Luka 24
24
Yesu watutuluka
(Mt 28:1-10; Mk 16:1-8; Yn 20:1-10)
1Uwanda wa ntangulo uwa juma, usiku-siku, yaile ukwilindi, yaleta ifinunkilile fino yateyinye. 2Yasana ifinga lili ikunkulushe apatali nilindi. 3Yingila nanti kulola umwili wa Mwene Yesu. 4Walangi pano yalusamalila ichintu chi, lolini, antu yaili yimilile pipi nayo, yaswite imyenda ilumesa-mesa. 5Apano ingofi shayalema, yapona yafukime apasi. Apano yao yayanena, yaati: “Uku chani mulusita umpuma uku yafwi? 6Asiko ku, watatutuluka. Mwiushe fino wafwansile nemwe, pano achili ali uku Galilea. 7Ati: ‘Chinnungime uMwana-ntu ukupiwa um-makasa ya antu ya maifyo, nu kukonkomelwa apa nsalaba, nu kututuluka uwanda wa utatu.’ ” 8Nayo yiyusha amaswi yaakwe. 9Nga yaatina ukwilindi yawela, yalandila yaya ikumi na wenga nanji yoshi amaswi ya ifintu fi fyoshi. 10Nayo yali Malia wa ku Magdala na Yoana, na Malia nyina wi Yakobo. Na anachi anji yano yali ponga nayo, yanenile imitume amaswi ya ifintu fi. 11Amaswi yao yaloleka fino aya uwelewele sile kuli yeneyo, nga yatachili yasumile. 12Leelo Petlo wakatwike awituka ulwilo afika ukwilindi. Awinama, asungamila mwenemo, alola ifitambala ifitiswe sile. Nga awela alusunguka ichintu chino ichiombeka.
Yesu waloleka uku yantu ya ku Emau
(Mt 16:12-13)
13Nga lolini, uwanda uo kwene antu yaili aya muli yeneyo, yayanga uku nsi umwi ishina lyaakwe Emau, uno wali lwa patali ni Yelusalemu, apa kupita insaa siili. 14Nayo yavwangaa akola uku ifintu fyoshi fino fyaombike. 15Nga pano yalufwanga yonga nu kutondoshana, Yesu unkola kwene apalamila alondekana nayo. 16Leelo amaso yao yakola uti yashita, yaula ukummanya.
17Wayanena, waati: “Amaswi uli ya yano mulufwanga fi pano mulupita?” Yimilila iyakonsa ni fikole apa maaso 18Nga wenga pali yeneyo, ishina lyaakwe Kleopa, annena, wati: “Chene! wewe mweni wenga um-Yelusalemu, utamanyila ifintu fino fyaombike um-manda ya?” 19Ayatondosha, wati: “Iifintu chi?” Yannena, yaati: “Iifintu fya pali Yesu wa ku Nazaleti, wino wali untu kalausha wa maka um-milimo na maswi kuli Leesa na pa antu yoshi. 20Kaili fino ayikolo iyakapela na ikolo yitu, fino yamtwite ummilandu ya kufwa, yamkonkomela apa nsalaba. 21Neswe twataila fino uwino alukulula aIslaeli. Nu kuluta vyonsi vi, ilelo uwanda wa utatu ukufuma pano ifintu fiyo vyaombeka. 22Na kaili anachi yamwi aya kuno tuli, yatusungwishe, yano yaile ukwilindi untondo-tondo. 23Yatasanile umwili wakwe, yisa yatunena fino yalola ichilolwa chi yamalaika, yano yatasile fino umpuma. 24Na yamwi yano yali ponga neswe yaile ukwilindi, yasana ndi fino anachi yaya yatasile, leelo wene yatamwine.”
25Nga ayanena, ati: “Fiwila mwe ivya myenzo minwamu iya kuntasumila fyoshi fino amalau yatasile. 26Chene! Chitalungime Klisto kusanwa na machulo ya ifintu fi, nu kwingila um-ukulu wakwe?” 27Ayalandila um-Maandiko ifintu fyoshi fino fyannungime unkola, ukufuma Mose na malau yoshi.
28Nga yapalamila unsi uno yayanga, nawe wachita kanti alusita aye apa nkolelo. 29Leelo yamkopa, yaati: “Uwikale ponga neswe. Kuno lîla, kwafita.” Nga awingila ukwikala nayo. 30Nga chali pano watensi nayo apa chakulya, watoshile unkate aupepelela, aukunyola nga ayapa. 31Amanso yao yayulika, yammanya; nga atina apa maaso yao. 32Yafwanshanya, yaati: “Chene! imyenso itu italilwaka unkasi muno tuli, pano wali alufwanga neswe un-nsila nu kutumanyisha aMaandiko?”
33Nga yakatuka liyo kwene, yawela uku Yelusalemu; yasana yalye ikumi na wenga iyakongana apali ponga na yano yali nayo. 34Yaati: “Umwenemo, uMwene watatutuluka, wataloleka kuli Simoni.” 35Wene yalanda ifintu fino chali un-nsila, na fino wamanyike kuno yali apa kukunyola unkate.
Yesu waloleka uku yalondeshi yaakwe
(Mt 28:16-20; Mk 16:14-18; Yn 20:19-23; Mil 1:6-8)
36Nga lino yachilufwanga ifintu fiyo, unkola kwene awimilila apakasi yao, ayanena, ayanena, wati: “Kuwe chele kuno muli.” 37Yachintukila nu kopa nkani, yatangi palumwi imikosi. 38Wayanena, waati: “Mulusima chani? Uku chani mulwelengula fiyo um-myenso ino? 39Lolini amakasa na mulu yane, fino inene kwene. Mpalakashini mulole, kuno umweso usi nu mwili na mafupa, ndi fino mulundola nene ndi nafyo.” 40Nga pano wafwanga fiyo, ayalanga amakasa na mulu yaakwe.
41Nga pano yachili yasumile uku kuchimba, na kuno yalusunguka, wayanena, waati: “Mukwite ichakulya chimwi pa?” 42Yampa ichilepu cha nswi impanike. 43Watola, walya pano yali.
44Apano ayanena, wati: “Ya ali maswi yane yano namunenile pano nalile ndi ponga nemwe, ukuti ifintu fyoshi fino naandikilwe un-Ntambi yi Mose na malau ni Sabuli, filusosya filoleke.” 45Apano wayayulila amano yao, kuti yamanye aMaandiko. 46Ayanena, wati: “Ifino chaandikwe, ukuti chilungime Klisto aluchula nu kututuluka uwanda wa utatu. 47Na fino antu yoshi ukwishina lyaakwe yalusundwa ukufipela nu kwelelwa amaifyo, ukutangula um-Yelusalemu. 48Nemwe muli yashuta ya ifintu fi. 49Nga lolini namuletela ulanyo wi Tata. Leelo mwikale um-nsi mu, kufika na lino mulupiwa amaka ukufuma mwiyulu.”
Yesu wakwela mwiyulu
(Mk 16:19-20; Mil 1:9-11)
50Apano ayatwala uku Betania, akatusha amakasa yaakwe mwiyulu, ayapepelela. 51Nga pano aluyapepelela, ayasha, wasendwa umwiyulu. 52Nga yamfukamila, yawela uku Yelusalemu yaluchimba nkani. 53Nga yali un-ng'anda-nkulu-iyi-Leesa manda yoshi, angi yalutensha Leesa.
S'ha seleccionat:
Luka 24: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.