EVASELIO A LUKA 20
20
Fehui o uhiga mo te pule a Sesu
1I he aho o te u aho aena, nee akonaki ia Sesu ki te hahai i te fale tapu, o fakaha te logo lelei, kae nee omai leva kia ia te kau pule faisakilifisio pea mo te kau sekelipa, pea mo te kau fakamatuatua. 2Pea nee natou ui leva kia ia: Fakaha mai kia matou pe ko te pule fea e ke fai ai te u mea aena, pe ko ai ae nee ina foaki atu kia koe te pule aena? 3Nee ina tali leva kia natou: E au fai atu foki kia koutou he tahi fehui. 4Kotou fakaha mai mua: Pe e hau te papitema a Soane-Patita mai te lagi, pee mai te tagata? 5Kae nee natou feuiaki ia natou: Kapau e tou tali: Mai te lagi, pea e ina ui leva: Kotea nee mole kotou tui ai kia ia? 6Pea kapau e tou tali: Mai te tagata, e tuki makai anai tatou e te hahai katoa, koteuhi nee natou fakamooni kia Soane ko he polofeta ia. 7Koia nee natou ui leva: E mole matou iloi pe e hau mai fea te papitema aena. 8Pea nee ui leva e Sesu kia natou: Mo au foki, e mole au fakaha atu anai kia koutou pe ko te pule fea ae e au fai ai te u mea aeni.
Folafola o te u tagata faivite
9Pea nee ina tuku leva ki te hahai te folafola fakatata aeni: Nee to e he tagata he vite, pea nee ina tuku ia ia ke tauhi e ni tagata faivite, kae nee mavae leva ia ia i te fenua o fualoa. 10I te temi toli o te vite, nee ina fekaui leva he tagata faifekau ki te kau tagata faivite, ke natou foaki age kia ia tona vaega i te fua o te vite. Kae nee tamatei ia e te kau tagata faivite, pea nee natou fekau ia ke alu mo ona nima atea. 11Nee ina toe fekaui leva he tahi age tagata faifekau, pea nee natou tamatei leva ia, pea mo tauvelei leva ia, pea mo toe fekaui leva ia ke liliu mo ona nima atea. 12Nee ina toe fekaui leva mo he tolu, pea nee natou tamatei leva ia o lavea, pea nee natou kapu leva ia. 13Nee ui leva e te pule o te vite: Kotea e au fai anai? E au fekaui anai toku foha ofaina; e lagi natou fakaapaapa anai kia te ia. 14Kae, i te sio a te kau tagata faivite kia ia, nee natou fonofono leva, o ui: Koeni te foha ae ka ina mau anai te tofiga; tou tamatei ia ia, o tupu ke tou mau te tofiga. 15Pea nee natou si leva ia ki tua o te vite pea nee natou tamatei leva ia. I te temi nei, kotea ka fai anai e te pule o te vite kia natou? 16E hau anai ia, pea e ina tamatei anai te u tagata faivite aena, kae e ina foaki anai te vite ki ni ihi age. I te logo a te hahai ki te mea aena, nee natou ui leva: E mole feia anai!
17Kae, nee sio leva ia Sesu kia natou, o ui: Kotea te uhiga o te folafola aeni e tuu i te Tohi:
Ko te maka ae nee siaki e te kau tufuga
Kua liliu ko te maka tafito o te agele?
18 Ko te u tagata fuli e fetooki anai ki te maka aena e fasifasi anai i ai; pea ko ae e to anai ki ai te maka aena e lailai anai.
Tukuhau kia Sesale
19Nee kumi leva e te kau pule faisakilifisio pea mo te kau sekelipa ke puke ia Sesu i te lakaga aena, kae nee natou mataku leva ki te hahai. Koteuhi nee natou mahino leva nee fai e Sesu te folafola fakatata aena kia natou. 20Nee natou kamata lamalama leva ia Sesu; pea nee natou fekaui leva ni tagata poto i te faifaitaki o te agatonu, o tupu ke natou fai kia ia ni puleaki kaka ke mau ai ni palalau maia ia, o tupu ke natou ave ia ki te tui fakamaau mo te kovana. 21Nee fai leva e natou aena te fehui aeni kia ia: Pule, e matou iloi e ke palalau i te mooni, pea e mole ke sio ki te mea e ha ki tua, kae e ke fakaha te ala o te Atua i te mooni katoa. 22Pe e gafua kia matou, pe kailoa, ke matou totogi te tukuhau kia Sesale? 23Kae i te iloi e Sesu tanatou kaka, nee ina tali leva kia natou: Kotou fakaha mai he foi tenalio kia au. 24O ai te paaki mo te fakailoga ae e tuu i ai? Nee natou tali leva: O Sesale. 25Pea nee ina ui leva kia natou: Koutou liufaki kia Sesale te mea a Sesale pea ki te Atua te mea a te Atua. 26Pea nee mole feala leva ke natou mau he hala i ana palalau ia mua o te hahai; kae i tanatou punamauli i tana tali, nee natou fakalologo leva.
Fakamooni o te toe tuuake
27Ko ni ihi o te kau Satuseo ae e natou ui e mole he toe tuuake, nee natou fakaoviovi age leva kia Sesu o fai te fehui aeni: 28Pule, koeni te mea ae nee tohi fakatomua mai e Moisese kia matou: Kapau e mate he tehina o he tahi, kae e hala fanau tona ohoana, e ohoana anai tona tehina mo te fafine, o fakatupu he hakoga ki tona tehina. 29Nee i ai leva ni tautehina e toko fitu. Nee ohoana leva te uluaki, pea nee mate leva ia hala fanau. 30Nee toe ohoana leva mo te finetaka te lua, mo te tolu, 31pea mo te toko fitu, pea nee natou mamate fuli leva, kae nee mole mau he fanau. 32Pea nee mate leva te fafine. 33I te toe tuuake, ko ai leva ia natou ko te ohoana o te fafine? Koteuhi nee ohoana te toko fitu mo ia? 34Nee tali leva e Sesu kia natou: E too e te u fanau o te sekulo aeni ni tagata mo ni fafine; 35kae ko natou ae ka mau anai e gali ke kau i te sekulo ka hau pea mo te toe tuuake o te kau mate, e mole natou toe too anai ni ohoana. 36Koteuhi e mole feala anai ke natou toe mamate, koteuhi e natou tatau anai mo te kau aselo, pea e natou liliu anai ko te u foha o te Atua, koteuhi ko te u foha natou o te toe tuuake. 37Ki te toe tutuuake o te kau mate, nee fakaha te mea aena e Moisese, mai te ulu vao uloulo, i tana fakahigoa te Aliki, ko te Atua o Apalahamo, ko te Atua o Isaake, pea ko te Atua o Sakopo. 38Koteuhi ko te Atua e mole ko te Atua o te kau mate, kae ko te Atua o te kau mauli; koteuhi kia ia ko te u tagata fuli e mauli. 39Nee ui leva e ni ihi o te kau sekelipa kia ia: Pule, nee ke palalau lelei osi. 40Pea nee mole natou toa leva i te fai o he fehui kia ia.
Sesu mo te kau sekelipa
41Nee ui leva e Sesu kia natou: Kotea e ui ai ko Kilisito ko te foha o Tavite? 42Pea nee ui totonu e Tavite i te tohi o te u pesalemo:
Nee ui e te Aliki ki toku Aliki:
Heka ia koe i toku fahai matau,
43 O kaku ki taku fakaliliu ou fili ko tou hiliaga vae.
44Koia e fakahigoa ia e Tavite ko te Aliki; Pe e feafeai ke liliu ia ko tona foha?
45Nee ui leva e Sesu ki ana tisipulo; kae lolotoga fakalologo te hahai katoa kia ia: 46Koutou tokaga ki te kau sekelipa, ae e fia evaeva mo te u kofu loloa, pea e loto ke fakamalo age kia natou i te u fakatahiaga; ae e natou filifili te u uluaki hekaaga i te u sinakoka, pea mo te u uluaki nofoaga i te u kaitahi; 47e natou too fakamalohi te u fale o te u finetaka, pea e natou fai ni kole loloa ke natou fakamatalelei ai ki tua. E mamafa age anai tonatou fakamaaui.
S'ha seleccionat:
EVASELIO A LUKA 20: WB2011
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland