Yoane 5
5
Unwale wa Betsata waposiwa
1Ichisila cha ifintu fiyo wali uwanda ukulu uwa aYudea, na Yesu apita ukuya uku Yelusalemu. 2Nu ku Yelusalemu kuo apa Nnyango-wa-Nfwele pali chifula, chino uku chiEblania yakuluti: Betzata. Nacho chili ni nsaka sisano. 3Na muo mwali alwale ainji umuno yawisi, apofu, aitenda, na yano yalemala. [Angi yalulolela amasi yafundoke. 4Kuno kwali lino malaika wikanga nu kwingila un-chifula, akomya amasi. Na wino watangula ukwingila pano yakomya amasi, apola ulwale waakwe woshi, uno walwile.] 5Na pao kwene kwali untu wino walwale imyaka amakumi yatatu na nnane. 6Pano Yesu wa nnola awisi, nawe wamanile fino unwale wa manda tupu, wannenile, waati: “Ulusita ukupola?” 7Unwale wiyo wafwanga ukuti: “Mwene, inene ntakwite untu uwa kuntela un-chifula, pano yakomya amasi. Na pano nisa, untu unji ankolelela.” 8Nga Yesu wannena, waati: “Katuka, utwike ichitala chako, upite.” 9Liyo kwene untu wiyo amwa umpuma, wanyetula ichitala chakwe, wampita.
Nu wanda uo wali uwanda wa Sabato. 10Chaleka aYudea yanena wino wapola, ukuti: “Ilelo uwanda wa Sabato. Chisi ningo kuli wewe ukusenda ichitala.”
11Wayanena, waati: “Wino ampozizye uwino annenile, ati: ‘Nyetula ichitala chako, upite.’ ” 12Nga yannena, yaati: “Wiyo wino akunenile, waati: ‘Nyetula, upite!’ uwini?” 13Untu wiyo wino alile wapola atammanyile ngi uwini, kuno Yesu walile atatina, kuno antu yalile yafula penepo.
14Ichisila cha ifintu fi Yesu amsana un-ng'anda-nkulu-iyi-Leesa, annena, wati: “Lola, ukuwa mpuma, utachita iifyo kaili, kuti uta cha usanwe niipe ukuluta liyo.” 15Untu wiyo ampita waya wayanena aYudea, fino Yesu uwino amposishe.
16Uku chintu chiyo aYudea yansunya Yesu, kuno wachisile ichintu chiyo uwanda wa Sabato. 17Leelo wayanena, waati: ‘Tata aluomba imilimo na li kwene li; nene kwene nduomba imilimo.”
18Chaleka aYudea yalusha ukusita nkani ifyakuti yamumole, kuno atononile uwanda wa Sabato sile, leelo apali ponga na fiyo, watangi Leesa i Tata, angalu ukolanya na Leesa.
Maka yi Yesu
19Nga Yesu wayanena, waati: “Umwenemo, umwenemo, ndumunena: uMwana atangi achite chimwi wenga, siku chino alulola Isi aluchita, kuno wiyo fino aluchita, ifino nu Mwana kwene aluchita. 20Kuno Isi wakunda uMwana, nawe akulunnanga fyoshi fino akuchita unkola, ni milimo imikulu ukuluta i alunnanga, ukuti mwemwe musunguke. 21Ndi fino Tata akulututulula afwi nu kuyapa upuma, ifiyo kwene nu Mwana akuluyapa upuma yaya yano akasime. 22Kaili Tata ataluputwila untu wensi imilandu, leelo wapa uMwana uputusi woshi. 23Ukuti antu yoshi yachindike uMwana, ndi fino yachindika Isi. Wino atachindike uMwana, atachindike isi wino wantumile.
24“uMwenemo, umwenemo, ndumunena: wino alupulika iswi lyane nu kumsumila wino wantumile, ali nupuma wa manda ti; atalwisa um-uputusi wa milandu, kuno walamba ukufuma undufu ukuya um-upuma. 25uMwenemo, umwenemo, ndumunena: isita ilwisa, na isaa ilipo, pano yafwi yalupulika iswi Iya Mwana wi Leesa, na yano yalipulika yaluwa upuma. 26Ndi kuti fino Tata ali kafumo ka upuma, ifiyo kwene ifino wapile nu Mwana ukuwa kafumo ka upuma; 27Nawe wampa amaka ya kuputula imilandu, kuno uMwana-ntu. 28Mutachisunguka uku maswi yao, kuno isaa ilwisa, yino antu yoshi yano yali um-malindi, yalupulika iswi lyaakwe. 29Nayo yalufuma, yaya yano yachisile ifisifu uku kusyuka kwa upuma, na yalye yano yachisile isiipe, uku kusyuka kwa kuputwilwa imilandu.
30“Nene ntangi nchite chimwi nenkola; ndi fino ndupulika ifino nduputula, nuputusi wane uwa ningo, kuno ntalusita fino nkasime nenkola, leelo fino akasime wino wantumile. 31Ngi nawimikila nenkola, usyuta wane usi wa ningo. 32Kuli unji wino alungimikila, nene manyile fino usyuta waakwe uno alungimikila, uwa ningo. 33Umwemwe mwatumile antu kuli Yoane, nawe wimikile icha kapanga. 34Leelo inene ntakusumila usyuta uku yantu. Leelo ndulanda fi, kuti mwemwe mufyuke. 35Uwino wali ikosho lilwaka nu kumesa, nemwe mwakasime ukuchimbila um-mwengelela waakwe ukufika pamwi. 36Leelo usyuta uno ndi nao nene, ulusile uwi Yoane; kuno imilimo ilye yino Tata Wampile kuti njiombe, imilimo kwene iyo yino nduomba, ilungimikila usyuta fino Tata wantumile. 37Nawe Tata wino wantumile angimikila usyuta. Kusi lino mwatana mupulike iswi lyaakwe, nanti usyu waakwe mutachili muulole. 38Nanti iswi lyaakwe musi nalyo ukuti angi litensi muli mwemwe; kuno mwemwe mutamsumile wiwi wino watumilwe nawe. 39Mwemwe mululondola um-Maandiko, kuno mulwelengula fino palumwi muli nupuma wa manda ti muli yeneyo. Nayo ayano yangimikile usyuta. 40Leelo mutakasime ukwisa kunondi, muwe nupuma.
41“Nemwi ntalusita ukulu uku yantu. 42Leelo mmanyile mwemwe, fino mutakwite ulukundo lwi Leesa muno muli. 43Nemwi ngisile ukwisina li Tata, leelo mwemwi mutampokelile. Unji ngi wisa ukwisina lyaakwe unkola, wiyo mulumpokelela. 44Mungasumila uli mwemwe yano mulupokelelana ukulu mwenga, nukulu uu uno ufumile kuli Leesa wino ali wenga, mutaluusita. 45Mutachelengula fino nene ndumusongelela kuti Tata; aliko wino alumusongelela, nawe i Mose wino mwemwe mwataila. 46Kuno ngi mwali musumile Mose, ngangi munsumile nene kwene, kuno wangaandike. 47Leelo ngi mutasumile amaandiko yaakwe, mungayasumila uli amaswi yane?”
S'ha seleccionat:
Yoane 5: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.