमैंइ येशूने त्होल् आयोंल। 20छतमा म्हि घ्रिइ येशूने बिइ, “क्हिए आमा नेरो अलिमैं क्हिने त्होबै सैं लसि बैरु रारिइमुँ।”
21छबिमा येशूजी चमैंने बिइ, “खाबइ परमेश्वरजी बिबै ताँ थेसि खीजी बिब् धों लमुँ, चमैंन् ङए आमा अलिमैं ग।”
येशूजी थेबै नाँ खैं च्याँ लमिंब
(मत्ती ८:२३-२७; मर्कूस ४:३५-४१)
22तिगें येशू ह्रोंसए चेलामैंने डुँङ्गार क्रेसि “तारे, ङ्यो तालए क्योंजा ह्याले ओ,” बिसि ह्याइ। 23छले ह्यारिमा येशू न्हरु च्हुयाइ। तालर थेबै नाँ खै खसि डुँङ्गार क्यु प्लिंबर होंइ। छतमा चमैं बेल्ले आतिदिइ।
24झाइले चेलामैं येशू ङाँर खसि “ओ गुरु, ङ्योम् क्युर प्ल्हुँसि सिबर होंइ,” बिदै खीलाइ छोरवाइ।
छबिमा येशू रेसि नाँ खैं नेरो क्युए भेल्गा हौदिइ। छले हौदिमा नाँ खैं नेरो क्युए भेल्गा च्याँ तयाइ। 25झाइले येशूजी खीए चेलामैंने बिइ, “क्हेमैंए बिश्वास खनि ह्याइ?”
चमैं ङ्हिंसि प्लेटोयाइ धै खें-खेंमैं न्होंर “चु म्हि खाब् मुँगे? नाँ खैं नेरो क्युए भेल्गालाज्यै या खीजी च्याँ तयाद् बिमा चमैंज्यै या खीजी बिब ङिंब!” बिबर होंइ।
येशूजी मोंइ स्याबै म्हि सल् लमिंब
(मत्ती ८:२८-३४; मर्कूस ५:१-२०)
26येशू नेरो खीए चेलामैं गालीलए क्योंजा गेरासेनस ह्युलर फेखइ। 27झाइले येशू डुँङ्गाउँइँले पखर त्होंमा मोंइ स्याबै नाँसर्बै म्हि घ्रि येशूने त्होइ। च म्हिइ ल्हें ओंसों ओंनोंन् क्वें आखिमल धै धिंरै या आटिमल छगोंजरे टिमल। 28चइ येशू म्रोंबै तोदोंन् चिरदै खीए उँइँर पद्खु तसि थेबै कैले बिइ, “ओ ताँन् भन्दा थेबै परमेश्वरए च्ह येशू, क्हिल ङने तो के मुँ? यो छ्युँ लमुँ, ङलाइ दुःख आपिंन्।”
29तलेबिस्याँ येशूजी च म्हिउँइँले मों त्होंइ ह्याद् बिल। च म्हिलाइ ल्हें खे मोंइ दुःख पिंब्ब्रें लमाल। छतसि चलाइ सँउँलिइ फैसि म्हिमैंइ रुँमल। दिलेया चइ खीलाइ फैथेंबै सँउँलि छ्याँन् छिन् लवामल। धै मोंइ चलाइ क्यु आयोंबै क्ल्ह्योजरे बोयामल।
30येशूजी चने “क्हिए मिं तो जा?” बिसि ङ्योएमा
चइ बिइ, “ङए मिं फौज ग।” तलेबिस्याँ ल्हें मोंमैंइ चलाइ स्याल।
31“ङि सजैं पिंबै ल्हागिर क्रोंर आल्हाद्,” बिसि मोंमैंइ येशूने यो छ्युँ लइ। 32चेंदोर्बै कोंर तिलिए बगाल रेंरिल। धै चमैंइ तिलिमैंए न्होंर होंल् पिंन् बिसि यो छ्युँ लमा येशूजी च मोंमैं ह्याल् पिंइ। 33झाइले मोंमैं च म्हिउँइँले त्होंसि तिलिमैंए न्होंर होंयाइ। छतमा तिलिमैं सोबाल तसि कोंउँइँले मा ङ्युँइर तेयासि सियाइ।
34छ तब् म्रोंसि च तिलि छबै म्हिमैं न्हेयासि च ताँमैं सहर नेरो नाँसजरे बिमिंइ। 35चमैंए ताँ थेसि “तो तगे” बिसि ङ्ह्योबर म्हिमैं येशू ङाँर खमा ओंसों मोंइ स्यासि सोबल् तबै म्हि सैं चिसि क्वें खिसि येशूए प्हले ङाँर टिरिब चमैंइ म्रोंइ। छाब् म्रोंसि चमैं ङ्हिंयाँइ। 36च मोंइ स्याबै म्हि खैले सइ बिसि म्रोंब्मैंइ ङ्ह्योएबर खब्मैंने बिमिंइ। 37छतमा गेरासेनस ह्युलर्बै म्हिमैंइ येशूलाइ खेंमैंए नाँसउँइँले ह्यामिंन् बिसि यो छ्युँ लइ, तलेबिस्याँ चमैं बेल्ले ङ्हिंयाँल। छबिमा येशू डुँङ्गार क्रेसि ह्याबि छेमा।
38मोंइ स्यासि सयाबै च म्हिइ येशूने “ओ प्रभु ङै या क्हिने बालु ह्याल् पिंन् बिसि यो छ्युँ लबर होंइ।”
दिलेया येशूजी चने बिइ, 39“क्हि ह्रोंसए धिंर एह्याद्, धै परमेश्वरजी क्हिए ल्हागिर लमिंबै च्हौ थबै के अरूमैंने बिद्।”
छबिमा च म्हि ह्यासि येशूजी खीए ल्हागिर लमिंबै थेबै के ताँन् नाँसजरे बिबर होंइ।
याइरसए च्हमि नेरो को त्हबै च्हमिरि
(मत्ती ९:१८-२६; मर्कूस ५:२१-४३)
40येशू ताल क्योंजउँइँले एखमा म्हि हुलइ खीलाइ बेल्ले मान लइ, तलेबिस्याँ चमैं ताँनइ येशू खोंयों खब् ङ्हे बिसि ह्रेरिल। 41च त्हेर्न च्हों धिंर्बै याइरस बिबै चिब घ्रि येशू ङाँर खसि प्हले फ्योसि चए धिंर खमिंन् बिसि खीने यो छ्युँ लइ। 42तलेबिस्याँ चल च्युसे ङ्हिंदिंर्बै घ्रिदे मुँबै च्हमि सिबिन् छेल। चए फिर ल्हयो खसि येशू चने बालु ह्याइ। छले ह्यारिमा म्हिए हुल कारर्ग्यु तखसि खीलाइ बेल्ले घच्याट तल। 43च हुल न्होंरि च्युसे ङ्हिंदिं समा को त्हबै बेथाइ दुःख योंबै च्हमिरि घ्रि मुँल। चइ खीए बेथा सबर ल्हें म्हिमैंने ङ्ह्योब्-लिब् लसि ह्रोंसने मुँबै ताँन् मुइ खर्ज लल् खाँल। दिलेया खाबज्यै या सल् लल् आखाँल। 44च च्हमिरिइ येशूए लिउँइँले खसि येशूए क्वेंए ङोर छुइबै तोदोंन् चए को त्हब टियाइ।
45च त्हेर्न येशूजी “ङलाइ खाबइ छुइ?” बिमा
चर्बै ताँन् म्हिमैंइ “ङिइ आछुइ,” बिइ। दिलेया पत्रुस नेरो चमैंने मुँब्मैंइ बिइ, “ओ गुरु, क्हिए कारर्ग्युले म्हिए हुल घचेट तरिइमुँ!”
46दिलेया येशूजी बिइ, “म्हि घ्रिइ ङलाइ छुइबन् ग। तलेबिस्याँ ङ ङाँउँइँले शक्ति त्होंह्याब ङइ सेल।”
47च्हौ तसेरो तारे लोइ टिरिब आतमना बिब् सेसि च च्हमिरि ङ्हिंसि त्हारदै खीए ओंसों पत्खु तइ। चइ येशूलाइ तले छुइ, धै छुइबै तोदोंन् खी खैले सइ बिबै तोन्दोंरि ताँ म्हिमैंए उँइँर बिइ।
48येशूजी च च्हमिरिने बिइ, “ओ च्हमिच्यों, क्हिए बिश्वासइ लमा क्हि सयाइमुँ, छतसि छिं ङ्हाँन्ले ह्याद्।”
49येशू च च्हमिरिने पोंरिमा च्हों धिंर्बै चिबए धिंउँइँले म्हि घ्रि खसि याइरसने बिइ, “क्हिए च्हमि सिल् खाँइ। तारे गुरुलाइ दुःख आपिंरिद्।”
50चु ताँ थेसि येशूजी याइरसने बिइ, “आङ्हिंन्! ङए ताँ क्वेंन्! क्हिए च्हमि सोब्मुँ।”
51झाइले याइरसए धिंर फेनेसि येशूजी पत्रुस, याकूब, यूहन्ना नेरो च्हमिरि कोलोए आबा-आमा बाहेक अरू खाबलाज्यै या खीने बालु धिं न्होंर होंल् आपिं। 52चर ताँन् म्हिमैं क्रोरिल। झाइले येशूजी चमैंने “आक्रोद्, कोलो आसिइमुँ, न्हरु च्हुइरिब् ग,” बिइ। 53च कोलो सियाल् खाँइ बिब् सेसि चमैंइ येशूए बिल्लि लबर होंइ। तलेबिस्याँ च कोलो क्ह्रोंसेंनन् सियाल् खाँल।
54दिलेया येशूजी च च्हमिरि कोलोए योर क्हासि “ओ च्हमिच्यों रेद्,” बिमा 55च च्हमिरि कोलो सोसि युन्ले रेइ। धै येशूजी “चु कोलोलाइ चबै सैमैं पिंन्” बिसि ल्हैदिइ। 56छाब् म्रोंसि कोलोए आबा-आमा प्लेटोयाइ। दिलेया “चुर तबै ताँ खाबलाज्यै या आबिद् ओ बिसि येशूजी चमैंने,” बिइ।
S'ha seleccionat:
लूका 8: GCMB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2020, Wycliffe Bible Translators, Inc. All rights reserved.