Milimo 2
2
uMweso Nswefu wikila asumila
1Nga pano uwanda wa Pentekoste wafika, yalipo yoshi apali ponga. 2Nga suwa suwa kwisa iswi lino likoline nu unza unzumo unkumu, ukufuma mwiyulu, ulupita suwa, uzyula ng'anda yoshi muno yali. 3Kuloleka ivyenje vya moto fino vyayalimbine vyaikalila chila ntu pano atensi. 4Yoshi yazyula uMweeso Nswefu, yatampa ukuvwanga uku mivwango minina, ndi fino Mweso Nswefu wayapile ukuvwanga.
5Nga aYudea yali kweneko uku Yelusalemu, antu yano yachindike Leesa, antu ya nko zyonsi aya kuno ukushi. 6Nga pano iswi li lyapulikwa, amaumba yakongana, yala yasakamikwa, kuno chila ntu wayapulike yaluvwanga uku mvwango waakwe unkola. 7Nga yakukuma nkani yoshi nu kuzunguka, yanenana, yaati: “Lolini, yoshi ya yano yaluvwanga, yasi aGalilea? 8Nga chawa uli swensi chila wenga ukupulika um-mvwango witu uno twavilwe nao? 9Apatia na aMedi na aElamu, na yano yatenzi uku Mesopotamia, nu ku Yudea nu ku Kapadokia, Ponto nu ku Asia, 10Fligia na Pamfilia, ukuMisili ni mbali zya ku Libia apipi ni Kilene, na eni yano yafumile uku Loma, aYudea na alondeshi ya kupepa kwao. 11aKlete na Alabia, tuluyapulika yaluvwanga uku mivwango itu, imilimo imikulu iyi Leesa.” 12Yasunguka yoshi nu kukukuma nkani, yanenana yaati: “Ichili chani ichintu kwene chi?” 13Leelo yamwi yasoweka, yaati: “Iyakoleka isute!”
Petlo wasunda apa Pentekoste
14Leelo Petlo awimilila ponga na yalye ikumi na wenga, afumya iswi lyaakwe, ayanena, ati: “Mwe yantu ya mu Yudea, nemwe mwensi yano mutenzi um-Yelusalemu, mumanye ichintu chi, mupulikisye amaswi yane. 15Kuno antu ya yatakolike ndi fino mulwelengula, kuno uchili untondo. 16Leelo ichintu chi, ichino chavwanzilwe na kalauzya Yoeli. 17Leesa ati:
‘Chiluwa uku manda ya chisila,
ndwitila antu yoshi Mweso wane,
na ana ino ayachonsi na ya chanachi yalulauzya,
na alumendo ino yalulola malele,
na ayikolo ino yalulota iviloto.
18Endi, na pa manda yalye ndwitila aomvi yane
ayonsi na yanachi
uMweso wane, nayo yalulausha.
19Nene ndulanga ifizunguko umwiyulu apiyulu,
ni vilangizyo kuno ukushi apansi:
uwazi nu moto ni chipu chi lyunsi.
20Ilanzi lilusenuka liwe ichanda,
nu mwezi ukuwa uwazi,
inkolelo ya kwiza uwanda uwo uwa Mwene,
uno wakula umanyike.
21Nga chiluwa wensi wino alwita izina lya Mwene,
alufyuka.’
22“Mwe yatata ya mwiIslaeli, pulikisyini amaswi ya: Yesu wa ku Nazaleti, untu wino walangiziwe kuno muli na Leesa uku maka ni vipezya-mano ni vilangizyo, fino Leesa wachisile ukwikasa lyaakwe pano muli, ndi fino mwe yakola mumanyile. 23Untu wi wafimilwe ndi fino Leesa wakasime nu kukumanya kwakwe fuma kali, nemwe mwamkonkomile apa nsalaba uku makasa ya antu yakulukuwa, mwamumola. 24Wino Leesa wamtutulwile asapula ichoze cha kuwaya kwa nfwa, kuno atali uwa kulemwa nayo.
25“Kuno Daudi watasile, ati:
‘Nalolanga uMwene manda yoshi apa maaso yane;
kuno ali ukwikasa lyane ilya kwilunji,
kuti ntachitelengana.
26Ichino umweso wane wachimba,
nu lulimi lwane lwatensya.
Kaili umwili wane nao wamwikala um-utailo.
27Kuno utalusya umweso wane ukuzimu,
nanti unswefu wako utalumfima alole uononi.
28Wammanyisya inzila zya upuma;
ulunzuzya ukuchimba pa usyu wako.’
29“Yatata yachane, muntekelele, mtane munene apatiswe ivya pali tata-kulu witu Daudi, fino wafwile azyikwa nilindi lyaakwe lilipo pa ukumwitu nilelo kwene. 30Nga fino ikalauzya, pano wamanya fino Leesa wannapile ichilapo fino aluteka wenga uwa mpanda wam-nsana wakwe, pa chisumbi chakwe icha ukulu, 31unkola kwene watangwile uku chilola inkolelo, watasile apa kututuluka kwi Klisto, fino umweso waakwe utasilwe ukuzimu, nanti umwili waakwe utali nu kuola. 32Yesu wiyo Leesa wantutulwile, neswe swensi swe yasyuta yaakwe. 33Nga pano wakweziwa afika ukwikasa ilya kwilunji ili Leesa, nu kupokelela kuli Tata ulanyo ulye wa Mweso Nswefu, atîta ichintu chi, chino mululola nu kuchipulika. 34Kuno Daudi atakwezile umwiyulu, leelo unkola kwene uwino afwashile, ati:
‘Umwene wanenile uMwene wane, waati:
Wikala ulusansa kwikasa lyane ilya kwilunji,
35fika na lino nduwika asiluembu yako
ukuwa ichisumbi cha mulu yako.’
36“Ichino ng'anda yoshi iya aIslaeli yamanye ningo, fino Leesa watamchita Yesu wino mwamkonkomile nu kumumola, ukuwa Mwene na Klisto.”
37Pano yapulika ifintu fi, fyayatota imyenzo, yanena Petlo ni mitume inina, yaati: “Tuchite uli yachitu?” 38Petlo wayanena, waati: “Vipelini, mubatishiwa chila ntu ukwizina li Yesu Klisto, uku kwelelwa amaifyo ino, nemwe mulupokelela uwila wa Mweso Nswefu. 39Kuno ulanyo u uwa kuli mwemwe nu ku ana ino, na antu yoshi aya kutali; na kuli yoshi yano yalwitwa nu Mwene Leesa witu yize kunali.” 40Nga ayasyutila uku maswi aminji amanina nu kuyasokesha, ati: “Ufyusini nu mpanda u unjipe.”
Fino asumila yateshi
41Na yano yapokelile iswi lyaakwe, yabatishiwa; uwanda uo kwene yungilizike antu yawa imyanda amakumi yatatu. 42Nga yikala nu kulemasya masambilizyo ya mitume numweeso onga, nu kukunyola unkate, nu kupepa.
43Chila ntu alemeka ni ngofi, ni fipesha-mano tupu ni vilangisho fichitwa ni mitume. 44Na yoshi yano yasumile yali apali ponga, yuminkinye ifintu vyao vyonsi. 45Yakasha ivyuma vyao ni ifintu vyao fino yali navyo, nu kwankanya antu yoshi ukulingana na fino untu waulilwe. 46Nga manda yoshi uku mweso onga yakonkowezya un-ng'anda-nkulu-iyi-Leesa, nu kukunyola unkate um-mang'anda yao, nu kulya ichakulya chao uku kuchimba ni myenzo na pe. 47Nga yatensya Leesa, yakundikwa na antu yoshi. uMwene aungilisha manda yoshi antu kuno yali, yano yafyusiwanga.
S'ha seleccionat:
Milimo 2: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.