Jọn 21
21
Jesu vwẹ Oma phia kẹ Idibo Ighwrẹ
1Rẹ ọnana vwọ wan nu Jesu da rhoma vwẹ oma phia kẹ idibo rọye vwẹ oma rẹ Abadi ri Tiberias; kẹ enẹ ọ vwẹ oma rọye vwọ phia kẹ ayen. 2Saimọn Pita, Tọmọs re se Agbava, Nataniẹl ri Kana ri Galili, emo ri Zebedi, kugbe idibo rọye efa da ghwẹ koko. 3Saimọn Pita da ta kẹ ayen, Mi kpo okọn rẹ iyeri. Ayen da ta kẹ, Avwanre vẹ owẹ ra. Ayen da yanran ra ro okọ na; ẹkẹvuọvo ason yena ayen hwe emuọvo-o.
4Rẹ ọke vwo rhie cha re, Jesu de mudia vwẹ erhuru; yẹ idibo na riẹnre nẹ ọye Jesu-u. 5Jesu da ta kẹ ayen, Emọ na, we vwo emeri? Ayen da kpahe kẹ, Ẹjo. 6Ọ da ta kẹ ayen, Fa ariri na phihọ obọrhe rẹ okọ na, ku we hwe emevo. Ọtiọye na ayen da fa phihọ, asakiephana ayen gbe sa ghwiẹ reyọ-ọ, kidie iyeri buebu muro. 7Odibo yena ri Jesu guọnọre na da ta kẹ Pita, Ọye Ọrovwohwo na. Ọke ri Saimọn Pita vwo nyo nẹ ọye Ọrovwohwo na, ọ da vwẹ emwa rọye rhuo, kidie ọ ban phihọ vwo ruẹ iruo na, o de pho teyọ abadi. 8Ẹkẹvuọvo idibo ri chekọ de bi okọ na rhe, yẹ ayen siẹ ariri na rọ vọnre vẹ iyeri, kidie ayen vẹ otọ sheri-i, ẹkẹvuọvo kerẹ agbadobọ ujori.
9Ọke rẹ ayen vwo te otọ re, ayen da mrẹ erhanre ra vwẹ esia koko phihọ, a vwẹ eri tọn, kugbe ikara. 10Jesu da ta kẹ ayen, Vwẹ emevo rẹ eri ru we hweri na rhe. 11Ọtiọye na Saimọn Pita da ro okọ na o de si ariri na rhe otọ, ọ vọnre vẹ iyẹri ride, unu rẹ ayen ujughwrẹ gbẹ ihwerha; kirobo rẹ ayen bu te na, ariri na bẹre-e. 12Jesu da ta kẹ ayen, A mọ re a re emu. Asakiephana ohwo ọvuọvo yivwi nọ nẹ, Wẹ ono-o? Ayen riẹnre nẹ ọye hẹ Ọrovwohwo na. 13Jesu da reyọ ikara ọ da vwọ kẹ ayen, ọtiọye ji te eri na. 14Asakiephana ọnana kọye asiarha ri Jesu vwẹ oma phia kẹ idibo na ro vwo vrẹn nẹ ughwu na.
Jesu vẹ Pita
15Ọke rẹ ayen vwọ re emu nu, Jesu da ta kẹ Saimọn Pita, Saimọn, ọmọ ri Jọn, wọ guọnọ ovwẹ nọ enana? Ọ da ta kẹ, E, Ọrovwohwo; Wọ riẹnre nẹ me guọnọ owẹ. Ọ da ta kẹ, Ghẹrẹ imigegede mẹ. 16O da ta kẹ obọ rivẹ, Saimọn, ọmọ ri Jọn, wọ guọnọ ovwẹ? Ọ da ta kẹ, E, Ọrovwohwo; wọ riẹnre nẹ me guọnọ owẹ. Ọ da ta kẹ, Sẹro rẹ igegede mẹ. 17Ọ da ta kẹ obọ rerha, Saimọn, ọmọ ri Jọn, wọ guọnọ ovwẹ? Ophu de mu Pita rọ vwọ nọ asiarha gbagba nẹ, Wọ guọnọ ovwẹ? Ọ da ta kẹ, Ọrovwohwo, wọ riẹn emu ejobi re; wọ riẹnre nẹ me guọnọ owẹ. Jesu da ta kẹ, Ghẹrẹ igegede mẹ. 18Uyota, uyota, me ta kẹ wẹ, ru wẹ vwẹ hẹ ọmọha, wẹ ọvo ri rhuo oma wẹn wo mi kpo asan ro je we; ẹkẹvuọvo wọ da rha ghworo, ku wọ riẹn abọ wẹn, ohwo ọfa ko rhuo we kọ ghwa wẹ kpo asan wọ guọnọ ra-a. 19(Ọ ta ọnana vwo dje oka rẹ ughwu ro che ghwu rọ da vwẹ urinrin kẹ Ọghẹnẹ,) Rẹ ọnana vwọ wan nu ọ da ta kẹ, Nene uvwe.
Jesu vẹ Odibo rẹ Guọnọre na
20Pita kuoma rhẹriẹ ọ da mrẹ odibo ri Jesu guọnọre na ro nene ayen, ọ rọ vwẹ oma rẹrẹ udu rọye rẹ ayen vwọ ria emu rẹ ovwọnvwọn na rọ nọrọ nẹ, Ọrovwohwo, ono re cha shẹ wẹ? 21Ọke ri Pita vwọ mrẹ, ọ da ta kẹ Jesu, Ọrovwohwo, kidie ohwo nana che ru? 22Jesu da kẹ, Ọ da dia ọhọre mẹ nẹ ọ dia bẹsiẹ me vwọ rhe, kidie ọyena fi kẹ wẹ? Nene uvwe. 23Ota na da hrabọ ro ohri rẹ imoni na nẹ odibo nana gbi che ghwu-u; ọ diane kẹ Jesu tare nẹ o che ghwu-u, ẹkẹvuọvo, Ọ da dia ọhọre mẹ nẹ ọ dia bẹsiẹ me vwọ rhe, kidie ọyena fi kẹ wẹ? 24Ọnana hẹ odibo na ro se oseri kpahe imu nana, kọye ri si imu nana; avwanre riẹnre nẹ iseri rọye uyota.
25Ẹkẹvuọvo imu efa buebu je herọ ri Jesu ruru; ọ dianẹ ke si ayen ọvuọvo, mi rori mẹ akpọ na dede sa gba ẹbe re si ayen phihọ-ọ.
S'ha seleccionat:
Jọn 21: UBV77
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Urhobo © United Bible Societies, 1977.