Yoane 4
4
Yesu nu mwanachi unSamalia
1Ichino uMwene pano wamanya fino aFaliseo iyapulika fino Yesu atawa na alondeshi ainji ukuluta Yoane nu kuyabatisha, 2—lelo Yesu unkola atabatishanga, shiku alondeshi yaakwe— 3waatinile uku Yudea, apita aya uku Galilea. 4Nawe wali uwa kupita apakasi pa nsi ya Samalia. 5Nga afika umunsi wa Samalia, uno yakuluti Sikali, uno uli pipi ni chalo chino Yakobo wapile Yosefu mwanakwe. 6Pao kwene pali ichifula chi Yakobo. Nga fino Yesu walile watatoonta ni shila yaakwe, awikala apa chifula, kuti apuse. Nao wali unsanya apakasi.
7Awiza umwanachi unSamalia ukusemba amasi. Yesu annena, wati: “Mpa amasi inwe.” 8Kuno alondeshi yaakwe yalile yaya uku nsi ukuyukala ifyakulya.
9Nga umwanachi unSamalia wiyo annena, wati: “Nga chawa uli wewe mYudea ukusita amasi kuli nene, nene mwanachi unSamalia?” (Kuno aYudea yatuminkine na aSamalia.) 10Yesu wannena, waati: “Ngi umanyile uwila wi Leesa, na kaili ngi umanyile wino aluti: Mpa, nwe! newe wali unndombe, nawe wali akupe amasi ya upuma.” 11Nawe wannena, waati: “Mwene, nga fino usi ni chakusembela, ni chifula chasika, nga wayafumya kwi amasi yao aya upuma? 12Chene! we wikolo ukuluta tata witu Yakobo wino watupile ichifula chi? Nawe kwene wanwanga amasi ya na anakwe ni nyama shaakwe.” 13Nga Yesu annena, wati; “Wensi wino alunwa amasi ya; alulola ulusala kaili.
14Leelo wino wanwa amasi yano nampa nene, atalulola ulusala manda yoshi. Leelo amasi yao yano nampa, yaluwa munali wi kafukoka wa mansi yano yalufukoka nu kumpa upuma wa manda ti.” 15Nga umwanachi wiyo annena, wati: “Mwene, mpa amasi yao, ntachilola ulusala kaili, nanti ukwisa pa ukwisu semba,” 16Nga Yesu annena, wati: “Yanga, ukite uwako, mwisa nawe pa.”
17Nga umwanachi wiyo afwanga, wati: “Ntakwite uwane,” Yesu wannena, waati: “Wafwanga ningo fino usi nu wako. 18Kuno wawa na yoshi yasano, na wino uli nawe kasalaka, asi wako. Ala li walanda ningo.” 19Apano umwanachi wiyo wannena, waati: “Mwene, nalola fino wewe ilau; 20Yatata yitu yapepanga uku mwamba u; nemwe muluti: uku Yelusalemu ukuno mupepelange.”
21Yesu wannena, waati: “Mama, unsumile, isaa ilwisa yino mutalupepa Tata uku mwamba u nanti uku Yelusalemu. 22Umwemwe mulupepa ichintu chino mutamanile; swemwi tulupepa chino tumanile, kuno ufyusi ufumile uku aYudea. 23Leelo isaa ilwisa, nisaa ilipo, yino alupepa ningo, yalupepa Tata uku mweso ni chumi. Kuno Tata alusita antu ndi yao akumpepa. 24Leesa uMweso, na yano yalumpepa, yangampepa ku mweso ni chumi.” 25Umwanachi wiyo wanena, waati: “Manyile fino alwisa Mesia, wino yakuluti Klisto; nawe pano wacha wisa, alutuswelwila ifintu fyoshi.” 26Yesu wannena, waati: “Ne ntu ndufwanga newe, ali nene.”
27Liyo kwene yisa alondeshi yaakwe, yasunguka, kuno wafwangaa nu mwanachi. Leelo umwi atachili, ati: “Ulusita chani?” Nanti: “Uku chani ulufwanga nawe?”
28Nga umwanachi wiyo asya ichaluzi chakwe, aya uku nsi anena antu, ati: 29“Nguni mlole untu wino wannena ifintu fyane fyoshi fino nachita. Chene! wi angawa i Klisto?” 30Nga yafuma umunsi yaya kuno ali.
31Uku chisila alondeshi yampapata yaati: “Labi, ulye.” 32Ayanena, ati: “Inene indi ni chakulya chino mutamanyile mwemwe.” 33Chaleka alondeshi yaakwe yanenana, yaati: “Siko umwi atanndetela ichakulya?” 34Yesu wayanena, waati: “Ichakulya chane alichi: nfikilishe fino akasi wino wantumile nu kumalila imilimo yaakwe. 35Umwemwe mutakuti: kwasyala imyesi yini tucheshe? Lolini, nemwi ndumunena, katusini amaso yino, mulolekeshe ifyalo, fino fifiswepa, ififika ukukumbula. 36Nu wino alusakata akulupiwa amalipo yaakwe, nu kukonganika ifikumbule uku upuma wa manda ti, ukuti wino alupela na wino alukumbula yachimbe paliponga. 37Kuno pao iswi liyo ifino chili: wenga alupela, akumbula unji. 38Inene namutumile ukukumbula fino mutachulile; anji yachusile, nemwe mwingila um-machulo yao.”
39Nu munsi uo aSamalia inji yamsumila ukwiswi lya mwanachi wiwi, wino watasile ukuti: Wali wanena ifintu fyoshi fino nachita. 40Na aSamalia, pano yaya kunali, yapapata kuti awikale ukumwao, nawe wikala kweneko amanda yaili. 41Na antu ainji nkani yasumila ukwiswi lyaakwe. 42Yannena umwanachi wiwi, yaati: “Nga twasumila, leelo asi uku maswi yako sile, kuno neswe twapulika, swe yakola, kaili twamanya ningo fino alawi uli Nkulusi wa nsi.”
Mwana wi Diwani
43Ni chisila cha manda yaili yao, atina kweneko aya uku Galilea. 44Kuno Yesu unkola watasile fino ilau atakupiwa unchinsi un-nsi ya kumwao. 45Nga pano waya uku Galilea, amu Galilea yampokelile, kuno yawine ifintu vyonsi fino wachisile uku Yelusalemu, apa wanda ukulu, kuno nayo kwene yaile ukii wanda uo.
46Nga aya uku Kana ya Galilea kaili, nako ukuno wasenwile manzi ukuwa amasi ya mizabibu. Nga kwali diwani wenga umwanakwe unwale uku Kapenaumu. 47Nga pano wapulika Yesu waatiza um-Galilea, ukufuma uku Yudea, waile kunali, wampapata ukuti aye akaposhe umwanakwe; kuno wali apa lufu. 48Nga Yesu wannena, waati: “Ngi mutawine ifilangisho ni fipezya-mano, mutangi musumile nanti uche?” 49Diwani wiyo wannena, waati: “Mwene, uye suwa, pano umwanane achili afwe.” 50Yesu wannena, waati: “Pitanga, umwanako umpuma.” Untu wiyo wasumila iswi liyo lino wanenwa na Yesu, wampita. 51Na pano wawelanga, aomfi yaakwe yankomenganya, yalanda fino umwanakwe umpuma. 52Nga ayatondosha ili lino umwana watampa ukuwa ningo; nayo yannena, yaati; “Iyulu pano lyasenuka, insusi yasisile.” 53Nga isi amanya fino ilili kwene lino Yesu wannenile fino umwanakwe umpuma. Wene wazumila na yoshi ayang'anda umwakwe, 54Ala chiyo ichilangisho cha uwili chino Yesu wachisile. pano wafumile uku Yudea ukuya uku Galilea.
S'ha seleccionat:
Yoane 4: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.