EVASELIO A LUKA 18
18
Te faikole: te tuifakamaau kovi
1Nee fai leva e Sesu kia natou he folafola fakatata, ke fakaha e tonu ke faikole tuumau, kae aua pe naa natou lotovaivai. 2Nee ina ui leva: Nee i ai i he kolo he tui fakamaau ae nee mole pe mataku ki te Atua, pea nee mole pe ina tokagai he tagata. 3Nee toe nofo foki i te kolo aia he finetaka; pea nee hau leva ia, o ui kia ia: Haofaki au i te fakamaau mai toku fili. 4Nee fakafisi leva ia o fualoa. Kae ki muli nee ina ui leva i tona loto: E mole pe au mataku ki te Atua pea e mole pe au tokagai he tahi, 5kae, koteuhi e fakahohaa mai te finetaka aeni kia au, e au haofaki anai ia i te fakamaau, o tupu ke aua naa mole toe gata tana tautau hau o fakakinakina mai kia au. 6Pea nee fakakatoa leva e te Aliki: Koutou logo ki te ui a te tuifakamaau agakovi! 7Pe e mole haofaki anai te Atua tana kau filifiliia, ae e kalaga kia ia i te aho mo te po? Pe e tuai anai ia kia natou? 8E au fakaha atu kia koutou, e vave anai tana haofaki natou. Kae, ka hau anai te Foha o te tagata, pe e ina mau anai te tui i te kele?
Te faikole: te faliseo mo te popelikano
9Nee ina toe fakaha leva te folafola fakatata aeni, o uhiga mo natou ae nee falala pe kia natou mo tonatou maonioni, pea nee natou meanoai te kaiga. 10Nee hake leva ni tagata e toko lua ki te fale tapu o faikole; ko te tahi nee faliseo, pea ko te tahi nee popelikano. 11Nee tuu te faliseo i oluga, pea nee faikole ia i tona loto, o ui: Ei Atua, e au fakafetai kia koe koteuhi e mole au hage ko te hahai fuli: e natou kaihaa, mo agakovi, pea mo tono; pea e mole au hage foki ko te popelikano aeni. 12E au sesunio tua lua i te vahaa, pea e au foaki te vaega hogofulu ia mea fuli e au mau. 13Nee tuu te popelikano mai mamao, pea nee mole ina faa tagaki pe la ona mata ki te lagi, kae nee ina tukituki tona fatafata, o ui: E Atua, ofa mai kia te au ko te tagata agahala. 14E au fakaha atu kia koutou, nee hifo te popelikano ki tona api kua tali ia, i ae ake. Koteuhi ko ae e ina hikihiki ake ia ia, pea e tuku anai ia ki lalo, pea ko ae e fakavaivai ifo e hikihiki ake anai ia ki oluga.
Nee tapuaki e Sesu ki te u toe liliki
15Nee toe aumai foki kia ia ni kii toe liliki, o tupu ke fafa ia kia natou. Kae i te sio a te kau tisipulo ki te mea aia, nee natou munai natou ae nee natou aumai ia natou. 16Pea nee paui leva natou e Sesu, o ui: Koutou tuku ke omai kia au te u toe liliki, kae aua naa kotou punupunu natou koteuhi e fakalogo te puleaga o te Atua kia natou ae e hage ko natou. 17E au fakaha mooni atu kia koutou, ko ae e mole ina tali te puleaga o te Atua o hage ko he kii toe veliveli, e mole ulu anai ia ki ai.
Te tagata tupulaga maukoloa
18Nee fehui leva e he tagata pule kia Sesu, o ui: Pule agalelei, kotea e tonu ke au fai ke mau ai te mauli heegata? 19Nee tali leva e Sesu kia ia: Kotea e ke higoai ai au lelei? E mole he tahi e lelei, ko te Atua pe toko tahi. 20E ke iloi te u fekau: Aua naa ke tono, aua naa ke fakapo, aua naa ke kaihaa, aua naa ke fakamooni loi, fakaapaapa ki tau tamai mo tau fae. 21Nee tali leva e te tagata: Nee au fai te u mea fuli aia talu mai taku veliveli. 22I te logo a Sesu ki te mea aena, nee ina ui leva kia ia: E kei puli pe kia koe te mea e tahi: Fakatau ia mea fuli e ke mau, tufa natou ki te kau masiva, pea e ke mau anai he koloa i te atu lagi. Pea ke hau, o mulimuli mai ia te au. 23I tana logo ki te u palalau aia, nee loto mamahi lahi leva ia; koteuhi nee maukoloa ia. 24Ko Sesu, i tana sio ki tona loto mamahi, nee ina ui leva: E faigataa aupito kia natou e natou maukoloa tanatou hu ki te puleaga o te Atua! 25Koteuhi e faigafua age ki he kamelo tana hu i te pu o he hui tuitui ki he tagata maukoloa tana hu ki te puleaga o te Atua. 26Nee ui leva e natou ae nee fakalogo kia ia: Pea ko ai anai e feala ke haofaki? 27Nee tali leva e Sesu: Ko te mea ae e mole fealagia e te tagata e faigafua ki te Atua.
Fakapale o te mulimuli ia Sesu
28Nee tali leva e Petelo: Koeni, nee matou tuku te u mea fuli, pea nee matou mulimuli ia te koe. 29Nee ui leva e Sesu kia natou: E au fakaha mooni atu kia koutou: E mole he tahi pe e ina tuku anai, o tupu ko te puleaga o te Atua, tona api, pe ko tona ohoana, pe ko ona tehina, pe ko ana matua, pe ko ana fanau, 30e mole ina tali anai o lahi aupito age i te sekulo aeni, pea, i te sekulo ka hau, te mauli heegata.
31Nee too leva e Sesu te toko hogofulu ma lua, o ui kia natou: Koeni, e tou hake ki Selusalemi, pea e hoko anai te u mea fuli ae nee tohi e te kau polofeta o uhiga mo te Foha o te tagata. 32E tuku anai ia ki te kau pagani; e nukinuki anai kia ia, e lau kovi anai kia ia, pea e anuanu anai kia ia. 33Pea e natou haha anai ia aki ni akau, pea e natou tamatei anai ia. Pea i te tolu aho e toe tuuake anai ia. 34Kae nee mole pe natou mahino ki te mea aia; nee hage ia kia natou ko he palalau fakapulipuli, ko ni folafola ae nee mole natou puke tonatou uhiga.
Fakamauli o Paletimeo
35I te fakaoviovi a Sesu ki Seliko, nee nofo he tagata kivi i te tafaaki o te ala, o kai kolekole. 36I tana logo ki te fakalaka a te hahai, nee ina fehui leva pe e kotea. 37Nee fakaha age leva kia ia: Ko Sesu mai Nasaleti ae e fakalaka. 38Pea nee kalaga leva ia: Sesu, foha o Tavite, ofa mai kia te au! 39Ko natou ae nee olo ia mua o Sesu nee natou munai ia ke tuku tana logoaa; kae nee toe asilisili kalaga ia o leo lahi: Foha o Tavite, ofa mai kia te au! 40Nee tuu leva ia Sesu, pea nee ina fakatotonu leva ke taki ake te tagata kivi kia ia; pea i tana ovi age, 41nee fehui leva e Sesu kia ia: Kotea e ke loto ke au fai kia koe? Nee ina tali leva: Aliki, ke au sio. 42Pea nee ui leva e Sesu kia ia: Sio la, he kua fakamauli koe e tau tui. 43I te temi pe aia, nee sio leva ia, pea nee mulimuli leva ia ia Sesu, o fakakololia ki te Atua. I te sisio a te hahai katoa ki te mea aia, nee natou fakavikiviki leva ki te Atua.
S'ha seleccionat:
EVASELIO A LUKA 18: WB2011
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland