Milimo 3
3
Katenda wenga waposhiwa
1Walangi Petlo na Yoane, lino yaluya ponga un-ng'anda-nkulu-iyi-Leesa, ukuyupepa, pano lyatemba, 2nguntu wino wikali tenda ukufuma unda yi nyina, wasendwanga na antu, wino yamwikanga manda yoshi apa nnyango wa ng'anda-nkulu-iyi-Leesa, uno yatangi Wazipa, kuti alombe uwila uku antu yano yalwingila un-ng'anda-nkulu-iyi-Leesa. 3Untu wiyo pano walola Petlo na Yoane yalwingila un-ng'anda-nkulu-iyi-Leesa, walomba kuti yampe uwila. 4Nga Petlo amkundwila amaso ponga na Yoane, ati: “Tulolekesye.” 5Nga ayalolekesya, ati palumwi akupiwa chimwi nayo. 6Leelo Petlo avwanga, ati: “Nene ntakwite impia nanti zaabu, leelo chino ndi nacho ichino nankupa: Ukwizina li Yesu wa ku Nazaleti, katuka upite!” 7Annema ikasa lya kwilunji, amkatusya; liyo kwene ivilyaatilo vyaakwe na twanankulungo twa mulu yaakwe tuwa na maka. 8Nga avulunka awimilila, atampa ukupita, awingila un-ng'anda-nkulu-iyi-Leesa ponga nayo, apita alutumpoka nu kutensya Leesa. 9Na antu yoshi yannola alupita nu kutensya Leesa. 10Nga yammanya fino uwino wikalanga nu kulomba uwila apa nnyango Wazipa uwa ng'anda-nkulu-iyi-Leesa; nga yazunguka nu kukukuma nkani uku chintu chino chachitwa kunali.
Petlo wasunda
11Nga pano achili alemile Petlo na Yoane, antu yoshi yakongana ulwilo undukungu luno yatangi Ulukungu lwi Salomoni, yazunguka leka. 12Na pano Petlo walola fiyo, anena antu yao, ati: “Mwe yaIslaeli, muluzunguka chani uku chintu chi, nanti uku chani mulutukundwila sweswe amanso, ungati twamchita apite uku maka itu swe yakola, nanti uku nchinzi witu kuli Leesa? 13Leesa wi Ablahamu nu wi Isaka nu wi Yakobo, Leesa wi yatata itu, watakusha umuofi waakwe Yesu, wino mwamfimile mwemwe nu kumtaluka apa maaso yi Pilato, pano waputwile unnandu waakwe asapulwe. 14Leelo mwemwi mwamtaluka uNswefu wiyo uwa chumi, mwasita ukupiwa umumozi. 15Mumola Katungulula wa Upuma, uwino Leesa wamtutulwile ukiu yafwi, neswe tuli yasyuta yaakwe. 16Nu ku kuzumila umwozina lyaakwe, izina lyaakwe lyampa amaka untu wi wino mululola na mmanyile; nusumilo uno uli kunali, wampa wi upuma u uwa ningo apa maaso ino mwensi.
17“Ichino leelo yachane, manyile fino mwachisile fiyo ukuntamanya kwino, ndi fino nayikolo ino yachisile. 18Leelo ifintu fino Leesa wasunzile fuma kali uku milomo ya malau yaakwe yoshi, fino Klisto waakwe aluchula, watavifikilizya. 19Vipelini leelo, muwele, kuti amaifyo ino yavulunganyiwe, kuti ize amanda ya kupuza apa Mwene. 20Kuti atume Klisto Yesu wino mwawikilwe fuma kali; 21fino chalungime ukupokelelwa umwiyulu, fika na lino amanda yalwiza aya ifintu vyonsi ukuchitwa ivipya kaili, yano yatasilwe na Leesa uku milomo ya malau yaakwe aswepe, fuma lino insi yalenzilwe. 22Umwenemo kuno Mose wafwashile, fino: uMwene Leesa wino alumukatusisha kalauzya, apa achino, ndi fino nene kwene; mpulikini uku ifintu vyonsi fino alumunena. 23Nga chiluwa fino untu wensi, wino atalumpulika Kalauzya wiyo, alutalulwa nu kufuma ku antu yanji nu kuononwa. 24Endi, na malau yoshi ukufuma Samweli na yaya yano yizile ichisila chakwe, yoshi yano yalanzile, yasundaa amaswi ya pa manda ya. 25Mwemwi mwawa yana ya malau na kaili aya Upangano ulye, uno Leesa walaine na yaso, anena Ablaamu fino um-mpanda waakwe antu yoshi aya kuno ukunzi yalupepelelwa. 26Leesa pano watutulula uMuofi waakwe watangwile ukumtuma kuno muli, kuti amupepelele nu kumuleusya chila wenga na maifyo yaakwe.”
S'ha seleccionat:
Milimo 3: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.