EVASELIO A LUKA 19
19
Felavei a Sesu mo Sakeo
1Nee ulu leva ia Sesu ki Seliko, o fakalaka i te kolo. 2Pea koeni, ko he tagata maukoloa, nee higoa ko Sakeo, pule o te kau popelikano, nee faiga ia ke sio pe ko ai ia Sesu; 3kae nee mole feala ke kaku ia kia ia, o tupu ko te hahai, koteuhi nee nounou pe ia. 4Nee lele leva ia ki mua, o kake i he fuu sikomole*, ke sio kia Sesu, koteuhi nee tonu ke fakalaka ia i te kogamea aia. 5I te kaku mai a Sesu ki te kogamea aia, nee tagaki ake leva ona mata ki oluga, pea nee ina ui age leva kia ia: Sakeo, fakavilivili o hifo ki lalo; koteuhi e tonu ke au nofo i te aho aeni i tou api. 6Nee fakavilivili leva ia Sakeo o hifo ki lalo, pea nee ina tali leva ia mo te fiafia. 7I te sisio a te hahai ki te mea aena, nee natou mumuna fuli, o lau: Kua alu ia o nofo i te api o he tagata agahala. 8Kae nee tuu ake leva ia Sakeo ia mua o te Aliki, o ui kia ia: Aliki, koeni, e au foaki ki te kau masiva te vaelua o oku koloa, pea, kapau nee au kaihaa he paaga a he tahi, e au toe fakaliliu anai kia ia te mea aia o liuga fa. 9Nee ui leva e Sesu kia ia: I te aho nei kua ulu te fakamauli ki te fale aeni, koteuhi ko ia foki aeni ko he foha ia o Apalahamo. 10Koteuhi nee hau te Foha o te tagata o kumi pea mo haofaki te mea nee puli.
Folafola o te u foi mine e hogofulu
11Pea i te fakalogo a te hahai ki te u mea aena, nee toe fai leva e Sesu kia natou he tahi folafola fakatata; koteuhi kua ovi ia ki Selusalemi, pea nee natou manatu e ha anai te puleaga o te Atua i te temi pe aia. 12Nee ina ui leva: Nee alu leva ki he fenua mamao he tagata aliki ke fakanofo ia ke hau, pea e hoki toe liliu mai leva. 13Nee ina pauii leva te toko hogofulu o tana kau tagata faifekau, pea nee ina foaki leva ni foi mine e hogofulu kia natou takitahi, o ui: Koutou gauei te u foi mine aeni o kaku pe ki taku toe liliu mai. 14Kae nee fehihia tana hahai kia ia, pea nee natou fekau leva he fakafofoga i ona muli ke olo, o ui: E mole matou loto ke hau te tagata aeni kia matou. 15I te hili o tona fakanofo ki tona puleaga, nee toe liliu leva ia, pea nee ina pauii leva te u tagata faifekau ae nee ina foaki ki ai te paaga, o tupu ke ina iloi pe nee feafeai te gauei o te paaga e te tagata taki toko tahi. 16Nee hau leva te uluaki, o ui: Aliki, kua toe mau e tau foi mine ni ihi foi mine e hogofulu. 17Nee ui leva e te hau kia ia: Lelei, tagata faifekau agalelei; koteuhi nee ke agatonu ki he mea veliveli, tali te pule ki ni kolo e hogofulu. 18Nee hau leva te lua, o ui: Aliki, kua mau e tau foi mine ni ihi foi mine e nima. 19Nee ui leva e te hau kia ia: Mo koe foki, pule ki ni kolo e nima. 20Nee hau leva he tahi, o ui: Aliki, koeni tau foi mine, nee au taupau ia o kofukofu ki he kie; 21koteuhi nee au mataku ia koe, he ko he tagata matakulia ia koe, e ke too te mea ae nee mole ke tuku, pea e ke utu te mea ae nee mole ke to. 22Nee ui leva e te hau kia ia: E au fakamaaui koe o mulimuli ki au palalau totonu, tagata faifekau agakovi; nee ke iloi ko he tagata matakulia au, e au too te mea ae nee mole au tuku, pea e au utu te mea ae nee mole au to. 23Kotea nee mole ke tuku ai taku foi mine ki he fale paaga? Pea, i taku toe liliu mai, e au too ia mo hona tupu. 24Pea nee ina ui leva kia natou ae nee nonofo i ai: Koutou too maia ia te foi mine, pea kotou foaki ia ki ae e nofo mo te u foi mine e hogofulu. 25Nee natou ui leva kia ia: Aliki, e nofo ia mo foi mine e hogofulu. 26E au ui atu kia koutou, e foaki anai ki ae e ina mau kae ki ae e nofo noa e toe too anai mo te mea foki ae e ina mau. 27Kae, koutou aumai ki heni oku fili, ae nee mole natou loto ke au hau kia natou, pea kotou tamatei natou i oku mua.
Ulu a Sesu ki Selusalemi
28I te osi o tana palalau aia, nee haele leva ia Sesu ia mua o te hahai, o hake ki Selusalemi.
29I tana fakaovi ki Petefase mo Petania, i te mouga e higoa ko te mouga o Oliveto, nee fekaui leva e Sesu he toko lua o ana tisipulo, 30o ui: Kolua olo ki te kolo ae e hagahaga mai; Ka kolua ulu anai ki ai, e kolua mau anai he uhii asino e hai, nee heeki hekai e he tagata; kolua vevete ia, pea kolua taki mai ia ki heni. 31Pea kapau e fehui atu anai he tahi kia kolua: Kotea e kolua vevete ai ia? E kolua tali anai kia ia: E aoga ia ki te Aliki.
32Ko naua ae nee fekaui nee na olo leva, pea nee na mau leva te u mea o hage ko tona fakaha age e Sesu kia naua. 33I tana vevete te uhii asino, nee fehui age leva e te u pule o te asino kia naua: Kotea e kolua vevete ai te uhii asino? 34Nee na tali leva: E aoga ia ki te Aliki. 35Pea nee na taki leva te uhii asino kia Sesu. Nee na hili leva ki ai ona kofu, pea nee na fakaheka leva ia Sesu ki ai. 36I te alu a Sesu, nee fola holo e te hahai onatou kofu i te ala. 37Pea i tana fakaovi age ki Selusalemi, i te hifo mai te mouga o Oliveto, ko te hahai kaugamalie o tana kau tisipulo, nee puke leva natou e te fiafia, pea nee natou kamata leva te fakavikiviki ki te Atua o leo lahi, o uhiga mo te u milakulo fuli nee natou mamata ki ai. 38Nee natou lau: Manuia te hau e haele mai i te huafa o te Aliki! Tokalelei i te lagi, pea kololia i te u potu maoluga osi!
39Nee lea age leva kia Sesu ni ihi o te kau faliseo, mai te lotomalie o te hahai: Pule, munai au tisipulo! 40Pea nee ina tali leva: E au tala atu kia koutou, kapau e natou fakalologo, pea e kalaga anai te u maka aeni!
Tagi a Sesu ki Selusalemi
41I tana fakaovi age ki te kolo, nee sio leva ia ki ai, pea nee tagi leva ia ki ai, o ui: 42Feia age i te aho aeni kua tuku atu kia koe, nee ke iloi te u mea e kau ki tou tokalelei! Kae, koeni kua ugia natou ki ou mata. 43E hoko mai anai kia koe ni aho ae e takatakai ai anai ia koe e ou fili aki ni luo, o taui ia koe, pea mo punupunu ia koe mai te potu fuli; 44pea e natou maumaui katoa anai ia koe, io, ia koe mo tau u fanau i lotomalie o koe; pea e mole natou tuku anai ia koe he maka i oluga o he tahi maka, o tupu nee mole ke iloi te aho ae nee ahiahi atu ai kia koe.
Kapu o te kau faikoloa i te fale tapu
45I tana hu leva ki te fale tapu, pea nee ina kamata leva te kapu ki fafo o te kau faifakatau, 46o ui kia natou: Kua tohi, ko toku fale e ko he fale faikole anai. Kae ko koutou, kua kotou fakaliliu ia ko he ana o te kau kaihaa.
47Nee akonaki ia i te aho fuli pe i te fale tapu. Pea ko te kau pule faisakilifisio, mo te kau sekelipa, mo te kau pule o te hahai, nee natou kumi ke tamatei ia; 48kae nee mole natou iloi pe e feafeai tona fakahoko, koteuhi nee fakalogo te hahai katoa kia ia mo he ofolele.
S'ha seleccionat:
EVASELIO A LUKA 19: WB2011
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland